सलगरा शिवारात सोयाबीन नुकसानीचे पंचनामे सुरू ; महसूल, ग्रामपंचायत व कृषी विभागाची संयुक्त पाहणी; दहा शेतकऱ्यांच्या शेतात प्रत्यक्ष पंचनामे
नळदुर्ग, दि. ३० सप्टेंबर :
तुळजापूर तालुक्यातील सलगरा (दिवटी) परिसरात पावसाअभावी व प्रतिकूल हवामानामुळे सोयाबीन पिकाचे झालेले नुकसान नोंदविण्यासाठी बुधवार, दि. ३० सप्टेंबरपासून प्रत्यक्ष शेतात जाऊन पंचनामे करण्यास सुरुवात झाली. महसूल, ग्रामपंचायत आणि कृषी विभागाच्या कर्मचाऱ्यांनी सलगरा शिवारातील शेतांची पाहणी करून पिकांच्या नुकसानीची प्रत्यक्ष स्थिती जाणून घेतली.
तलाठी कोरडे, ग्रामपंचायत अधिकारी गुरुशरण पारे आणि कृषी सहाय्यक संतोष रणदिवे यांनी सलगरा शिवारात भेट देऊन विविध शेतकऱ्यांच्या सोयाबीन पिकांची पाहणी केली. यावेळी पिकाची सद्यस्थिती, झालेल्या नुकसानीचे स्वरूप तसेच बाधित क्षेत्राची प्रत्यक्ष पाहणी करून पंचनाम्याची प्रक्रिया करण्यात आली.
पहिल्या टप्प्यात अहमद शेख, राजेंद्र जाधव, भुजंग कुंभार, बालाजी गरड, नागनाथ काटवटे, गोविंद पुजारी, दिनकर तोंडवळे, राजेंद्र भरगंडे यांच्यासह एकूण दहा शेतकऱ्यांच्या शेतात जाऊन पंचनामे करण्यात आले. प्रत्यक्ष शेतावर जाऊन पाहणी होत असल्याने नुकसानग्रस्त शेतकऱ्यांकडूनही या प्रक्रियेला प्रतिसाद मिळत आहे.
यावेळी सागरा ग्रामपंचायतीचे उपसरपंच प्रशांत लोमटे, गोविंद पुजारी, श्याम माळी, राजेंद्र लोमटे यांच्यासह परिसरातील शेतकरी उपस्थित होते. शेतकऱ्यांनी आपल्या सोयाबीन पिकाच्या नुकसानीची वस्तुस्थिती संबंधित अधिकाऱ्यांच्या निदर्शनास आणून दिली.
नुकसानग्रस्त क्षेत्राची प्रत्यक्ष पाहणी करून पंचनामे करण्यात येत असल्याने शासनाकडून मिळणाऱ्या संभाव्य मदतीसाठी ही नोंद महत्त्वाची ठरणार आहे. त्यामुळे पंचनाम्याची प्रक्रिया पारदर्शकपणे व वस्तुनिष्ठ पद्धतीने पूर्ण करण्याची अपेक्षा शेतकरी व्यक्त करीत आहेत.
