राजश्री शाहू पुरस्कार मिळाल्याबद्दल धाराशिव जिल्हा मुख्याध्यापक संघ व साने गुरुजी कथामाला यांच्यावतीने ज्येष्ठ विचारवंत पन्नालाल सुराणा यांचा गौरव
नळदुर्ग ,दि.०३
ज्ञानदीप कलोपासक मंडळ संचलित धरित्री विद्यालय व राष्ट्रसेवा दल संचलित आपलं घर बालग्राम येथे ज्येष्ठ विचारवंत पन्नालाल सुराणा यांच्या वाढदिवसानिमित्त व राजश्री शाहू पुरस्कार मिळाल्याबद्दल धाराशिव जिल्हा मुख्याध्यापक संघ व धाराशिव जिल्हा साने गुरुजी कथामाला यांच्या संयुक्त विद्यमाने गौरव करण्यात आला.
पन्नालाल सुराणा यांना कोल्हापुरातील राजश्री शाहू मेमोरियल ट्रस्टच्या वतीने यंदाचा राजश्री शाहू पुरस्कार देवुन गौरविण्यात आला. एक लाख रुपये,स्मृतीचिन्ह व मानपत्र असे या पुरस्काराचे स्वरूप आहे. वैद्यकीय शिक्षण मंत्री हसन मुश्रीफ आणि खासदार श्रीमंत शाहू छत्रपती यांच्या प्रमुख उपस्थितीत सुराणा यांना हा पुरस्कार प्रदान करण्यात आला . त्यांच्या वाढदिवसानिमित्त व पुरस्काराच्या सन्मानानिमित्त त्यांचा सत्कार करण्यात आला.यावेळी मानदअध्यक्ष एम.डी.देशमुख, मुख्याध्यापक संघ अध्यक्ष सुरेश टेकाळे, साने गुरुजी जिल्हा समिती धाराशिव अध्यक्ष डी के कुलकर्णी,साने गुरुजी कथामाला राष्ट्रीय प्रमुख कार्यवाह तथा मुख्याध्यापक सुनील पुजारी उपस्थित होते. या सर्वांच्या हस्ते भाऊंचा सत्कार शाल,पुष्पहार व बुके देऊन करण्यात आला.ज्येष्ठ विचारवंत, समाजाचे मार्गदर्शक, तरुण वर्गाचे आदर्श व "आपलं घर"मधील अनाथ विद्यार्थ्यांचे पालक अशा बहूरंगी भूमिका बजावणाऱ्या आपल्या वयाचा विचार न करता सतत समाजसेवा करणाऱ्या पन्नालाल सुराणा यांचा सत्कार करण्याचे भाग्य लाभल्याचे उद्गगार देशमुख यांनी व्यक्त केले. सुरेश टेकाळे यांनी सुराणा यांचा आदर्श डोळ्यासमोर ठेवून या वयातही आम्हाला कार्य करण्याची प्रेरणा त्यांच्याकडून मिळल्ल्याचे सांगितले .
सामाजिक समस्यांचे जाणीव ठेवणारे असे व्यक्तिमत्व आधी घडले नाही आणि पुढे घडणारही नाही असे डी.के.कुलकर्णीनी उद्गगार काढले. सुनील पुजारी यांनी आपल्या आयुष्यातील यशाचे श्रेय सुराणा याना दिले.
यावेळी आपले घर बालग्राम मधील सर्व कर्मचारी,धरित्री विद्यालयातील सर्व शिक्षक, शिक्षकेतर कर्मचारी व विद्यार्थी उपस्थित होते.