राष्ट्रवादीचे नेते अशोक जगदाळे यांच्या प्रवेशाने काँग्रेस पक्षाला नवसंजीवनी ; नागरिकात चर्चेला उधाण
नळदुर्ग,दि.११ :
नगरपालिका निवडणुक कार्यक्रम जाहीर झाल्यानंतर शहरात अनपेक्षित राजकीय नाटयमय घडामोडी घडण्यास सुरुवात झाली आहे.त्याचा एक भाग राष्ट्रवादीचे (शरद पवार गटाचे) प्रदेश कार्यकारणी सदस्य अशोक जगदाळे हे त्यांच्या कार्यकर्त्यांसह राष्ट्रवादीला सोडचिठ्ठी देत काँग्रेसमध्ये प्रवेश केल्याने ऐन नगरपालिका निवडणुकीत राजकीय क्षेत्रात मोठी खळबळ उडाली आहे.तर जगदाळे यांच्या प्रवेशाने काँग्रेस पक्षाला नवसंजीवनी मिळाल्याची नागरिकात चर्चा होत आहे.
नगरपालिका निवडणुकीचा कार्यक्रम जाहीर झाल्याने सर्वच राजकीय पक्ष निवडणुकीसाठी योग्य उमेदवारांच्या शोधात असतानाच माजी नगरसेवक तथा भाजपचे संजय बताले हे कमळला बाय बाय करत राष्ट्रवादी अजित पवार गटात नुकतेच मुंबईत जाहिर प्रवेश केल्याची घटना ताजी असतानाच मंगळवार दि.११ नोव्हेंबर रोजी मुंबईत राष्ट्रवादीचे नेते अशोक जगदाळे काँग्रेस पक्षात प्रवेश केल्याने राजकीय क्षेत्रातील समीकरण बदलणार की काय ? याबाबत चर्चेला नागरिकात उधाण आले आहे
काँग्रेस प्रदेश अध्यक्ष हर्षवर्धन सपकाळ ,माजी मंत्री अमित देशमुख यांच्या प्रमुख उपस्थितीत अशोक जगदाळे यांनी राष्ट्रीय काँग्रेस पक्षात जाहिर प्रवेश केला.
यावेळी माजी नगराध्यक्ष नितीन कासार,माजी उपनगराध्यक्ष शरीफमुन्ना शेख, माजी नगरसेवक अमृत पुदाले,माजी नगरसेविका सौ.सुमन जाधव, विकास सोसायटी चेअरमन संजय बेडगे,व्हाइस चेअरमन ताजोद्दीन सय्यद , रुकनोद्दीन शेख ,अलीम शेख,अमोल सुरवसे, दत्ता राठोड, नवलकुमार जाधव आदींनी पक्ष प्रवेश केला आहे.
