उस्मानाबाद, दि. 14 : जिल्हयात कोरोनाचा संसर्ग दिवसेंदिवस वाढत चालला आहे. त्यातच तुळजापुर विधानसभेचे भाजपाचे आमदार राणाजगजितसिंह पाटील यांच्या स्टाफमधील सहा जणांना कोरोनाची लागण झाली आहे. त्यामुळे आ. राणाजगतिसिंह पाटील हे स्वत: होम क्वारंटाईन झाले आहेत. आ. पाटील यांनी खुद्द फेसबुक पोस्टद्वारे ही माहिती आहे.
यापूर्वी उस्मानाबाद जिल्हयात शिवसेनेचे आमदार ज्ञानराज चौगुले व भाजपाचे आ. सुजितसिंह ठाकूर यांना कोरोनाची लागण झाली आहे. त्यापाठोपाठ आता आ. राणाजगतिसिंह पाटील यांच्या स्टाफमधील सहा जणांना कोरोना झाला आहे. त्यामुळे आ. पाटील यांना होम क्वारंटाईन करुन घेतले आहे.
आ. राणाजगजितसिंह पाटील यांची फेसबुक पोस्ट :
नागरिकांचे आरोग्य सुरक्षित रहावे म्हणून कोरोनाच्या पार्श्वभूमीवर मतदारसंघात विविध ठिकाणी परिस्थितीचा आढावा घेण्यासाठी मी सातत्याने फिरतो आहे.
माझ्या सोबत असणाऱ्या स्टाफ पैकी एक व्यक्ती कोरोना पॉझिटिव्ह आल्यानंतर सोबतच्या सर्व स्टाफची चाचणी केली. यातही एकूण ५ जणांचे अहवाल पॉझिटिव्ह आले आहेत. माझी देखील पहिली तपासणी केली असून माझा अहवाल हा निगेटिव्ह आला आहे. माझी प्रकृती चांगली असून कोणतेही काळजीचे कारण नाही. वैद्यकीय सल्ल्यानुसार मी होम कॉरंटाइन झालो आहे.
त्याचप्रमाणे माझ्या व माझ्या स्टाफच्या संपर्कात जे कोणी आले असतील त्यांना माझे आवाहन आहे की, त्यांनी देखील स्वतःची तपासणी करून घ्यावी, स्वत: ला होम क्वारंटाईन करून घ्यावे व वैद्यकीय सुचनांचे पालन करावे.
