तुळजापूर/उस्मानाबाद : झालेल्या अतिवृष्टीमध्ये तुळजापूर तालुक्यातील अनेक गावांमध्ये प्रचंड प्रमाणात आर्थिक व वित्त हानी झालेली आहे. याचा मोठ्या प्रमाणावर फटका लोकांना बसला आहे. देवसिंगा तूळ, ता. तुळजापूर येथे अर्जुन शिवाजी मस्के व त्याच्या पत्नी हे एक निराधार अंध दाम्पत्य राहत होते. या अतिवृष्टीमध्ये या दाम्पत्याचे घर हे वाहून गेले होते. अशा निराधार दाम्पत्यावर असे संकट कोसळले असता, खासदार ओमराजे निंबाळकर यांनी अतिवृष्टीतील नुकसानीची पाहणीप्रसंगी या कुटुंबियांची भेट घेऊन त्याला आधार दिला होता. यामध्ये त्यांना लवकरात लवकर मदतीचे आश्वासन खासदार निंबाळकर यांनी दिले होते.
आज शनिवार रोजी खासदार ओमराजे निंबाळकर यांच्या मार्गदर्शनाखाली निराधार दाम्पत्याला तालुकाप्रमुख सतिशकुमार सोमाणी यांच्या हस्ते रोख वीस हजार रुपये आर्थिक मदत करून मदतीचा एक छोटासा आधार देण्यात आला. प्रसंगी अर्जुन मस्के यांच्या वतीने खासदार ओमराजे निंबाळकर व शिवसेनेचे आभार मानून कृतज्ञता व्यक्त केली.
यावेळी तुळजापूर शिवसेना तालुकाप्रमुख जगन्नाथ गवळी, तालुकाप्रमुख सतिश सोमाणी ,तुळजापूर उपतालुकाप्रमुख रोहित नागनाथराव चव्हाण, विभागप्रमुख सौदागर जगताप , सोशल मिडीया तालुका प्रमुख चेतन बंडगर,अमिर शेख,सिदफळ सिद्राम कारभारी, महादेव पवार यांच्यासह पदाधिकारी, शिवसैनिक व शेतकरी बांधव उपस्थित होते.
