उस्मानाबाद, दि. 08 : सामाजिक न्याय व विशेष सहाय्य विभाग व इतर मागास बहुजन कल्याण विभाग या दोन विभागांतर्गत देण्यात येणाऱ्या भारत सरकार शिष्यवृत्ती,शिक्षण शुल्क परीक्षा शुल्क,राजर्षि शाहू महाराज गुणवत्ता शिष्यवृत्ती व व्यावसायिक पाठ्यक्रमात शिक्षण घेत असलेल्या विद्यार्थ्यांना निर्वाह भत्ता इत्यादी योजनेचे सन-2020-21 या शैक्षणिक वर्षातील अर्ज भरणे करिता https://mahadbtmahait.gov.in हे संकेत स्थळ दि.31 डिसेंबर-2020 पासून सुरू झालेले असून भारत सरकार शिष्यवृत्ती, शिक्षण शुल्क परीक्षा शुल्क, राजर्षी शाहू महाराज गुणवत्ता शिष्यवृत्ती व व्यावसायिक पाठ्यक्रमात शिक्षण घेणाऱ्या विद्यार्थ्यांना निर्वाह भत्ता इत्यादी योजनेकरिता अर्ज करण्याचा अंतिम दि.31 जानेवारी 2021 असून जिल्ह्यातील अनुसूचित जाती, विमुक्त जाती भटक्या जमाती, इतर मागासवर्ग व विशेष मागास प्रवर्गातील विद्यार्थ्यांना आवाहन करण्यात येते की उपरोक्त विहित मुदतीमध्ये आपले शिष्यवृत्तीचे अर्ज https://mahadbtmahait.gov.in या संकेतस्थळावरती भरून ते ऑनलाईन पद्धतीने व ऑफलाइन(हार्ड कॉपी) पद्धतीने आपल्या महाविद्यालयाकडे जमा करावेत.
महाविद्यालयांनी सदर अर्ज हे प्रस्तुत कार्यालयाकडे सादर करण्यापूर्वी सदर अर्जाची छाननी करून शिष्यवृत्तीस पात्र असणाऱ्या विद्यार्थ्यांचेच अर्ज या कार्यालयास मंजुरीस्ताव सादर करावेत. सदर अर्जात काही त्रुटी असल्यास तात्काळ त्या विद्यार्थ्यांकडून त्रुटींची पूर्तता करून घेण्यात यावी दिलेल्या विहित मुदतीत सदर कार्यवाही पूर्ण करावी.आपल्या महाविद्यालयात प्रवेशित एकही मागासवर्गीय विद्यार्थी शिष्यवृत्तीपासून वंचित राहणार नाही याची खबरदारी घ्यावी. विहित मुदतीत अर्ज सादर न केल्यास एखादा मागासवर्गीय विद्यार्थी शिष्यवृत्तीपासून वंचित राहिल्यास त्यास सामाजिक न्याय विभाग व इतर मागास बहुजन कल्याण विभाग जबाबदार राहणार नाहीत.
तसेच ज्या विद्यार्थ्यांचे आधार कार्ड NPCI मॅपर द्वारे बँकेशी लिंक झालेले नाहीत. अशा विद्यार्थ्यांची शिष्यवृत्ती त्यांचे बँक खात्यामध्ये जमा होत नाही.त्यामुळे ज्या विद्यार्थ्यांची 2018-19 व 19-20 या वर्षातील शिष्यवृत्तीची रक्कम अद्याप त्यांच्या बँक खात्यावर जमा झालेली नाही.त्यांनी आपले आधार NPCI मॅपर द्वारे बँकेशी लिंक करुन घ्यावे व आपली महाडीबीटी ची प्रोफाईल अद्यावत करुन घ्यावे, असे आवाहन सहाय्यक आयुक्त समाजकल्याण उस्मानाबाद यांचेकडून करण्यात येत आहे.
