नळदुर्ग, दि. 21
कोरोनाचा प्रादुर्भाव वाढत असल्याने दिवसेंदिवस बाधित रूग्णांची संख्या मोठ्या प्रमाणावर वाढल्याने जिल्हा प्रशासनाने विविध मनाई आदेश जारी केले असतानाही ते झुगारून नळदुर्ग शहरात कापड दुकान उघडून व्यवसाय करणा-या दुकानदारासह ग्राहक असे मिळून 6 जणाविरूध्द नळदुर्ग पोलिसात गुरूवार रोजी गुन्हा दाखल करण्यात आला आहे.
कोरोनाच्या पार्श्वभुमीवर जिल्हाधिकारी तथा अध्यक्ष जिल्हा आपत्ती व्यवस्थापन प्राधिकरण, उस्मानाबाद यांनी विविध मनाई आदेश जारी केले आहेत. असे असतांनाही ते मनाई आदेश झुगारुन जिलानी अब्दुलकलाम कुरेशी, रा. नळदुर्ग यांनी गुरूवार दि. 20 मे रोजी 11 वाजण्याच्या सुमारास गावातील आपले ‘गुडलक वेअर’ हे कापड दुकान व्यवसायास चालू ठेवले. ग्राहक शिवाजी लवटे रा. गुंजोटी ता. उमरगा, महादेव गुंजोटे रा. भोसगा ता. लोहारा, अनिल दबडे रा. लोहगांव ता. तुळजापूर, दगडु लकडे मानेवाडी ता. तुळजापूर, याकुब जहागिरदार रा. नळदुर्ग या सर्वांनी नमूद कापड दुकानात गर्दी करुन कोरोना संसर्गाची शक्यता निर्माण होण्याची निष्काळजीपणाची कृती केली.
यावरुन नळदुर्ग पोलिस ठाणे पोलिस कॉन्स्टेबल अमोल फत्तेपुरे यांनी सरकातर्फे दिलेल्या प्रथम खबरेवरुन भा.दं.सं. कलम- 188, 269, 270 सह साथीचे रोग प्रतिबंध कायदा कलम- 2, 3, 4 अंतर्गत गुन्हा नोंदवला आहे.
