लोहारा, दि.२६ :
तालुक्यातील एका गावात बेकायदेशीर खुलेआम वैद्यकीय व्यवसाय करणाऱ्या इसमाविरुध्द पोलिसात गुन्हा दाखल झाल्याने बोगस डाँक्टरगिरी करणा-यांचे धाबे दणाणले आहे.
मौजे अचलेर येथे अवैध वैद्यकीय व्यवसाय करणाऱ्या सागर गोकुळ भद्रा (उर्फ बंगाली) या इसमास मंगळवार दि. २५ मे रोजी रंगेहाथ पकडून गजाआड करण्यात आले.
दोन आठवड्यापुर्वी दि.११ मे रोजी अचलेर ता.लोहारा येथील रहिवाशी विष्णू लोहार यांनी सदर वरील इसम कोरोना बाधीत रुग्णांना घरी जाऊन उपचार करीत असल्याची लेखी तक्रार केली होती. त्यानंतर अवैध वैद्यकीय व्यवसाय करणाऱ्या विरूद्ध कार्यवाही साठी पथक तयार करण्यात आले. आणि त्याच्यावर नजर ठेवण्यात आली.
मंगळवार दि २५ मे रोजी गटविकास अधिकारी सोपान अकेले, सहाय्यक गटविकास अधिकारी संजय ढाकणे , तालुका आरोग्य अधिकारी डॉ. अशोक कटारे, वाहन चालक राजू कांबळे आदी प्राथमिक आरोग्य केंद्र आष्टा कासार येथे कोविड लसीकरण सत्रास भेट देण्यासाठी गेले असता, अचलेर येथे राजरोसपणे उपचार सुरू असलेबाबत माहिती मिळाली.
त्यावेळी तात्काळ मुरूम पोलिस स्टेशन येथे संपर्क साधून पोलिस कॉन्स्टेबल संजय नायकल यांना अचलेर येथे बोलावण्यात आले. आणि सर्व पथकाने अचानकपणे धाड टाकून सदर इसमास रुग्णावर उपचार करताना रंगेहाथ पकडले. त्याच्याकडील सर्व साहित्य जप्त करण्यात आले. व त्यास मुरूम पोलिस स्टेशन येथे नेण्यात आले व रात्री उशिरा ऑनलाईन गुन्हा दाखल करण्यात आला.
आवाहन
सद्या कोरोना रुग्णांची संख्या वाढत आहे. तरी कृपया सर्व नागरिकांनी शासकीय रुग्णालय अथवा नोंदणीकृत खासगी वैद्यकीय व्यवसाय करणाऱ्या डॉक्टर कडूनच उपचार घ्यावेत. अनाधिकृत वैद्यकीय व्यवसाय करणाऱ्या लोकांकडून उपचार घेऊन स्वतः चा तसेच इतरांचा जीव धोक्यात आणू नये. शॉर्टकट खूप महागात पडू शकतो असे आवाहन लोहारा तालुका आरोग्य अधिकारी डॉ अशोक कटारे यांनी केले आहे.