मुरुम, दि.२४ :
महाराष्ट्र राज्य सहकारी पतसंस्था फेडरेशनच्या वतीने आयोजित राज्यस्तरीय दिपस्तंभ पुरस्कार वितरण सोहळा शिर्डी येथील सहकारी प्रशिक्षण व संशोधन मंदिर येथे आयोजित ता. २४ (शनिवारी) रोजी पार पडला. यावेळी महाराष्ट्रातील सर्वोत्कृष्ट कार्य करणाऱ्या विविध पतसंस्थेला विभागीय पुरस्कार देण्यात आला.
यामध्ये सन २०१८-१९ चा उमरगा तालुक्यातील मुरुमच्या श्री महात्मा बसवेश्वर नागरी सहकारी पतसंस्था चळवळीत दिपस्तंभाप्रमाणे उत्कृष्ट व दिशादर्शक कार्य केल्याबद्ल गट क्रमांक १ मधून १ कोटी ते १० कोटीच्या दरम्यान झालेला पारदर्शक व्यवहार, वाढते भागभांडवल, वसुली व कोरोना काळात सामाजिक बांधीलकीची भावना जोपासून केलेली मदत. त्यांच्या या कार्याबद्ल अहमदनगर जिल्ह्याचे सहकारी संस्थेचे जिल्हा उपनिबंधक दिग्विजय आहेर, विधान परिषदेचे आमदार सुधीर तांबे, महाराष्ट्र राज्य पतसंस्था फेडरेशनचे अध्यक्ष ओमप्रकाश कोयटे, कार्याध्यक्ष राजूदास जाधव यांच्या हस्ते पतसंस्थेस मराठवाडा विभागीय दिपस्तंभ द्वितीय पुरस्कार देण्यात आला .
पतसंस्थेचे पदाधिकारी संस्थापक अध्यक्ष शिवशरण वरनाळे, उपाध्यक्ष शरणाप्पा मुदकण्णा, सचिव कमलाकर जाधव, कर्जवसुली समितीचे सदस्य विकास जाधव आदींना सन्मानचिन्ह, प्रशस्तीपत्र देवून मान्यवरांनी सन्मानित केले. सदर पतसंस्थेने या अगोदर दोन वेळा पुरस्काराने सन्मानित करण्यात येवून हा तिसरा पुरस्कार प्राप्त झाला आहे. या त्यांच्या यशाबद्ल संस्थेचे सर्व संचालक, सभासद, कर्मचारी वृंद आदिंनी फटाके वाजवून व गुलाल उधळून आनंदोत्सव साजरा करून त्यांचे विशेष अभिनंदन केले.
