नळदुर्ग , दि.१४ :
येथील उपजिल्हा रुग्णालय सुरू व्हावे या मागणीसाठी महाराष्ट्र नवनिर्माण सेनेच्या वतीने उदया उपोषण करण्यात येणार आहे. माञ पोलिसाकडुन मनसे कार्यकर्त्यांना नोटिस बजावुन उपोषण करु नये असे सुचित केले आहे. हे रुग्णालय सुरू होण्यासाठी मनसेने तीन आंदोलने केली,परंतु अद्याप पर्यंत कसलीही हालचाल झाली नाही. त्यामुळे संतप्त मनसेकडुन रविवार दि . १५ आँगस्ट रोजी उपोषणावर ठाम असल्याचे प्रमोद कुलकर्णी यानी सांगितले.
रुग्णालय सुरू होण्यासाठी व काम पूर्ण होण्यासाठी साडे अकरा कोटी रुपये इतका निधी आवश्यक आहे, कोरोनाच्या पार्श्वभूमीवर आरोग्य सेवेला प्राधान्य दिले पाहिजे.
नळदुर्ग शहर हे राष्ट्रीय महामार्गावर वसलेले शहर असून या महामार्गावर वारंवार अपघात होतात,वेळेत उपचार न मिळाल्याने अनेक अपघातग्रस्त दगावले आहेत, शहराशी निगडित ६०गावे दैनंदिन व्यवहारासाठी नळदुर्ग येथे दाखल होतात,हे रुग्णालय सुरू झाल्यास नळदुर्ग शहर व परिसरातील ६० गावातील जवळपास दीड लाख लोकांना आरोग्य सेवेचा फायदा होणार आहे, स्वातंत्र्याची ७४ वर्षे पूर्ण होत आहेत. तरीही नळदुर्ग शहर व परिसरातील नागरिक उत्तम अशा आरोग्य सुविधेपासून आजही वंचीत आहेत. यामुळे हे रुग्णालय सुरू होण्यासाठी आवश्यक तो निधी तात्काळ उपलब्ध करून रुग्णालय सुरू करावे व प्रशासनाला जागे करण्यासाठी महाराष्ट्र नवनिर्माण सेनेच्या वतीने रेंगाळलेल्या उपजिल्हा रुग्णालयाच्या इमारती समोर उद्या दि .१५ ऑगस्ट २०२१ रोजी सकाळी १० वाजता "एक दिवसीय लाक्षणिक उपोषण करण्यात येणार आहे.
त्यासाठी पोलीस ठाणे नळदुर्ग यांनी मनसेचे जिल्हाध्यक्ष प्रशांत नवगिरे, जिल्हा सचिव ज्योतीबा येडगे ,शहराध्यक्ष अलिम शेख,शहर सरचिटणीस प्रमोद कुलकर्णी, शहर उपाध्यक्ष रमेश घोडके यांना, सी.आर.पी.सी.कलम१४९ प्रमाणे नोटीस दिली आहे, तरी मनसे उपोषणावर ठाम असल्याचे सांगण्यात आले आहे.
