उमरगा , दि . ०२
कामगार दिनाच्या निम्मिताने महाराष्ट्र राज्याचे मुख्यमंत्री सन्मानीय उद्धव ठाकरे यांना महाराष्ट्रातील उसतोड कामगार यांच्या मुलभूत सेवा व सुविधांच्या तरतूद मागणीचे निवेदन सोमवारी रोजी नायब तहसिलदार आर. व्ही. काजळे यांच्या मार्फत देण्यात आले.
यावेळी उसतोड कामगारांच्या वतीने उमरगा आणि लोहारा तालुक्यातील सामाजिक क्षेत्रात काम करणारे प्रा.युसुफ मुल्ला, निखील वाघ, संतोष मोरे, संकेत लवटे, कृष्णा पाटील विष्णू ओव्हल आदी निवेदन देण्यास उपस्थित होते.
ऊसतोड कामगारांसाठी मागण्या
ऊसतोड कामगारांसाठी स्थलांतरित ठिकाणी व कामाच्या ठिकाणी चांगल्या मूलभूत सेवा व सुविधांची तरतूद मागणी
१. ऊसतोड कामगार व त्यांच्या मुलांना बुट, उबदार कपड्यांसह सुरक्षा किट मिळावे.
२. सर्व ऊस तोडणाऱ्यांसाठी स्थलांतरित ठिकाणी मोफत वैद्यकीय सुविधा मिळाव्यात.
३. ऊसतोड कामगारांसाठी अपघात विमा मिळावा
४. ऊसतोड कामगारांच्या बैलांना अपघात झाला किंवा किंवा जीवित हानी झाली तर त्यासाठी विम्याची तरतूद करावी .
५. ऊसतोड कामगारांना स्थलांतरीत ठिकाणी पाणी व्यवस्था, स्वच्छता, वीज, तात्पुरता निवास या मूलभूत आवश्यक सुविधांची तरतूद व्हावी .
६. ऊसतोड कामगारांच्या तक्रारींची नोंदणी आणि निवारण करण्याची योग्य यंत्रणा विकसित करावी
७. ई-श्रम आणि इतर संबंधित योजनांतर्गत ऊसतोड कामगारांची अनिवार्य नोंदणी व्हावी
८. ऊसतोड कामगारांना त्यांच्या मूळ गावी बंद हंगामात मनरेगा सारख्या योजनाअंतर्गत लाभ मिळावा त्याचबरोबर विशेषत: सामाजिक सुरक्षा आणि संरक्षणाशी संबंधित महत्त्वाच्या योजनांचा लाभ मिळावा.
९. राज्यातील व परराज्यातील ऊस तोडणाऱ्यांच्या कुटुंबांनी कुठेही स्थलांतर केल्यास त्यांना अन्न सुरक्षा अंतर्गत योजनांचा लाभ मिळावा.
१०. ‘घरकुल योजना’ सारख्या गृहनिर्माण योजनांतर्गत ऊस तोडणाऱ्यांसाठी विशेष तरतुदी व्हाव्यात.
११.ऊसतोड कामगारांच्या कुटुंबांना सामाजिक सुरक्षा सारख्या योजनांचा लाभ मिळावा.
१२. ऊसतोड कामगार स्थलांतरित कुटुंबातील, सर्व मुलांसाठी स्थलांतरित ठिकाणी अंगणवाडी केंद्र तरतूद व्हावी
१३. शिक्षण हक्क अंतर्गत असणाऱ्या अध्यादेशानुसार ऊसतोड कामगारांच्या मुलांना स्थलांतरित ठिकाणी असलेलया शाळांमध्ये प्रवेश मिळावा व त्याची काटेकोर अंमलबजावणी व्हावी.
१४. स्थलांतरित ऊसतोड कामगारांच्या कुटूंबातील मुलांसाठी निवासी शाळांची तरतूद व्हावी
१५. ऊसतोड कामगारांच्या मुलांसाठी इयत्ता 8 वी नंतर शिक्षण शिष्यवृत्ती मिळावी.
लिंगभाव समानता व हक्कआधारित तरतुदी
----------------
१६. ऊसतोड कामगार गरोदर महिला आणि स्तनदा मातांसाठी विना अट आरोग्यसेवा व सुविधा मिळाव्यात
१७. कामाच्या ठिकाणी महिलांसाठी स्वच्छतागृहे आणि पिण्याच्या पाण्याची व्यवस्था व्हावी
१८. ऊसतोड कामगार महिलांच्या पाच वर्षाखालील मुलांसाठी कामाच्या ठिकाणी पाळणाघर तरतूद.
१९. कामाच्या ठिकाणी महिलांचा लैंगिक छळ (प्रतिबंध, प्रतिबंध आणि निवारण) अधिनियम २०१३ ची प्रभावी अंमलबजावणी सुनिश्चित करावी ; ऊसतोड कामगार महिलांच्या सोबत होणाऱ्या लैंगिक छळाची प्रकरणे तपासण्यासाठी आवश्यक समित्या सक्रिय करणे किंवा नसतील तेथे अशा समित्यांची त्वरित बांधणी केली जावी.
२० ऊसतोड कामगार महिलांना समान वेतन मिळावे. या मागण्यांचे निवेदन तहसिलदार मार्फत मुख्यमंत्र्यांना देण्यात आले.
