पत्रकाराला जीवे ठार मारण्याची धमकी ; पत्रकार संरक्षण कायदा, भादवी कलमान्वये गुन्हा दाखल करुन अटक करण्याची मागणी
मुरूम,दि.२६ :
मुरूम शहर पत्रकार संघाचे अध्यक्ष पत्रकार रामलिंग पुराणे यांना बातमीत नाव न दिल्याच्या कारणावरून तुगाव (ता. उमरगा) येथील एका व्यक्तीने अश्लील शिवीगाळ करत जीवे मारण्याची धमकी देत खोट्या गुन्ह्यात अडकवण्याची धमकी दिल्याने याप्रकरणी मुरूम शहर पत्रकार संघाच्या वतीने पोलिसांत तक्रार देण्यात आली आहे.
या घटनेप्रकरणी आरोपीविरोधात कडक कारवाईची मागणी करत मुरूम शहर पत्रकार संघटनेने दि. 26 जुलै 2025 रोजी मुरूम पोलीसात निवेदन देवुन ‘पत्रकार संरक्षण कायदा’ आणि भारतीय दंड संहितेतील संबंधित कलमान्वये गुन्हा नोंद करुन संबंधितास अटक करण्याची मागणी करण्यात आली आहे.
दि 25 जुलै रोजी तुगाव येथील प्राथमिक आरोग्य उपकेंद्राच्या उद्घाटन कार्यक्रमाची बातमी रामलिंग पुराने यांनी त्यांच्या डिजिटल माध्यमावर प्रसिद्ध केली होती. या बातमीत नाव न आल्याने संतप्त झालेल्या एकाने फोनवरून अश्लील भाषा वापरत पत्रकाराला जीवे मारण्याचा दम दिला, तसेच खोट्या गुन्ह्यात अडकवण्याची धमकी दिली.
पत्रकार संघटनेने याप्रकरणी म्हटलं आहे की, "बातमी संकलन व प्रसारण हे पत्रकाराचं कर्तव्य आहे. अभिव्यक्ती स्वातंत्र्य हा संविधानिक अधिकार असून, त्यावर अशा धमक्या म्हणजे थेट पत्रकारितेवरच हल्ला आहे." याशिवाय, संबंधित आरोपीचा राजकीय दबाव आणि पार्श्वभूमी लक्षात घेता, या प्रकाराकडे गांभीर्याने पाहण्याची आवश्यकता असल्याचेही संघटनेने स्पष्ट केलं आहे.
सदर निवेदनावर मोहन जाधव, नहीरपाशा मासुलदार, अजिंक्य मुरूमकर, रफिक पटेल, रवी अंबुसे, राजेंद्र कारभारी, इम्रान सय्यद, लखन भोंडवे, हुसेन नुरसे यांच्यासह अनेक पत्रकारांनी सह्या करून एकजूटीतून पत्रकारांच्या सुरक्षेचा आवाज बुलंद केला आहे.
प्रशासनाने याविषयी तातडीने आणि ठोस पावले उचलली नाहीत, तर तीव्र आंदोलन छेडण्याचा इशारा दिला आहे.
