नळदुर्ग नगरपरिषदेत १५ पदे रिक्त; मोजक्या कर्मचाऱ्यांच्या खांद्यावर शहराचा गाडा!
फायरमनपासून लिपिकांपर्यंत अनेक पदे रिक्त; नागरी सेवांवर वाढता ताण
नळदुर्ग, दि. २० जून
शहराच्या विकासाचे आणि नागरिकांच्या सेवांचे केंद्र असलेल्या नळदुर्ग नगरपरिषदेत तब्बल १५ पदे रिक्त असल्याचे वास्तव समोर आले आहे. मंजूर ५३ पदांपैकी केवळ ३८ पदांवर कर्मचारी कार्यरत असल्याने उर्वरित कामांचा भार उपलब्ध कर्मचाऱ्यांवर पडत असून प्रशासनाची कसरत वाढली आहे.
नगरपरिषदेच्या आकडेवारीनुसार राज्यस्तरीय संवर्गातील १३ पदांपैकी तब्बल ८ पदे रिक्त आहेत. त्यामुळे अनेक विभागांतील निर्णयप्रक्रिया, तांत्रिक कामे आणि दैनंदिन प्रशासकीय कारभारावर त्याचा परिणाम होत असल्याचे चित्र दिसून येत आहे.
वर्ग-३ मधील ९ मंजूर पदांपैकी ३ पदे रिक्त आहेत. लिपिक-टंकलेखक, सहाय्यक ग्रंथपाल तसेच पंप ऑपरेटर-विजतंत्री यांसारख्या महत्त्वाच्या पदांमध्ये मनुष्यबळाची कमतरता जाणवत आहे. परिणामी नागरिकांच्या कामकाजाच्या गतीवर परिणाम होण्याची शक्यता व्यक्त केली जात आहे.
वर्ग-४ मधील ३१ मंजूर पदांपैकी २८ पदे भरलेली असली तरी अग्निशमन विभागाची स्थिती चिंताजनक आहे. चार फायरमन पदांपैकी तीन पदे रिक्त असल्याने आपत्कालीन परिस्थितीत उपलब्ध मनुष्यबळ पुरेसे ठरेल का, असा प्रश्न उपस्थित होत आहे.
स्वच्छता, पाणीपुरवठा, कर वसुली, बांधकाम परवानग्या, जन्म-मृत्यू नोंदी, नागरिकांच्या तक्रारींचे निवारण यांसारख्या अत्यावश्यक सेवांसाठी सध्या कार्यरत कर्मचाऱ्यांनाच अतिरिक्त जबाबदाऱ्या पार पाडाव्या लागत आहेत. त्यामुळे काही कामांच्या निपटाऱ्यास विलंब होत असल्याची चर्चा शहरात रंगू लागली आहे.
वाढत्या नागरीकरणाच्या पार्श्वभूमीवर रिक्त पदे तत्काळ भरण्यासाठी शासन स्तरावर प्रभावी पाठपुरावा होणे आवश्यक असल्याची मागणी नागरिकांकडून होत आहे. आवश्यक मनुष्यबळ उपलब्ध झाल्यास नगरपरिषदेच्या सेवा अधिक गतिमान आणि परिणामकारक होऊ शकतील, अशी अपेक्षा व्यक्त केली जात आहे.
■ ठळक बाबी
➡️ मंजूर पदे – ५३
➡️ भरलेली पदे – ३८
➡️ रिक्त पदे – १५
➡️ राज्यस्तरीय संवर्गातील रिक्त पदे – ८
➡️ वर्ग-३ मधील रिक्त पदे – ३
➡️ वर्ग-४ मधील रिक्त पदे – ३
➡️ फायरमनची ४ पैकी ३ पदे रिक्त
"शहराच्या विकासाचा रथ वेगाने धावायचा असेल, तर त्याचे सारथीच कमी असतील तर गती कशी येणार? रिक्त पदांची ही घंटा आता शासनाने ऐकण्याची वेळ आली आहे," अशी प्रतिक्रिया नागरिकांमधून उमटत आहे.
बसवराज धरणे, नगराध्यक्ष, न.प. नळदुर्ग
गेल्या एप्रिल महिन्यात शासनाकडे आकृतीबंध प्रस्ताव पाठवून नगरपालिकेतील कर्मचाऱ्यांची रिक्त जागा भरण्याची मागणी केली आहे. नवीन पाणीपुरवठ्यासाठी पंप ऑपरेटर, लाईनमेन, माळी, फायरमन, वाहन चालक आदीसह इतर जागा भरण्याची मागणी केली आहे.
