नळदुर्ग येथे गणेश मिरवणूक मार्गाची पाहणी; प्रशासनाकडून उपाययोजनांच्या सूचना
नळदुर्ग, दि. ७ सप्टेंबर :
आगामी गणेशोत्सवाच्या पार्श्वभूमीवर गणपती मिरवणूक सुरळीत, सुरक्षित व शांततेत पार पडावी, यासाठी प्रशासनाच्या वतीने मिरवणूक मार्गाची प्रत्यक्ष पाहणी करण्यात आली. यावेळी मार्गावरील विविध समस्या व आवश्यक उपाययोजनांचा आढावा घेण्यात आला.
पाहणीदरम्यान मिरवणूक मार्गावरील रस्त्यांची स्थिती, वाहतूक नियमन, विद्युत व्यवस्था, स्वच्छता, अतिक्रमणे तसेच कायदा व सुव्यवस्थेच्या दृष्टीने आवश्यक बाबी तपासण्यात आल्या. मिरवणुकीदरम्यान नागरिकांना कोणत्याही प्रकारचा त्रास होऊ नये, तसेच अनुचित प्रकार घडू नयेत, यासाठी संबंधित विभागांनी आवश्यक ती कार्यवाही करण्याच्या सूचना देण्यात आल्या.
मिरवणूक मार्गावरील विद्युत व्यवस्था सुरळीत ठेवणे, स्वच्छता करणे, अडथळे व अतिक्रमणे दूर करणे तसेच वाहतुकीचे योग्य नियोजन करण्याबाबत संबंधित यंत्रणांना निर्देश देण्यात आले. गणेशोत्सव काळात सर्व विभागांनी परस्पर समन्वयाने काम करून मिरवणूक शांततेत पार पाडावी, असेही यावेळी सांगण्यात आले.
यावेळी नगराध्यक्ष बसवराज धरणे, पाणीपुरवठा सभापती तानाजी जाधव, महावितरणचे कर्मचारी विनोद चौधरी, अमोल डोंगरे, सतीश घोडके, नळदुर्ग पोलिस ठाण्याचे पोलिस निरीक्षक रवींद्र गायकवाड, नगरपरिषद कार्यालयीन अधीक्षक अजय काकडे आदी उपस्थित होते.
