नळदुर्ग येथील कुरनुर (बोरी धरण) मध्‍यम प्रकल्‍पाच्‍या पाणलोट क्षेत्रात जोरदार पर्जन्‍यवृष्‍टी होत असल्‍याने बोरी धरण भरण्‍याच्‍या मार्गावर आहे. त्‍यामुळे धरण भरुन जास्‍त झालेले पाणी सांडव्‍यातून वाहून जाण्‍याची शक्‍यता आहे. हा धरण भरण्‍यास केवळ दोन फुट पाणी कमी असल्‍याचे नळदुर्ग नगरपालिकेचे पाणीपुरवठा अधिकारी डी.एन. कस्‍तुरे यांनी 'तुळजापूर लाईव्‍ह' शी बोलताना सांगितले. नळदुर्गच्‍या उत्‍तर दिशेला असलेल्‍या बोरी धरणातील जास्‍त झालेले पाणी वैशिष्‍ट्यरित्‍या नळदुर्ग येथील ऐतिहासिक किल्‍ल्‍यात वळविण्‍यात आले आहे. त्‍यामुळे किल्‍ल्‍यातील प्रेक्षणीय स्‍थळ असलेल्‍या ''नर-मादी'' हा धबधबा वाहण्‍याची अपेक्षा वाढल्‍या आहेत. असाच पाऊस सुरु राहिल्‍यास येत्‍या काही दिवसात नर-मादी धबधबा सुरु होईल.
