अलीकडील दोन-तीन दिवसात बार्शी तालुक्याच्या पुर्वभागासह डोंगरी भागात मान्सुनपुर्व पावसाने थोडीशी हजेरी लावण्‍यास सुरूवात केली असुन पावसापेक्षा अगोदर गावावार व सगळीकडे घोंगावणारे वादळच लक्षवेधी व भितीदायक असेच ठरू लागले आहे. तालुक्यात बार्शी-पांगरी, बार्शी-चारे बार्शी-येरमाळा आदी मार्गावर झाडे पडल्यामुळे वाहतुकही खोळंबली होती. बार्शी तालुक्यात शिराळे, चारे, पांगरी आदी भागात विज वितरण केंद्राचे विजवाहक पोल कोसळल्यामुळे अनेक गावचा विजपुरवठा खंडीत झालेला आहे. जनावरांसह माणसांच्या निवास्थानावरील पत्रे उडुन गेले आहेत. चारे या एकटया गावात तर चक्री वादळाने 190 घरावरील पत्रे ऊडुन गेले असुन शेकडोजण उघडयावर आले आहेत. चारे येथील पांडुरंग वैजिनाथ जगदाळे यांच्या घरावर जुने मोठे झाड पडल्यामुळे नुकसान झाले असुन बाबुशा सोनार अब्दुल गणी, एकनाथ जगदाळे, अजिनाथ झालटे आदींच्या घरावरील व जनावरांच्या गोठयावरील पत्रे उडाले आहेत. तसेच चारे येथीलच जय भवानी सार्वजनिक वाचनलयावरील पत्रे उडुन गेले आहेत.
घटनेनंतर सोलापुर जि.प.चे विरोधी पक्षनेते संजय पाटील यांनी बार्शी मंडळाचे महसुल अधिकारी सुपेकर, चारेचे गांव कामगार तलाठी मुंढे, ग्रामसेवक खळदकर, कृषी विभागाचे कोलगे या पथकासह नुकसानग्रस्त भागांना भेटी देऊन पाहणी केली. ग्रामस्थांनी नुकसानभरपाईची मागणी केली आहे.
