तुळजापूर :- दिवस-रात्र२४ तास पैसे काढणे, जमा करणे यासह सर्वच बँकिंग सुविधा असलेली ई-गॅलरी सुविधा स्टेट बँक ऑफ इंडियाच्या तुळजापूर शाखेत शुक्रवार दि. १८ डिसेंबर रोजी सुरू करण्यात आली. ई-गॅलरी सुविधा उस्मानाबाद, लातूर जिल्ह्यातील पहिली सुविधा तुळजापूर शाखेत सुरू करण्यात आली आहे.
ई-गॅलरी सुविधेचा शुभारंभ स्टेट बँक ऑफ इंडियाचे विभागीय व्यवस्थापक एन. के. शर्मा प्रादेशिक व्यवस्थापक रघुनाथ लोटे यांच्या हस्ते करण्यात आला. यावेळी शाखाधिकारी श्याम वाघमारे यांच्यासह बाळासाहेब हंगरगेकर, प्रशांत अपराध, अभिजीत जेवळीकर आदी कर्मचारी उपस्थित होते. बँकिंग व्यवहारात स्पष्टपणा आणण्यासाठी एसबीआयच्या तुळजापूर शाखेत जीआरसी मशीन बसविण्यात आले असून, जीआरसी कार्डद्वारे बँकिंग व्यवहार करण्यात येणार असल्याने जानेवारीपासून स्लीप पद्धत पूर्णपणे बंद करण्यात येणार असल्याचे बाळासाहेब हंगरगेकर यांनी सांगितले.
ई-गॅलरीमध्ये रक्कम जमा करणे, रक्कम काढणे, पासबुकमध्ये इन्ट्री करणे, अकाउंट स्टेटमेंट काढणे, धनादेश जमा करणे, ऑनलाइन खाते उघडणे आदी सुविधा २४ तास विनामूल्य उपलब्ध राहणार आहेत. यामुळे ग्राहकांना गर्दीचा त्रास होता चांगली सेवा मिळणार आहे. ई-गॅलरी सुविधा इंन्ट्रानेट तंत्रज्ञानावर आधारित असल्याने इंटरनेट प्रॉब्लेमचा त्रास टळणार आहे.
