तुळजापूर : कुमार नाईकवाडी
कुलस्वामिनी श्री तुळजाभवानी मातेच्या जामदारखाना व खजिन्यातील ऐतिहासिक पुरातन मौल्यवान सोन्या चांदीचे अलंकार व नाणी गायब झाल्याप्रकरणी अखेर तत्कालिन धार्मिक व्यवस्थापक दिलीप नाईकवाडी यांच्याविरुध्द तुळजापूर पोलीसांत रविवारी गुन्हा करण्यात आला आहे. याप्रकरणी मंदिर संस्थानचे अध्यक्ष तथा जिल्हाधिकारी कौस्तुभ दिवेगावकर यांनी दोन दिवसांपूर्वी गुन्हे दाखल करण्याचे आदेश दिले होते.
धार्मिक व्यवस्थापक म्हणून काम पाहिलेले दिलीप नाईकवाडी यांनी प्राचीन दागिन्यात हेरोफेरी करुन नाणी व काही मौल्यवान, दुर्मिळ वस्तूंत गैरप्रकार केल्याची तक्रार तुळजापूर येथील किशोर गंगणे यांनी जिल्हाधिका-याकडे केली होती. त्यावर अप्पर जिल्हाधिका-यांच्या अध्यक्षतेखाली चौकशी समिती नेमण्यात आली होती. या समितीने दिलेल्या अहवालानुसार खजिन्यात गडबड झाल्याचे समोर आले. या चौकशी समितीने यास तात्कालिन धार्मिक व्यवस्थापक दिलीप नाईकवाडी यांना जबाबदार धरुन त्यांच्या वर गुन्हा दाखल करण्याचे आदेश श्री तुळजाभवानी मंदिर संस्थानअध्यक्ष तथा जिल्हाधिकारी कौस्तुभ दिवेगावकर यांनी दिल्यावर तब्बल दोन दिवसाने प्रशासकीय अधिकारी योगिता कोल्हे यांनी तक्रार दाखल केल्यानंतर नाईकवाडी यांच्यावर गुन्हा दाखल झाला आहे.
या फिर्यादीमध्ये म्हटले आहे की, श्री तुळजाभवानी मंदिर संस्थानचा धार्मिक व्यवस्थापकपदी दिलीप नाईकवाडी कार्यरत असताना 29 नोव्हेंबर 2001 ते 30 नोव्हेंबर 2018 या कालावधीत नाईकवाडी यांनी पदाचा दुरुपयोग करत श्री तुळजाभवानी मंदिर संस्थान व भाविकांची फसवणूक केली असून त्याचा ताब्यात असलेल्या श्री तुळजाभवानी देवीचा खजिना व जामदार खान्यातीलअतिप्राचिन अलंकार, वस्तू तसेच भाविकांनी अर्पण केलेले सुमारे 348.661 ग्रॅम सोने व सुमारे 71698.274 ग्रॅम चांदीच्या वस्तू तसेच उपरोक्त 71 प्राचीन नाणे यांचा वैयक्तिक स्वार्थासाठी अपहार चोरी केली. या फिर्यादीवरुन पोलिसांनी तात्कालिन धार्मिक व्यवस्थापक दिलीप देविदास नाईकवाडी विरोधात पोलीस ठाण्यात 323 कलम 420, 464, 409, 467, 468, 471, 381 भादंवि अन्वये गुन्हा नोंद करण्यात आला आहे.
