नळदुर्ग शहरात विनामास्क व विनाकारण रस्त्यावर फिरणाऱ्या नागरीकां विरोधात तहसिलदार सौदागर तांदळे यांच्या नेतृत्वाखाली कारवाई करण्याची धडक मोहीम राबविण्यात आली. यावेळी विनामास्क तसेच विनाकारण रस्त्यावर फिरणाऱ्या ४६ नागरीकांची कोरोना चाचणी करण्याबरोबरच त्यांच्यावर दंडात्मक कारवाई करण्यात आली. चाचणी दरम्यान दोघेजण कोरोना बांधित आढळुन आले आहे.
या कारवाईमुळे विनामास्क तसेच विनाकारण रस्त्यावर फिरणाऱ्यांमध्ये मोठी खळबळ उडाली असुन सर्वसामान्य नागरीकांनी मात्र प्रशासनाच्या या कारवाईचे स्वागत केले आहे.
सध्या सर्वत्र कोरोनाचा कहर सुरू आहे. दररोज कोरोनामुळे अनेकजनांचा मृत्यु होत आहे. तर हजारो नागरीक कोरोनामुळे बाधित होत आहेत. कोरोनाचा संसर्ग इतका वाढला आहे की परिस्थिती हाताबाहेर जाण्याची भीती व्यक्त केली जात आहे. सरकार नागरीकांचा जीव वाचविण्यासाठी सर्वतोपरी प्रयत्न करीत आहे. कोरोनाचा वाढत चाललेला संसर्ग थांबविण्यासाठी तसेच कोरोनाची वाढत चाललेली साखळी तोडण्यासाठी अनेक कडक निर्बंध लावले आहेत. प्रशासन सरकारने लावलेल्या निर्बंधांचे पालन व्हावे यासाठी प्रामाणिकपणे प्रयत्न करीत आहे.
असे असताना नागरीकांना मात्र कोरोनाचे कुठलेच भय नाही. नागरीक, व्यापारी, फळ विक्रेते, भाजी विक्रेते हे अतीशय बेफिकीरीने वागत आहेत याचाच परीणाम म्हणुन आज कोरोना झपाट्याने वाढत चालला आहे. ही परिस्थिती थांबविण्यासाठी सरकार व प्रशासन अतीशय चांगले काम करीत आहे.
मात्र कांही बेफिकीरीने वागणाऱ्या नागरीकांमुळे कोरोनाचा प्रादुर्भाव वाढत चालला आहे. नळदुर्ग शहरात जे व्यापारी, भाजी तसेच फळ विक्रेते मास्कचा वापर करीत नाहीत अशांना शहरात व्यापार करण्यास तसेच फळे व भाजी विक्री करण्याची परवानगी देऊ नये. कारण अशा बेफिकीरीने वागणाऱ्या माणसांमुळेच आज कोरोना वाढत चालला आहे.
गुरुवार दि.२२ एप्रिल रोजी नळदुर्ग बसस्थानकासमोर तहसिलदार सौदागर तांदळे यांच्या नेतृत्वाखाली नळदुर्ग पोलिस ठाण्याचे सहाय्यक पोलिस निरीक्षक जगदीश राऊत, सुधीर मोटे, पोलिस उपनिरीक्षक कैलास लहाने, न.प.चे मुख्याधिकारी लक्ष्मण राठोड, प्राथमिक आरोग्य केंद्राचे वैद्यकीय अधिकारी डॉ. राहुल जानराव, डॉ. यशवंत नरवडे मंडळ अधिकारी अमर गांधले यांनी विनामास्क तसेच विनाकारण दुचाकीवरून किंवा पायी रस्त्यावर फिरणाऱ्या नागरिकांविरोधात धडक कारवाई करण्याची मोहीम राबविली. यावेळी विनामास्क फिरणाऱ्या नागरीकांची तसेच व्यापाऱ्यांची कोरोना चाचणी करण्याबरोबरच त्यांच्यावर दंडात्मक कारवाईही करण्यात आली. यामुळे विनामास्क तसेच विनाकारण रस्त्यावर फिरणाऱ्यामध्ये एकच खळबळ उडाली.
वास्तविकपाहता आशा प्रकारची कारवाई प्रशासनाने नळदुर्ग शहरात वारंवार करण्याची गरज आहे. प्रशासनाच्या या कारवाईचे सर्वस्तरातुन स्वागत होत आहे.
