उमरगा,दि.१८
कोविड रुग्णांच्या नातेवाईकांना रुग्णवाहिकेसाठी येणारा अवाढव्य खर्च कमी करावा, या हेतूने रिलायन्स पेट्रोलियम कंपनीद्वारे मोफत इंधन सेवा या उपक्रमाचा उमरगा येथील रिलायन्स पेट्रोलपंप येथे आमदार ज्ञानराज चौगुले यांच्या हस्ते करण्यात आला.
यावेळी जिल्हा शल्यचिकित्सक डॉ. धनंजय पाटील , युवा नेते किरण गायकवाड यांची प्रमुख उपस्थिती होती. कोरोनाच्या संकट समयी अनेक गरजू रुग्णांना रुग्णवाहिकेची आवश्यकता भासल्यास त्यांना भरमसाठ पैसे मोजावे लागत आहेत. नेमकी रुग्णांची ही गरज ओळखुन रिलायन्स पेट्रोलियमद्वारे कोरोनाग्रस्त रुग्णांना घेऊन जाणाऱ्या रुग्णवाहिकांना, मग ती शासकीय असो किंवा खाजगी अशा सर्व रुग्णवाहिकांना दररोज 50 लिटर याप्रमाणे मोफत इंधन देण्याचा स्तुत्य उपक्रम हाती घेतला आहे.
प्रारंभी सदर उपक्रम हा केवळ मोठ्या शहरात राबविण्यात येत होता. परंतु सध्या कोरोनाचा प्रादुर्भाव ग्रामीण भागातही वाढत असल्याने व खरी गरज ग्रामीण भागातील रुग्णांना असल्याने रिलायन्स पेट्रोलियम समूहाद्वारे ग्रामीण भागातही हा उपक्रम राबवण्याचे मान्य केले.
उस्मानाबाद जिल्ह्यातील या उपक्रमाचा शुभारंभ उमरगा येथून करण्यात आला. यात उपजिल्हा रुग्णालय, उमरगा, ग्रामीण रुग्णालय, मुरूम, ग्रामीण रुग्णालय, लोहारा, स्पर्श ग्रामीण रुग्णालय, सास्तुर, येथील रुग्णवाहिका व 108 च्या रुग्णवाहिका, कोरोना रुग्णांसाठी मागील काही दिवसांपासून सेवा देणाऱ्या शिवसेनेच्या तीन रुग्णवाहिका तसेच इतर खासगी रुग्णवाहिका यांना प्रथम या उपक्रमाचा लाभ देण्यात आला.
खासगी रुग्णवाहिकांनाही मोफत इंधन मिळत असल्यामुळे गरजू रुग्णांकडून माफक दर घेण्याच्या सूचना आमदार ज्ञानराज चौगुले यांनी खासगी रुग्णवाहिका चालकांना केल्या. तसेच सदरचा उपक्रम सुरू केल्याबद्दल रिलायन्स समूहाचे आभार मानले.
यावेळी शिवसेना तालुकाप्रमुख बाबुराव शहापुरे, उमरगा रिलायन्स पेट्रोल पंपाचे संचालक विक्रम माणिकवार, स्पर्श ग्रामीण रुग्णालयाचे समन्वयक रमाकांत जोशी, डॉ.वसंत बाबरे, १०८ रुग्णवाहिका समन्वयक जयराम शिंदे, नगरसेवक पंढरीनाथ कोणे, युवा सेना तालुकाप्रमुख योगेश तपसाळे, माजी नगरसेवक विवेक हराळकर, शरद पवार, राघवेंद्र माणिकवार, पेट्रोलपंप व्यवस्थापक सिद्धेश्वर मुर्गे, शाहूराज माने आदी उपस्थित होते.
