लोहारा,दि.१९ :
राष्ट्रीय आरोय अभियान अंतर्गत प्राईड इंडिया स्पर्श ग्रामीण रुग्णालय सास्तुरच्या साहकार्याने चालवल्या जाणाऱ्या फिरत्या आरोग्य पथकामुळे ग्रामीण भागातील जनतेच्या आरोग्याला बळकटी प्राप्त झाल्याचे प्रतिपादन जिल्हा परिषदचे मुख्य कार्यकारी अधिकारी डॉ.विजयकुमार फड यांनी केले.
लोहारा तालुक्यातील फनेपूर येथे दि.१८ आमदार ज्ञानराज चौगुले, मुख्य कार्यकारी अधिकारी डॉ. विजयकुमार फड, जिल्हा आरोग्य अधिकारी डॉ. हणमंत वडगावे, लोहारा तालुका आरोग्य अधिकारी डॉ. अशोक कटारे, डॉ किरण गरड, गटविकास अधिकारी सोपान अकेले, ग्रामीण रुग्णालय स्पर्श सास्तूरचे प्रकल्प अधिकारी रमाकांत जोशी, डॉ. सुनिता चक्करवार, ग्रामसेवक गोरे ए. बी, फनेपुरचे सरपंच तहेराबी मुल्ला आदी मान्यवरांनी फिरत्या वैद्यकीय पथकाला भेट देऊन पाहणी केली.
स्पर्श ग्रामीण रूग्णालयाच्या फिरत्या वैद्यकीय पथका मार्फत दिल्या जाणाऱ्या दर्जेदार आरोग्य सेवेबद्दल मान्यवरांनी समाधान व्यक्त केले.
राष्ट्रीय आरोग्य अभियान अंतर्गत स्पर्श ग्रामीण रुग्णालय सास्तूरच्या सहकार्याने गेल्या दहा वर्षापासून उस्मानाबाद जिल्ह्यातील दुर्गम अशा ५४ गावांमध्ये या फिरत्या वैद्यकीय पथकाद्वारे दर्जेदार आरोग्य सेवा पुरवली जाते.
ग्रामीण भागातील शेतकरी, मजूर, वृद्ध आर्थिक दृष्ट्या दुर्बल जनतेचा वेळ, पैसा वाचवा. गरोदर मातांची प्रसूतीपूर्व सेवा, प्रसूतीपाश्चात तपासणी त्यांच्या गावात व्हावी त्यांना त्रास होऊ नये बालके व किशोर वयीन मुलांची तपासणी व उपचार रक्तदान, मधुमेह, कुष्ठरोग आदी तपासणी तज्ञ डॉक्टरांमार्फत महिलांची गर्भाशयाच्या कॅन्सर विषयक तपासणी, रक्त लघवी तपासणी ह्या मोफत सेवा दिल्या जातात.
फिरत्या वैद्यकीय पथकाच्या दैनंदिन कामकाजा बद्दल प्रकल्प अधिकारी जोशी यांनी मान्यवरांना माहिती दिली.
मुख्य कार्यकारी अधिकारी डॉ विजयकुमार फड यांनी मांडलेल्या संकल्पनेनुसार व जिल्हा आरोग्य अधिकारी डॉ हणमंत वडगावे यांच्या मार्गदर्शनानुसार गावपातळीवरच कोरोनासंबंधीत रँपिड एन्टीजन टेस्ट मोबाईल मेडिकल युनिट मार्फत सुरु करण्यात आली आहे. त्यामुळे संशयित लोकांची कोरोना तपासणी लवकर केल्यास व रुग्ण पॉझिटिव्ह आला तर ताबडतोब उपचाराला सुरूवात होत असल्याने कोरोनाचा संसर्ग रोखण्यासाठी व लवकर निदांनामुळे मृत्यूदर कमी करण्यासाठी मदत होत आहे. त्यामुळे सर्व सरपंच हे या उपक्रमाबद्दल मुख्य कार्यकारी अधिकारी, जिल्हा आरोय अधिकारी व स्पर्श मोबाईल मेडिकल युनिटचे कौतुक करत आहेत.
मुख्य कार्यकारी अधिकारी यांनी झाडे लावण्यासाठी जनजागृती करून गावाच्या लोकसंख्येनुसार प्रत्येक व्यक्तीने ३ ते ४ झाडे लावावीत व यासाठी सर्वांनी पुढाकार घ्यावा असे आवाहन केले. तसेच पुढील काळात मोबाईल मेडिकल युनिटद्वारे कोरोना लसीकरण मोहीम चालू करण्याबाबत सूचना केली जेणेकरून प्रत्येक गावात १०० टक्के लसीकरण करून गाव कोरोनामुक्त होईल असा मानस व्यक्त केला. तसेच कोरोन या आजाराबद्दल जनजागृती व प्रबोधन करण्याचे काम या मोबाईल मेडिकल युनिटमधील डॉक्टर व कर्मचारी करीत आहेत.
पाँझिटिव्ह किवा तीव्र आजार असणाऱ्या व्यक्तींना नजीकच्या प्राथमिक आरोग्य केंद्र, ग्रामीण रुग्णालय, जिल्हा रुग्णालय येथे संदर्भ सेवेसाठी पाठवण्यात येते. अशी माहिती रमाकांत जोशी यांनी दिली.
ग्रामीण भागातील जनतेसाठी हे मोबाईल मेडिकल युनिट देवदूता प्रमाणे कार्य करीत आहे. ग्रामीण जनतेने त्याचा लाभ घ्यावा असे आवाहन आमदार ज्ञानराज चौगुले यांनी केले.