उमरगा, दि.२१
सोलापूर हैद्राबाद महामार्गावर भरधाव आयशर टेम्पो व मोटारसायकल यांच्यात झालेल्या आपघातात एकजण गंभीर जखमी होवुन उपचारादरम्यान मृत्यु झाला.ही घटना गुंजोटी फाट्यासमोर राजधानी पेट्रोल पंपाजवळ घडली.
रविवारी दि. २० रोजी दुपारी दोन वाजण्याच्या सुमारास झालेल्या आपघातात माधव गणपती कांबळे वय ३० वर्ष ,रा. चंडकाळ ता. उमरगा असे मृत्यु झालेल्याचे नाव आहे.
तालुक्यातील चंडकाळ येथील माधव गणपती कांबळे हे दुचाकी वरून (क्र. एमएच १३, एवाय ७८८८) तुळजापूर तालुक्यातील नंदगाव येथील नातेवाईकाच्या लग्नासाठी गेला होता. लग्न समारंभ झाल्यानंतर राष्ट्रीय महामार्गावरून गावाकडे परत येत असताना शहरातील गुंजोटी मोड समोर असलेल्या राजधानी पेट्रोल पंपातून आयशर टेम्पो (क्र. एमएच २०, बीटी ३३३७) हा पाठीमागे घेत असताना राष्ट्रीय महामार्गावरून जाणाऱ्या दुचाकीला जोरदार धडक बसल्याने दुचाकीचालक माधव कांबळे गंभीर जखमी झाले. परिसरातील नागरिकांनी तातडीने त्यांना उपजिल्हा रुग्णालयात दाखल केले. उपचारादरम्यान चारच्या सुमारास त्यांचा मृत्यू झाला. सायंकाळी शवविच्छेदन करून मृतदेह नातेवाईकांकडे देण्यात आला. दरम्यान पोलिसांनी घटनास्थळी दाखल होत आयशर टेम्पो ताब्यात घेतला असून याप्रकरणी रात्री उशीरापर्यंत गुन्हा नोंद करण्याची प्रक्रिया सुरू होती.