काटी , दि . १८ उमाजी गायकवाड
तुळजापूर तालुक्यातील काटी येथे शनिवार दि. १८ रोजी सायंकाळी येथील दत्त मंदिरात धार्मिक कार्यक्रमांचे आयोजन करून दत्तजयंती मोठ्या उत्साहात साजरी करण्यात आली. दत्त जन्मोत्सवनिमित्त मंदिरात फुले व रोषणाई करून दिवसभर येथील भजनी मंडळाच्या वतीने ‘दिगंबरा, दिगंबरा, श्रीपाद वल्लभ दिगंबरा’ चा गजर सुरू होता.
यंदा येथील भक्तांनी स्वत: पुढाकार घेऊन मंदीरात होणाऱ्या धार्मिक कार्यक्रमांसाठी कायम स्वरुपी स्पिकरसेट खरेदी केला आहे. जन्मोत्सवाचा सोहळा अनुभवण्यासाठी येथील भाविकांनी मोठी गर्दी केली होती.
मंदिरात आकर्षक फुलांच्या सजावटीने पाळणा बांधून अनेक भाविकांच्या उपस्थितीत वैविध्यपूर्ण धार्मिक कार्यक्रमांनी दिगंबरा, दिगंबरा, श्रीपाद वल्लभ दिगंबराच्या जयघोषात संध्याकाळी सहा वाजता पुष्पवृष्टी वाहून दत्त जन्मोत्सव सोहळा मोठ्या उत्साहात धार्मिक वातावरणात साजरा करण्यात आला. जन्मोत्सवानंतर फटाक्यांची आतषबाजी करण्यात आली. शनिवारी सायंकाळी हभप अच्युत महाराज पुरी यांच्या किर्तन सोहळ्याचा कार्यक्रम पार पडला.
दत्त जन्मोत्सव यशस्वी करण्यासाठी गाटे गल्ली, माळी गल्ली भजनी मंडळासह येथील भाविकांनी परिश्रम घेतले. दत्त जयंती निमित्त रविवारी सकाळी भक्तांना महाप्रसादाचे वाटप करण्यात येणार आहे.
