तुळजापूर ,दि . १०
वात्सल्य सामाजिक संस्थेने सुरू केलेल्या ग्रंथालयामुळे मंगरूळ ता .तुळजापूर परिसरातील विद्यार्थी,शेतकरी,महिला,नागरीक यांच्यात वाचनाची चळवळ समृद्ध होण्यास मदत होईल असे प्रतिपादन गोवा राज्याचे लोकायुक्त न्यायमुर्ती अंबादास जोशी यांनी केले.
मुळचे पुण्याचे आणि सध्या सिडनी ऑस्ट्रेलिया येथे स्थायिक असलेले शरद कानिटकर यांनी त्यांच्या आईंच्या मृत्यूपश्चात वात्सल्य सामाजिक संस्थेस सदरील ग्रंथालय उभे करण्यास मदत केली आहे. संस्थेने मालती-माधव स्मृती ग्रंथालय असे नाव सदरील ग्रंथालयास दिले आहे.
ऑस्ट्रेलिया सिडनी येथून पाठवलेल्या शुभेच्छा संदेश मध्ये शरद कानिटकर म्हणतात की,”आमची आई श्रीमती मालती माधव कानिटकर 1987 पासून सिडनीमध्ये होती.ऑस्ट्रेलियन राहणी स्वीकारली होती. पण मन पूर्णपणे भारतीय होते.आयुष्याच्या सुरुवातीला काढलेल्या कष्टाची जाणीव ठेवून मृत्यूपश्चात लिहिलेल्या मृत्यू पत्रानुसार सामाजिक संस्थांना निधी देण्याची इच्छा व्यक्त केली होती. त्यानुसार आम्ही सामाजिक कामात वेगळी ओळख निर्माण करणाऱ्या वात्सल्य सामाजिक संस्थेस ग्रंथालय उभारणीसाठी मदत केली आहे”.
यावेळी संस्थेच्या अध्यक्षा श्रीमती प्रणिता शेटकार म्हणाल्या की सदरील ग्रंथालयात ऐतिहासिक ग्रंथ,स्पर्धा परीक्षांची पुस्तके,कथा,कादंबऱ्या तसेच वैचारिक,कला-क्रीडा आणि वैज्ञानिक क्षेत्रातील सर्व पुस्तके समाविष्ट करून सुसज्ज ग्रंथालय उभा करण्याचा प्रयत्न केला आहे.
यावेळी तुळजापूर येथील सिद्ध गरीबनाथ मठाचे महंत मावजीनाथ बाबा,अरण्य गोवर्धन मठाचे महंत व्यंकट अरण्य महाराज,ज्येष्ठ विधिज्ञ ॲड.तानाजी जगताप संस्था पदाधिकारी यांची प्रमुख उपस्थिती होती.
