अणदूर च्या खंडोबा ची बुधवार पासून यात्रा
अणदूर,दि.११: श्रीकांत अणदूरकर
तुळजापूर तालुक्यातील अणदूर येथील लेखी करारपद्धतीने देव देण्या-घेण्याची ऐतिहासिक परंपरा असलेल्या ग्रामदैवत श्री खंडोबाची यात्रा (सटीची जत्रा) बुधवारी (दि.१३) पासून सुरु होणार असून त्यानिमित्त विविध धार्मिक कार्यक्रमाचे आयोजन करण्यात आले आहे.
बुधवारी पहाटे चार वाजता काकडा आरतीनंतर परिसरातील भाविक दंडवत घालून आपापले नवस फेडतात.सकाळी 9 वा.श्रींंच्या मुर्तीला अभ्यंगस्नान घालून अभिषेक व विविध धार्मिक विधी पुर्ण करण्यात येतात.दिवसभर मंदिरात भाविक तळीभंडार उचलणे,ओटी भरणे,भंडार-खोबरे उधळणे,लहाण मुलांचे जावळ काढणे,लंगर तोडणे,नवीन मुरळी, वारुंना दिक्षा देणे आदी कार्यक्रम सुरु असतात.सायंकाळी मानाची काठी मिरवणुक,वाघ्या-मुरळी नृत्य,धनगरी ओव्या गायनाचा कार्यक्रम होणार आहे.या निमित्य अणदूर चे रहिवासी पण कामधंदा, नोकरी निमित्य बाहेरगावी असलेली मंडळी आवर्जून यात्रे साठी गावी येतात त्याला देव घालवणे असे म्हणतात.
रात्री दहा वाजता श्रींं ची अश्वरुपी सवाद्य छबीना मिरवणूक काढून मंदिराला दोन प्रदक्षिणा घातल्या जातात.यावेळी हलगीच्या तालावर खंडोबाचे वारु बेभान होवून नाचतात.हे विलोभनीय दृष्य पाहण्यासाठी परिसरातील भाविक मोठ्या प्रमाणात उपस्थित राहातात छबीना मिरवणुकीनंतर जेष्ठ वारुकडून आगामी वर्षाची भाकनूक(भविष्य) सांगितले जाते.रात्री बारा वाजता नळदुर्गचे मानकरी श्रींंच्या मुर्तीला मैलारपूर येथे नेण्यासाठी सवाद्य मिरवणुकीने येतात.यावेळी त्यांचे स्वागत करुन यात्रा कमिटीच्या वतीने मानपान देवून दोन गावांमध्ये देव देण्या-घेण्याचा करार होवून दोन्ही गावातील पंचाच्या सह्या होतात.त्यानंतर महाआरती होते.मैलारपूर(नळदुर्ग) येथे पौष पौर्णिमेदिवशी होणार्या उत्सवासाठी हेगडी प्रधानांंसह म्हाळसादेवीच्या मुर्तीचे प्रस्थानानंतर श्रींंच्या मुर्तीला पालखीतून निरोप देण्यात येतो. रवि गुरुवारी(दि.१४) पहाटे पाच वाजता मैलारपूर येथील मंदीरात मुर्तीची प्रतिष्ठापना करण्यात येणार आहे. यात्रेनिमित्त मंदिरावर लक्षवेधक व आकर्षक विद्युतरोषणाई करण्यात आली आहे.यात्रेची सर्व तयारी पूर्ण झाली असून भाविकांनी व ग्रामस्थांनी सहकार्य करावे असे आवाहन देवस्थान ट्रस्ट व यात्रा कमिटीच्या वतीने करण्यात आले आहे.
जंगी कुस्त्यांचे आयोजन
कोरोना च्या प्रदीर्घ विश्रांतीनंतर श्री खंडोबा यात्रेनिमित्त गुरुवारी (दि.१४) जवाहर महाविद्यालयाच्या कुस्ती आखाड्यात भव्य कुस्त्यांचा फड होणार आहे.त्यामध्ये महाराष्ट्रातील नामवंत मल्ल सहभागी होणार आहेत. या कुस्ती स्पर्धेत १०० रुपये पासून 1 लाख रूपये पर्यंतच्या कुस्त्या होणार आहेत.या कुस्त्याची जय्यत तयारी झाली असून,सर्व पक्षीय ग्रामस्थांचा व तरुणांचा फार मोठा सहभाग या कुस्ती स्पर्धेत दिसून येत आहे त्यामुळे या वेळेच्या कुस्त्या जंगी होणार आहेत.