खेळ रंगला पैठणीचा- होम मिनिस्टर कार्यक्रमास ग्रामीण भागात महिलांचा उत्स्फूर्त प्रतिसाद
नळदुर्ग,दि.४:
खेळ रंगला पैठणीचा- होम मिनिस्टर कार्यक्रमात ग्रामीण भागातील महिला भगिनींनी सहभागी होवून मनमुराद आनंद लुटला. खास महिला वर्गासाठी शहापूर ता.तुळजापूर या गावात दि.३ ऑक्टोंबर रोजी राष्ट्रवादीचे नेते अशोक जगदाळे आयोजित खेळ रंगला पैठणीचा- होम मिस्टर या कार्यक्रमास महिलांची गर्दी उसळली होती.
तुळजापूर विधानसभा मतदारसंघातून निवडणूकीसाठी इच्छुक असलेल्या राष्ट्रवादीचे नेते अशोक जगदाळे यांच्या तर्फे शहापूर येथील छत्रपती शिवाजी विद्यालयात गुरुवारी होम मिनिस्टर कार्यक्रमाचे आयोजन करण्यात आले होते.
कार्यक्रमात सहभागी झालेल्या महिला भगिनींना अशोक जगदाळे यांच्याकडून भेटवस्तू देण्यात आली. तसेच विविध खेळादरम्यान जिंकलेल्या ११ महिलांना आकर्षक बक्षीसे देण्यात आले.
घटस्थापना आणि नवरात्र उत्सवाचे औचित्य साधत महिलांना दैनंदिन जीवनातून स्वतःसाठी वेळ काढत मनसोक्त जगता यावं म्हणून या कार्यक्रमाचे आयोजन करण्यात आले होते. सदा सर्वकाळ पाठीशी असणाऱ्या आई तुळजाभवानीच्या आशीर्वादाने कार्यक्रमाची सुरवात झाली. या कार्यक्रमात माधुरी जगताप, अंकिता यादव या पैठणीच्या मानकरी ठरल्या. कार्यक्रमाच्या मध्यावर सहभागी झालेल्या बंजारा भगिनींनी पारंपारिक वेशभूषा करत बाहरदार नृत्य सादर केले.
या कार्यक्रमाच्या माध्यमातून महिलांना हक्काचं व्यासपीठ उपलब्ध करून दिल्याबद्दल महिलांनी अशोक जगदाळे यांचे कृतज्ञता व्यक्त केली.
या कार्यक्रमाला सौ. आशाताई जगदाळे, माजी नगराध्यक्षा रेखाताई जगदाळे, माजी सरपंच उर्मिला घोराडे , ग्रा. प. सदस्य पूजा मोरे, सुरय्या पटेल, समाजसेवक नामदेव यादव, सामाजिक कार्यकर्ते देविदास नागणे, शिवसेना शाखा अध्यक्ष आप्पा मिटकर, केशेगावचे माजी सरपंच कल्याण पाटु, माजी नगराध्यक्ष नितीन कासार , कमलाकर चव्हाण, ताजुद्दीन सय्यद सावकार आदी उपस्थित होते. शहापूरसह परिसरातील गावातुन महिलांनी कार्यक्रमात सहभागी झाल्या होत्या.