अण्णासाहेब दराडे यांच्या आंदोलनाला आठवड्यातच यश ; नळदुर्ग बसस्थानकात सिमेंट काँक्रिटीकरण कामाचा शुभारंभ

नळदुर्ग, दि.०१: शिवाजी नाईक 

महाराष्ट्र राज्य परिवहन महामंडळाच्या तुळजापूर आगारा अंतर्गत  येणाऱ्या महामार्गावरील नळदुर्ग एसटी बसस्थानक आवाराच्या  सिमेंट काँक्रिटीकरण कामाचा सोमवार दि.३० सप्टेंबर रोजी दुपारी शुभारंभ करण्यात आला.अखेर अण्णासाहेब दराडे यांच्या आंदोलनाला अवघ्या आठवड्याभरात यश आल्याने त्यांचे सर्वत्र कौतुक करत अभिनंदनाचा वर्षाव होत आहे.

 गेल्या कांही वर्षांपासून व सध्या सततच्या पावसाने नळदुर्ग येथील बस स्थानकात पडलेल्या असंख्य खड्ड्यात मोठ्या प्रमाणात पाणी साचून डबके तयार झाले आहे. त्यामुळे प्रवाशांचे हाल होत आहेत. प्रवाशांचे होणार हाल पाहून अण्णासाहेब दराडे यांनी गेल्या आठवड्यात बुधवारी सायंकाळी  नळदुर्ग बस स्थानकातील एका डबक्यात चक्क बैठक मारून प्रशासनाचा निषेध केला होता.
त्यावेळी नळदुर्ग एसटी बस स्थानकात प्रवाशांची मोठ्या प्रमाणात बघ्यांचीही गर्दी झाली होती. अण्णासाहेब दराडे यांनी खड्ड्यातील पाण्यात चक्क मांडी घालून बसत प्रशासनावर टीकेचे आसूड ओढले होते .

शासनाच्या विविध विभागातील भ्रष्टाचार, ग्रामीण भागातील रस्ते, वीज, पाणी या मूलभूत सुविधा बद्दल ही त्यांनी शासनावर टीका करत सगळ्यांचे लक्ष वेधले होते.
 
 अण्णासाहेब दराडे हे तुळजापूर विधानसभेसाठी अपक्ष इच्छुक उमेदवार आहेत. त्यांनी तुळजापूर तालुक्यातील ८० ते ९० गावांमधून मोठ्या प्रमाणात गाठीभेटी घेत प्रचाराची एक  फेरी पूर्ण केली आहे, ग्रामीण भागात त्यांना नागरिकाकडून उत्स्फूर्तपणे  प्रतिसाद मिळत आहे. कारण कुणीही "गॉडफादर" नसलेला सामान्य कुटुंबातील तरुण छोट्या छोट्या वाड्या,  तांड्यावर जाऊन, त्यांचे प्रश्न जाणून घेत आहे. ग्रामीण भागातील रस्ते, पिण्याचे पाणी व विजेचा प्रश्न गंभीर असल्याचे जाणवत असल्याचे अण्णासाहेब दराडे यांनी सांगितले.

महाराष्ट्र औद्योगीकरण महामंडळ धाराशिवचे, कार्यकारी अभियंता रमेश गुंड, उपअभियंता राजेंद्र पाटील, कनिष्ठ अभियंता मधुर पंडित, वाहतूक नियंत्रक महेश डुकरे यांच्या प्रमुख उपस्थितीत एसटी बसस्थानकात
कामाचा शुभारंभ करण्यात आला.यावेळी प्रवाशी, नागरिक उपस्थित होते.

 
Top