🌿 हरित धाराशिव अभियानाला लोहगावातून हिरवी सुरुवात; ३० हजार रोपांच्या लागवडीचा शुभारंभ

🌿 हरित धाराशिव अभियानाला लोहगावातून हिरवी सुरुवात; ३० हजार रोपांच्या लागवडीचा शुभारंभ

नळदुर्ग, दि. २० जुलै :

पर्यावरण संवर्धन, जैवविविधतेचे संरक्षण आणि हरित क्षेत्रात वाढ करण्याच्या उद्देशाने राबविण्यात येत असलेल्या 'हरित धाराशिव' अभियानाला तुळजापूर तालुक्यातील लोहगाव शिवारातून उत्साहात प्रारंभ झाला. 

वन विभागाच्या पुढाकारातून एक हेक्टर क्षेत्रावर विविध प्रजातींच्या ३० हजार रोपांच्या लागवडीचा शुभारंभ सोमवारी (दि. २०) लोकनियुक्त सरपंच प्रवीण बसवराज पाटील यांच्या हस्ते करण्यात आला.

या अभियानाअंतर्गत परिसरात फुले, फळे, औषधी वनस्पती, शेवगा, आपटा, करंजीसह पर्यावरणासाठी उपयुक्त आणि स्थानिक हवामानाशी सुसंगत अशा विविध प्रजातींची मोठ्या प्रमाणावर लागवड करण्यात येणार आहे. या उपक्रमामुळे परिसरातील हरित क्षेत्रात वाढ होण्याबरोबरच जैवविविधतेचे संवर्धन, मृदसंवर्धन, भूजलपातळी सुधारणा आणि पर्यावरण संतुलन राखण्यास मोठी मदत होणार असल्याचे वन विभागाच्या अधिकाऱ्यांनी सांगितले.

यावेळी बोलताना सरपंच प्रवीण बसवराज पाटील यांनी वृक्षलागवड ही केवळ औपचारिकता नसून प्रत्येक नागरिकाने लावलेल्या रोपांचे संगोपन करणे ही सामूहिक जबाबदारी असल्याचे सांगितले. शासनाच्या हरित अभियानाला ग्रामस्थांनी सक्रिय सहकार्य करून लोहगाव अधिक हिरवेगार करण्याचा निर्धार व्यक्त केला.

या कार्यक्रमास वन अधिकारी संगीता शिरसे, प्रतिष्ठित नागरिक सुरेश पाटील, सुधाकर देशमुख, संजय स्वामी, वनमजूर शिवाजी पवार, विनायक पवार, वाल्मिक पांढरे, पिराप्पा मुळे, दत्तु

 बनसोडे, डी. एम. जाधव यांच्यासह ग्रामस्थ मोठ्या संख्येने उपस्थित होते.

हरित धाराशिव अभियानांतर्गत होणारी ही व्यापक वृक्षलागवड भविष्यात पर्यावरण संरक्षणाबरोबरच ग्रामीण भागात स्वच्छ, हिरवे आणि समृद्ध वातावरण निर्माण करण्यासाठी महत्त्वाची ठरणार असल्याची भावना यावेळी उपस्थितांनी व्यक्त केली.