🚨 अतिक्रमणामुळे नळदुर्गचा मुख्य रस्ता जाम!बसस्थानकासमोरील अतिक्रमण हटवा; अन्यथा उपोषणाचा इशारा; सकल हिंदू समाजाचे मुख्याधिकाऱ्यांना निवेदन; वाहतूक कोंडीमुळे नागरिक संतप्त

🚨 अतिक्रमणामुळे नळदुर्गचा मुख्य रस्ता जाम!

बसस्थानकासमोरील अतिक्रमण हटवा; अन्यथा उपोषणाचा इशारा; सकल हिंदू समाजाचे मुख्याधिकाऱ्यांना निवेदन; वाहतूक कोंडीमुळे नागरिक संतप्त

नळदुर्ग, दि. ८ जुलै : 

नळदुर्ग शहरातील अक्कलकोट रोड बसस्थानकासमोरील वाढत्या अतिक्रमणामुळे वाहतूक कोंडीचा प्रश्न दिवसेंदिवस गंभीर बनत असून, नागरिकांच्या सुरक्षिततेचा प्रश्नही ऐरणीवर आला आहे. या पार्श्वभूमीवर सकल हिंदू समाजाच्या वतीने बुधवार (दि. ८) रोजी नगर परिषदेचे मुख्याधिकारी यांना निवेदन देऊन तातडीने अतिक्रमण हटविण्याची मागणी करण्यात आली. अन्यथा तीव्र आंदोलनासह उपोषण छेडण्याचा इशाराही देण्यात आला आहे.

निवेदनात म्हटले आहे की, अक्कलकोट रोडवरील व  बसस्थानक परिसर हा शहरातील सर्वाधिक वर्दळीचा भाग असून येथे दररोज शाळकरी विद्यार्थी, महिला, ज्येष्ठ नागरिक तसेच हजारो नागरिकांची ये-जा असते. मात्र मच्छी विक्रेते, फळ विक्रेते, हातगाड्या, इतर व्यावसायिक आणि रस्त्यावर ठेवण्यात आलेल्या साहित्यामुळे मुख्य रस्ता अरुंद झाला आहे. त्यामुळे पादचाऱ्यांना सुरक्षितपणे चालणेही धोकादायक बनले आहे.

अक्कलकोट रोड आणि शहरात प्रवेश करणा-या   मुख्य मार्गावर  चारचाकी व दुचाकी वाहनेही रस्त्यावर अव्यवस्थित उभी केली जातात. परिणामी वारंवार वाहतूक कोंडी निर्माण होत असून बस, रुग्णवाहिका, शालेय वाहने आणि अत्यावश्यक सेवांच्या वाहनांनाही मार्ग काढताना मोठ्या अडचणींचा सामना करावा लागत आहे. यामुळे अपघाताचा धोका वाढत असून नागरिकांच्या जीवितालाही धोका निर्माण झाला असल्याचे निवेदनात नमूद करण्यात आले आहे.

सदर ठिकाणी तात्काळ पाहणी करून सर्व अतिक्रमणांवर नियमानुसार कारवाई करावी, रस्ता वाहतुकीसाठी मोकळा करावा तसेच अवैध पार्किंग करणाऱ्यांवर कठोर कारवाई करावी, अशी मागणी निवेदनाद्वारे करण्यात आली आहे.

प्रशासनाने या प्रश्नाकडे दुर्लक्ष केल्यास येत्या काळात लोकशाही मार्गाने तीव्र आंदोलनासह बेमुदत उपोषण करण्यात येईल, असा इशाराही सकल हिंदू समाजाच्या वतीने देण्यात आला आहे. निवेदनावर सकल हिंदू समाजाचे गणेश मोरडे, अजित सुमार, सुनिल गव्हाणे, विजय ठाकूर यांच्या स्वाक्षऱ्या आहेत.

नळदुर्ग अक्कलकोट रोड बसस्थानकासमोरील अतिक्रमण हटविण्याच्या मागणीसाठी नगर परिषद मुख्याधिकाऱ्यांना निवेदन देताना सकल हिंदू समाजाचे पदाधिकारी