"तालुक्यात 'ऑपरेशन टायगर'ची चाहूल?; बडा नेता उडीच्या तयारीत, राजकीय कॅलक्युलेटर झाले हँग!"
📍नळदुर्ग, दि. ६ जुलै : शिवाजी नाईक
तुळजापूर तालुक्याच्या राजकारणात सध्या चहाच्या टपरीपासून व्हॉट्सॲप ग्रुपपर्यंत एकाच चर्चेने धुरळा उडवला आहे. "कोण जाणार? कधी जाणार? आणि किती जणांना सोबत घेऊन जाणार?" या प्रश्नांनी राजकीय जाणकारांचे गणितच बिघडले आहे. कारण तालुक्यातील एक बडा राजकीय नेता आपल्या समर्थकांच्या ताफ्यासह शिवसेना शिंदे गटात प्रवेश करण्याच्या तयारीत असल्याची जोरदार चर्चा रंगली आहे.
राज्यात "ऑपरेशन टायगर"ची चर्चा अजून थंडावलेली नसतानाच आता त्याचे वारे तुळजापूर तालुक्यापर्यंत पोहोचल्याचे बोलले जात आहे. त्यामुळे काही जणांनी आपले राजकीय "बॅगा-पिशव्या" आवरायला सुरुवात केली आहे, तर काही जण अजूनही "थांबा... पाहू काय होतं!" या भूमिकेत असल्याचे चित्र आहे.
धाराशिव जिल्ह्यातील राजकीय घडामोडींनंतर तालुक्यातील या संभाव्य प्रवेशामुळे अनेकांचे राजकीय अंदाज पुन्हा बदलू लागले आहेत. संबंधित नेत्याचे तालुक्यात मोठे संघटन, प्रभावी समर्थकवर्ग आणि विविध संस्थांमध्ये प्रभाव असल्याने हा प्रवेश झाला, तर अनेक संस्थांतील समीकरणे बदलण्याची शक्यता व्यक्त केली जात आहे.
दरम्यान, राजकीय वर्तुळात एक विनोदी चर्चा रंगली आहे—"नेत्यांच्या बैठका जास्त आणि चहाचा खर्च त्याहून जास्त!" काही कार्यकर्त्यांचे मोबाईल सतत व्यस्त, तर काहींच्या चेहऱ्यावर रहस्यमय स्मित पाहून गावोगावी तर्क-वितर्कांना उधाण आले आहे.
एकेकाळी काँग्रेसचा बालेकिल्ला म्हणून ओळखला जाणारा तुळजापूर तालुका आज भाजपच्या प्रभावाखाली असल्याचे चित्र आहे. अशा परिस्थितीत हा संभाव्य राजकीय भूकंप झाला, तर तालुक्यातील सत्ता समीकरणांना नवे वळण मिळू शकते, अशी चर्चा सुरू आहे
सध्या मात्र संबंधित नेत्याच्या समर्थकांच्या बैठका सुरू असून, अंतिम निर्णयाची सर्वांनाच उत्सुकता लागली आहे. राजकारणात "आजचा विरोधक उद्याचा सहकारी" आणि "आजचा सहकारी उद्याचा प्रतिस्पर्धी" होऊ शकतो, हे पुन्हा एकदा सिद्ध होणार का, याकडे तालुक्याचे लक्ष लागले आहे.
