जिल्हाध्यक्ष शहाबाज काझी यांच्या पुढाकाराने गरजूंना मदतीचा हात; समाजोपयोगी उपक्रमांनी अनोखा वाढदिवस साजरा
नळदुर्ग, दि. १२ ऑगस्ट :
वाढदिवस म्हणजे केवळ केक कापणे, फटाके आणि जल्लोष नव्हे, तर समाजातील गरजूंप्रती आपली जबाबदारी पार पाडण्याची संधीही असते, याचा प्रत्यय बुधवारी नळदुर्ग येथे आला. एमआयएमचे प्रदेशाध्यक्ष इम्तियाज जलील यांच्या वाढदिवसानिमित्त जिल्हाध्यक्ष शहबाज काझी यांच्या पुढाकारातून गरजू महिलांना साड्यांचे वाटप आणि उपजिल्हा रुग्णालयातील रुग्णांना फळांचे वितरण करून सामाजिक बांधिलकी जपणारा उपक्रम राबविण्यात आला.
धाराशिव जिल्हा एमआयएमच्या वतीने आयोजित या उपक्रमात शहरातील आर्थिकदृष्ट्या दुर्बल महिलांना साड्यांचे वाटप करण्यात आले. महिलांच्या चेहऱ्यावरील समाधान आणि आनंदाने कार्यक्रमाला भावनिक स्वरूप प्राप्त झाले. वाढदिवसाचा आनंद गरजूंशी वाटून घेण्याचा संदेश या उपक्रमातून प्रभावीपणे देण्यात आला.
यानंतर पदाधिकारी व कार्यकर्त्यांनी नळदुर्ग उपजिल्हा रुग्णालयात भेट देत उपचार घेत असलेल्या रुग्णांना फळांचे वाटप केले. रुग्णांची विचारपूस करून त्यांच्या प्रकृतीची चौकशी करत त्यांना मानसिक आधार देण्याचाही प्रयत्न करण्यात आला. या उपक्रमामुळे रुग्णांसह त्यांच्या नातेवाईकांनीही समाधान व्यक्त केले.
या प्रसंगी एमआयएमचे पदाधिकारी, कार्यकर्ते आणि स्थानिक मान्यवर उपस्थित होते. समाजोपयोगी उपक्रमांच्या माध्यमातून वाढदिवस साजरा करण्याच्या संकल्पनेचे उपस्थितांनी स्वागत करत जिल्हाध्यक्ष शहबाज काझी यांच्या पुढाकाराचे कौतुक केले.
अनावश्यक खर्चाला फाटा देत वाढदिवसाच्या निमित्ताने गरजूंना मदतीचा हात देण्याचा संदेश देणारा हा उपक्रम सामाजिक संवेदनशीलतेचे आणि लोकाभिमुख कार्यपद्धतीचे उदाहरण ठरला.
