पालकमंत्री चव्हाण यांच्या पाठपुराव्यामुळे मराठवाड्यात चारा छावणीसाठी अनामत रक्‍कम दोन लाख रुपये

उस्मानाबाद -: टंचाईग्रस्त भागात चारा छावण्यांसाठी असणारी पाच लाख रुपये अनामत रकमेची अट पालकमंत्री मधुकरराव चव्हाण यांच्यामुळे केवळ मराठवाड्यासाठी शिथील करण्यात आली आहे. आता मराठवाड्यातील भागासाठी अनामत रकमेची अट दोन लाख रुपये इतकी ठेवण्यात आली आहे.
       उस्मानाबाद जिल्ह्यासह जालना, बीड आणि औरंगाबाद जिल्हा टंचाईचा सामना करतो आहे. राज्य शासनाने चारा छावण्यांसाठी अनामत रकमेची अट पाच लाख रुपये ठेवल्याने छावण्या सुरु करण्यासाठी या भागात कोणी पुढे येत नसल्याचे चित्र निर्माण झाले होते. त्या पार्श्वभूमीवर नुकतीच मुंबई येथे मदत व पुनर्वसन मंत्री डॉ. पतंगराव कदम यांच्य़ा अध्यक्षतेखाली मंत्री उपसमितीची बैठक झाली. त्या बैठकीत पालकमंत्री चव्हाण यांनी ही वस्तुस्थिती या समितीसमोर मांडून चारा छावण्यांबाबतची अनामत रकमेची अट मराठवाड्यासाठी शिथील करण्याची मागणी केली. त्यास डॉ. कदम यांनी मान्यता दिल्याने टंचाईच्या काळात जिल्ह्यातील पशुधन वाचविण्यासाठी अधिकाधिक संस्था पुढे येण्याची शक्यता आहे. मराठवाड्यासाठी ही अट आता दोन लाख रुपये इतकी करण्यात आली आहे.
          सध्या उस्मानाबाद जिल्हा प्रशासनाने जिल्ह्यात ७ चारा छावण्यांना मंजूरी दिली आहे. त्यापैकी भूम तालुक्यात चार छावण्या कार्यान्वित झाल्या आहेत तर मराठवाड्यात ३४ चारा छावण्या मंजूर करण्यात आल्या असून त्यापैकी १४ कार्यान्वित झाल्या आहेत.
याशिवाय, राज्यात गाई-म्हशींची उत्पादकता वाढविण्यासाठी सर्वसमावेशक अनुवंशिक सुधारणा कार्यक्रम अशी योजना यावर्षीपासून राज्यात राबविण्यासही राज्य मंत्रीमंडळाने नुकतीच मंजूरी दिली आहे. राज्यातील दुग्धोत्पादनात वाढ होण्याच्या दृष्टीने पालकमंत्री चव्हाण यांनी या योजनेसाठी आग्रह धरला होता.  

कुक्कुट पालन व्यवसायास गती देण्यासाठी अनुदानीत नव्या योजनेस मान्यता

उस्मानाबाद -: राज्यातील कुक्कुट पालन व्यवसायास गती देण्यासाठी १२ व्या पंचवार्षिक योजनेत कुक्कुट पालन व्यवसाय सुरु करण्याच्या नवीन योजनेस मुंबईत बुधवारी झालेल्या मंत्रिमंडळाच्या बैठकीत मान्यता देण्यात आली. ज्या जिल्ह्याचा मानव विकास निर्देशांक कमी आहे, अशा शेवटच्या ५ जिल्ह्यांमध्ये ही योजना सन २०१२-१३ मध्ये राबविण्यात येणार आहे. पुढील कालावधीत उपलब्ध निधी विचारात घेऊन वरील निकषानुसार इतर जिल्हयांमध्ये या योजनेची व्याप्ती वाढविण्यात येणार आहे.
      ग्रामीण भागात या व्यवसायाद्वारे होणारी रोजगार निर्मिती तसेच कुक्कुट व्यवसायाच्या योजनेस मागील वर्षी लाभार्थ्याकडून मिळालेला मोठा प्रतिसाद, ही बाब विचारात घेवून विषयाधीन योजना मंजूर करण्यात आलेली आहे. या योजनेत एक हजार कुक्कुट पक्षांचे संगोपन करावयाच्या या योजनेंतर्गत खुल्या प्रवर्गातील लाभार्थ्यांना प्रती युनिट २ लाख २५ हजार रुपये प्रकल्प खर्चाच्या ५० टक्के म्हणजेच १ लाख १२ हजार ५०० रुपये मर्यादेत अनुदान देण्यात येईल. अनुसुचित जाती उपयोजना व आदिवासी उपयोजनेतून अनुसुचित जाती, जमातीं या लाभार्थ्यांना प्रकल्प खर्चाच्या ७५ टक्के म्हणजेच १ लाख ६८ हजार ७५० रुपये मर्यादेपर्यंत अनुदान देण्यात येईल. खुल्या प्रवर्गातील लाभार्थ्यांना ५० टक्के तसेच अनुसुचित जाती जमातीच्या लाभार्थ्यांना २५ टक्के रक्कम स्वत: अथवा वित्तीय संस्थांकडून कर्ज घेऊन उभी करावी लागणार आहे. लाभार्थ्यांना कुक्कुट पक्षी पालनाचे आवश्यक ते प्रशिक्षण देण्यात येणार असून आवश्यक ती पशु वैद्यकीय सेवा व तांत्रिक मार्गदर्शन करण्यात येणार आहे.  निवड झालेल्या लाभार्थ्यांना प्रती वर्षी ५ ते ६ बॅचेसमध्ये कुक्कुट पक्षाचे संगोपन करावयाचे आहे.  प्रत्येक बॅच १००० पक्षांची राहील.  प्रत्येक बॅच करिता आवश्यक त्या निविष्टा म्हणजेच एक दिवशीय कुक्कुट पक्षी, पक्षी खाद्य, औषधे आदी स्वखर्चाने उपलब्ध करून घेऊन ४५ ते ५० दिवसानंतर पक्षांच्या विक्रीची व्यवस्था लाभार्थ्यांना स्वत: करावी लागेल. यापूर्वी सुरु असलेली कंत्राटी पध्दतीने कुक्कुटपालन व्यवसाय रद्द करून त्याऐवजी ही नवीन योजना सुरु करण्यात आली आहे.
    लाभार्थ्यांची निवड करण्यासाठी जिल्हाधिकारी यांच्या अध्यक्षतेखाली लाभार्थी निवड समिती करण्यात येणार आहे.

बाल कामगार क्रिडा स्पर्धेचे प्रा.ढोबळे यांच्‍या हस्ते बक्षिस वितरण

सोलापूर : राज्याचे पाणीपुरवठा व स्वच्छता मंत्री तथा जिल्ह्याचे पालकमंत्री प्रा. लक्ष्मण ढोबळे यांच्या हस्ते बाल कामगार प्रकल्पाद्वारे आयोजित बाल कामगार क्रिडा स्पर्धेच्या बक्षिस वितरणाचा कार्यक्रम सुशिलकुमार शिंदे शारिरीक शिक्षण महाविद्यालय प्रांगणात पार पडला.
    स्पर्धेत घेण्यात आलेल्या सहा वैयक्तिक आणि तीन सांघीक क्रिडा प्रकारांमध्ये बाल कामगार प्रकल्पातील ९ ते १४ वयोगटातील ६५० मुला-मुलींनी आपला सहभाग नोंदवला होता. तर शिक्षकांसाठी संगीत खुर्ची स्पर्धेचे आयोजन करण्यात आले होते.
    यावेळी मुलांना मार्गदर्शन करतांना पालकमंत्री प्रा. ढोबळे यांनी या प्रकल्पास शुभेच्छा देऊन येथील विद्यार्थ्यांच्या क्रिडागुणांचे कौतुक करत पाठीवर शाबासकीची थाप दिली. प्रकल्प संचालीका तसेच येथील शिक्षकांच्या मेहनतीचे आणि एकूणच त्यांच्याकडून पार पाडल्या जात असणा-या चांगल्या जबाबदारीबद्दल आभार मानले. 
    प्रकल्प संचालीका अपर्णा कांबळे यांनी या प्रकल्पाची व घेण्यात आलेल्या क्रिडा स्पर्धांची माहिती आपल्या भाषणातून दिली.
    कार्यक्रमास जिल्हा परिषदेचे माजी अध्यक्ष बळीराम साठे,  मगर आणि बाल कामगार प्रकल्पातील शिक्षकवृंद व विद्यार्थी उपस्थित होते.

लोकशाही दिनाचे स्वरुप बदलले

उस्मानाबाद -: प्रत्येक महिन्याच्या पहिल्या सोमवारी लोकशाही दिनाचा उपक्रम आयोजित करण्यात येतो. उस्‍मानाबाद जिल्हाधिकारी कार्यालयात सोमवार दि. ४ फेब्रुवारी रोजी सकाळी १० वाजता लोकशाही दिनाचे आयोजन करण्यात आले आहे. सर्व नागरीकांनी याची नोंद घ्यावी तसेच संबंधित यंत्रणांच्या प्रमुखांनी वेळेवर उपस्थित रहावे, असे आवाहन जिल्हा प्रशासनाच्यावतीने करण्यात आले आहे.
    सर्वसामान्य जनतेच्या तक्रारी तसेच अडचणी यांची न्याय व तत्परतेने शासकीय यंत्रणेकडून सोडवणू करण्यासाठी जिल्हाधिकारी, महानगरपालिका आयुक्त, विभागीय आयुक्त आणि मंत्रालय स्तरावर लोकशाही दिन हा उपक्रम राबविण्यात येतो यासंदर्भातील कार्यपध्दती अधिक सूलभ व्हावी, यासाठी आता तालुकास्तरावरही लोकशाही दिनाचा उपक्रम राबविण्यात येणार आहे. प्रत्येक महिन्याच्या तिस-या सोमवारी तालुकास्तरावर तर प्रत्येक महिन्याच्या पहिल्या सोमवारी जिल्हास्तरावर लोकशाही दिन हा उपक्रम राबविण्यात येणार आहे. चारही स्तरावरील लोकशाही दिनाकरीता अर्जदाराने अर्ज विहीत नमुन्यात १५ दिवस आधी २ प्रतीत पाठविणे आवश्यक ठरणार आहे.
    शासनाच्या सामान्य प्रशासन विभागाने याबाबत दि. २६ सप्टेंबर २०१२ रोजी परिपत्रक जारी केले असून यापुढील काळात विहीत नमुन्यातील अर्जच लोकशाही दिनाकरीता स्वीकारण्यात येतील, असे जिल्हाधिकारी, उस्मानाबाद यांनी कळविले आहे.
    तालुका लोकशाही दिन कार्यक्रमाचे तहसीलदार हे अध्यक्ष असतील तर जिल्हाधिकारी कार्यालयात होणा-या कार्यक्रमाचे जिल्हाधिकारी हे अध्यक्ष असतील. संबंधित स्तरावरील मुख्यालयाच्या ठिकाणी सकाळी १० वाजता हा उपक्रम आयोजित करण्यात येईल.
    संबधितानी आपले अर्ज विहीत नमुन्यात करावेत, तक्रार अथवा निवेदन वैयक्तिक स्वरुपात असावी. चारही स्तरावरील लोकशाही दिनाकरीता अर्जदाराने अर्ज विहीत नमुन्यात १५ दिवस आधी २ प्रतीत पाठविणे आवश्यक राहील. तालुका लोकशाही दिनानंतर एक महिन्याने जिल्हाधिकारी  यांच्या लोकशाही दिन कार्यक्रमात संबंधितांना अर्ज करता येईल. त्यानंतर दोन महिन्यांनी विभागीय आयुक्त लोकशाही दिन कार्यक्रमात तर विभागीय आयुक्त लोकशाही दिनानंतर दोन महिन्यानी मंत्रालय लोकशाही दिनात  अर्ज करता येणार आहे.
    या चारही स्तरावर लोकशाही दिनात न्यायप्रविष्ट प्रकरणे, राजस्व/अपील्स, सेवाविषयक तसेच आस्थापनाविषयक बाबी, विहीत नमुन्यात नसणारे व त्यासोबत आवश्यक त्या कागदपत्रांच्या प्रती न जोडलेले अर्ज, अंतीम उत्तर दिलेले आहे/देण्यात येणार आहे, अशा प्रकरणी पुन्हा त्याच विषयासंदर्भात केलेले अर्ज, तक्रार/निवेदन वैयक्तिक स्वरुपाची असेल तर असे अर्ज स्वीकारले जाणार नाहीत.
    सर्वस्तरावरील लोकशाही दिनासाठी अर्ज स्वीकृत केल्यानंतर ज्या विभागाशी संबंधित तक्रार आहे, त्या विभागाच्या विभाग प्रमुखांकडे संबंधित अर्ज पाठविण्यात येईल व सदर विभाग प्रमुख या अर्जातील कार्यवाहीच्या अहवालासह लोकशाही दिनास हजर राहतील.
    तालुका लोकशाही दिनात अर्ज करताना अर्जदारांनी स्वत:चे नाव व पुर्ण पत्ता, दूरध्वनी/मोबाईल क्रमांक, विषय, विनंती/निवेदन/तक्रारीच्या समर्थनार्थ दाखल केलेली कागदपत्रे जोडावयाचे असून सोबत तहसीलदार यांना उद्देशून अर्ज करावयाचा आहे. तालुकास्तरावरील लोकशाही दिन तहसीलदार कार्यालयात होईल. त्यावेळी मुळ अर्जासह उपस्थित रहावे. अर्जाची आगाऊ प्रत लोकशाही दिनाच्या १५ दिवस आधी पाठविणे आवश्यक आहे.
    जिल्हाधिकारी स्तरावरील लोकशाही दिनात अर्ज सादर करताना अर्जदारांने स्वत:चे नाव व पुर्ण पत्ता, दूरध्वनी/मोबाईल क्रमांक, विषय, तालुका लोकशाही दिनात अर्ज केला होता काय, असल्यास टोकन क्रमांक, तहसीलदारांकडून मिळालेले उत्तर आदि कागदपत्र जोडावयाचे असून सोबत जिल्हाधिकारी यांना उद्देशून अर्ज, तालुका लोकशाही दिनातील टोकन क्रमांकाची प्रत आणि तहसीलदारांच्या उत्तराची प्रत जोडणे आवश्यक आहे.
    लोकशाही दिनाच्या दिवशी सार्वजनिक सुटी असल्यास त्यानंतर येणारा कामकाजाचा दिवस लोकशाही दिन म्हणून पाळण्यात येईल,असे कळविण्यात आले आहे.                              

पशु साहित्य वाटप समितीची बैठक

उस्मानाबाद :- केंद्र पुरस्कृत वैरण विकास योजनेअंतर्गत  हस्तचलीत व विद्युत चलीत कडबाकुटटी यंत्राच्या वापरास  प्रोत्साहन  मिळावे, यासाठी साहित्य वाटप  अंमलबजावणीसाठी समिती गठीत केली आहे. या समितीची बैठक कुक्कुट प्रकल्प, उस्मानाबाद येथे  एक फेब्रुवारी रोजी सकाळी 11-30 वाजता होत असून यावेळी चिठ्ठ्या  टाकून सोडत पध्दतीने लकी (ड्राव्दारे) लाभार्थ्यांची निवड  करण्यात येणार आहे. प्रस्ताव सादर केलेल्या जास्तीत जास्त लाभार्थ्यांनी यावेळी हजर राहण्याचे आवाहन जिल्हा पशुसंवर्धन आयुक्त डॉ. एस. एस. भोसले यांनी केले आहे.   

विधानसभा अध्यक्ष दिलीप वळसे पाटील जिल्हा दौ-यावर

उस्मानाबाद -: महाराष्ट्र राज्य विधानसभेचे अध्यक्ष दिलीप वळसे पाटील हे शनिवार, दि. २ फेब्रुवारी रोजी उस्मानाबाद जिल्हा दौ-यावर येत आहेत. त्यांच्या कार्यक्रमाचा तपशिल पुढीलप्रमाणे आहे.
       सकाळी ८-१५ वाजता कुर्डुवाडीहून पळसप, ता. उस्मानाबादकडे प्रयाण. सकाळी १० वाजता पळसप येथे आगमन व सकाळी १० ते दुपारी १ वाजेपर्यंत स्व. वसंतराव काळे स्मृतिदिनानिमित्त आयोजित एक दिवसीय दुस-या मराठवाडा ग्रामीण साहित्य संमेलनास उपस्थिती. दुपारी १-३० वा. मोटारीने वाठवडा ता.कळंबकडे प्रयाण. 1-४० वा. वाठवडा येथे आगमन व श्रीदत्त साईमंदिर ट्रस्ट येथे सदिच्छा भेट. दु.२ वा. डोमगाव, ता. परंडाकडे प्रयाण. दु. ३-१५ वा. डोमगाव येथे आगमन व तेथील बोटींग क्लब व सभागृहाचे उदघाटन कार्यक्रमास उपस्थिती. सायंकाळी ६ वा. मोटारीने कोल्हापूरकडे प्रयाण.         

पालकमंत्री ढोबळे यांच्या हस्ते मधुकर शिंदे यांचा सत्कार

सोलापूर : येथील जिल्हा माहिती कार्यालयातील वाहन चालक मधुकर शिंदे यांच्या सेवानिवृत्ती निमित्त पालकमंत्री प्रा. लक्ष्मण ढोबळे यांच्या हस्ते शिंदे यांचा शाल, श्रीफळ व पुष्पगुच्छ देऊन भावपूर्ण वातावरणात सत्कार करण्यात आला.
    यावेळी बोलतांना पालकमंत्री म्हणाले की, शिंदे यांनी त्यांच्या ३८ वर्ष ६ महिन्याच्या सेवेच्या कालखंडात अतिशय उत्कृष्ट कामगिरी बजावली असून शेवटच्या दिवशीही ते कार्यरत राहिले यातच त्यांची कामसु वृत्ती दिसुन येते. तर जिल्हा माहिती अधिकारी गोविंद अहंकारी यांनी  शिंदे हे विभागात सर्वाधिक सेवेचा कालखंड उपभोगलेले वाहन चालक असून त्यांनी त्यांच्या संपूर्ण आयुष्यात कर्तव्याला प्राधान्य दिल्याचे सांगुन कार्यालयाच्या वतीने त्यांना पुढील भावी आयुष्यासाठी शुभेच्छा दिल्या.
    याप्रसंगी माहिती सहाय्यक फारुक बागवान, निवृत्त दुमुचा दिलीप घारगे (सांगली) यांनीही आपले मनोगत व्यक्त केले. यावेळी  माहिती सहाय्यक रुपाली गोरे, नितिन पवार, सचिन बहुलेकर, ज्ञानेश्वर कोकणे, विजयकुमार साबळे, संजय घोडके, भाऊसाहेब चोरमले, इक्बाल भाईजान, मनिषा लकडे, प्रविण पाटील यांच्यासह अनेकजण उपस्थित होते.

बार्शीच्‍या सीए उत्‍तीर्ण विद्यार्थ्‍यांचा सत्‍कार

बार्शी -: नोव्‍हेंबर महिन्‍यात घेण्‍यात आलेल्‍या सी.ए. परीक्षेत बार्शीतील पाच मुला,मुलींनी घवघवीत यश संपादन केले. या यशस्‍वी विद्यार्थ्‍यांचा बी.एन. क्‍लासेसच्‍यावतीने सत्‍कार करण्‍यात आला.
     इन्स्टिट्यूट ऑफ चार्टड अकाऊन्‍ट ऑफ इंडियाच्‍यावतीने नोव्‍हेंबर २०१२ मध्‍ये घेण्‍यात आलेल्‍या सीए च्‍या परीक्षेत उत्‍तीर्ण झालेले पाचही विद्यार्थी बी.पी. सुलाखे कॉमर्स कॉलेजमधील उच्‍च माध्‍यमिक व्‍यवसाय अभ्‍यासक्रमामधील अकौन्टिंग अँन्‍ड ऑडिटिंग विभागात शिक्षण घेतलेले आहेत. यश संपादन केलेल्‍या मोहसीन सिकंदर शेख, शेखर मस्‍के, श्रद्धा दशरथ वायचळ, सूरज जुगल, किशोर जाजू या विद्यार्थ्‍यांचा बी.एन. क्‍लोससच्‍या हॉलमध्‍ये बार्शी प्रेस क्‍लबचे अध्‍यक्ष सचिन वायकुळे यांच्‍या हस्‍ते व नायब तहसिलदार धिरज मांजंरे यांच्‍या प्रमुख उपस्थितीत सत्‍कार करण्‍यात आला. क्‍लासचे प्रमुख सुरेश बागल यांनी या सत्‍कार कार्यक्रमाचे आयोजन केले होते. उत्‍तीर्ण झालेले विद्यार्थी बी.एन. क्‍लासचे माजी विद्यार्थी आहेत. सत्‍कारमूर्ती शेखर मस्‍के, मोहसीन शेख तसेच श्रध्‍दा वायचळ यांचे वडील यांनी यावेळी मनोगत व्‍यक्‍त केले. बार्शी प्रेस क्‍लबचे अध्‍यक्ष सचिन वायकुळे, नायब तहसिलदार धिरज मांजरे, सुरेश बागली यांनीही विद्यार्थ्‍यांना मार्गदर्शन केले.
    कार्यक्रमासाठी विद्यार्थी, विद्यार्थिनी मोठ्या संख्‍येने उपस्थित होत्‍या. कार्यक्रमाचे सूत्रसंचालन व आभार विशाल गरड यांनी मानले. कार्यक्रम यशस्‍वी करण्‍यासाठी अमित देशमुख, सुशील कोळेकर यांच्‍यासह सर्व विद्यार्थ्‍यांनी परिश्रम घेतले.

बार्शीत रक्‍ताच्‍या हिशोबासाठी केलेले उपोषण चौथ्‍या दिवशी माघारी

बार्शी -: येथील इंडियन रेडक्रॉस सोसायटीच्‍या अंतर्गत रामभाई शहा रक्‍तपेढी असून सदरच्‍या ठिकाणी उपाध्‍यक्ष पदावरील असलेल्‍या कुंकूलोळ यांनी जीवनज्‍योत संघटनेच्‍यावतीने दि. २५ मार्च २०१२ रोजी लकी ड्रॉ ठेवून रक्‍ताची गैरमार्गाने विल्‍हेवाट लावल्‍याचा आरोप योगेश लोखंडे यांनी केला आहे. सदरच्‍या बाबत अनेक वेळा मागणी करुनही योग्‍य ती कारवाई न झाल्‍याने लोखंडे यांनी दि. २५ जानेवारी रोजीपासून आमरण उपोषण सुरु केले होते. उपोषणानंतर चौथ्‍या दिवशी रक्‍तपेढीच्‍या संचालकानी आठ दिवसात चौकशी करण्‍याचे आदेश करुन जिल्‍हाधिकारी यांना अहवाल सादर केला जाईल, असे लेखी आश्‍वासन दिल्‍याने लोखंडे यांनी उपोषण मागे घेतले.

जिल्हाधिकारी कार्यालयात हुतात्म्यांना अभिवादन

उस्मानाबाद :- देशाच्या स्वातंत्र्यासाठी बलिदान दिलेल्या हुतात्म्यांच्या स्मरणार्थ् येथील जिल्हाधिकारी कार्यालयात  सोमवारी दोन मिनीटे स्तब्धता पाळून त्यांना आदरांजली वाहण्यात आली. अतिरिक्त जिल्हाधिकारी ज्ञानोबा फुलारी, उपजिल्हाधिकारी बी.एस. चाकूरकर, मिनाज मुल्ला, के.ए. तडवी, चंद्रकांत सूर्यवंशी आणि शिल्पा करमरकर यांच्यासह विविध विभागांचे अधिकारी व कर्मचारी यावेळी उपस्थित होते.
विविध शासकीय कार्यालयातही हुतात्मा दिनानिमित्त दोन मिनीटे स्तब्धता पाळून हुतात्म्यांना आदरांजली वाहण्यात आली.         

कळंब येथे जिल्हास्तरीय विज्ञान व लोकसंख्या शिक्षण प्रदर्शन

उस्मानाबाद -: जिल्हा परिषदेच्या शिक्षण विभाग व जिल्हा विज्ञान मंडळ, उस्मानाबादच्या संयुक्त विद्यमाने उस्मानाबाद जिल्हा विज्ञान प्रदर्शन, शैक्षणिक साहित्य व लोकसंख्या शिक्षण साहित्य प्रदर्शन दि. ३१  जानेवारी  ते  १ फेब्रुवारीपर्यंत विज्ञान भवन हायस्कुल, कळंब येथे आयोजित करण्यात आले असून  त्याचे उदघाटन दि. ३१ जानेवारी सकाळी  ११ वाजता डॉ. प्रशांत पवार यांच्या हस्ते होणार आहे. कार्यक्रमाचे अध्यक्षस्थानी जिल्हा परिषदेचे उपाध्यक्ष संजय पाटील दुधगांवकर राहतील.
    या कार्यक्रमास प्रमुख पाहूणे म्हणून जि.प. चे सभापती पंडीत जोकार, धनंजय सावंत, दगडू धावारे, सविता कोरे, कळंब पंचायत समिती सभापती छाया वाघमोडे, उपसभापती लक्ष्मण अडसूळ, नगराध्यक्ष शिवाजी कापसे, डॉ. अशोक मोहेकर उपस्थित राहणार आहेत. या कार्यक्रमास जास्तीत जास्त लाभ घ्यावा असे आवाहन प्राथमिक शिक्षणाधिकारी एस.एम.जाधव माध्यमिक शिक्षणाधिकारी व्ही. के. खांडके, विद्याभवन हायस्कूलच्या मुख्याध्यापक व्ही. एस. पवार आणि गटशिक्षणाधिकारी के.एच. सोनवणे यांनी केले आहे.

ग्रामसेवक व ग्रामविकास अधिका-यांचा उत्कृष्ट कामाबद्दल गौरव

उस्मानाबाद :- सन २००९-१०, सन २०१०-११ व  सन २०११-१२ या वर्षात गावात शासकीय योजना उत्कृष्टपणे राबवून स्वत:चा ठसा उमटवणा-या ग्रामसेवक आणि ग्रामविकास अधिका-यांचा राज्याचे पशुसंवर्धन दुग्धविकास मंत्री तथा जिल्हयाचे पालकमंत्री ना. मधुकरराव चव्हाण यांचे हस्ते गौरव करण्यात आला. 
        स्वयंवर मंगल कार्यलयात झालेल्या या कार्यक्रमात जिल्हा परिषदेचे अध्यक्ष डॉ. सुभाष व्हटटे, उपाध्यक्ष संजय पाटील दुधगावकर, समाजकल्याण सभापती पंडित जोकार, पं.स. सभापती प्रेमलता लोखंडे,  मुख्य कार्यकारी अधिकारी एस.एल.हरिदास, उपमुख्यकार्यकारी अधिकारी (ग्रा.प.) के.डी. बोणे यांच्या  प्रमुख उपस्थितीत या ग्रामसेवक, ग्रामविकास अधिका-यांचा सत्कार करण्यात आला आहे.
     सन २००९-१० या वर्षात उस्मानाबाद तालुक्यातील इर्ला येथील ग्रामसेवक लक्ष्मण गरड यांनी गावातील लोकसहभागातून ओढयावर, नाल्यावर वनराई बंधारे बांधून उद्दिष्ट पुर्ण केल्याबद्दल, तुळजापूर तालुक्यातील पिंपळा बु. येथील प्रभाकर नलावडे यांनी तंटामुक्त गाव योजनेत सहभाग घेवन गावास रुपये ३ लाखाचे बक्षिस मिळवून दिल्यावद्दल, उमरगा तालुक्यातील कुन्हाळी येथील महारुद टाकळे यांनी पर्यावरण संतुलीत ग्राम योजना व संपुर्ण स्वच्छता अभियानांर्तत गावात उल्लेखनीय कार्य, लोहारा तालुक्यातील धानुरी येथील अंकुश काळे यांनी अध्याम्याच्या माध्यमातून गावात दारुबंदी व व्यसन मुक्तीचे काम, कळंब तालुक्यातील नायगाव येथील नवनाथ पवार यांनी संपुर्ण स्वच्छता अभियानांतर्गत उल्लेखनीय कार्य, वाशी तालुक्यातील पांगरी व घाटप्रिंप्री येथील अशोक हजारे यांनी तंटामुक्त गाव करण्याठी विशेष प्रयत्न करुन गावास ३ लाख रुपयाचे बक्षिस मिळवून दिल्‍याबद्दल, परंडा तालुक्यातील मलकापूर व रत्नापूर येथील सोमनाथ भिल्लारे यांनी पर्यावरण संतुलीत योजनेस गाव पात्र केल्याबद्दल त्यांचा पालकमंत्री चव्हाण यांच्या हस्ते सत्कार करण्यात आला.
        सन २०१०-११ या वर्षात उस्मानाबाद तालुक्यातील काजळा येथील ऋषीकेश कुलकर्णी यांनी  महात्मा गांधी तंटामुक्त गाव मोहिमेत सहभाग घेवून गावास बक्षिस मिळवून दिल्‍याबद्दल तसेच गावास निर्मल ग्राम पुरस्कार मिळवून दिलेबद्दल,  तुळजापूर तालुक्यातील वाणेगांव व आपसिंगा येथील प्रशांत भोसले यांनी संत गाडगेबाबा ग्रामस्वच्छता अभियान जिल्हयात प्रथम शाळा, २०१०-११ मध्ये वानेगाव गावास महात्मा फुले जलभुमी अभियानात प्रथम, वाणेगाव निर्मल भारत अभियानांतर्गत १०० टक्के हागणदारीमुक्त, लोकसहभागातून कोल्हापूर पध्दतीचे १५२ गेट बसविले, सानेगुरुजी स्वच्छ शाळाअंतर्गत गावास जिल्हास्तरावर पुरस्कार, सावित्रीबाई फुले स्वच्छ अंगणवाडी वाणेगाव येथील शाळा जिल्हयात तिसरी, अपसिंगा येथे महात्मा गांधी तंटामुक्त गाव विशेष शांतता पुरस्कार, हरयाली प्रकल्प यशस्वी राबविल्याने गावात हातपंप, विहीरीला दुष्काळातही पाणी असल्यामुळे गाव टॅंकरमुक्त, गावात १० टक्के कुटुंबाकडे शौचालयासह बायोगॅस जोडणी, म. ग्रा. रो. ह. योजनेअंतर्गत लोकसहभागातून १५ शेतरस्ते, अपसिंगा येथे रोपे निर्मिती करुन शासनाच्या शतकोटी वृक्षलागवडीत खारीचा वाटा उचलल्यामुळे या कामास ग्रामसचिव व प्रधान सचिव यांनी भेट देवून गौरविण्यात आले. त्यामुळे भोलसे यांचा विशेष गौरव  करण्यात आला.
       उमरगा तालुक्यातील कोराळ येथील श्रीशैल कलशेट्टी यांनी महात्मा गांधी तंटामुक्त व निर्मल ग्रामपुरस्कार गाव मोहिमेत सहभाग घेवून गावास बक्षिस मिळवून दिले. लोहारा तालुक्यातील तावशीगड येथील महादेव जगताप यांनी निर्मल ग्रामपुरस्कार मिळवून दिले. कळंब तालुक्यातील बरमाचीवाडी व अतिरिक्त शेलगाव दि. बरमाची वाडी गाव तंटामुक्त करुन शासनाचे अनुदान ग्रामपंचायतीला प्राप्त करण्याच्या कार्यास सहकार्य केले. वाशी तालुक्यातील  रुई व कन्हेरी या गावास संत गाडेबाबा ग्राम स्वच्छता अभियानांतर्गत कन्हेरी ग्रामपंचायतीला रुपये एक लाखाचे, भुम तालुक्यातील दांडेगाव येथील मच्छिंद्र मस्के यांनी महात्मा गाधी तंटासमुक्त गाव मोहिमेत सहभाग घेवून गावास बक्षिस मिळवून दिले तसेच संपूर्ण स्वच्छता अभियानात उल्लेखनीय कार्य केले आणि परंडा तालुक्यातील शेळगाव व तांदळवाडी येथील ग्रामसेवक लक्ष्मण भिसे यांनी सन २०१०-११ मध्ये आरोग्य ग्राम पुरस्कार व संत गाडगेबाबा तालुका स्तरीय प्रथम पुरस्कार मिळवून दिले.
       सन २०११-१२ या वर्षात उस्मानाबाद तालुक्यातील अंबेहोळ वा, खामगाव येथील ग्रामसेवक वसंत ढाकणे यांनी गाव ६० टक्के हागणदारीमुक्त केले. तुळजापूर तालुक्यातील तिर्थ (खु). येथील  केशव लोखंडे यांनी महात्मा गांधी तंटामुक्त गाव मोहिमेत सहभाग घेवून गावास बक्षिस मिळवून दिले. उमरगा तालुक्यातील समुद्राळ व कडदोरा येथल बालाजी निकम यांनी महात्मा गांधी तंटामुक्त गाव मोहिमेत व निर्मल ग्राम पुरस्कार मिळवून दिले. लोहारा तालुक्यातील भातांगळी येथील दत्तात्रय पवार यांनी महात्मा गांधी तंटामुक्त गाव मोहिमेत पुरस्कार मिळवून दिले. कळंब तालुक्यातील खोदला येथील राजेंद्र मिटकरी यांनी हरियाली योजना व हगणदारी मुक्ती कार्यक्रमास उल्लेखनीय कार्य केले. वाशी तालुक्यातील सोनेगाव येथील मकरंद देशमुख यांनी उर्जाबचत मध्ये सहभाग, भूम तालुक्यातील अंतरवली येथील सुरेखा भोरे यांनी निर्मल ग्राम व पर्यावरण संतुसलित ग्रामसमृध्दी योजनेत बक्षीस व प्रशस्तीपत्र प्राप्त करुन यशस्वी सहभाग आणि परंडा तालुक्यातील शेळगाव व तांदळवाडी येथील ग्रामसेवक लक्ष्मण भिसे यांनी आरोग्य ग्राम पुरस्कार मिळवून दिला. संत गाडगेबाबा तालुकास्तरीय प्रथम पुरस्कार मिळवून दिल्याबद्दल प्रमुख पाहूण्यांच्या हस्ते पुरस्कार देवून नुकतेच एका समारंभात गौरविण्यात आले आहे.

क्रीडा पुरस्कारासाठी प्रस्ताव १५ मार्चपर्यंत प्रस्ताव पाठविण्याचे आवाहन

उस्मानाबाद -: राज्य शासनामार्फत सन २०११-१२ या वर्षासाठी शिवछत्रपती राज्य, क्रीडा जीवन गौरव पुरस्कार, उत्कृष्ट क्रीडा मार्गदर्शक पुरस्कार, शिवछत्रपती राज्य क्रीडा पुरस्कार, (खेळाडू संघटक, कार्यकर्ते) राज्य क्रीडा साहसी पुरस्कार, एकलव्य राज्य क्रीडा पुरस्कार (अपंग खेळाडू), जिजामाता राज्य क्रीडा पुरस्कार देण्यात येणार आहे. पुरस्कारासाठी आवश्यक त्या माहितीसह वैयक्तिकरित्या विहित नमुन्यात अर्ज करता येईल. अधिक माहितीसाठी पुरस्काराबाबतची नियमावली व अर्ज राज्य शासनाच्या क्रीडा व युवक सेवा संचालनालयाच्या www.mahasportal.gov.in  या संकेतस्थळावर उपलब्ध आहे. या सुधारित नियमावलीतील तरतुदी विचारात घेऊन संबंधित मान्यताप्राप्त खेळांच्या अधिकृत राज्य संघटनांनी त्यांची शिफारस, आवश्यक ती कागदपत्र व संघटनेच्या ठरावासह अर्ज दि. १५ मार्च २०१३ पर्यंत आयुक्त, क्रीडा व युवक सेवा संचलनालय, मध्यवर्ती इमारत, महाराष्ट्र राज्य, पुणे-१ या पत्यावर पाठवावेत, असे जिल्हा क्रीडा अधिकारी, उस्मानाबाद यांनी कळविले आहे. अधिक माहितीसाठी जिल्हा क्रीडा कार्यालयाशी संपर्क साधावा.

बारावी परीक्षेच्या विद्यार्थी प्रवेशपत्राचे शाळांना वितरण

उस्मानाबाद -: महाराष्ट्र राज्य माध्यमिक व उच्च माध्यमिक शिक्षण मंडळ, लातूरच्या वतीने माहे फेब्रु./मार्च २०१३ मध्ये घेण्यात येणा-या उच्च माध्यमिक प्रमाणपत्र परिक्षेचे नियमित, पुनर्परीक्षार्थी व उच्च श्रेणीसुधार योजनेनुसार प्रविष्ठ होणा-या विद्यार्थ्यांची प्रवेशपत्र व प्रात्यक्षिक परीक्षेचे साहित्य गुरुवार, दि. ३१ जानेवारी रोजी जिल्हा परिषद (कन्या) प्रशाला, उस्मानाबाद येथे वितरीत करण्यात येणार आहे. संबंधित कनिष्ठ महाविद्यालयानी आपल्या  प्रतिनिधीस विद्यार्थ्यांची प्रवेशपत्र व प्रात्यक्षिके परीक्षेचे साहित्य स्वीकारण्यासाठी अधिकारपत्रासह पाठवावेत, असे आवाहन लातूर विभागीय सचिवांनी केले आहे.
      प्रात्यक्षिक व लेखी परीक्षेच्या तारखा पुढीलप्रमाणे आहेत. प्रात्यक्षिक, तोंडी /श्रेणी परीक्षा  दि. २ ते १८ फेब्रुवारीपर्यंत, लेखी परीक्षा दि. २१ फेब्रुवारी ते दि. २६ मार्चपर्यंत घेण्यात येतील याची संबधितानी नोंद घ्यावी.             

मावळत्या जिल्हाधिका-यांना निरोप तर नुतन जिल्हाधिका-यांचे स्वागत

सोलापूर -: येणारा काळ कठिण परिक्षेचा असून प्रत्येकाने निर्भयपणे आणि प्रामाणिकपणे काम करुन सर्वसामान्य जनतेची कामे करावीत अशी अपेक्षा नुतन जिल्हाधिकारी डॉ. प्रविण गेडाम यांनी आपल्या मनोगतात व्यक्त केली.
    श्री शिवछत्रपती रंगभवन येथे मावळते जिल्हाधिकारी गोकुळ मवारे यांचा निरोप समारंभ आणि नुतन जिल्हाधिकारी डॉ. प्रविण गेडाम यांच्या स्वागत समारंभाचे आयोजन करण्यात आले होते. यावेळी व्यासपीठावर पोलीस आयुक्त प्रदीप रासकर, जिल्हा पोलीस अधीक्षक, राजेश प्रधान, अप्पर जिल्हाधिकारी अशोक काकडे, निवासी उपजिल्हाधिकारी पराग सोमण, भारत वाघमारे, साहेबराव गायकवाड, दिनेश भालेदार उपस्थित होते.
    नूतन जिल्हाधिकारी डॉ. गेडाम पुढे म्हणाले की, सगळ्यांच्या सहकार्याने दुष्काळासारख्या भीषण परिस्थितीला जिल्हा प्रशासनास तोंड द्यावयाचे आहे. प्रशासनातील मागण्या निश्चितच चर्चेने सोडविल्या जातील. चांगल्या कामासाठी प्रत्येक अधिकारी - कर्मचा-याच्या पाठीशी खंबीरपणे उभे राहून प्रसंगी कठोर निर्णय गरज पडल्यास घेतले जातील असेही ते म्हणाले.
    मावळते जिल्हाधिकारी गोकुळ मवारे आपल्या मनोगतात म्हणाले की, प्रत्येकाने आयुष्यात समाधानी राहून आयुष्याकडून माफक अपेक्षा ठेवल्यास निश्चितच प्रत्येक जण सुखी होईल. सोलापूर प्रशासनातील प्रत्येक घटकाने केलेल्या सहकार्याबद्दल धन्यवाद देऊन नूतन    जिल्हाधिका-यांनाही अशीच साथ मिळेल असेही ते म्हणाले.
    पोलीस आयुक्त श्री. रासकर यावेळी म्हणाले की, शासन हे प्रशासनावर चालते गतीमान प्रशासन असल्यास शासन नक्कीच यशस्वी होते. मावळते जिल्हाधिकारी श्री. मवारे हे मृदुभाषी व अहंकार नसलेले व्यक्तीमत्व आहे. त्यांनी आपल्या वागण्यातून सर्वसामान्य जनतेसह प्रशासनातील प्रत्येक घटकाचे सकारात्मकरित्या काम केले. नुतन जिल्हाधिकारी डॉ. गेडाम धाडसी व्यक्तीमत्व असून त्यांच्या नेतृत्वाखाली हा जिल्हा नक्कीच नावलौकिक कमवेल.
     पोलीस अधीक्षक प्रधान म्‍हणाले की, प्रशासनातील सर्व घटकांनी मिळून काम केले पाहिजे. एकमेकांमध्ये संवाद ठेऊन काम केल्यास कायदा व सुव्यवस्थेचा प्रश्न निर्माण होत नाही.  याचा अनुभव मवारे साहेबांच्या काळात आपण सर्वांनी घेतला आहे. नुतन जिल्हाधिका-यांच्या काळातही इच्छाशक्ती निर्माण करुन प्रत्येकाने चांगले काम करावे यासाठी पोलीस प्रशासनाकडून लागणारी सर्व मदत केली जाईल अशी ग्वाही त्यांनी दिली.
      अप्पर जिल्हाधिकारी यांनी मवारे साहेबांच्या कामाचा झपाटा आपल्या मनोगतातून सांगितला तर नुतन जिल्हाधिका-यांचा धाडसीपणातून जिल्ह्यात नक्कीच चांगले काम होईल, असा विश्वास व्यक्त केला. निवासी उपजिल्हाधिकारी पराग सोमण यांनी माणूसकी ठेऊन काम करणारा अधिकारी या शब्दात मावळत्या जिल्हाधिका-यांबद्दल आपल्या भावना व्यक्त केल्या.    
     कार्यक्रमास सर्व विभागाचे अधिकारी - कर्मचारी आणि नागरिक उपस्थित होते.

हुतात्मा दिनानिमित्त दोन मिनिटे मौन पाळण्याचे आवाहन

मुंबई -: देशाच्या स्वातंत्र्यासाठी प्राणार्पण केलेल्या हुतात्म्यांना आदरांजली वाहण्यासाठी बुधवार दि. ३० जानेवारी रोजी  हुतात्मा दिनानिमित्त सर्व शासकीय कार्यालयांत तसेच सर्व नागरिकांनी सकाळी ११ वाजता २ मिनिटे मौन (स्तब्धता) पाळावे, असे आवाहन शासनाने केले आहे.
    संपूर्ण देशभर हुतात्मा दिनी २ मिनिटे मौन पाळून हुतात्म्यांना आदरांजली वाहण्यात येते. उद्या सकाळी ११ वाजता सर्व शासकीय, निमशासकीय कार्यालये, आस्थापना, शैक्षणिक संस्था. विद्यापीठे यामधील अधिकारी व कर्मचारी, विद्यार्थी व सर्व नागरिकांनी  दोन मिनिटे मौन (स्तब्धता) पाळून आदरांजली  वाहण्यात यावी. मौन पाळण्याची सुरूवात होण्यापूर्वी सकाळी १०.५९ मिनिटांपासून ११ वाजेपर्यंत इशारा भोंगा वाजविण्यात येईल. भोंगा संपल्यानंतर २ मिनिटांचे मौन पाळण्यात यावे. त्यानंतर इशारा भोंगा वाजविल्यानंतर मौन सोडावे.
     ज्या ठिकाणी इशारा भोंग्याची सोय नसेल त्याठिकाणी ठीक वाजता दोन मिनिटांसाठी मौन पाळावे, असेही  शासनाने सूचित केले आहे.

राष्ट्रीय इंडियन मिलिटरी कॉलेज प्रवेश पात्रता परीक्षेसाठी ३१ मार्चपर्यंत अर्ज पाठवा

मुंबई :-  राष्ट्रीय भारतीय सैन्य महाविद्यालय, डेहराडून (उत्तरांचल) प्रवेश पात्रता परीक्षा  १ व २ जून २०१३ रोजी पुणे  येथे घेण्यात येणार आहे. ही परीक्षा फक्त मुलांसाठीच आहे.
       या परीक्षेसाठी राष्ट्रीय इंडियन मिलिटरी कॉलेज, डेहराडून यांची विहित नमुन्यातील आवेदनपत्रे स्वीकारली जातील ही आवेदनपत्रे विद्यार्थ्यांना २२ जानेवारी पासून उपलब्ध आहेत. अनुसूचित जाती/ जमातीसाठी ४०५ रुपये (जातीच्या दाखल्याच्या सत्यप्रतीसह) आणि  जनरल संवर्गातील विद्यार्थ्यांसाठी ४५० रुपयांचा डिमांड ड्राफ्ट स्टेट बँक ऑफ इंडिया या बँकेच्या कमांडंट, आर.आय.एम.सी., डेहराडून, पेएबल अॅट डेहराडून (तेलभवन बँक code no.०१५७६) यांच्या नावे काढण्यात यावा.
        परिपूर्ण भरलेली आवेदनपत्रे ३१ मार्च २०१३ पर्यंत आयुक्त, महाराष्ट्र राज्य परीक्षा परिषद, १७ डॉ. आंबेडकर मार्ग, पुणे-४११००१ यांच्याकडे स्वीकारण्यात येतील. त्यानंतर आलेली आवेदनपत्रे कोणत्याही परिस्थितीत स्वीकारण्यात येणार नाहीत. २० मे २०१३ पर्यंत विद्यार्थ्यांचे प्रवेशपत्र प्राप्त न झाल्यास या कार्यालयाचा दूरध्वनी क्र. ०२०-२६१२३०६६/६७, फॅक्स क्र. ०२०-२६१२९९१९ या क्रमांकावर संपर्क साधावा. परिषदेच्या www.mscepune.in  या संकेतस्थळावरुनही विद्यार्थ्यांना प्रवेशपत्रे डाऊनलोड करता येतील. आवेदनपत्र, माहितीपत्र व ५ वर्षाचा प्रश्नपत्रिका संच आयुक्त, महाराष्ट्र राज्य परीक्षा परिषद, १७ डॉ. आंबेडकर मार्ग, पुणे-१ या कार्यालयाकडून किंवा 'राष्ट्रीय इंडियन मिलिटरी कॉलेज' डेहराडून, उत्तरांचल २४८००३ यांचे कडून प्राप्त होतील.
    या परीक्षेसाठी विद्यार्थ्यांचे वय १ जानेवारी २०१४ रोजी ११ वर्ष ६ महिने पेक्षा कमी तर १३ वर्षापेक्षा अधिक नाही असे विद्यार्थी पात्र समजण्यात येतील. विद्यार्थ्यांचा जन्म दि. २ जानेवारी २००१ ते  १ जुलै २००२ या कालावधीत असावा. विद्यार्थी दिनांक १ जानेवारी २०१४ रोजी कोणत्याही मान्यताप्राप्त शाळेमध्ये इयत्ता ७ वी च्या वर्गात शिकत असावा किंवा ७ वी पास असावा. आवेदनपत्रासोबत जन्मतारखेच्या व जातीच्या दाखल्याची (अनुसूचित जाती/ जमातीसाठी) छायांकित प्रत व शाळेचे बोनाफाईड सर्टिफिकेट दोन प्रतीत जोडणे आवश्यक आहे.
        परीक्षेसाठी इंग्रजी, गणित आणि सामान्यज्ञान या तीन विषयाचे लेखी पेपर असून यापैकी गणिताचा व सामान्यज्ञानाचा पेपर इंग्रजी अथवा हिंदीमध्ये लिहिता येईल. गणित व सामान्यज्ञान विषयांच्या प्रश्नपत्रिका इंग्रजी/ हिंदी या भाषेत उपलब्ध होतील. लेखी परीक्षेत उत्तीर्ण होणाऱ्या विद्यार्थ्यांच्या मुलाखती ७ ऑक्टोबर 2013 रोजी घेण्यात येतील, असे आयुक्त, महाराष्ट्र राज्य परीक्षा परिषद, पुणे यांनी कळविले आहे.

राज्यस्तरीय उद्योग मित्र समितीची बैठक ६ फेब्रुवारी रोजी

मुंबई :- राज्यस्तरीय उद्योग मित्र समितीची बैठक ६ फेब्रुवारी रोजी दुपारी २.३० वाजता वालचंद हिराचंद सभागृह, ४ था मजला, आय.एम.सी. बिल्डींग, आय.एम.सी.मार्ग, चर्चगेट येथे विकास आयुक्त (उद्योग) तथा अध्यक्ष, उद्योग मित्र यांच्या अध्यक्षतेखाली आयोजित करण्यात आली आहे.
    राज्यस्तरीय उद्योग मित्र समितीची सप्टेंबर २०१२ मध्ये आयोजित करण्यात आलेली बैठक काही अपरिहार्य कारणामुळे पुढे ढकलण्यात आली होती. राज्यस्तरीय महामंडळाचे मुख्य कार्यकारी अधिकारी व शासनाचे वरिष्ठ अधिकारी या बैठकीस उपस्थित रहाणार असून उद्योग संघटनांनी यापूर्वी पाठविलेले विषय विषयसूचीवर कायम ठेवण्यात आले आहेत.
      अधिक माहितीसाठी सुनिल महाजन, निमंत्रक उद्योग मित्र समिती,उद्योग संचालनालय, दुसरा मजला, नवीन प्रशासन भवन, मंत्रालयासमोर, मुंबई- ४०० ०३२ यांचेशी (दूरध्वनी क्रमांक ०२२-२२०२६७५५ किंवा फॅक्स क्र. ०२२-२२०२६८२६. email diumitra@maharashtra.gov.in) किंवा वा.दौ. देसले, उद्योग उपसंचालक (उद्योग मित्र) यांच्याशी दूरध्वनी क्र. ०२२-२२०४४१०७ वर संपर्क साधावा, असे विकास आयुक्त (उद्योग) तथा अध्यक्ष, उद्योगमित्र यांनी कळविले आहे.

टंचाईअंतर्गत पाणी पुरवठ्याकरिता ४१३.९८ कोटी रुपयांचा निधी वितरित : पतंगराव कदम

मुंबई -: राज्यातील टंचाईग्रस्त परिस्थितीच्या पार्श्वभूमीवर टंचाई निवारणासाठी उपलब्ध झालेल्या निधी पैकी पाणीपुरवठा विभागास एकूण ४१३.९८ कोटी रुपयांचा निधी वितरित केला असल्याची माहिती वनमंत्री डॉ. पतंगराव कदम यांनी मंत्रालयात आयोजित पत्रकार परिषदेत दिली.
      वनमंत्री डॉ. पतंगराव कदम पुढे म्हणाले,  पुणे विभागीय आयुक्त आणि मराठवाडा विभागाचे आयुक्त यांना आजच्या आढावा बैठकीत बोलावून दोन विभागातील पिण्याचे पाणी, रोजगार हमी योजनेची कामे, चारा छावण्या इत्यादी बाबत टंचाईग्रस्त परिस्थितीची माहिती घेण्यात आली. टँकर्सचे फिडींग पॉईंट आणि डिजिटल रोड मॅपिंगचे काम पूर्ण करण्यात आले आहे. फेब्रुवारी अखेर पाण्याची पातळी जास्त खाली गेल्यास अन्य १२८ पाँईट शोधण्यात आले आहेत. टँकर्स मधील पाणी विहिरीत न ओतण्याच्या सूचना देण्यात आल्या आहेत. टँकर्स मधील पाणी सिंटेक्स टाक्यांमध्ये ओतण्यासाठी सहकारी संस्थांकडून या टाक्या उपलब्ध करुन घेण्यात येणार आहेत. काही नळपाणी पुरवठा योजनांच्या तात्पुरत्या दुरुस्तीची कामे त्वरित हाती घेण्यात येणार आहेत. पिण्याचे पाणी पिण्यास योग्य आहे  का याचीही पाहणी करण्यात येणार आहे.
केंद्राच्या ७७८ कोटी रुपये निधीचे वितरण
     केंद्र शासनाकडून टंचाई निवारणासाठी ७७८ कोटी रु. निधी प्राप्त झाला असून शेतपिकांच्या नुकसानीसाठी ५६३.२९ कोटी फळबागांसाठी ९१.२९ कोटी चारा छावण्यासाठी ७८.८८ कोटी पाणी पुरवठयासाठी ५०.६३ कोटी रुपये निधी वितरित करण्यात येणार आहे. कापूस, सोयाबीन धान यांच्या २ हजार कोटी रुपयांच्या पॅकेजमध्ये १८९१.२ कोटी रुपये शेतक-यांच्या खात्यात जमा केले असून ९३.८ कोटी रुपये जिल्हाधिकारी यांच्याकडे शिल्लक आहेत, असे डॉ. कदम यांनी यावेळी सांगितले.
चारा वितरणासाठी ६८४.२९ कोटी रुपये वितरित
     राज्यात १२०५ गावे व ३७८९ वाड्यांसाठी एकूण १६१३ टँकर्स चालू आहेत. राज्यात एकूण ४२० चारा छावण्या आहेत त्यामध्ये ३.२६ लाख मोठी व ४२,९५९ लहान जनावरे आहेत. जनावरांची एकूण संख्या ३.८२ लाख आहे. छावण्यांवर २५६.०८ कोटी रुपये खर्च झाले असून चारा वितरणासाठी एकूण वितरित निधी ६८४.२९ कोटी रुपये इतका आहे, असेही त्यांनी यावेळी सांगितले.
नरेगा अंतर्गत १६,२८६ कामे चालू
     महात्मा गांधी राष्ट्रीय ग्रामीण रोजगार हमी योजनेंतर्गत एकूण चालू कामे १६,२८६ असून मजुरांची उपस्थिती १३४ लाख आहे. शेल्फवरील कामे ४.४८ लाख असून मजूर क्षमता २९.७६ कोटी आहे.
वनात तळ्यांची निर्मिती करणार
     डॉ. कदम पुढे म्हणाले, पिण्याच्या पाण्याच्या टंचाईमुळे मोठया प्रमाणात जनावरे खाली उतरली आहेत. ही बाब लक्षात घेऊन सिमेंटच्या टाक्यांमध्ये टॅंकर्सद्वारे  पाणी उपलब्ध करुन देण्यात येणार आहे. यापुढे भविष्यकाळात तळयांची निर्मिती करण्याचा कार्यक्रम मोठया प्रमाणात हाती घेण्यात येणार आहे. सहकारी संस्थांनी चारा छावण्या उभारण्यासाठी पुढाकार घ्यावा याकरिता छावण्यासांठी असलेल्या डिपॉझिटची रक्कम पाच लाखांवरुन दोन लाख इतकी करण्याची शिफारस उद्याच्या मंत्रिमंडळ बैठकीत करण्यात येणार आहे.

डॉ.शरद पिशवीकर विज्ञान शाळेच्‍या विविध स्‍पर्धा संपन्‍न

नळदुर्ग -: येथील आपलं घर नळदुर्ग संचलित डॉ. शरद पिशवीकर विज्ञान शाळेच्‍यावतीने तालुका स्‍तरीय शालेय विद्यार्थ्‍यांसाठी विविध स्‍पर्धांचे आयोजन करण्‍यात आले होते. या स्‍पर्धेचे उदघाटन जेऊरकर यारंच्‍या हस्‍ते झाले. तर सुलभाताई पिशवीकर, पुष्‍पाताई आगरकर, दत्‍ता गायकवाड यांची प्रमुख उपस्थिती होती. या स्‍पर्धेमध्‍ये एकूण १५ शाळेच्‍या २१० विद्यार्थ्‍यांनी सहभाग नोंदविला होता. सर्व विजेत्‍या स्‍पर्धकांना रोख रक्‍कम, पुस्‍तके व प्रशस्‍तीपत्र देऊन मान्‍यवरांच्‍या हस्‍ते सत्‍कार करण्‍यात आला. सदर स्‍पर्धाचे प्रशिक्षक म्‍हणून सुलभा चौधर, प्रा. ढवळे, प्रा. पोळे, प्रा. पवार, कोरेकर आदीनी केले. स्‍पर्धा यशस्‍वी करण्‍यासाठी आपलं घरचे व्‍यवस्‍थापक शिवाजी पोतदार, माणिक कोकणे, शिवराज सुर्यवंशी, सुनिल पुजारी, संगिता शहा यांनी परिश्रम घेतले.

श्री खंडोबाचे अणदूर येथे रविवारी प्रस्‍थान

नळदुर्ग - मैलारपूर (नळदुर्ग) येथील श्री खंडोबा यात्रेचा समारोप पालखी मिरवणुकीने झाला.मात्र श्री खंडोबाचे प्रस्थान अणदूरला होईपर्यंत भाविकांची गर्दी सुरूच असते.रविवार दि. ३ फेब्रुवारी रोजी दिवसभर श्री खंडोबा मैलारपूरात असून, मध्यरात्री अणदूरकडे प्रस्थान होणार आहे.

घरफोडीचे गुन्हयातील १९ वर्षापासुन फरार आरोपीस अटक

भूम -:  सन १९९४ मध्ये भुम पोलीसांच्‍या हद्दीत घरफोडीचा गुन्हा घडल्याने गुरनं ७६/१९९४ कलम ४६१,३८० भादंवि प्रमाणे गुन्हा दाखल होता. सदर गुन्हयातील निष्‍पन्‍न आरोपी भागवत शिवराम काळे हा सदरचा गुन्हा केल्‍यापासुन फरार होता. पोलीस त्याचा शोध घेत होते परंतु तो मिळुन येत नव्हता. सदर आरोपीविरूध्द न्यायालयाने वारंवार समंन्स व वारंन्ट काढुनही तो मिळुन येत नसल्याने जाहिरनामा काढुन त्याला फरार घोषीत केले होते.
        सदरचा आरोपी वाशी येथे त्याचे नातेवाईकांकडे देवकार्यासाठी येणार असल्याची माहिती दरोडा प्रतिबंधक पथकास मिळाल्याने दरोडा प्रतिबंधक पथकाने सापळा रचुन दि. २८ जानेवारी रोजी एका शेतामध्ये यातील फरारी आरोपी नामे भगवान षिवराम काळे रा.जोगेश्‍वरी पीडी, पारा ता. वाशी यास ताब्यात घेवुन त्याचेकडे सखोल चौकशी करून त्याला पुढील कार्यवाहीसाठी भुम पोलीसात हजर केले आहे. सदरची कामगीरी पोलीस अधिक्षक सचिन पाटील, अपर पोलीस अधिक्षक, बाळकृष्‍ण भांगे व गुन्हे शाखेचे पोलीस निरीक्षक एम.डी. गुंडीले यांच्या मार्गदर्शनाखाली दरोडा प्रतिबंधक पथकाचे पोउपनि गोमारे व त्यांचे सहकारी मधुकर घायाळ, संजय पानसे, तानाजी माळी, मोईज काझी, वाहेद मुल्ला, नाना भोसले, सुनिल कोळेकर, प्रफुल ढगे, सचिन कळसाईन यांनी केली आहे.

श्री खंडोबा यात्रेच्‍या दुर्घटनेबद्दल पालकमंत्री ना. चव्‍हाण यांना दुःख

नळदुर्ग -: श्री खंडोबा यात्रेच्‍या इतिहासामध्‍ये कधी नव्‍हे ते यंदाच्‍या वर्षी खंडोबा यात्रेत सोमवार पहाटे विजेच्‍या धक्‍क्‍याने झालेल्‍या दुर्घटनेत दोघा भाविकाना आपले प्राण गमवावे लागले. शांततेत व सुरळीत पार पडण्‍यासाठी प्रसिध्‍द असलेल्‍या मैलारपूर खंडोबा यात्रेला या दुर्घटनेमुळे गालबोट लागल्‍याने आपणास मनस्‍वी दुःख झाले आहे. यापुर्वी कसलीही दुर्घटना घडली नाही, असे सांगून पालकमंत्री ना. मधुकरराव चव्‍हाण यांनी 'तुळजापूर लाईव्‍ह' शी बोलताना हळहळ व्‍यक्‍त केली.

अनुचित प्रकार टाळण्‍यासाठी विशेष उपाययोजना करण्‍याची मागणी

नळदुर्ग -: मैलारपूर (नळदुर्ग) येथील श्री खंडोबा यात्रेत सोमवारी पहाटे छबीना निघाला असता विजेच्‍या धक्‍क्‍याने दोघा भाविकांचा करुण अंत झाला. अशी घटना घडण्‍याची यात्रेच्‍या इतिहासातील पहिली घटना ठरली आहे. गेल्‍या काही वर्षापासून खंडोबाची यात्रा मोठ्याप्रमाणावर भरत आहे. मात्र त्‍या पार्श्‍वभूमीवर विशेष उपाययोजना करण्‍यात येत नसल्‍याचे निदर्शनास येत आहे. या घटनेवरुन मंदीर समिती व प्रशासनाने बोध घेऊन भविष्‍यात अनुचित प्रकार अथवा दुर्घटना घडू नये, यासाठी उपाययोजना करण्‍याची मागणी भाविकांतून केली जात आहे.
      नळदुर्ग येथील श्री खंडोबाची यात्रा राज्‍यासह सीमेलगत असणा-या परप्रांतातही ऐतिहासिक काळापासून प्रसिध्‍द आहे. पूर्वी यात्रेकरु भाविक बैलगाडीने श्री खंडोबाच्‍या दर्शनासाठी येणारे आज आपापली वाहने घेऊन येतात. भाविकांची वाढलेली गर्दी पाहता मंदीर परिसर आज अपुरे पडत असल्‍याचे दिसत आहे. भंडारा, प्रसाद व खेळणी यासह इतर दुकाने अरुंद रस्‍त्‍यावरच थाटलेली असल्‍याने भाविकांना रहदारीसाठी रस्‍ता अपुरा पडत असल्‍याने प्रचंड दाटीवाटीने जावे लागते. श्री खंडोबाच्‍या छबीन्‍यासाठी भाविक लाखोंच्‍या संख्‍येने रविवारी मैलारपुरात मानाच्‍या काठ्यासह दाखल झाले होते. या छबीन्‍यात मानाच्‍या काठ्यासह भाविक मोठ्याप्रमाणाने सहभागी झाल्‍यामुळे प्रचंड गर्दी झाली होती. अनेक काठ्यावर विद्युत रोषणाई करण्‍यात आली होती. काठ्या भली मोठी व उंचीच्‍या असल्‍यामुळे प्रसंगी तोल जाताना अन्‍य भक्‍त त्‍यास सावरत होते. काठ्या नाचविताना मोठी तारेवरची कसरत करावी लागते. खंडोबाच्‍या नवीन मंदिरापासून निघालेला छबीना जुन्‍या खंडोबा मंदिराकडे जात असताना काही अंतरावर कोकणे यांची काठी नाचवित असताना सदरील काठी वरच्‍या बाजूस असणा-या 33 के.व्‍ही. उच्‍च दाबाच्‍या विद्युत वाहिनीस स्‍पर्श झाल्‍याने विद्युत प्रवाह काठीत उतरल्‍याने दोघेजण मृत्‍यूमुखी पडले व तिघेजण गंभीर जखमी झाले. यावेळी तात्‍काळ वीज प्रवाह बंद पडल्‍याने सुदैवाने मोठी दुर्घटना टळली. या घटनेनंतर जखमीना औषधोपचाराकरीता घटनास्‍थळावरुन हलविताना सुरक्षा यंत्रणेला किंवा मदत करु इच्छिणा-याना मोठी कसरत करावी लागली. कारण अरुंद रस्‍ते, दाटीवाटीने थाटलेली दुकाने यामुळे भाविकांना मोठ्या गैरसोयीला तोंड द्यावे लागले. मैलारपुरच्‍या खंडोबा मंदीराकडे जाणारे रस्‍त्‍याची अत्‍यंत दुरावस्‍था झाली आहे. रस्‍ते दुरुस्‍त करुन मोठे करणे गरजेचे आहे. त्‍याचबरोबर वाढत्‍या यात्रेच्‍या अनुषंगाने यापुढे तरी मंदीर समिती व प्रशासनाने खबरदारीचा उपाय म्‍हणून विस्‍तीर्ण अशी यात्रा भरविण्‍यासाठी आवश्‍यक उपाययोजना व योग्‍य नियोजन करण्‍याची मागणी भाविक, नागरिकातून केली जात आहे. केवळ यात्रा जवळ आली किंवा अणदूरहून पावणे दोन महिन्‍याच्‍या वास्‍तव्‍यासाठी श्री खंडोबा मैलारपूरला आले तर भाविकांच्‍या सोयीसाठी अमुक करु तमुक करु गप्‍पा मारण्‍याऐवजी योग्‍य नियोजन करावे, कारण वर्षभर मैलारपूर येथील मंदिरात भाविक दर्शनासाठी येत असल्‍याचे सर्वश्रूत आहे.

सैन्य भरती मेळाव्याचे आयोजन

सोलापूर -: सोलापूर येथे दि. १ ते ८ फेब्रुवारी २०१३ या कालावधीत सैन्यदलातील विविध पदासाठीच्या भरती मेळाव्याचे आयोजन करण्यात आहे. एस.आर.पी.एफ ग्रुप नं. १० परेड ग्राऊंड, सोरेगांव, सोलापूर येथे होणा-या भरती मेळाव्यात सोल्जर जीडी, सोल्जर टेक्निकल, सोल्जर टेक्निकल (नर्सिंग असिस्टंट), सोल्जर क्लर्क, स्टोअरकिपर टेक्निकल व सोल्जर ट्रेडमन (साधारण मॅट्रीक पास) या पदांचा समावेश आहे. सदर सैन्य भरतीमध्ये सेवारत सैनिकांची, माजी सैनिकांची, युध्व विधवांची, विधवांची मुले तसेच एन.सी.सी. प्रमाणपत्र धारक युवक आणि राष्ट्रीय, राज्य स्तरावर प्रथम किंवा द्वितीय क्रमांक मिळविलेले खेळाडू यांच्या भरतीचे आयोजन करण्यात आलेले आहे.
    जिल्हा निहाय भर्ती कार्यक्रम पुढीलप्रमाणे सिंधुदुर्ग व रत्नागिरी दि. १ फेब्रुवारी कोल्हापूर, सोलापूर, सातारा, सांगली, सिंधुदुर्ग, रत्नागिरी दि. २ फेब्रुवारी (सोल्जर ट्रेडमन), कोल्हापूर दि. ३ फेब्रुवारी, सातारा ४ फेब्रुवारी, सांगली ५ फेब्रुवारी, सोलापूर ६ फेब्रुवारी, वरील सर्व जिल्हे ७ फेब्रुवारीरोजी भरती कार्यक्रम राहील.
    भरती कार्यक्रम जिल्हा निहाय असून फक्त संबंधित जिल्ह्यातील उमेदवारांना भरतीच्या ठिकाणी सकाळी ४ ते ८ वा. दरम्यान प्रवेश दिला जाईल. सेवारत सैनिकांची मुले, माजी सैनिकांची मुले, वीरपत्नी, दिवंगत सैनिकांची मुले, एनसीसी प्रमाणपत्रधारक उमेदवार तसेच खोळाडू हे दि. ७ फेब्रुवारी या नियोजित तारखे व्यतिरिक्त भरतीस हजर राहू शकतील परंतु त्यांना देय होत असणारी सवलत/अतिरिक्त गुण (बोनस) दिले जाणार नाहीत. भरतीसाठी येतेवेळी उमेदवारांनी मूळ कागदपत्रे व त्यांच्या दोन झेरॉक्स प्रती राजपत्रित अधिका-याद्वारे साक्षांकित केलेल्या सोबत आणणे आवश्यक आहे. अधिक माहितीसाठी जिल्हा सैनिक कल्याण कार्यालय, सोलापूर दुरध्वनी क्र. ०२१७-२७३१०३५ येथे संपर्क साधावा.

केरोसिन कार्ड धारकांनी बँकेत त्वरीत खाते उघडावेत : संतोष भोर

सोलापूर -: सर्व केरोसिन कार्ड लाभार्थ्यांनी केरोसीन सबसिडीसाठी राष्ट्रीयकृत बँकांमध्ये आपले खाते २८ फेब्रुवारी 2013 पर्यंत उघडावे अन्यथा त्यांना बाजारभावाप्रमाणे रॉकेल खरेदी करावे लागेल असे अन्नधान्य वितरण अधिकारी संतोष भोर यांनी सुचित केले आहे.
   या संदर्भात अन्नधान्य वितरण अधिकारी कार्यालयात झालेल्या बैठकीतील सर्व झोनल अधिकारी भोर यांनी सुचना दिल्या. यावेळी लीड बँकेचे महाव्यवस्थापक माधव कोरवार उपस्थित होते.
     भोर बैठकीत सुचना देताना म्हणाले की, सर्व झोनल अधिका-यांनी पात्र केरोसीन कार्ड धरकाकडुन विहित नमुन्यातील अर्ज भरुन घ्यावेत. तसेच सर्व कार्ड धारकांनी राष्ट्रीयकृत बँकेत स्वत:चे खते शुन्य अकाऊण्ट बॅलन्सवर २८ फेब्रुवारी २०१३ पर्यंत खाते उघडुन घ्यावे. अन्यथा त्यांना अनुदानीत केरोसीन मिळणार नसुन बाराजपभावाप्रमाणे केरोसिन खरेदी करावे लागेल. यासाठी स्वत: लाभधारकांनाच जबाबदार धरण्यात येईल असेही श्री. भोर बैठकीत म्हणाले.
    श्री. कोरवार बैठकीत म्हणाले की, बँकांनी अशी खाती उघडण्यास अडचण निर्माण केल्यास संबंधित बँकेचा तसा अहवाल राज्यस्तरीय बँकर्स कमिटीकडे पाठविण्यात येईल. बैठकीस सर्व झोनल अधिकारी उपस्थित होते.

४ वर्षापासून फरार असलेले ८ अट्टल गुन्‍हेगार पोलीसांच्‍या ताब्‍यात

उस्‍मानाबाद -:  हरीण व काळविटांची शिकार करणारे आरोपी चार वर्षापासून फरार असलेल्‍या अट्टल गुन्‍हेगारांच्‍या मुसक्‍या (दरोडा प्रतिबंधक पथकाचे) पोलीसानी सापळा रचून आवळल्‍या. ही घटना सोमवार दि. २८ जानेवारी रोजी मस्‍सा (ता. कळंब) शिवारात घडली.
    नाना बिरु काळे, सुभाष बिरु काळे, राजु विलास काळे, विलास माणिक काळे, शंकर पापा काळे, शंकर आबा काळे, पाण्‍या कबु काळे (सर्व रा. मस्‍सा व अंदोरा ता. कळंब) असे फरारी लोकांना पोलीसानी ताब्‍यात घेऊन त्‍यांची सखोल चौकशी करुन पुढील कारवाईसाठी वाशी पोलीस ठाण्‍यात हजर केले आहे. याप्रकरणी २९ ऑगस्‍ट २००९ रोजी दुपारी मांडवा (ता. वाशी) शिवारात हरीण व काळविट पकडून मोटार सायकलवर घेऊन जात असल्‍याचे पोलीसाना माहिती मिळाली. त्‍यावरुन या शिकारी लोकांचा पोलीस पाठलाग करीत असताना हे पाहून सर्व शिकारी पळून जाण्‍यात यशस्‍वी झाले. याप्रकरणी वाशी पोलीस ठाण्‍यात हवालदार अशोक जगताप यांच्‍या फिर्यादीवरुन वन्‍यजीव संरक्षण अधिनियमप्रमाणे दहा गुन्‍हेगारांवर गुन्‍हा नोंद करण्‍यात आला होता. तेव्‍हापासून सदरील गुन्‍हेगार फरार होते. वन्‍यजीवन कायद्यातील फरारी आरोपींचा शोध दरोडा प्रतिबंधक पथक पोलीस अधिक्षक यांच्‍या मार्गदर्शनाखाली सोमवार रोजी घेत असताना वरील माहिती मिळाली. त्‍यावरुन मस्‍सा (ता. कळंब) शिवारात दरोडा प्रतिबंधक पथकाने सापळा रचून एका शेतामध्‍ये वरील फरारी आरोपींना पकडण्‍यात यश मिळविले. ही कामगिरी जिल्‍हा पोलीस अधिक्षक सचिन पाटील, अप्‍पर पोलीस अधिक्षक बाळकृष्‍ण भांगे, गुन्‍हे शाखेचे पोलीस निरीक्षक एम.डी. गुंडीले यांच्‍या मार्गदर्शनाखाली दरोडा प्रतिबंधक पथकाचे पोलीस उपनिरीक्षक गोमारे व त्‍यांचे सहकारी मधुकर घायाळ, संजय पानसे, तानाजी माळी, मोईज काझी, वाहेद मुल्‍ला, नाना भोसले, सुनिल कोळेकर, प्रफुल ढगे, सचिन कळसाईन यांनी पार पाडली. 

खंडोबा यात्रेत वीजेच्‍या धक्‍क्‍याने दोघा भा‍विकांचा मृत्‍यू

नळदुर्ग -: श्री खंडोबाचा छबीना मिरवणूक सुरु असताना अचानक विजेचा धक्‍का बसून दोघे भाविक ठार झाले. तर तिघेजण गंभीर जखमी झाल्‍याची घटना दि. २८ जानेवारी रोजी पहाटे पावणे चार वाजता नळदुर्गच्‍या मैलारपूर खंडोबा यात्रेत वरील दुर्दैवी घटना घडली.
         संतोष दासू चव्‍हाण (वय ३५ वर्षे, रा. वसंतनगर, नळदुर्ग), महादेव नारायण कोकणे (वय २५ वर्षे, रा. नळदुर्ग) असे दोघेजण विजेच्‍या धक्‍क्‍याने मरण पावले असून दिपक नारायण कोकणे (वय ३२ वर्षे), प्रकाश आप्‍पाराव कोकणे (वय ४२ वर्षे), सखाराम मसाजी कोकणे (वय ५८ वर्षे) तिघे रा. नळदुर्ग, असे गंभीर जखमी झालेल्‍यांची नावे आहेत. मैलारपूर येथील श्री खंडोबाच्‍या यात्रेत दुर्देवी घटनेमुळे गालबोट लागले आहे. छबिन्याच्या वेळी नंदीध्वजाची काठी नाचवत असताना वरून जाणा-या विद्युत तारेला काठीचा स्पर्श झाल्यामुळे ठिणग्या पडून, तसेच विजेचा धक्का लागून दोघांचा होरपळून मृत्यू झाला तर तिघेजण गंभीररित्या जखमी झाले.
       मैलारपूर येथील श्री खंडोबाच्‍या यात्रेस शनिवार रोजीपासून प्रारंभ झाले आहे. रविवार हा यात्रेचा मुख्य दिवस होता. यात्रेसाठी चार लाखापेक्षा अधिक भाविकांनी गर्दी केली होती. यावर्षी दुष्काळी परिस्थिती असतानाही भाविक मोठ्या उत्साहाने सहभागी झाले होते. दिवसभरात सोलापूर, लातूर, उस्‍मानाबाद जिल्‍ह्यातील गावोगावाहून मोठ्या उत्‍साहाने काठ्यांचे आगमन झाल्यानंतर रात्री बारा वाजण्याच्या सुमारास नळदुर्गच्या मानाच्या काठ्याचें आगमन झाले. त्यात कोकणे कुटुंबियाचीही काठी सहभागी झाली होती. नळदुर्गच्या काठ्यानंतर रात्री दीडच्या सुमारास अणदूरच्या मानाच्या घोड्याचे आणि पालखींचे आगमन झाले. नंतर अणदूर आणि नळदुर्गच्या मानक-यांचा देवाच्या मुर्तीसमोर फेटा बांधून मानपान करण्यात आल्यानंतर तीन वाजण्याचा सुमारास श्री च्‍या छबिन्यास सुरुवात झाली. समोर अणदूरहून आलेले दोन घोडे, नंतर श्री खंडोबाची पालखी नंतर विविध गावच्या नंदीध्वजाच्या काठ्या वाद्यासह छबिना प्रदक्षिणा घालण्यास निघाला असता पहाटे पावणे चार वाजता छाबिना चालू असताना नळदुर्गच्या कोकणे परिवाराची नंदीध्वजाची काठी नाचवत असताना सदर काठी वरून जाणा-या विद्युत तारेला चिकटल्यामुळे मोठा स्फोट झाला आणि विजेच्या ठिणग्या उडाल्या. यावेळी विजेचा मोठा धक्का लागून वसंतनगरचा संतोष चव्हाण हा जागीच मृत्यू पावला. तर दवाखान्यात नेत असताना नळदुर्गचा महादेव कोकणे हा मरण पावला. तर प्रकाश कोकणे, दीपक कोकणे, सखाराम कोकणे हे जखमी झाले. कोकणे यांच्या काठीसमवेत जनरेटरचे वाहन होते. जनरेटरवर काठीला विद्युत रोषणाई करण्यात आली होती. त्यासाठी तारेची बायडिंग वायर वापरण्यात आली होती. काठी तल्लीन होवून नाचवत असताना सदर काठी विद्युत तारेला चिकटल्यामुळे करंट उतरून हा दुर्देवी प्रकार घडला. महादेव कोकणे हा काठी नाचवत होता, तर संतोष चव्हाण हा जनरेटर वाहनांवर होता. अन्य लोक विद्युत ठिणग्या पडल्यामुळे जखमी झाले. या दुर्देवी घटनेमुळे नळदुर्ग परिसरावर शोककळा पसरली. त्‍याचबरोबर भाविक व नागरिकातून हळहळ व्‍यक्‍त केली जात आहे.
         नळदुर्ग शहराच्‍या उत्‍तर दिशेला मैलारपूर येथील बोरी नदीच्‍या काठावर खंडोबाचे मंदीर असून शाकंभरी पौर्णिमेनिमित्‍त रविवारी श्री खंडोबाच्या यात्रेस महाराष्‍ट्र राज्‍याच्‍या कानाकोप-यासह परप्रांतातून लाखो भाविक खंडोबाचे दर्शन घेण्‍यासाठी मैलारपूरात दाखल झाले होते. यावेळी खंडोबा यात्रेत निघालेल्‍या छबीना मिरवणुकीत काठी आकर्षक विद्युत रोषणाई करण्‍यात आल्‍या होत्‍या. या घटनेतील जखमीना सोलापूर येथे उपचारासाठी हलविण्‍यात आले आहे. या घटनेची खबर नारायण राम कोकणे यांनी पोलीसात दिल्‍यावरुन आकस्‍मात मृत्‍यू म्‍हणून दाखल करण्‍यात आले आहे. पुढील तपास सहाय्यक पोलीस निरीक्षक सुरेश शेटकर हे करीत आहेत.

पत्रकाराची नोकरी वेटर एवढीच भुक्कड

पत्रकार मित्रानो,
        आपल्यासाठी एक धक्कादायक बातमी आहे. अमेरिकेतील "कऱिअर कास्ट' या कंपनीने केलेल्या एका पाहणीत ज्या सर्वाधिक दहा वाईट नोक-या आहेत. त्यात पत्रकाराची नोकरी पाचव्या स्थानावर असल्याचं आढळून आलं आहे. सर्वाधिक वाईट आणि सर्वाधिक चांगल्या नोक-या कोणत्या याची पाहणी करताना करिअर कास्टला असे आढळून आले आहे की, वेटर ही सर्वात वाईट नोकरी आहे. त्या खालोखाल कपबश्या धुणारे आणि खाटीक, सुतार यांचा क्रम लागतो. त्यानंतर वाईट पत्रकाराच्या नोकरीचा क्रम लागतो. हा क्रम ठरविताना कास्टने जे निकष लावलेत त्यात शारीरिक दगदग, कामाचे वातावरण, उत्पन्न, ताण आणि रोजगार क्षमता आदिंचा समावेश आहे. या सर्वच बाबतीत पत्रकाराची नोकरी वाईट असल्याचे आढळून आले आहे. पत्रकारितेत धोके ही अधिक असल्याचे दिसून आलं आहे. या बरोबरच डिजिटल माहिती आणि माहितीचा पुरवठा मागणीप्रमाणे करण्याच्या काळात वृत्तपत्र आणि वाहिन्यासाठी वृत्तसंकलन करणा-यांची मागणी घटू लागल्याचेही या पाहणीत आढळून आलं आहे. ताण, विरळ होत जाणा-या संधी आणि अत्यल्प उत्पन्न यामुळे पत्रकारिता वंगळ नोकरीच्या यादीत गेल्याचं स्पष्ट झालं आहे. स्पॉफ्टवेअर इंजिनिअऱची नोकरी सर्वात चांगली आहे. ते सरासरी 88 हजार डॉलर्स वर्षाला कमावतात.
    पत्रकारितेत वलय दिसते, झगमगाट दिसतो. मात्र तो दिखावा आहे. वास्तवात पत्रकाराचे जीवन कमालीचे अस्थिर आणि असुरक्षित आहे. आयुष्यभर जगाच्या उठाठेवी करणा-या पत्रकारांच्या उत्तर आयुष्यात ज्या समस्यांना सामोरे जावे लागते त्या अंगावर काटा आणणा-या असतात. आयुष्यभर निष्टेनं सेवा करणारे अनेक पत्रकार निवृत्ती नंतर आज महाराष्ट्रात कोणत्या अवस्थेत जगत आहेत, हे मी बघतो आहे. महाराष्ट्र सरकार त्यांच्यासाठी काही करीत नाही. समाजानेही त्यांना वा-यावर सोडले आहे.
     आपल्याकडं लेबर लॉ असल्यानं कोणालाही कामावरून काढताना त्याला किमान कायद्यानं संरक्षण आहे. मात्र पत्रकाराला तेही संरक्षण नाही पत्रकाराची नोकरी आज आहे आणि उद्या नाही अशी स्थिती आहे. अनेक ठिकाणी पीएफ, ग्रॅच्यूएटीचंही संरक्षण पत्रकारांना नाही. जिथं आङे तिथं त्याच्या पीएफ अर्जावर स्वाक्षरी करायलाही मॅनेजमेंट टाळाटाळ करते. पत्रकारांची ही अवस्था वधु पित्यांना माहित असल्याने लग्नाच्या बाजारातही पत्रकाराला मागणी नाही. ही सारी वस्तुस्थिती असताना पत्रकार सा-या जगाची काळजी आणि जबाबदारी आपल्यावरच आहे अशा तोऱ्यात वावरत असतात ज्यांना स्वतःची काळजी करता येत नाही ते जगाची काळजी करीत राहतात ही गंमत आहे. नव्यानं पत्रकारितेत येणा-यासाठी मात्र कास्टची पाहणी हजारदा विचार करायला लावणारी आहे हे नक्की.
     अर्थात हे सारं खरं असलं तरी पत्रकारिता ही "खाज'' असल्यानं या सा-या परिस्थितीतही अनेक पत्रकार निष्टेनं काम करीत आहेत. नव्यानं पत्रकारितेत येणा-यांची संख्याही कमी नाही हे ही तेवढंच खऱं.

साभार - पत्रकार एस.एम. देशमुख 

यांच्‍या फेसबुकवरुन

उपासमारीनं पत्रकाराच्या भावाचे निधन

      ग्रामीण भागातील पत्रकारांची अवस्था किती बिकट आहे याची अंगावर शहारे आणणारी बातमी आज वाचनात आली. बातमी आहे पश्चिम बंगालमधील.चितरंजन-मिहिनाम येथील स्थानिक वृत्तपत्राचे वार्ताहर पंकज मिश्रा यांचे थोरले बंधू निरज मानसिकदृष्टया विकलांग होते. वडिल रेल्वेत होते, तोपर्यत किमान इलाज झाले. आई-वडिलांच्या मृत्यूनंतर उत्पन्नच थांबले. पंकज यांना स्थानिक वृत्तपत्रात केवळ एक हजार रूपये पगार मिळायचा.यामध्ये घऱ चालविणे शक्य नव्हते. त्यामुळे ते आपल्या भावाला पोटभर अन्न देऊ शकले नाहीत आणि त्यांच्यावर योग्य उपचारही करू शकले नाहीत. त्यामुळं अर्धपोटी आणि उपचाराअभावी निरज यांच नुकतच निधन झालं आहे. पंकज यांना रेल्वेनं अनुकंपा तत्वावर नोकरी द्यावी म्हणून त्यांनी रेल्वे कडं अर्ज केलेला आहे. पण तो अजून पडून आहे.
      पत्रकारितेची दुनिया मोहमयी आहे.मात्र या मोहमयी दुनियेतली दुसरी बाजू काळीकुट्ट आणि तेवढीच काळजी वाटावी अशी आहे. महाराष्ट्रातही किमान पन्नास ज्येष्ठ पत्रकार माझ्या माहितीत आहेत की, त्यांच्यासमोर आज मोठी आर्थिक अडचण आहे. औषधोपचारासाठीही पैसे नाहीत. पण त्याची ना समाजाला काळजी ना सरकारला. समाजाला केवळ ब्ल्रॅकमेलिंग करणारे, खंडणी मागणारे मुठभर पत्रकार दिसतात. त्यांच्या गाड्या वगैरे दिसतात. निष्ठेनं पत्रकारिता करणारे पत्रकार मोठ्या संख्येनं आहेत त्यांची दुःख मात्र कोणालाच दिसत नाहीत. त्यांच्यासाठी कोणीच काही करताना दिसत नाही. पत्रकारांनी आपला धर्म पाळला पाहिजे, अशी अपेक्षा व्यक्त करणारा समाज प्रामाणिक पत्रकाराच्या पाठिशी उभा राहताना दिसत नाही. पत्रकारिता हे सतीचं वाण खऱंच पण याचा अर्थ असा नाही की, समाजासाठी आयुष्य वेचणा-या पत्रकारांनी अन्नानं करीत मरावं. पत्रकारांच्या नावानं नेहमीच बोटं मोडणा-या समाजानं याचा विचार करावा. पत्रकारांनी आणि पत्रकार संघटनांनीच आता स्वतःसाठी काही करण्याची गरज आहे. या दृष्टीनं मी काही प्रय़त्न करीत आहे. बघू यात कितपत यश येतं ते.

साभार : पत्रकार एस.एम. देशमुख

यांच्‍या फेसबुकवरुन

आशीष नंदी यांच्‍याविरोधात अ‍ॅट्रॉसिटी कायद्यांतर्गत गुन्‍हा दाखल

जयपूर -: सध्या जयपूरमध्ये साहित्य संमेलन होत असून, हे संमेलन साहित्यापेक्षा वादग्रस्त चर्चांनी नेहमी गाजते. आता एक असाच वाद तयार झाला आहे. समाजशास्त्रज्ञ व पॉलिटिकल साइकोलॉजिस्ट आशीष नंदी यांनी शनिवारी एक वादग्रस्त वक्तव्य केले. एससी, एसटी व ओबीसी या मागासवर्गिय समाज भारतात सर्वांधिक भ्रष्टाचार करणा-यांमध्ये पुढे आहे. यांचे उदाहरण देताना त्यांनी मायावतींवर तोफ डागत हेच लोक भ्रष्टाचार पसरवत आहेत, असे वक्तव्य नंदी यांनी केले आहे. दलित आणि मागासवर्गीयांविरोधात वादग्रस्त वक्तव्य करणा-या आशीष नंदी यांच्याविरोधात अ‍ॅट्रॉसिटी कायद्यांतर्गत जयपूरमध्‍ये गुन्‍हा दाखल झाला आहे.
        ओबीसी आणि दलितांमध्ये भ्रष्टाचाराचे प्रमाण जास्त आहे, असे वादग्रस्‍त वक्तव्य समाजशास्त्रज्ञ आशीष नंदी यांनी जयपूर लिटरेचर फेस्‍टीव्‍हलमध्‍ये केले होते. नंदी यांच्या या वक्तव्यानंतर देशभरातून निषेध व्यक्त झाला.  त्यांचावर गुन्हा दाखल करावा अशी मागणीही जोर धरत होती. त्या पार्शभूमीवर हा गुन्हा दाखल झाला आहे. तर नंदी यांनी आपल्या वक्तव्याचा विपर्यास केल्याचे म्हटले आहे. मला दलित आणि मागासवर्गींयाबाबत आदर आहे, असे नंदी यांनी स्‍पष्‍टीकरण देताना सांगितले.
        दरम्यान, नंदी यांच्या वक्तव्यानंतर देशभरातून त्यांच्यावर टीकेची झोड उठली आहे. देशभरातील दलित नेत्यांनी नंदी यांचा निषेध करून त्यांच्यावर कारवाई करण्याची मागणी केली आहे. दरम्यान, जयपूर पोलिस नंदी यांच्यावर कारवाई करण्याची शक्यता आहे. दलित नेते चंद्रभान प्रसाद, रामदास आठवले, उदित राज यांनी नंदींवर सडकून टीका केली आहे.
        आशीष नंदी 'जेएलएफ'च्या तिस-या दिवशी 'रिपब्लिक ऑफ आइडियाज' या चर्चासत्रात पेट्रिक फ्रेंच, तरूण तेजपाल, रिचर्ड सोराबजी आणि आशुतोष कुमार यांच्यासोबत चर्चा करीत होते. या चर्चासत्राचे सूत्रसंचालन उर्वशी बुटालिया करीत होती. नंदी यांच्या वादग्रस्त वक्तव्यानंतर चर्चासत्रात सहभागी झालेले पत्रकार आशुतोष यांनी लागलीच विरोध दर्शिवला.
         भारत देश स्वतंत्र्य झाल्यानंतर झालेली आंदोलने व देशात श्रीमंती-गरीबी यांच्यातील दरी वाढत चालली असल्याची चर्चा सुरु होती. अशीष नंदी यावेळी सांगितले की, भारतात भ्रष्टाचार वाढत चालला आहे व त्यावर अद्याप कोणताही उपाय शोधला नाही. दुसरीकडे, जगभर भ्रष्टाचाराच्या विरोधात तेथील सरकार व लोक उपाय शोधत आहेत. सिंगापूर असा देश आहे तेथे जवळजवळ भ्रष्टाचार संपला असल्याचे म्हणता येईल.
         आशीष नंदींच्या विरोधात गुन्हा - दलितांना भ्रष्ट म्हटल्याने समाजशास्त्रज्ञ नंदींच्या विरोधात राष्ट्रीय मीणा महासभा गुन्हा दाखल करणार आहे. महासभेचे अध्यक्ष रामपाल मीणा यांनी म्हटले आहे की, दलितांच्या विरोधात भाष्य केल्याने अट्रासिटीच्या गुन्ह्यातंर्गत अशोकनगर पोलिस ठाण्यात गुन्हा दाखल करीत आहोत. तसेच गरज पडली तर, नंदी यांच्या तोंडावर काळे फासू.
           80-85 टक्के भारतीयांना शिव्या- जाट महासभेचे अध्यक्ष राजाराम मील यांनी म्हटले आहे की, जयपूर लिटरेचर फेस्टिवलमध्ये साहित्यिकांनी दलितांच्या विरोधात गैरउदगार काढू नयेत. देशात दलित व ओबीसींची संख्या 80-85 टक्के इतकी आहे आणि ते कोणत्याही भ्रष्टाचारात अडकले नाहीत. असे वक्तव्य करुन देशातील एवढ्या लोकांना शिव्या देऊ नयेत.
         ७५ वर्षीय आशीष नंदी हे बंगाली खिश्चन कुटुंबातील असून, प्रसिद्ध पत्रकार लेखक प्रितीश नंदी यांचे थोरले बंधू आहेत.

* सौजन्‍य दिव्‍यमराठी

एकही गाव पाण्यापासून वंचित राहणार नाही : पालकमंत्री चव्हाण

उस्मानाबाद -: दुष्काळी परिस्थितीत जिल्ह्यातील एकही गाव पाण्यापासून वंचित राहणार नाही. त्याठिकाणी पिण्याचे पाणी उपलब्ध करुन देण्यास शासन कटीबध्द आहे, अशी ग्वाही राज्याचे पशुसंवर्धन, दुग्धविकास व मत्स्य व्यवसायमंत्री तथा जिल्हयाचे पालकमंत्री मधुकरराव चव्हाण यांनी केले.
      येथील पोलीस संचलन मैदानावर भारतीय प्रजासत्ताक दिनाच्या ६३ व्या वर्धापनदिनाचा  मुख्य शासकीय समारंभ झाला. यावेळी पालकमंत्री  चव्हाण यांच्या हस्ते ध्वजारोहण करण्यात आले. त्यावेळी  ते बोलत होते. यावेळी ध्वजारोहणानंतर राष्ट्रध्वजास राष्ट्रीय सलामी देण्यात आली.
     आपल्या भाषणात राष्ट्रपिता महात्मा गांधी आणि स्वातंत्र्य चळवळीत बलीदान दिलेले स्वातंत्र्यसैनिक तसेच घटनाकार भारतरत्न डॉ. बाबासाहेब आंबेडकर यांचा  श्री. चव्हाण यांनी  कृतज्ञतापूर्वक उल्लेख केला.
      पालकमंत्री चव्हाण म्हणाले की, आपल्या जिल्ह्यात यंदा पुरेसा पाऊस झालेला नाही, त्यामुळे जिल्हा सध्या मोठ्या प्रमाणावर पाणीटंचाईचा सामना करीत आहे. मात्र पाणीटंचाईवर मात करण्यासाठी विहिरी, विंधन विहीरींचे  अधिग्रहण करुन तसेच टॅंकरद्वारे पाणीपुरवठा करण्याचा प्रयत्न करुन ही तीव्रता कमी करण्याचा प्रयत्न प्रशासनाकडून केला जात आहे. जिल्ह्यात सध्या ७७ गावात टॅंकरद्वारे पाणीपुरवठा करण्यात येत आहे. याशिवाय ३१३ गावे आणि ३३ वाड्यांना ७२२ विहिरी आणि विंधन विहिरी अधिग्रहित करुन त्यामार्फत पाणीपुरवठा करण्यात येत आहे. याशिवाय, उस्मानाबाद, परंडा आणि उमरगा या शहराच्या नागरी भागात ६५ टॅंकरद्वारे पाणीपुरवठा करण्यात येत आहे. जनावरांच्या चा-याचा प्रश्न ध्यानात घेऊन आपण भूम तालुक्यात चार छावण्यांना मंजूरी दिली असल्याची माहिती त्यांनी दिली. या दुष्काळी परिस्थितीत एकही गाव पाण्यापासून वंचित राहणार नाही, यासाठी प्रशासन कटिबद्ध आहे.
      ऩळयोजना दुरुस्ती, तात्पुरती ऩळयोजना, विहीर अधिग्रहण, टैंकर लावणे, विंधन विहिरी दुरुस्ती, नवीन विंधन विहीरी, गाळ काढणे आदी कामांसाठी ८८ कोटी रुपयांचा १३ जून पर्यंतचा आराखडा तयार करुन शासनास सादर करण्यात आला असल्याचे सांगून या कामांसाठी निधीची कमतरता भासू दिली जाणार नाही. जिल्हा नियोजन समितीकडूनही टंचाई उपाययोजनांसाठी प्रत्येक तालुक्यास एक प्रमाणे ८ टैंकर खरेदी करण्यासाठी १ कोटी १२ लाख रुपये निधी उपलब्ध करुन दिला असल्याचे ते म्हणाले.
    राज्य शासनाने उस्मानाबाद शहराच्या पाणीपुरवठ्यासाठी उजनी योजना तातडीने पूर्ण व्हावी, यासाठी निधी उपलब्ध करुन दिला असून उमरगा शहरासाठीची माकणी योजनाही दोन महिन्यात पूर्ण होण्याच्या मार्गावर आहे. या योजना पूर्ण झाल्यानंतर पाणीटंचाईची झळ निश्चित कमी होईल, असा विश्वास त्यांनी व्यक्त केला.
    आगामी दोन-तीन महिने पाणीटंचाईच्या दृष्टीने अतिशय महत्वाचे आहेत. अशा कठीण परिस्थितीत सर्वांनी पाणी जपून वापरावे, पाण्याचा पुनर्वापर करावा, असे आवाहन पालकमंत्री चव्हाण यांनी केले. सध्या नरेगा अंतर्गत आपण शेतरस्ते, विहीरी, रोपवाटिका, जलसंधारण आदिंची कामे हाती घेतली आहेत. आतापर्यंत जिल्ह्यासाठी ११०  कोटींचा निधी उपलब्ध करुन देण्यात आला आहे. या योजनेत सध्या ११ हजार २५ कामांचे नियोजन करण्यात आले आहे. त्याद्वारे ३ लाख १५ हजार ८८५ जणांना रोजगार उपलब्ध होणार आहे. अधिकाधिक नागरिकांनी याचा लाभ घ्यावा, असे आवाहनही त्यांनी केले. पाणीटंचाईचा मुकाबला करण्यासाठी जिल्हा प्रशासन आणि जिल्हा परिषद प्रशासनाने आराखडा तयार केला आहे. आगामी काळात उपलब्ध पाणी स्त्रोत लक्षात घेऊन या आराखड्याची अंमलबजावणी केली जाणार असल्याचे प्रतिपादन त्यांनी केले.
       आपल्या जिल्ह्यात विविध विकास कामांद्वारे प्रगती साधली जात आहे. जिल्ह्यात २० उपकेंद्रे, दोन ग्रामीण रुग्णालये तसेच तीन प्राथमिक आरोग्य केंद्रांची स्थापना करण्यात येणार असल्याचे ते म्हणाले.
        राज्य शासनाने प्राथमिक शिक्षण क्षेत्रात आमुलाग्र बदल केले आहेत. सहा ते चौदा वर्षे वयोगटातील सर्व बालकांना इयत्ता पहिली ते आठवी पर्यंतचे शिक्षण मोफत आणि सक्तीचे असल्याचा मुलभूत हक्क बहाल करण्यात आला आहे. गुणवत्तापुर्ण आणि दर्जेदार शिक्षण घेण्याचा प्रत्येक बालकाचा हक्क आहे, असे त्यांनी नमूद केले.

शिक्षणाद्वारे मुलांना जबाबदार नागरिक बनवा : पालकमंत्री ढोबळे

सोलापूर : शिक्षण हक्क कायद्यामुळे ६ ते १४ वयोगटातील मुला-मुलींना मोफत आणि सक्तीचे शिक्षण देण्याचा हक्क प्राप्त झाला आहे. त्यांना चांगले, दर्जेदार शिक्षण देऊन देशाचा जबाबदार नागरिक बनविण्याचे आवाहन राज्याचे पाणीपुरवठा व स्वच्छता मंत्री तथा जिल्ह्याचे पालकमंत्री लक्ष्मण ढोबळे यांनी केले.
    भारतीय प्रजासत्ताक दिनाच्या ६३ व्या वर्धापन दिनानिमित्त शहर पोलीस मुख्यालयाच्या कवायत मैदानावर पालकमंत्र्यांच्या हस्ते मुख्य ध्वजारोहण करण्यात आले त्यावेळी पालकमंत्र्यांनी नागरिकांना आपल्या भाषणातुन शुभेच्छा दिल्या. यावेळी जिल्हाधिकारी डॉ. प्रविण गेडाम, जिल्हा परिषदेचे मुख्य कार्यकारी अधिकारी तुकाराम कासार,महापालिका आयुक्त अजय सावरीकर, पोलीस आयुक्त प्रदिप रासकर, जिल्हा पोलीस अधिक्षक राजेश प्रधान उपस्थित होते.
     पालकमंत्री ढोबळे आपल्या शुभेच्छा संदेशात म्हणाले की, पोलीस व सैन्यातील जवानांनी देशासाठी केलेले बलीदान अमुल्य असून आपण सर्वांनी त्यासाठी कृतज्ञ राहुन त्यांना अभिवादन केले पाहिजे. देशाला प्रगतीपथावर घेऊन जाणारे व शेजारील राष्ट्रांची वाकडी नजर करुन बघण्याची हिंमत होऊ नये असे शिक्षण मुलांना देण्याची गरज आहे. सोलापूर जिल्ह्यात स्वच्छता, आरोग्य, शिक्षण आणि उद्योग या सर्वच क्षेत्रात प्राधान्य द्यावे असेही शेवटी ते म्हणाले. 
    ध्वजारोहणानंतर परेडचे निरिक्षण करुन त्यांनी शहर पोलीस, राज्य राखीव दल, एन.सी.सी. आणि स्काऊट गाईड प्लॅटुनकडुन मानवंदना स्वीकारली. यावेळी पोलीय निरिक्षक प्रकाश पाटील यांना राष्ट्रपती पदक मिळाल्याबद्दल, जिल्हा भूमी अभिलेख कार्यालयास आय. एस. ओ. मानांकन प्राप्त झाल्याबद्दल जिल्हा अधिक्षक बाळासाहेब वानखेडे आणि महिला व बाल विकास विभागाच्या वतीने अहिल्याबाई होळकर पुरस्कार मिळालेल्या श्रीमती प्रीती श्रीराम, सविता होरा आणि सविता मुदलीयार यांना पालकमंत्र्यांच्या हस्ते गौरविण्यात आले. यानंतर इंडियन मॉडेल स्कुल, एस. आर. चंडक शाळा आणि ज्ञान प्रबोधिनी शाळेच्या विद्यार्थ्यांनी सांस्कृतिक कार्यक्रम सादर केले.
     नवीन प्रशासकीय इमारतीत अप्पर जिल्हाधिकारी अशोक काकडे यांच्या हस्ते ध्वजारोहण करण्यात आले. यावेळी उपजिल्हाधिकारी अमृत नाटेकर, शकुंतला गायकवाड, जिल्हा उपनिबंधक श्रीकांत मोरे, यांच्यासह सर्व अधिकारी व कर्मचारी उपस्थित होते.

दुष्काळी कामांसाठी समक्ष भेटण्याचे पालकमंत्री प्रा. ढोबळे यांचे आवाहन 

सोलापूर :-  टंचाई परिस्थितीमध्ये मजुरांना रोजगार, जनावरांना चारा, पाणी टंचाई तसेच पिण्याचा पाणी पुरवठा याबाबतच्या अडी-अडीचणींच्या सोडवणुकीच्या संदर्भात आवश्यक ती कार्यवाही तातडीने करण्याच्या सुचना सर्व विभागप्रमुखंना देण्यात आलेल्या आहेत.  टंचाई निवारणामध्ये क्षेत्रीयस्तरावरील अधिका-यांकडून सकारात्मक प्रतिसाद मिळत नसल्यास सर्व नागरिकांचे प्रश्न तातडीने मार्गी लावण्यासाठी सोलापूर येथील माझ्या संपर्क कार्यालय इंदिरा गांधी स्टेडीयम (पार्क स्टेडीयम), डॉ. बाबासाहेब आंबेडकर चौक, सोलापूर ( दु. क्र. ०२१७-२३२९५७९) येथे सोमवार दि. २८ जानेवारी रोजी सकाळी ९ ते सायंकाळी ७ वाजेपर्यंत पालकमंत्र्यांना समक्ष भेटावे. ज्यांना समक्ष भेटणे शक्य होणार नाही अशा नागरिकांनी त्यांची लेखी निवेदने दोन प्रतीत संपर्क कार्यालयात पाठवावीत, असे आवाहन पालकमंत्री प्रा. लक्ष्मण ढोबळे यांनी केले आहेत.

'तुळजापूर लाईव्‍ह' च्‍या दिनदर्शिकेचे थाटात प्रकाशन

नळदुर्ग (भैरवनाथ कानडे)  -:  'तुळजापूर लाईव्‍ह' ऑनलाईन ई-न्‍यूज पेपरच्‍या प्रथम वार्षिक दिन‍दर्शिकेत पर्यावरण जाणीवजागृती, स्‍त्रीभ्रुणहत्‍या, पाणीटंचाई निवारणासंबंधी उदभबोधनपर संदेश देण्‍यात आला असून शिवाय उस्‍मानाबाद जिल्‍ह्यातील राजकीय, सामाजिक, सांस्‍कृतिक व साहित्‍य क्षेत्रामध्‍ये वेगळा ठसा निर्माण केलेल्‍या व्‍यक्‍तींच्‍या स्‍मृतीना उजाळा देण्‍यात आला आहे. समाज प्रबोधनाच्‍या दृष्‍टीने आवश्‍यक बाबींची विशेष नोंद या दिनदर्शिकेमध्‍ये घेतल्‍यामुळे ही दिनदर्शिका विधायक कार्यासाठी नक्‍कीच उपयोगी ठरणार असल्‍याचे मत श्री तुळजाभवानी शेतकरी सहकारी साखर कारखान्‍याचे व्‍हा.चेअरमन सुनीलराव चव्‍हाण यांनी व्‍यक्‍त केले.

    'तुळजापूर लाईव्‍ह' च्‍यावतीने प्रकाशित करण्‍यात आलेल्‍या प्रथम वार्षिक दिनदर्शिका २०१३ चे प्रकाशन सोहळा श्री तुळजाभवानी शेतकरी सहकारी साखर कारखान्‍याचे व्‍हा.चेअरमन सुनीलराव चव्‍हाण यांच्‍या हस्‍ते मोठ्या थाटात करण्‍यात आला. या कार्यक्रमास प्रमुख पाहुणे म्‍हणून तुळजापूर पंचायत समितीचे उपसभापती प्रकाश चव्‍हाण, माजी सभापती बालाजी मोकाशे, कॉंग्रेस शिक्षक सेलचे जिल्‍हाध्‍यक्ष संजय दळवी, श्री कुलस्‍वामिनी सुतगिरणीचे कार्यकारी संचालक के.के.लकडे यांची प्रमुख उपस्थिती होती.

     कार्यक्रमाच्‍या प्रारंभी 'तुळजापूर लाईव्‍ह' चे मुख्‍य संपादक शिवाजी नाईक यांनी सुनीलराव चव्‍हाण यांचा शाल, पुष्‍पहार, पुष्‍पगुच्‍छ देऊन सत्‍कार केला. त्‍याचबरोबर उपस्थितांचे पुष्‍पगुच्‍छ देऊन स्‍वागत करण्‍यात आले. त्‍यानंतर तुळजापूर लाईव्‍ह दिनदर्शिकेचे प्रकाशन सोहळा मोठ्या उत्‍साहाच्‍या वातावरणात व थाटयाने संपन्‍न झाला. समाजाला दिशा देण्‍याचे स्‍तुत्‍य उपक्रम दिनदर्शिकेच्‍या माध्‍यमातून संपादक शिवाजी नाईक यानी वेगळ्या पध्‍दतीने करीत असल्‍याचे कॉंग्रेस सेवा दलाचे शहराध्‍यक्ष विनायक अहंकारी यांनी सांगून अभिनंदन केले. तर अनेकानी अभिनंदनाचा वर्षाव करुन कौतुक केले.

      या कार्यक्रमाचे प्रास्‍ताविक व सूत्रसंचालन भैरवनाथ कानडे यांनी केले. या प्रकाशन सोहळ्यास कॉंग्रेस सेवा दलाचे शहराध्‍यक्ष विनायक अहंकारी, युवक कॉंग्रेसचे शहराध्‍यक्ष बसवराज धरणे, जिल्‍हापरिषद शिक्षण समितीचे माजी सदस्‍य अविनाश मोकाशे, माजी जिल्‍हा प्रसिध्‍दी प्रमुख दत्‍तात्रय वाघमारे, तुळजापूर लाईव्‍हचे संचालक विकास नाईक, दादासाहेब बनसोडे, दयानंद काळुंके, सतीश राठोड, सोमनाथ बनसोडे, प्रशांत देशमुख आदींची उपस्थिती होती.

डॉ. प्रविण गेडाम यांनी स्‍वीकारला जिल्हाधिकारी पदाचा पदभार

सोलापूर -: सोलापूरचे नुतन जिल्हाधिकारी म्हणून डॉ. प्रविण गेडाम यांनी जिल्हाधिकारी पदाचा पदभार स्वीकरला.
     याप्रसंगी निवासी उपजिल्हाधिकारी पराग सोमण, विविध उपजिल्हाधिकारी, महसुल विभागातील विविध अधिकारी, कर्मचारी यांनी त्यांचे पुष्पगुच्छ देऊन स्वागत केले.
    तसेच याप्रसंगी डॉ. गेडाम यांनी पत्रकारांशीही संवाद साधुन जिल्ह्यातील टंचाईच्या प्रश्नांना प्राधान्य देणार असल्याचे सांगितले. डॉ. गेडाम हे २००२ च्या बॅचचे आय.ए.एस. अधिकारी असून येथे येण्यापूर्वी ते पुणे येथे भूजल सर्वेक्षण विभागाचे संचालक म्हणून कार्यरत होते.

दुष्काळ निवारण, पर्यावरण व पुनर्भरण या कामासाठी टाटा संस्थेचा पुढाकार कौतुकास्पद - पालकमंत्री चव्हाण

उस्मानाबाद -: राज्याचे पशुसंवर्धन, दुग्धविकास व मस्यव्यवसाय मंत्री तथा जिल्हयाचे पालकमंत्री मधुकरराव चव्हाण यांच्या हस्ते टाटा सामाजिक विज्ञान संस्था, तुळजापूर येथे राष्ट्रीय ग्रामीण युवक महोत्सवाचे उदघाटन झाले. यावेळी खासदार डॉ. पद्मसिंह पाटील,जि.प.चे अध्यक्ष डॉ. सुभाष व्हट्टे, टाटा सामाजिक विज्ञान संस्थेचे संचालक एस.परशुरामन, अधिष्ठाता एस.पेपीन, रशीद काझी, बाळासाहेब पाटील हे उपस्थित होते.
      या प्रसंगी बोलताना पालकमंत्री चव्हाण म्हणाले की, ही संस्था २७ वर्षापुर्वी रोपटे होते. आता याचे विशाल वृक्षामध्ये रुपांतर झाले आहे. या संस्थेमधील अनेक विद्यार्थी मोठमोठया पदावर कार्यरत आहेत. या ठिकाणी पडणाऱ्या पावसाचा प्रत्येक थेंब अडवून त्याचे पुनर्भरण पध्दतीने वापर करुन आदर्श निर्माण केला आहे. भूगर्भातील पाण्याचा साठा प्रमाणाबाहेर वापर होत असल्यामुळे पाणीपातळी सातत्याने खालावत आहे. यासाठी पुनर्भरणाव्दारे ही पाणीपातळी वाढवता येते. याकरीता सर्वांनी प्रयत्न करणे गरजेचे आहे. दुष्काळ निवारण, पर्यावरण व पुनर्भरण या कामासाठी येथील विद्यार्थ्यांनी पुढाकार घेऊन गावोगावी जाऊन तेथील जनतेला शिक्षण देणे गरजेचे आहे.
      या कार्यक्रमात डॉ. पद्मसिंह पाटील बोलताना म्हणाले की, या संस्थेत उत्तम व  दर्जेदार शिक्षण असून अनेक विद्यार्थी वेगवेगळया पदावर कार्यरत आहेत. याठिकाणी पाण्याचे नियोजन उत्तम प्रकारे केले आहे. त्यामुळै पाणी कमी पडत नाही. सद्यस्थितीत पाण्याचा वापर काटकसरीने करणे गरजेचे असून भविष्यात पडणा-या पावसाचे पाणी अडवून जमिनीत वेगवेगळया माध्यमातून जिरवणे गरजेचे आहे. शेतातील पिकांना ड्रीप पध्दतीने पाणी देऊन पाण्याची बचत करता येते. यासाठी जनजागृती होणे आवश्यक आहे.
    महाराष्ट्र पुरोगामी राज्य आहे. या शंभर एकर माळरानावर या संस्थेने प्रतिसृष्टी निर्माण केली असून याठिकाणी अनेक माणिक, मोती, हिरे विद्यार्थ्यी रुपात घडवून उत्तम नागरिक निर्माण केले आहेत असे डॉ. सुभाष व्हट्टे म्हणाले.
    पाणी व पाऊस तयार करणे माणसाच्या हाती नाही, परंतू पडलेल्या पावसाचे पाणी भूगर्भात वेगवेगळया माध्यमातून जिरवणे माणसाच्या हाती आहे. ही संस्था पाणलोट क्षेत्र विकास कामात अग्रेसर असून या संस्थेने ग्रामविकासा बरोबरच राष्ट्र विकासाचे देखील काम  हाती घेतले आहे. याठिकाणी आत्तापर्यंत 6 हजार शेतकऱ्यांना जलसाक्षरता व पुनर्भरणाचे शिक्षण दिले आहे. असे पाणलोट क्षेत्र विकास अभ्यासक गणेश चादरे म्हणाले.
    याप्रसंगी या संस्थेतील प्राध्यापक, विद्यार्थी, कर्मचारी मोठया संख्येने उपस्थित होते. या कार्यक्रमाचे सुत्रसंचलन श्रीमती उत्कर्षा यांनी केले.

भारतीय प्रजासत्ताक आणि महाराष्ट्राची दमदार वाटचाल

         भारतीय प्रजासत्ताकाचा ६३ वा वर्धापन दिन म्हणजे २६ जानेवारी, २०१३ या सहा दशकाच्या कालखंडात भारतीय लोकशाहीने अनेक स्थित्यंतरे  पाहिली. विकासाच्या विविध लाटांवर आरुढ होऊन भारतीयांनी एक समर्थ भारत पाहिला आहे. तर विविध राज्यांनी देखील आपापल्या राज्यांमधून विकासात्मक कार्याद्वारे देशाच्या प्रगतीत मौलिक मदत केलेली आहे. महाराष्ट्र हे त्यातील एक अग्रणी राज्य. महाराष्ट्राने स्वतंत्र राज्य निर्माण झाल्यापासून देशाच्या विकासात भरीव योगदान दिलेले आहे. राज्याने केलेल्या दमदार वाटचालीची ही थोडक्यात ओळख . . .      
      एका शतकाचा अर्धा टप्पा म्हणजे ५० वर्षाचा प्रदिर्घ कालखंड पार केलेले महाराष्ट्र राज्य देशाच्या महत्वपूर्ण राज्यात अग्रणी समजले जाते.भारतीय प्रजासत्ताकाच्या नंतर बरोबर दहा वर्षानी महाराष्ट्र राज्य अस्तित्वात आले. त्यानंतर गेल्या ५० वर्षात राज्याने विविध प्रगतीचे नविन टप्पे पदाक्रांत केले. गेल्या कांही वर्षांपासून आपले राज्य देशात औद्योगिक क्षेत्रात अग्रणी समजले जाते. नुकतेच राज्याने नविन औद्योगिक धोरण जाहीर करुन देशभरातील उद्योजकांसाठी महाराष्ट्र मॅग्नेटिक केले. तसेच जनहिताच्या अनेक कल्याणकारी योजनाही जाहीर करुन त्यांची प्रभावी अंमलबजावणी सुरु आहे.
क्रांतिकारी निर्णय
    नव्या औद्योगिक धोरणाद्वारे विकास दरात १०-१३ टक्के वृध्दिदर असून पाच लाख कोटी रुपयांची गुंतवणूक आणि वीस लाख रोजगार अपेक्षित आहे. त्याचप्रमाणे मेगा प्रोजेक्ट धोरणामुळे २ लाख ८० हजार २९२ कोटी रुपयांची गुंतवणूक, ३.२४ लाख रोजगार संधी अपेक्षित आहेत. सध्या ३५४ प्रकल्पांपैकी ११४ प्रकल्पांचे काम सुरु आहे. तर येत्या पाच वर्षात रोजगाराच्या ११ लाख संधी आणि ४० हजार कोटी रुपयांची गुंतवणूक अपेक्षित असणारे महत्त्वाकांक्षी वस्त्रोद्योग धोरण जाहीर केले आहे.
        राज्यभरात पाच कोटी नागरिकांची आधार कार्डासाठी नोंदणी झाली असून आधार कार्डाच्या आधारे सहा जिल्ह्यांत लाभार्थ्यांच्या बँक खात्यामध्ये थेट रक्कम जमा होणार आहे. तसेच राजीव गांधी जीवनदायी आरोग्य योजनेद्वारे दारिद्रय रेषेखालील कुटुंबातील रुग्णांसाठी असलेल्या विनामूल्य औषधोपचार योजनेचा  ३० हजारांहून अधिक रुग्णांना लाभ झालेला आहे. तसेच राज्यात १०७ नवीन प्राथमिक आरोग्य केंद्रे व १० जिल्हा रुग्णालये निर्माण केली जाणार आहेत.
महिलांचा आत्मसन्मान
     महिलांचा आत्मसन्मान जोपासण्यासाठी आणि त्यांना मदत करण्यासाठी ५१ समुपदेशन केंद्रे सुरु असून महिला आणि बालकांच्या विविध योजनांच्या प्रसारासाठी, त्यांच्या कल्याणासाठी राजमाता जिजाऊ आणि क्रांतीज्योती सावित्रीबाई फुले जाणीव जागृती  अभियानाचा नवा उपक्रम राबविण्यात येत आहे.
        अडचणीतील महिलांना आणि नागरिकांना तत्काळ मदत करण्यासाठी मुंबई पोलिसांतर्फे विशेष मोबाईल फोन यंत्रणा कार्यरत असून 103 क्रमांकावर अहोरात्र हेल्पलाईन सुरु आहे. 
सर्वांगिण विकास
       नव्याने अस्तित्वात आलेल्या नगरपरिषदा आणि नगरपंचायतींना त्यांच्या सर्वांगिण विकासासाठी 100 टक्के मदतीचा निर्णय घेण्यात आला आहे. तसेच राज्यातील लहान अन्नप्रक्रिया केंद्राच्या दर्जात सुधारणा करण्यासाठी नॅशनल मिशन ऑन फूड प्रोसेसिंगची अंमलबजावणी करण्यात आली असून अन्न प्रक्रियेशी संबंधित काम करणाऱ्या बचतगटांनाही यामुळे सहाय्य मिळणार आहे.            
     गतिमान आणि पारदर्शक कारभारासाठी ई-गव्हर्नन्स, सिंधुदुर्ग महाराष्ट्रातील पहिला ई-जिल्हा जाहीर झाला असून इतर जिल्ह्यातही ई-कार्यालयाचे काम प्रगतीपथावर आहे. तसेच कलाक्षेत्राला उत्तेजन देण्याच्या उद्देशाने 'भारतरत्न स्व. पं.भीमसेन जोशी जीवनगौरव पुरस्कार' देण्या‍त येणार आहे.
    मुंबईतील इंदू मिलच्या जागेवर भारतरत्न डॉ. बाबासाहेब आंबेडकर यांचे भव्य स्मारक उभारण्याचा क्रांतिकारी निर्णय शासनाने घेतला आहे. त्यासाठी केंद्र शासनाकडून मंजूरी मिळविली आहे. तसेच कोल्हापूर येथे शाहू मिलच्या जागेवर राजर्षी छत्रपती शाहू महाराज यांचे स्मारक करण्याचा निर्णय घेतला आहे.
प्रभावी अंमलबजावणी
      राज्याने टंचाई दूर करण्यासाठी टंचाई निवारण कार्यास प्राधान्य दिले आहे. त्यामुळे टंचाईग्रस्त भागातील जनतेला मोठा दिलासा मिळाला आहे. यासाठी शासनाला  केंद्र सरकारकडून कोटींची मदत मिळविण्यात यश प्राप्त झाले.  टंचाईग्रस्त भागात पिण्याच्या पाण्यासाठी 414 कोटींचा निधी देण्यात आला. तर सर्व जलसाठे पिण्यासाठी राखीव ठेवण्यात आले. पिण्याच्या पाण्यासाठी प्रत्येक गावासाठी आकस्मिक कृती आराखडा तयार करण्यात आला आहे. महत्त्वाचे म्हणजे प्रत्येक जिल्हाधिकाऱ्यांना पाच कोटी रुपये आकस्मिक निधी म्हणून उपलबध करुन देण्यात आले.
      ५० टक्क्यांपेक्षा कमी पैसेवारी असलेल्या गावातील स्वतंत्र नळपाणी पुरवठा योजनांची चालू वीज देयके भरण्यासाठी ग्रामपंचायतीने ३० टक्के रक्कम भरण्याच्या अटीवर ६७ टक्के अनुदान दिले आहे. तसेच राज्यात रोजगार हमी योजनेची १८ हजार ९०७ कामे सुरु असून तेथे जवळपास  एक लाख 48 हजार मजुरांची उपस्थिती आहे.
       जनावरांसाठी राज्यात असलेल्या ३९५ छावण्यात तीन लाख ३५ हजार जनावरे दाखल असून आतापर्यंत त्या ठिकाणी 223 कोटींचा खर्च झालेला आहे. तर  चारा वितरणासाठी ६८४ कोटी रुपयांचा निधी देण्यात आला.
       सुवर्ण जयंती राजस्व अभियानाच्याद्वारे लोकसहभागातून २५ हजार ३२३ कि.मी. लांबीचे ग्रामीण रस्ते पूर्ण करण्यात आले व खेडी शहरांच्या जवळ आणली.
    अशाप्रकारे महाराष्ट्र शासनाने विविध कल्याणकारी निर्णय योजना जाहीर केल्या असून त्याची प्रभावी अंमलबजावणी सुरु आहे. प्रजासत्ताकदिनाच्या निमित्ताने आपणही राज्याच्या, देशाच्या प्रगतीत आपणांस  शक्य त्या  माध्यमाद्वारे मदत करुन आपला भारत देश महासत्ता होईल यासाठी प्रयत्न करु.
                                  - राजू पाटोदकर
                                       patodkar@yahoo.co.in

पिण्याचे पाणी उपलब्ध करुन देण्यास शासनाचा अग्रक्रम

उस्मानाबाद -:                         राज्याचे पशुसंवर्धन दुग्धविकास व मत्स्यव्यवसाय मंत्री तथा जिल्हयाचे पालकमंत्री मधुकरराव चव्हाण यांनी पाणीटंचाई व दुष्काळ निवारणार्थ करावयाच्या उपाययोजनांबाबत उस्मानाबाद तालुक्‍यातील धारुर, वाडी बामणी व केशेगाव या गावांना भेटी देऊन नागरिकांच्या अडचणी जाणून घेतल्या. पिण्याचे पाणी उपलब्ध करुन देणे हाच सध्या शासनाचा आणि प्रशासनाचा अग्रक्रम असल्याचे प्रतिपादन ना. मधुकरराव चव्हाण यांनी या दौ-याप्रसंगी केले.
       पालकमंत्री चव्हाण यांच्या या दौऱ्यात जि.प.अध्यक्ष्‍डॉ. सुभाष व्हट्टे, उपाध्यक्ष संजय पाटील दुधगावकर, जि.प. सदस्या अर्चनाताई पाटील, लक्ष्मण सरडे, राजेंद्र शेरखाने यांच्यासह गटविकास अधिकारी प्रियदर्शिनी मोरे, तहसीलदार अभिजीत पाटील,  आदी उपस्थित हाते.
          या दौ-यात पालकमंत्री चव्हाण यांनी, ज्या विहिरींना पाणी आहे तेथून पाईप टाकुन पाणी उपलब्ध करुन देण्याच्या सुचना संबंधित अधिकाऱ्यांना दिल्या. तसेच तेथील ग्रामस्थांच्या अडीअडचणी समजावून घेउन गावातील उपलब्ध असणारे पाणी जनतेस देण्यासाठी जे हातपंप नादुरुस्त आहेत ते दुरुस्त करुन घेणे, ज्या विहिरींना पाणी आहे तेथुन पाईप टाकुन पाणी गावात आणून जनतेस उपलब्ध करुन देणे, तलाव, विहिरींमधील गाळ काढणे व नविन विहिरी घेणे याबाबत संबंधित अधिकाऱ्यांना सुचना दिल्या.
          ज्यांचेकडे वीज बील थकीत आहे ते तात्काळ भरुन शासनास सहकार्य करावे, असे आवाहन त्यांनी केले. पालकमंत्री चव्हाण यांनी केशेगाव येथे मंडळ अंतर्गत गावांच्या प्रश्नांसंदर्भात बैठक घेतली. यावेळी अधिकारी वर्गही उपस्थित होता.नागरिकांच्या प्रश्नांची तातडीने दखल घ्यावी. टंचाईसंदर्भातील कोणतेही निर्णय प्रलंबित ठेवू नयेत, ते तातडीने मार्गी लावावेत, जेणेकरुन नागरिकांना या परिस्थितीत दिलासा मिळेल, असे त्यांनी सांगितले. विंधन विहिरींची दुरुस्ती, तात्पुरत्या नळ योजना, गाळ काढणे आदी कामे प्राधान्याने हाती घ्यावीत, असे त्यांनी सांगितले. ज्याठिकाणी उपलब्ध पाणी स्त्रोत आहेत, ते जपून वापरण्याच्या सूचनाही त्यांनी यावेळी दिल्या.
          पालकमंत्री चव्हाण यांच्या हस्ते वाडी बामणी येथे दलित वस्ती सुधार योजनेतून सिमेंट रस्ता व नाली बांधकाम तसेच स्मशानभूमी शेड बांधकाम आदी कामांचा प्रारंभ करण्यात आला. धारुर येथे पालकमंत्री चव्हाण यांनी तेथील पाणीपुरवठा सद्यस्थिती आणि टंचाई उपाययोजनांबाबतची वस्तुस्थिती जाणून घेतली.
      संजय गांधी निराधार योजनेबाबत येणाऱ्या तक्रारी तात्काळ सोडविण्याचे निर्देश त्यांनी यावेळी अधिका-यांना दिल्या.
         दौ-याप्रसंगी संबंधित गावचे सरपंच, उपसरपंच, ग्रामसेवक, तलाठी, ग्रामस्थ मोठया संख्येने उपस्थित होते.