आंबेडकर कारखाना सक्षमपणे चालवुन दाखवू : रोहन देशमुख

उस्‍मानाबाद -  डॉ. बाबासाहेब आंबेडकर साखर कारखान्याची निवडणुक भाजपा प्रणित बळीराजा विकास पॅनल पुर्ण गांर्भियाने लढवित असून यशस्वी साखर कारखानदारीतला मोठा अनुभव आमच्याही पाठींशी आहे. सभासद शेतकर्‍यांनी निश्‍चित होऊन भाजपा प्रणित पॅनलला भरघोस मतांनी विजयी करावे व कारखान्यातील आतापर्यंतची  एकाधिकारशाही मोडुन काढावी, असे आवाहन भाजपाचे युवक नेते तथा लोकमंगलचे कार्याध्यक्ष रोहन देशमुख यांनी केले.

     डॉ. बाबासाहेब आंबेडकर साखर कारखान्याच्या निवडणुकीची पुर्व तयारी बैठक उस्‍मानाबादच्‍या प्रमोद महाजन सभागृहात पार पडली. या बैठकीच्या अध्यक्षस्थानी अॅड.मिलिंद पाटील हे उपस्थित होते. यावेळी पॅनल प्रमुख तथा भाजपा नेते संजय निंबाळकर, संजय पाटील-दुधगावकर,भाजपा जिल्हाध्यक्ष नितीन काळे, रामभाऊ पडवळ यांची उपस्थिती होती. 

यावेळी बोलताना रोहन देशमुख म्हणाले की, डॉ. आंबेडकर साखर कारखान्याचे चेअरमन अरविंद गोरे हे इतर कारखान्यात झालेल्या गैर कारभाराचा दाखला देत स्वतःचा प्रचार करीत आहेत. व इतर पॅनलच्या उमेदवारांना कारखानदारीतला अनुभव नाही, असे सांगुन सभासदांची दिशाभूल करीत आहेत. परंतू आम्ही साखर कारखानदारीमध्ये यशस्वी काम करून दाखवले आहे. या अनुभवाच्या जोरावर आम्ही निवडणुक रिंगणात उतरलो आहोत व या कारखान्याचा कारभारही संपुर्ण पारदर्शक व सभासदांना विश्‍वासात घेऊन अत्यंत सचोटीने करून दाखवू. ऊस गाळपासाठी सभासदांची चेअरमन अरविंद गोरे यांनी चालविलेली थट्टा सभासद विसरणार नाहीत. वास्तविक कारखान्याच्या गाळपासाठी सभासदांच्या ऊसाला प्राधान्य देणे गरजेचे असताना बिगर सभासदांचा व कार्यक्षेत्राबाहेरील ऊसाचा वापर सध्या करीत आहेत.त्यामुळे सभासदांनी खंबीरपणे भाजपा प्रणित बळीराजा विकास पॅनलच्या पाठीशी उभे रहण्‍याचे आवाहन त्‍यांनी केले . तत्पुर्वी अॅड. मिलिंद पाटील यांनी उपस्थित सभासद शेतकर्‍यांना मार्गदर्शन करताना चेअरमन अरविंद गोरे यांच्या एकाधिकारशाहीचे वाभाडे काढले. अरविंद गोरे यांच्याकडून सभासद शेतकर्‍यांना अपमानास्पंद वागणुक मिळत असून या निवडणुकीत सभासद शेतकरी अरविंद गोरे यांना त्‍यांची जागा दाखवून देतील अशा शब्दात टिका केली. यावेळी भाजपा जिल्हाध्यक्ष नितीन काळे, जिल्हा परिषदेचे माजी उपाध्यक्ष संजय पाटील-दुधगावकर यांनीही कार्यकर्त्यांना मार्गदर्शन केले. या कार्यक्रमाचे सूत्रसंचालन लक्ष्मण माने तर आभार धनंजय शिंगाडे यांनी मानले. या कार्यक्रमास भिमराव साळुके, मोहन खापरे, नवनाथ क्षिरसागर, जीवन देशमुख, सतिश देशमुख,शहराध्यक्ष भिमा अण्णा जाधव आदी कार्यकर्त्यांनी परिश्रम घेतले. 

आहार पुरवठयाचे प्रस्ताव पाठविण्याचे आवाहन

उस्मानाबाद - जिल्हा आहार समितीच्या ठरावानूसार अंगणवाडीतील बालकांना नियमीतपणे आहार पुरवठा करण्याबाबत स्थानीक पातळीवरील सक्षम  व पात्र महिला बचत गट, नोदणीकृत महिला मंडळ/ संस्थेची  निवड करण्यात येणार आहे. इच्छुक पुरवठा धारकांनी विहीत नमुन्यात आपले प्रस्ताव 11 मार्चपर्यंत सादर करावेत. अर्जाचा विहीत नमुना अटी व शर्ती यांचा तपशील संबधित बाल विकास प्रकल्प अधिकारी यांच्या कार्यालयात कार्यालयीन वेळेत  व कामकाजाच्या सायंकाळी 5 वाजेपर्यंत दिवशी मिळेल.

       विहीत नमुन्यात अर्ज आवश्यक त्या कागदपत्रासह 11 मार्चपर्यत एकात्मिक बाल विकास सेवा योजन कार्यालयात सायांकळी 5 वाजेपर्यत कार्यालयीन वेळेत सादर करता येतील. मुदतीमध्ये विहीत नमुन्यातील  व आवश्यक त्या कागदपत्रासह प्राप्त अर्जाची छाननी करुन पात्र महिला बचत गटांची यादी संबधित एकात्मिक बाल विकास सेवा योजन कार्यालयात सूचना फलकावर 16 मार्च, 2015 पर्यंत प्रसिध्द करण्यात येईल.

           यादी प्रसिध्द झालेल्या तारखेपासून 5 दिवसापर्यंत अर्जदांराच्या पात्र व अपात्रतेसंबंधी हरकती मागविण्यात येतील. संबधितांनी आपल्या हरकती लेखी स्वरुपात  21 मार्चपर्यंत संबधित बाल विकास सेवा योजन कार्यालयात सादर कराव्यात. हरकती विचारात घेवून 23 मार्च रोजी इच्छुकांची अंतीम यादी संबधित एकात्मिक बाल विकास सेवा योजन प्रकल्प कार्यालयाच्या नोटीस बोर्डावर प्रसिध्द करण्यात येईल.

निवड करण्यात आलेल्या महिला बचत गटांना आहार पुरवठा करण्याचे आदेश शासनाने विहीत केलेल्या अटी व शर्तीच्या आधीन राहून  निर्गमीत करण्यात येतील तसेच वेळोवेळी बदलण्यातआलेले शासन निर्णय बंधनकारक राहतील याची सबंधितांनी नोद घ्यावी, असे जिल्हा स्‍तरीय समितीचे अध्यक्ष  तथा जिल्हा परिषद, उस्मानाबादचे मुख्य कार्यकारी अधिकारी व समितीचे सदस्य सचिव तथा उप मुख्य कार्यकारी अधिकारी (बा.क) जिल्हा परिषद, उस्मानाबाद यांनी केले आहे.       

जिल्हास्तरीय महिला आरोग्य अभियान

उस्मानाबाद -  जागतिक ‍महिला आरोग्य दिनाचे  औचित्य साधुन जिल्हा सामान्य  रुग्णालयात नुकतेच जिल्हास्तरीय महिला आरोग्य अभियान पंधारवाडयाचे आयोजन करण्यात आले होते. या पंधरवाडयाचे उदघाटन जिल्हा परीषदेचे अध्यक्ष धीरज पाटील यांच्या हस्ते करण्यात आले.  याप्रसंगी मुख्य कार्यकारी अधिकारी सुमन रावत, जिल्हा शल्य चिकीत्सक डॉ. वसंत बाबरे, जिल्हा आरोग्य अधिकारी डॉ. आर. बी. पवार  उपस्थित होते. 

           महिला आरोग्य अभियान पंधरवाडानिमीत्त विविध उपक्रमाचे आयोजन करण्यात आले आहे. हा पंधरवाडा 12 मार्चपर्यंत गावपातळीवर राबविण्यात येणार आहे.  जिल्हयातील सर्व आरोग्य संस्थेमध्ये राबविण्यात  येणार आहे.‍या पंधरावाडयाचे मुख्य  उददेश महिलांचे आरोग्य सुधारणे आहे.

         दि. 28 फेब्रुवारी  ते 2 मार्च या दरम्यान जिल्ह्यातील 100 टक्के गरोदर मातांची नोंदणी  व आरोग्य तपासणी. 3 मार्चला महिला मेळाव्यात आरोग्य सेवेची माहिती दिली जाईल.  4 ते 6 मार्च या दरम्यान असांसर्गीक आजाराचे उच्च रक्तदाब , डायबेटीस, कॅन्सर, मोतीबंदू निदान व उपचार करण्यात  येतील.

         दि. 7 ते 9 मार्च या कालावधीत  आरोग्य संस्था सुसज्य बनवण्याकारीता उदा- सुसज्य यंत्रसामुग्री, सुसज्ज इमारतीबाबत कार्यवाही केली जाईल. 10 ते 12 मार्चच्या दरम्यान बालकांचे 100 टक्के लसीकरण. पंधरवाडया  दरम्यान जिल्हा रुग्णालय व उप जिल्हा रग्णालय स्तरावर रक्‍तदान शिबीरे, मोतीबिंदू शस्त्रक्रीया शिबीरे, राजीव गांधी जीवनदायी योजनेअंतर्गत शिबीरे व आयुष शिबीरे घेण्यात येतील.

या पंधरवाडयात आरोग्‍य संस्थेतील सर्व वैदयकीय अधिकारी व कर्मचारी तसेच अशासकीय संस्थेच्या समन्वयाने कार्यक्रम राबविला जाणार आहे. प्राथमिक आरोग्‍य केंद्र अणदूर, व ग्रामीण रुग्णालय सास्तूर , लेप्रोक्सोपी शिबीराचे आयोजन करण्यात आले आहे. तसेच प्रा. आ. केंद्र आणदूर येथे कॅन्सर कर्करोगासंबधि विशेष  शिबीराचे आयोजन करण्यात येणार आहे. पात्र रुग्णांनी या संधीचा लाभ घ्यावा, असे आवाहन  करण्यात आले आहे.

महिला आणि बालचमुंची स्टॉल्सवर गर्दी

उस्मानाबाद -  जिल्हा परिषदेच्या ग्रामीण विकास यंत्रणेच्या वतीने येथील दी उस्मानाबाद क्लब येथे सुरु असणाऱ्या आद्या महोत्सवास उस्मानाबादकर नागरिकांचा भरभरुन प्रतिसाद मिळत आहे. विशेषत: महिला वर्गाने खरेदीसाठी केलेली गर्दी, खाद्य पदार्थांच्या स्टॉल्सवर आबालवृद्धांची उडालेली झुंबड यामुळे आद्या महोत्सवात सहभागी झालेल्या बचत गटांच्या प्रतिनिधींच्या चेहऱ्यावरही समाधान झळकत आहे. 

राष्ट्रीय ग्रामीण जीवनोन्नती अभियान, स्वर्णजयंती ग्राम स्वरोजगार योजनांतर्गत जिल्हा ग्रामीण विकास यंत्रणेने हे स्वयंसहायता समुह-बचत गट निर्मित वस्तूंचे जिल्हास्तरीय प्रदर्शन व विक्री महोत्सव आयोजित केला आहे. दि. 26 फेब्रुवारी रोजी या महोत्सवास प्रारंभ झाला. दि. 26 व 27 या दोन दिवसांत 34 बचत गटांनी तब्बल 1 लाख 19 हजार रुपयांची विक्री केली. या प्रदर्शनात विविध बचत गटांनी खाद्य पदार्थ, लेदर वर्कसचे चप्पल व बूट, सफेद मुसळी, आयुर्वेदीक पावडर, घोंगडी, आवळा कॅन्डी,  चटणी, ज्वेलरी, लसूण पापड, महिलांचे सौंदर्य प्रसाधने आदी विक्रीसाठी उपलब्ध करुन दिली आहेत. 

या महोत्सवाला भेट देणारेही आवर्जून येथील वस्तूंची खरेदी करुन एक प्रकारे बचत गट चळवळीला बळ देण्याचे काम करीत आहेत. या महोत्सवात जिल्ह्याबाहेरीलही 9 बचत गटांनी सहभाग नोंदविला आहे. हा महोत्सव दि. 2 मार्चपर्यंत सुरु राहणार असून अधिकाधिक नागरिकांनी या प्रदर्शनाला भेट देण्याचे आवाहन जिल्हा परिषदेच्या मुख्य कार्यकारी अधिकारी सुमन रावत आणि जिल्हा ग्रामीण विकास यंत्रणेच्या प्रकल्प संचालक डॉ. रुपाली सातपुते यांनी केले आहे.         

नामवंत प्रकाशकांच्या पुस्तकांनी ग्रंथोत्सव सजणार

 उस्मानाबाद -  महाराष्ट्र शासनाच्या ग्रंथोत्सव उपक्रमास गेल्या तीन वर्षापासून संपूर्ण राज्यात चांगला प्रतिसाद लाभत आहे. वाचन चळवळ वाढविण्यासाठी आणि वाचकांना त्यांच्या आवडीची पुस्तके एकाच ठिकाणी उपलब्ध व्हावीत, यासाठी राज्य शासनाने हा उफक्रम सुरु केला. या उपक्रमाने अल्पावधीत चांगले रुप घेतल्याचे चित्र दिसत आहे. उस्मानाबाद जिल्ह्यात प्रकाशकांनी नोंदविलेला सहभाग, जिल्ह्यातील रसिक वाचकांनी त्यास भरभरुन दिलेला प्रतिसाद आणि प्रसारमाध्यमांनी त्याची घेतलेली दखल यामुळे हा उपक्रम अधिकाधिक नागरिकांपर्यंत पोहोचला.  या उपक्रमाचे हे चौथे वर्ष असून  दि. 2 ते 4 मार्च, 2015 या कालावधीत सांस्कृतिक सभागृह, आनंदनगर, उस्मानाबाद येथे या ग्रंथप्रदर्शन व विक्री उपक्रमाचे आयोजन करण्यात आले आहे. 

जिल्हा माहिती कार्यालयाच्या वतीने या तीन दिवसीय उपक्रमाचे आयोजन करण्यात आले असून यांत विविध साहित्यिक कार्यक्रमांची मेजवानी रसिकांना मिळणार आहे. त्याचबरोबर नामवंत प्रकाशकांची पुस्तके एकाच ठिकाणी मिळणार आहेत. सध्या परीक्षांचा हंगाम असला तरी दहावी व बारावीचे विद्यार्थी वगळता इतर विद्यार्थ्यांनी हे ग्रंथप्रदर्शन पाहावे तसेच जिल्ह्यातील महाविद्यालयांनाही त्यांच्या विद्यार्थ्यांना या ग्रंथप्रदर्शनास आवर्जून भेट देण्याचे आवाहन करण्यात आले आहे. विविध महाविद्यालयांच्या साहित्य मंडळाचे प्रतिनिधी, विद्यार्थी प्रतिनिधी, शिक्षक, शिक्षकेतर कर्मचारी यांनीही तीन दिवसांत त्यांच्या सोईप्रमाणे या ग्रंथप्रदर्शनास आवर्जून भेट द्यावी, असे आवाहन जिल्हा माहिती कार्यालयाच्या वतीने करण्यात आले आहे. त्याचबरोबर जिल्ह्यातील सार्वजनिक वाचनालये-ग्रंथालये यांच्याशीही संपर्क साधून अधिकाधिक मोठ्या प्रमाणात येथील ग्रंथप्रदर्शनाचा त्यांनी लाभ घ्यावा आणि त्यांचा सहभाग नोंदवावा, असेही आवाहन करण्यात आले आहे. 

जिल्ह्यातील विविध संस्था-संघटना, सार्वजनिक मंडळे यांचे पदाधिकारी, सदस्य यांनीही या उपक्रमास आवर्जून भेट द्यावी आणि पुस्तक खरेदीचा लाभ घ्यावा, असे आवाहन करण्यात आहे आहे. 

या उपक्रमास मराठवाडा साहित्य परिषदेची उस्मानाबाद शाखा, नगरवाचनालय, जिल्हा ग्रंथालय अधिकारी कार्यालय, आकाशवाणी आणि जिल्हयातील सर्व प्रसारमाध्यम प्रतिनिधींचे सहकार्य लाभले आहे. त्याचबरोबर जिल्हा प्रशासन, जिल्हा परिषद प्रशासन, पोलीस प्रशासन, शहर वाहतूक शाखा, नगरपालिका आणि सार्वजनिक बांधकाम विभागही या उपक्रमाच्या आयोजनात सहकार्य करीत आहे. 

दि. 2 मार्चपासून सुरु होणाऱ्या या ग्रंथोत्सवात लोकसाहित्य प्रकाशन, राजहंस प्रकाशन (पूजा ग्रंथ वितरण), प्रतिभास प्रकाशन, इस्लामिक मराठी पब्लिकेशन ट्रस्ट, पृथ्वीराज प्रकाशन, सुविद्या प्रकाशन, विचारसेतू पुस्तकालय, साईशयाम पुस्तकालय, विकास बुक सेलर्स, सविता प्रकाशन, विजय प्रकाशन, ज्ञानदाता साहित्य सेवा, मायबोली इंटरप्रायजेस, विश्वरुपी पुस्तकालय, ग्रंथाली प्रकाशन, साकेत प्रकाशन, अलवी बुक सेंटर, शिवशंभू युवा प्रकाशन, श्रीनाथ बुक मार्केटींग, ज्ञानसागर प्रकाशन, संदर्भ प्रकाशन, संस्कार प्रकाशन, शब्द प्रकाशनआणि अक्षर प्रकाशन हे खासगी प्रकाशक- विक्रेते  सहभागी होणार आहेत. त्याचबरोबर शासकीय ग्रंथागार औरंगाबाद आणि बालभारती पुणे यांचेही स्टॉल्स याठिकाणी राहणार आहेत. 

ग्रंथोत्सवात तीनही दिवस सकाळी 9 ते रात्री 9 वाजेपर्यंत ग्रंथप्रदर्शन रसिक वाचकांसाठी खुले राहणार असून जिल्ह्यातील रसिकांनी याचा लाभ घ्यावा, असे आवाहन जिल्हा माहिती कार्यालय, उस्मानाबादच्या वतीने करण्यात आले आहे.   

काठीने मारहाण प्रकरणी पाच जणावर गुन्‍हा दाखल

पांगरी - घराकडे बघण्याच्या किरकोळ कारणावरून पाच जणांनी मिळून घरात घुसून दोघांना काठीने मारहाण करत जातिवाचक शिवीगाळ केल्याची घटना काल दि.27 शुक्रवारी 8.30 वाजता खडकोणी ता.बार्शी येथील वस्तीत घडली.अलका अनिल बगाडे,व विपुल अनिल बगाडे दोघेही रा.खडकोणी अशी मारहाणीत जखमी झालेल्याची नांवे असून पांडुरंग उत्रेश्वर शिंदे,अर्जुन बलभीम शिंदे,उत्रेश्वर शिंदे,सरस्वती उत्रेश्वर शिंदे,व मनीषा पांडुरंग शिंदे (सर्व रा.खडकोणी)अशी जातिवाचक शिविगाळ  केल्याप्रकरणी गुन्हा दाखल झालेल्या आरोपीची नांवे असून त्यांना शनिवारी(28) ताब्यात घेण्यात आले आहे.

  जखमी अलका बगाडे या महिलेने पांगरी पोलिसात दिलेल्या फिर्यादीत म्हटले आहे की त्यांचे घर आरोपीच्या घरासमोर आहे.आरोपींनी गैरकायद्याची मंडळी जमवून फिर्यादीच्या घरात घुसून त्यांचा मुलगा विपुल यास तू आमच्या घराकडे का बघतोस,तुमची लायकी आहे काय असे म्हणत जातवाचक शिवीगाळ केली.काठीने मायलेकरांच्या डोक्यात,पायावर मारून लाथाबुक्यांनी मारहाण करत तुम्हाला ठेवत नाही,पुन्हा बघतो असे म्हणून दमबाजी केली.

  पांगरी पोलिसात अनुसूचीत जाती जमाती अत्याचार प्रतिबंधक कलमानव्ये पाच जणांवर गुन्हा दाखल केला आहे.अधिक तपास उपविभागीय पोलिस अधिकारी सर्जेराव ठोंबरे हे करत आहेत.

चोरीप्रकरणी एकास चार तासात अटक

पांगरी (गणेश गोडसे) पांगरी पोलिस ता.बार्शी  ठाण्याच्या हद्दीतील पांगरी व आगळगांव येथे चो-याच्या घटना घडल्या.आगळगांव येथील चोरीप्रकरणी पांगरी पोलिसांनी तात्काळ चक्र फिरवून दुचाकीसायकल चोरास चार तासात अटक केली.

    बालाजी अशोक मुळे रा.उक्‍कडगांव यांनी पोलिसात दिलेल्या फिर्यादीत म्हटले आहे की त्यांच्या पांगरी येथे पुणे-लातूर राज्य मार्गावर राजकिरन इरिगेशन अँड हार्डवेअर दुकान असून अज्ञात चोरट्यांनी त्यांच्या दुकानावरील पत्रा उचकटून आत प्रवेश करत गळल्यात ठेवलेले रोख पाच हजार रुपये चोरून नेले.शेजारील अभिमान माणिक गवळी यांचे जय भवानी सायकल मार्ट अश्याच पद्धतीने फोडून आत प्रवेश करून दुकानातील दहा हजार रुपये चोरून नेले.नंतर चोरट्यांनी विक्रांत गरड यांच्या गुरुद्त्त ट्रेडर्सकडे आपला मोर्चा वळवून दुकानात प्रवेश करण्याचा अयशस्वी प्रयत्न केला.

   दुसर्‍या आगळगांव येथे घडलेल्या घटनेबाबत प्रकाश कृष्णाथ पाठक यांनी दिलेल्या फिर्यादीत म्हटले आहे की त्यांची शेतातील वस्तीवर लावलेली एम.एच.13 ए.व्ही.2660 ही पंचेविश हजार रुपये किमतीची दुचाकी अज्ञात चोरट्यांनी त्यांच्या संमतीशिवाय चोरून नेली आहे.

 दरम्यान आगळगांव येथील दुचाकी चोरीबाबत पांगरी पोलिसांनी तपास वेगाने करून जयदीप दत्तात्रय जाधव यास अटक केली आहे.ही कारवाई स.पो.नि.सोमनाथ वाघ यांच्या मार्गदर्शनाखाली राजू राठोड,सुधाकर ठाकर,प्रभूलिंग वाघमारे यांनी केली.पांगरी पोलिसात गुन्हे दाखल झाले असून तपास पांगरी पोलिस करत आहेत.

शब्द प्रेमाचे' या चित्रपटाचा पांगरीत शुभारंभ

पांगरी (गणेश गोडसे) पांगरीसारख्या ग्रामीण भागातून हरहुन्नरी कलाकार तयार होत आहेत ही बाब खरोखरच कौतुकास्पद असून यातून स्फूर्ती घेऊन ग्रामीण भागात नवीन उदयोन्मुख कलाकार उदयास येतील असे प्रतिपादन पांगरी पोलिस ठाण्याचे अधिकारी राजू राठोड यांनी केले.ते पांगरी ता.बार्शी

येथील नीलकंठेश्वर मंदिरात 'शब्द प्रेमाचे'  या चित्रपटाच्या शुभारंभप्रसंगी प्रमुख पाहुणे म्हणून बोलत होते.कार्यक्रमाच्या अध्यक्षस्थानी सरपंच विजय गोडसे होते.

  राठोड पुढे बोलताना म्हणाले की या चित्रपटात  प्रमुख अभिनेत्रीची भूमिका साकारत असलेल्या पांगरीच्या कु.वैष्णवी जानराव हिच्यामुळे पांगरीचे नांव महाराष्ट्राच्या नकाशावर कोरले जात असून एखाद्या कलाकारामुळे गावाची ओळख तयार निर्माण होत असते.पांगरीसारख्या डोंगरी ग्रामीण भागात कसलाही वारसा नसतानाही शारी भागातील कलाकारांना लाजवेल असे कलाकार तयार होत आहेत. विविध सामाजिक,सांस्कृतिक क्षेत्रातील सहभागाबरोबरच 'पुढारी'सारखे वृतपत्र ग्रामीण भागातील कलाकारांना पाठबळ देत आहे ही गौरवाची गोष्ट आहे.कु.जानराव हिने यापूर्वी ‘प्रेम स्पर्श’,’प्रेमा तुझा रंग कसा’ आदी चित्रपटात काम केले आहे.

   यावेळी माजी सरपंच तात्या बोधे,विष्णु जानराव,दत्ता भालेराव,प्रसाद औटी,रंगनाथ जानराव,यांच्यासह डॉ.शरद पवार,विनोद चव्हाण,अजित देशमुख,कैलास तोडकर,सूर्यकांत घोडके,अशोक वाघमारे,सिने अभिनेत्री वैष्णवी जानराव,श्रीकांत पाटील,नितिन चव्हाण,नितिन सदाफुले,पत्रकार गणेश गोडसे,बाबा शिंदे,ऋषिकेश घोडके, आदी उपस्थित होते.सूत्रसंचालन शरद बसवंत यांनी केले.

चौकट: वैष्णवी जानराव(अभिनेत्री) :ग्रामीण भागातील बालकलाकारांच्या अंगातील सुप्त कलागुणांना वाव देण्यासाठी दैनिक पुढारी पांगरीत अनेक वर्षापासून राबवत असलेल्या नृत्य स्पर्धेचा माझ्या जडणघडणेत मोठा सहभाग असून यामुळेच मला कला सादर करण्यास संधी मिळाली.पुढारीच्या स्पर्धेत प्रथम माणकरी ठरल्यानंतर तेथूनच स्फूर्ती मिळाल्याचे जानराव यांनी सांगितले.

विद्यार्थीनींनी झाडे लावण्‍याची घेतली शपथ

नळदुर्ग -  जमिनीची धुप थांबवण्‍यासाठी व दुष्‍काळावर मात करण्‍यासाठी वृक्षारोपन व वृक्ष संवर्धन ही काळाची गरज लक्षात घेवून '' एक विद्यार्थी एक झाड लावणे'' गरजेचे असल्‍याचे अवाहन परिवर्तन सामाजिक संस्‍थेचे सचिव मारूती बनसोडे यांनी केले  जि.प. कन्‍या प्रशाला नळदुर्ग येथील विद्यार्थींनीनी पर्यावरण संवर्धनासाठी घेतली वृक्ष  लावण्‍याची शपथ. 

    पर्यावरण व वने, हवामान बदल मंत्रालय भारत सरकार व बायस संस्‍था पुणे आणि परिवर्तन सामाजिक संस्‍था नळदुर्ग यांच्‍या संयुक्‍त विद्यमाने आयोजित राष्‍ट्रीय पर्यावरण जनजागृती मोहीम 2015 च्‍या अंतर्गत नळदुर्ग  येथील जि.प. कन्‍या प्रशाला येथे कार्यक्रमाचे आयोजन करण्‍यात आले होते. यावेळी मारूती बनसोडे बोलत होते. 

    या कार्यक्रमाच्‍या अध्‍यक्षस्‍थानी कन्‍या प्रशालेचे प्रभारी मुख्‍याध्‍यापक गौतम राठोड हे होते. पुढे बोलताना मारूती बनसोडे म्‍हणाले की, बदलत्‍या हवामानामुळे मानवांच्‍या जीवनावर अनेक परिणाम होत आहे. दिवसेन दिवस तापमानात वाढ होवून जमिनिची धूप वाढत आहे. त्‍यामुळे वृक्षारोपण व वृक्ष संवर्धनाच्‍या चळवळीला गती देण्‍याची गरज आहे. या कार्यक्रमाचे सुत्रसंचालन व आभार गुंजीरे  यांनी केले. यावेळी कार्यकर्ते दादासाहेब बनसोडे, माने,  राठोड व  विद्यार्थी उपस्थित होते. 

जळकोट येथे मोफत आरोग्‍य शिबीर

जळकोट (संजय रेणुके)  जळकोट ता. तुळजापूर येथे शिवरत्‍न बहुउद्देशिय सामाजिक सेवाभावी संस्‍था जळकोट अंकित सार्वजनिक शिवजन्‍मोत्‍सव समिती व अश्विनी सहकारी रूग्‍णालय व संशोधन केंद्र सोलापूर यांच्‍या संयुक्‍त विद्यमाने हिंदवी स्‍वराज्‍य संस्‍थापक छत्रपती शिवाजी महाराज यांच्‍या 385 व्‍या जयंतीनिमित्‍त जळकोट येथे दि. 1 मार्च 2015 रोजी मोफत आरोग्‍य तपासणी व उपचार शिबीराचे आयोजन करण्‍यात आल्‍याचे संयोजन समितीच्‍यावतीने सांगण्‍यात आले. 

   उपरोक्‍त शिबीर सकाळी 9 ते 4 या वेळेत जिल्‍हा परिषद प्रशालेच्‍या नवीन इमारतीमध्‍ये संपन्‍न होणार असून याप्रसंगी उदघाटक म्‍हणून उस्‍मानाबाद जिल्‍हा नियोजन अधिकारी एम.के. भांगे, कार्यक्रमाच्‍या अध्‍यक्षस्‍थनी उस्‍मानाबाद बार काऊंन्‍सीलचे उपाध्‍यक्ष अॅड अंगदराव तुकाराम कदम, तर नळदुर्ग पोलिस ठाण्‍याचे सहाय्यक पोलिस निरीक्षक एम.वाय डांगे,  नायब तहसिलदार माणिक चव्‍हाण,डि.एच.ओ अश्विनी सहकारी रूग्‍णालय सोलापूर  एस.बी पाटील, निवृत्‍त पोलिस निरीक्षक ए.बी. कदम यांची प्रमुख उपस्थिती राहणार असून या शिबीरात उपस्थित लाभार्थींचे अश्विनी सहकारी रूग्‍णालयातील विविध तज्ञ डॉ. उपस्थित राहून सपासणी व उपचार करणार आहेत. इतकेच नव्‍हे तर रूग्‍णांना मोफत औषधांचे वाटपही करण्‍यात येणार असल्‍याचे यावेळी संयोजकाकडून सांगण्‍यात आले. त्‍याचबरोबर स्‍वाइन फ्ल्‍यू, चिकन गुणिया, व संधीवात आदी रोगासंदर्भात सल्‍ला व मार्गदर्शन करणार आहेत. शिबीरासंदर्भात  परिसरातील इच्‍छुकांनी  जळकोट येथील ज्ञानसंजिवनी क्‍ि‍लनीकचे डॉ. संजय कदम यांच्‍याशी संपर्क साधण्‍याचे अवाहन करण्‍यात आले. 

मसापच्यावतीने मराठी राजभाषा दिन साजरा

उस्मानाबाद - कुसुमाग्रजांचे साहित्य मूल्य, विचार आणि वैज्ञानिक दृष्टिकोन अधिक प्रभावीपणे समाजमनात रूजविण्याचे काम करते. मानवाला केंद्रबिंदू मानून त्यांनी केलेले लिखान आजही अनेक प्रश्‍नांना सहज भिडण्याचे सामर्थ्य देवून जाते. त्यामुळे कुसुमाग्रजांचे साहित्य नीतीमुल्यांसाठी सतत संघर्ष करण्याचे बळ देत असल्याचे प्रतिपादन व्यंकटेश महाजन महाविद्यालयाचे उपप्राचार्य डॉ. प्रशां

त चौधरी यांनी केले. 

मराठवाडा साहित्य परिषदेच्यावतीने कविश्रेष्ठ कुसुमाग्रज यांच्या जयंतीनिमित्त मराठी राजभाषा दिन साजरा करण्यात आला. यावेळी व्यंकटेश महाजन महाविद्यालयात आयोजित कार्यक्रमात ते बोलत होते. कार्यक्रमाच्या अध्यक्षस्थानी मसापचे कार्याध्यक्ष राजेंद्र अत्रे तर प्रा. महेंद्र चंदनशिवे यांची प्रमुख उपस्थिती होती. 

डॉ. चौधरी यांनी कुसुमाग्रजांच्या एकूण साहित्य कृतींचा धावता मागोवा घेतला. त्यांनी अनुवादित केलेल्या नाटकांचे कथानक भारतीय समाजव्यवस्थेतील प्रश्‍नांना सोबत घेवून कशा पध्दतीने मांडले, याची अनेक उदाहरणे चौधरी यांनी यावेळी उपस्थितांना दिली. इंग्रजी नाटकांच्या केवळ संकल्पना कुसुमाग्रजांनी स्वीकारल्या आणि त्याचा स्वयंअनुवाद करीत असताना महाराष्ट्र आणि भारतीय समाज डोळ्यासमोर ठेवून नाटकांचे लेखन केले. त्यामुळेच त्यांचा नटसम्राट असेल, ऑथेलो असेल, असी कितीतरी नाटके आजही मराठीत माणसांच्या मनावर अधिराज्य गाजवित असल्याचे त्यांनी सांगितले. त्यांच्या साहित्यकृतींचा अधिक सजगपणे अभ्यास करणे गरजेचे आहे. त्यातून मानवतावादी मूल्यांची जोपासणा होत असल्याचेही त्यांनी सांगितले. 

प्रा. चंदनशिवे यांनी केशवसुतांच्या सामाजिक अंगाला कुसुमाग्रजांनी आपल्या कवितांमधून खर्‍या अर्थाने प्रतिष्ठा मिळवून दिली असल्याचे नमूद केले. त्यांनी कुसुमाग्रजांच्या अनेक कवितांचे दाखले देत त्यात वापरलेल्या प्रतिमा सर्वसामान्यांच्या जीवनात पावलोपावली आढळत असल्याचे निदर्शनास आणून दिले. राजेंद्र अत्रे यांनी अध्यक्षीय समारोपात कुसुमाग्रजांच्या आठवणींना उजाळा दिला. कुसुमाग्रज म्हणजे साक्षात वैज्ञानिक दृष्टिकोन, अशा शब्दांत त्यांनी वि. वा. शिरवाडकर यांच्या साहित्यातील दाखले दिले. त्यानंतर कवी पी. डी. कांबळे, युवराज नळे, प्रा. अरविंद हंगरगेकर, हनुमंत पडवळ, ऍड. वा. मा. वाघमारे, रवींद्र केसकर, बालाजी तांबे यांनी कुसुमाग्रजांच्या विविध कवितांचे वाचन केले. कार्यक्रमाचे सूत्रसंचालन मसापचे सचिव बालाजी तांबे यांनी तर आभार हनुमंत पडवळ यांनी मानले. कार्यक्रमास मसापचे पदाधिकारी, सदस्य, प्राध्यापक व विद्यार्थी उपस्थित होते. 

ग्रामीण साहित्याने मराठीला चांगले दिवस

 बार्शी (मल्लिकार्जुन धारूरकर)  मराठी भाषेत भविष्यात ज्ञानपीठ पुरस्कार मिळवणारे लेखक निर्माण व्हावेत ग्रामीण साहित्य हे बोली भाषेतील व वास्तववादी विचार मांडणारे आहेत. ग्रामीण साहित्याने मराठीला चांगले दिवस आले आहेत. या साहित्याने मराठी भाषेत मोलाची भर घालण्याचे काम केल्‍याचे विचार प्राचार्य डॉ.मधुकर फरताडे यांनी व्यक्त केले.

    श्री. शिवाजी महाविद्यालात कुसुमाग्रज यांचा जन्‍मदिवस मराठी राज

भाषा गौरव दिन व जागतिक मराठी दिन म्हणून साजरा करण्यात आला या कार्यक्रम प्रसंगी ते बोलत होते. यावेळी व्यासपीठावर मराठी विभागप्रमुख प्रा.डॉ.भारती रेवडकर, प्रा.डॉ.राजेंद्र दास, प्रा.डॉ.बी.डी.पारसे, प्रा.डॉ.रविकांत शिंदे, प्रा.विजयश्री गवळी आदी उपस्थित होते. पुढे बोलताना प्राचार्य फरताडे म्हणाले मराठी भाषेतील शब्द इतर भाषेत घेतले जात आहेत यामुळे इतर भाषाही मराठी शब्दाने संमृध्द होत आहेत. कार्यक्रमाच्‍या अध्यक्षा प्रा.डॉ.भारती रेवडकर म्हणाल्या भाषांच्या अभ्यासातून जीवनातील मुल्‍य समजते. मानवतावाद, माणुसकी यांना अधोरेखित करणारे साहित्य कुसुमाग्रजांनी निर्माण केले. साहित्यातून खरे ज्ञान मिळते. मराठी भाषेने आज पर्यंत ज्ञान देण्याचे कार्य केले. माधुर्य, सौंदर्य असलेली भाषा म्हणाजे मराठी भाषा आहे. ग्रामीण मराठी बोली भाषा अतिशय सुंदर आहे. मराठी भाषेचा शब्द संग्रह वाढवण्याची जबाबदारी आपल्या सर्वांची आहे. त्यासाठी प्रमाण भाषेपेक्षा बोली भाषेतील साहित्य निर्माण होणे आवश्यक आहे. प्रा.डॉ.राजेंद्र दास म्हणाले माणसांच्या मनाला जोडते ती भाषा असते. मराठी भाषा मोठ्या साहित्यींकापसून ते प्रत्येक मराठी भाषीकांनी आपल्या लिखाणाने संमृध्द केली आहे. प्रास्ताविकात प्रा.डॉ.बी.डी.पारसे यांनी नेमाडे यांना मिळालेल्या ज्ञानपीठ पुरस्काराने मराठी भाषेच्या शिरोपेचात मानाचा तुरा रोवला गेला असल्याचे सांगितले. मराठी भाषा संमृध्द करण्याचे काम आज पर्यंत अनेक साहित्यिकांनी केले. कुसुमाग्रजांनी एकूण सोहळा कविता संग्रह, तीन कादंबर्‍या, आठ कथासंग्रह यांच्यासह एकांकीका, नाटक लिहिले. त्यांची ओळख भारताचे शेक्सपिअर, मानवतेचे कवी अशी होती. प्रारंभी ज्ञानपीठ पुरस्कार विजेते कवी कुसुमाग्रज व भालचंद्र नेमाडे यांच्यावर आधारित भित्ती पत्रकाचे उद्घाटन, कवी कुसुमाग्रज व कर्मवीर डॉ.ममासाहेब जगदाळे यांच्या प्रतिमेचे पुजन करण्‍यात आले.  यावेळी स्वाती कोकरे,  संध्या काळे, करिश्‍मा गायकवाड या विद्यार्थींनीनी मनोगत व्यक्त केले. सूत्रसंचालन व आभार प्रा.डॉ.रविकांत शिंदे यांनी मानले.

दिडशे वर्षानंतरही बार्शी नगरपरिषदेचा अजब कारभार

बार्शी (मल्लिकार्जुन धारूरकर) बार्शी नगरपरिषदेच्या सार्वजनिक पिण्याच्या पाईपलाईनवर अतिक्रमण करुन शौचालयांची बांधकामे केल्याचा धक्कादायक प्रकार उघडकीस आला आहे. याबाबत परिसरातील रहिवाशांनी नगरपरिषदेकडे अनेक दिवसांपासून तक्रार करुनही त्याकडे जाणीवपूर्वक दुर्लक्ष होत असल्याचे दिसूत येत आहे.

 बार्शी नगरपरिषदेच्या स्थापनेला दिडशे वर्षे पुर्ण होत असून यंदाचे वर्ष हे मोठ्या योजनापूर्ण विकासाकडे घेऊन जाणारे साजरे करु अशा गप्पा मारतांना अधिकारी व नगरसेवक मात्र  

जनतेच्या आरोग्याशी खेळ करत असल्याचे जनतेतून बोलले जात  आहे.

याबाबत तक्रार समीरअहमद बशीरअहमद वळसंगकर यांनी दिलेल्या तक्रारीत महेदवी कब्रस्तान शेजारी असलेल्या गट नं.९३३ या सरकारी मालकीच्या जागेत मोठ्या प्रमाणात रहिवासी अतिक्रमण करण्यात आले आहे. यातून महाराष्ट्र प्रादेशिक व नगररचनाचे प्रारुप विकास योजना (दुसरी सुधारीत) ४० फुटांचा रस्ता मंजूर करण्यात आला आहे. त्याबाबत आदेशही २००३ साली नगरपरिषदेला देण्यात आले होते. हा रस्ता परंडा रस्ता ते गाडेगाव रस्त्याला जोडणारा असून परिसरातील शेळके प्लॉट, नाईकवाडी प्लॉट, नागणे प्लॉट, गुंड प्लॉट तसेच सर्वे नं.४२२ आदी परिसरातील नागरिकांच्या सोयीचा आहे. या जागेतून चांदणी तसेच उजनी पाणी पुरवठा योजनेतील जलशुध्दीकरण करुन जाणारी पाईपलाईन पूर्वीपासूनच नेण्यात आली आहे. येथे आमदार कोठ्यातील हातपंपही बसविण्यात आला आहे. तसेच परिसरातील नागरिकांच्या पिण्याच्या पाणीपुरवठ्याची लाईनही नेण्यात आली असून अतिक्रमण धारकांनी यावरुन बोगस नळ कनेक्शन घेऊन वापर सुरु केला आहे.

सदरच्या जागेची पाहणी करण्यासाठी नगरपरिषदेचे कर्मचारी गेले असता त्यांनी अतिक्रमण धारकांना बेकायदा बांधकाम थांबविण्याच्या सूचना केल्या परंतु त्यांना धमकावण्यात आल्याचे प्रत्यक्षदर्शी सांगत आहेत. अतिक्रमण धारकांना याबाबत प्रश्‍न विचारला असता ही जागा आमच्या समाजाची असून आम्ही ती विकत घेतल्याचे सांगत आहेत. याखालून पाण्याची पाईपलाईन गेली का अशी विचारणा केली असता गेली आहे परंतु त्यापासून दोन फूट अंतर सोडूनच आम्ही आमच्या वैयक्तिक शौचालयांचे बांधकाम सुरु केले असल्याचे सांगत आहेत. सदरची जागा सरकारी आहे तर ही जागा कोणत्या प्रकारे खरेदी विक्री झाली याचीही चौकशी करणे गरजेचे आहे.

जळकोट येथे आयोजित शिवजन्‍मोत्‍सव समितीच्‍यावतीने 111 युवकांचे रक्‍तदान

 जळकोट (संजय रेणुके) जागतिक पातळीवर विज्ञानाने प्रचंड प्रगती केली आहे. मग जगातील कोणत्‍याही प्रयोग शाळेत कृत्रिमरित्‍या मानवी रक्‍त तयार करण्‍यात दुर्दैवाने आद्याप यश आले नाही. त्‍यामुळे रूग्‍णाचे प्राण वाचवण्‍यासाठी मानवाच्‍या शरीरातील रक्‍ताशिवाय पर्याय ना

ही.  त्‍यासाठी सर्वच ठिकाणी रक्‍तदान शिबीर आयोजित करून रक्‍त संकलित केले जाते. याचाच एक भाग म्हणून भविष्‍यात मानवी रूग्‍णांना रक्‍त कमी पडू नये हा उदात्‍त हेतूने जळकोट ता. तुळजापूर  येथील शिवरत्‍न बहुउद्देशिय सामाजिक सेवाभावी संस्‍था संचलित सार्वजनिक शिवजन्‍मोत्‍सव समिती तर्फे शुक्रवार दि. 27 फेब्रुवारी रोजी आयोजित रक्‍तदान शिबीरात एकशे अकरा युवकांनी रक्‍तदान केले.

    शिवजन्‍मोत्‍सव समितीच्‍या पदाधिका-यांनी आयोजित केलेल्‍या रक्‍तदानाचे हे आठवे वे वर्ष असून प्रत्‍येक वर्षी  रक्‍तदात्‍यांनी रक्‍तदान करून रूग्‍णांचे प्राण वाचविण्‍याचे सत्‍कर्म आजपर्यंत केले आहे. व यापुढेही अविरत करतच राहणार आहोत असा निर्धारही यावेळी समितीचे पदाधिका-यासह युवकांनी केला आहे.प्रारंभी शिवाजी चौकातील अश्‍वारूढ शिवरायांच्‍या पुतळयाचे पुजन प्राथमिक आरोग्‍य केंद्राचे वैद्यकिय अधिकारी वि‍वेक कुलकर्णी व संजिवनी कुलकर्णी, डॉ. संजय कदम यांच्‍या हस्‍ते करण्‍यात आले.  तर रक्‍तदान शिबीराचे उदघाटन नळदुर्ग पोलीस ठाण्‍याचे सहाय्यक पोलिस निरीक्षक डांगे यांनी केले. याप्रसंगी शिवजन्‍मोत्‍सव समितीचे अधारस्‍तंभ किशोर कदम, अध्‍यक्ष नागराज जाधव, उपाध्‍यक्ष आनंद मोटे, सचिव शाहुराज कदम, कोषाध्‍यक्ष नागराज कदम, सहसचिव मंगेश सुरवसे, खजिनदार विशाल जाधव, अॅड सचिन कदम, शिवराम कदम, उमेश गंगणे, ब्रम्‍हानंद कदम, शकिल मुलानी, विकास जाधव, दगडू सुरवसे, पवन जाधव, विकास चुंगे, रोहित कदम, जितेंद्र कदम, मनोज कदम, अमिरपाशा जमादार, आदीसह नागरिक उपस्थित होते. 

   सदर शिबीरात अरूण लोखंडे, संजय रेणुके, जीवन गुळे आदींसह एकुण एकशे अकरा युवकांनी रक्‍तदान केल्‍याने जन्‍मोत्‍सव समितीच्‍यावतीने त्‍यांचे आभार व्‍यक्‍त करण्‍यात आले. रक्‍त संकलनासाठी गोपाबाई दमाणी, रक्‍तपेढी सोलापूर येथील श्रीमती. ए.ए थिटे, प्रकाश केसकर आदींनी योगदान दिले.

मराठी दिनानिमित्‍त मनसेतर्फे मराठी शिक्षकांचा सत्‍कार

उस्‍मानाबाद - 27 फेब्रुवारी हा वि.वा. शिरवाडकर यांची जयंती मराठी भाषा दिवस म्‍हणून राज्‍यभर साजरा करण्‍यात येते. याचाच भाग म्‍हणून मनसेतर्फे मराठी विषय शिकवणारे शिक्षकांचा सत्‍कार करण्‍यात आला. 

   उस्‍मानाबाद प्रशालेत मराठी विषय शिकवणारे शिक्षक कुदळे बी.व्‍ही, बोचरे ए.व्‍ही, रणदिवे एन.एल यांचा सत्‍कार मनसेचे जिल्‍हा उपाध्‍यक्ष दिनेश देशमुख, जिल्‍हा संघटक मिलींद चांडगे यांच्‍या हस्‍ते सत्‍कार करण्‍यात आला. यावेळी शाळेचे मुख्याध्‍यापक मोहन सुरवसे यांच्‍यासह शाळेचे विद्यार्थी उपस्थित होते. 

मनसेच्‍यावतीने जागतिक मराठी भाष दिवस साजरा

 उस्‍मानाबाद - महाराष्‍ट्र नवनिर्माण सेनेच्‍यावतीने शिवाजी चौक येथे जागतिक मराठी भाषा दिवस म्‍हणून फटाकेची अतिषबाजी व पुष्‍पगुच्‍छ, लाडू वाटप करून सदर 27 फेब्रुवारी रोजी उत्‍सहाने साजरा करण्‍यात आला. कार्यक्रमास मनसे शहराध्‍यक्ष दादा कांबळे यांच्‍या नेतृत्‍वाखाली सदर जागतिक मराठी भाषा दिन साजरा करण्‍यात आला. 

   यावेळी मनसे शहराध्‍यक्ष दादा कांबळे, तालुका उपाध्‍यक्ष व्‍यंकट जाधव, नितीन राठोड, विठ्ठल गिरी, शिंगाडे रक्षित, संकेत गायकवाड, प्रेम बनसोडे, निहाल मुजावर, धावरे प्रतिक, अमोर सोयात धनेश मसने, संदीप आळगे आदी उपस्थित होते. 

कामधेनु दत्‍तक ग्राम योजना 65 गावात कार्यान्वित

उस्‍मानाबाद - कामधेनु दत्‍तक ग्राम योजना पशुसंवर्धन विभाग, महाराष्‍ट्र शासन व जिल्‍हा परिषद उस्‍मानाबाद यांच्‍या संयुक्‍त विद्यमाने कामधेनु दत्‍तक ग्राम योजना जिल्‍ह्यातील 65 गावांमध्‍ये राबविण्‍यात येत आहे. 

   दत्‍तक गावामधील पशुंचे वंध्‍यत्‍व दूर करून त्‍यांची उत्‍पादन क्षमतेत वाढ करून दुग्‍धोत्‍पादक वाढविणे हा योजनेचा मुख्‍य उद्देश आहे. त्‍या दृष्‍टीने ही योजना  टप्यानूसार वर्षभर त्‍या गावामध्‍ये राबविले जाते. त्‍यामध्‍ये जनावरामधील जंतनिर्मुलन, गोचीड, गोमाशा निर्मुलन सर्व रोगाचे रोगप्रतिबंधक लसीकरण, वंध्‍यत्‍व निवारण निकृष्‍ट चारा सकस करणे, जनावरांच्‍या मलमुत्र व वाया गेलेल्‍या चा-यापासून खतनिर्मिती, प्रात्‍याक्षिक असलेला वनस्‍पतीचा जनावरांच्‍या खाद्यात उपयोग करणे, पशुपालन मंडळांना अधुनिक पध्‍दतीने पशुपालन करणे बाबत आभ्‍यास दौरा दत्‍तक गावामध्‍ये दुग्‍धस्‍पर्धा इत्‍यादी कार्यक्रम पशुपालन मंडळाच्‍या सल्‍याने राबविले जातात. त्‍याचाच भाग म्‍हणून या योजनांतर्गत पशुपालकांची आभ्‍यास दौरा उस्‍मानाबाद येथून फलटन ता. सातारा येथे दि. 27 फेब्रुवारी रोजी रवाना झाली. त्‍यांना पशुसंवर्धन व दुग्‍धशाळा समितीचे सदस्‍य रामदास कोळगे व पशुपालन विकास अधिकारी डॉ. सुभाष  बोरकर यांनी हिरवा झेंडा दाखवून सहल रवाना केली. 

प्रभारी नगराध्‍यक्षपदी पुराणिक

नळदुर्ग -  येथील नगरपालिकेच्‍या प्रभारी नगराध्‍यक्षपदाचा पदभार उपनगराध्‍यक्ष सौ. सुप्रिया पुराणिक यांनी घेतला असून नगराध्‍यक्ष सौ. मंगल सुरवसे यांनी नगराध्‍यक्षपदाचा पदभार पुराणिक यांना दिले. 

       नळदुर्ग नगरपालिकेच्‍या नगराध्‍यक्षा सौ. मंगल सुरवसे या रजेवर गेल्‍याने उपाध्‍यक्षा सुप्रिया पुराणिक यांनी प्रभारी नगराध्‍यक्ष पदाची सुत्रे स्‍वीकारली. याप्रसंगी पालिका सभागृहात  नगराध्‍यक्षा मंगल सुरवसे, शहर मनसे अध्‍यक्ष ज्‍योतिबा येडगे, शहर शिवसेना प्रमुख, संतोष पुदाले, माजी नगरसेवक सुधीर हजारी, नगरसेवक शब्‍बीर सावकार, संजय बताले, निरंजन राठोड, सचिन डुकरे, इमाम शेख, नगरसेविका अपर्णा बेडगे,  निर्मला गायकवाड, , कुरेशी, सुमन जाधव, लक्ष्‍मी खारवे, मुनवर सुलताना कुरेशी, सुप्रिया कुरेशी ,कॉंग्रेस सेवादलाचे अध्‍यक्ष विनायक अहंकारी, कॉंग्रेस जिल्‍हा सरचिणीस जावेद काझी, अख्‍तर काझी यांच्‍यासह नागरिक उपस्थित होते. 

    सुप्रिया पुराणिक यांनी प्रभारी नगराध्‍यक्षांचा पदभार घेतल्‍यानंतर त्‍यांच्‍या समर्थकांनी शहरात फटाक्‍यांची आतबाजी करून पेढे वाटले. त्‍यांचा शहरातील विविध संघटना व  कार्यकर्ते, पदाधिकारी सौ. सुप्रिया पुराणिक यांचा सत्‍कार करून त्‍यांना शुभेच्‍छा दिल्‍या. 

    यावेळी बोलताना नगरसेवक शहबाज काझी यांनी म्‍हटले की, शहरातील  पाणीपुरवठा तसेच स्‍वच्‍छतेचे पुरते धिंडवडे निघाले असून नगरपालिका  कर्मचा-यांवर  वचक राहिला नाही. जे कर्मचारी काम करित नाहीत त्‍यांना कारवाई करण्‍याचे सांगितले. यावेळी सत्‍काराला उत्‍तर देताना प्रभारी नगराध्‍यक्षा सुप्रिया पुराणिक यांनी म्‍हटले की, माझ्यासारख्‍या सर्वसामान्‍य महिलेला हे मनाचे पद आ. मधुकरराव चवहाण यांच्‍यामुळे मिळाले आहे. त्‍यांनी दाखविलेल्‍या विश्‍वासाला तडा न जावू देता मला मिळालेल्‍या या संधीचा उपयोग शहराचा विकास करण्‍यासाठी प्रयत्‍नशील राहिल. शेवटी सर्वांचे  आभार मुनीर शेख यांनी मानले. 

बार्शी आगारातून धावतात भंगारातील बस

बार्शी - अच्छे दिन आऐंगे, सर्वात पुढे महाराष्ट्र, कुठे नेऊन ठेवलाय महाराष्ट्र माझा? अशा जाहीरातींचा मारा संपला लोकांनी दिलेली मते आणि मिळालेली सत्ता यांचा अजूनही ताळमेळ बसला नाही आणि सामान्यांच्या अडचणी आहे तशाच राहिल्याचे विदारक चित्र अनेक ठिकाणी दिसून येत आहे. त्यातीलच एक जीवंत उदाहरण म्हणजे बार्शी आगारातील धावणार्‍या एसटी बस होय.
भ्रष्टाचारची चर्चा करतांना अनेकजण सहजपणे म्हणतात लोकशाहीपेक्षा इंग्रज बरे होते त्याचप्रमाणे आता भाजपापेक्षा कॉंग्रेसच बरे होते असे म्हणतांना दिसत आहेत. बार्शी बस स्थानकातून ग्रामीण भागात जाणार्‍या अनेक बसची अवस्था ही अत्यंत दयनीय आहे. या बसची पत्र्याची आच्छादने वाहन चालतांना हलतांना दिसून येतात. अनेक काचांच्या जागी रिकाम्या फ्रेम आहेत त्यामुळे नैसर्गिक एअरकंडीशन तसेच या वाहनातून प्रवास करणारे प्रवास्यांमध्ये एकच समाधानाची गोष्ट घडते ती म्हणजे खिडकीपाशी बसण्यासाठी कोणी भांडत नाही अथवा जागा धरण्याचा प्रयत्नही करत नाही. पावसाळ्यात तर छत गळत असल्याने बसमध्ये छत्री घेऊनच बसावे लागते. प्रवाशी दारातून आत शिरले काय अथवा खिडकीतून आत शिरले हे सहजासहजी लक्षात येत नाही इतकी दुरावस्था वाहनांची झालेली दिसून येते. बार्शी बस आगारातून उपलब्ध १०८ बसपैकी ३७ वाहनांची अवस्था ही वाहन भंगारात घालण्यासारखी आहे.
यामुळे एसटीचा प्रवास सुरक्षीत प्रवास हे विसरा असे म्हणण्याची वेळ प्रवाशांवर आली आहे. आपल्या गावाकडे जाण्यासाठी अनेक खेड्यापाड्यांतील नागरिकांना या वाहनांशिवाय पर्याय नाही इतर खाजगी वाहनांच्या पर्यायाचा विचार करता बसपेक्षा जादा रक्कम आणि चार जण बसण्याच्या जागेवर आठ जणांना बसवून छोट्याश्या वाहनातून सोळा ते वीस जणांना प्रवास करावा लागतो. त्यामुळे नाईलाज म्हणून अशा प्रकारच्या वाहनांतून त्यांचा प्रवास सुरु असतो. अशा प्रकारच्या दयनीय अवस्थेतील वाहनांबाबत बसचालक आणि वाहकांनी उद्गार काढल्यास अधिकार्‍यांकडून त्यांच्यावर कारवाई करण्याची धमकी देण्यात येते. वाहनांचे चाक पंक्चर झाले तरी त्यांना ते का पंक्चर झाले याचा लेखी खुलासा द्यावा लागतो. अशा प्रकारच्या सतत डगमगणार्‍या वाहनांच्या काचा फुटल्यासही त्यांच्याकडून लेखी घेण्यात येते अनेक प्रसंगी त्यांच्या वेतनातून कपात करण्यात येते. प्रत्येक वर्षाच्या सुरुवातीस वाहतूक सुरक्षा सप्ताहाचे आयोजन करण्यात येते. या सप्ताहात अशा प्रकारची वाहने आतून बाहेर काढली जात नाहीत. परंतु सप्ताह संपल्याबरोबर पुन्हा प्रवाश्यांच्या सेवेसाठी ही वाहने उपलब्ध होतात. आगारातील अधिकार्‍यांनाही या प्रश्‍नावर वरिष्ठ पातळीवरुन कोणत्याही नवीन वाहनांचा पुरवठा केला जात नाही. एसटी तोट्यात आहे, आहे त्यामध्ये ऍडजस्ट करा, शासनाकडून अनेक कोटी रुपये येणे बाकी आहे अशा प्रकारच्या थापा मारुन कर्मचार्‍यांना कामे करण्याचे बंधन लगावले जाते. अशा प्रकारच्या नादुरुस्त वाहनांना आरटीओ अधिकार्‍यांकडून परवानगी मिळतेच कशी हा देखिल प्रश्‍न यानिमित्ताने समोर येत आहे. ज्या जनतेच्या जोरावर पुढारी आपल्या तुंबड्या भरतात त्या ग्रामीण भागातील सामान्यांच्या व्यथा मात्र तसेच राहिल्याचे विदारक चित्र आजही अनेक प्रसंगी दिसून येत आहे. भ्रष्टाचारी मंडळी अनेक ठिकाणी भ्रष्टाचार करुन एकर कंडीशन वाहनांचा वापर करतात परंतु सामान्यांचा प्रवास मात्र नादुरुस्त असलेल्या वाहनातून आणि स्वत:चा जीव धोक्यात घालूनच होतो. अशा प्रकारची दयनीय अवस्थेतील वाहने चांगल्या रितीने दुरुस्त अथवा भंगारात घालणे गरजेचे झाले आहे.

सदोष मनुष्यवधाचा गुन्हा दाखल करण्याची मागणी

बार्शी - पाण्यात बुडून चार शाळकरी मुलींचा मृत्यू झाला, या घटनेस लघुपाटबंधारे खात्याचे अभियंत्ये जबाबदार असून त्यांच्या हलगर्जीपणामुळेच चौघींचा मृत्यू झाला असल्याने त्यांच्याविरोधात सदोष मनुष्यवधाचा गुन्हा दाखल करावा अशी मागणी करणार असल्याचे भा.ज.पा.नेते राजेंद्र मिरगणे यांनी पत्रकार परिषदेत सांगीतले. मिरगणे यांच्या वतीने पत्रकारांसमक्ष मृत मुलींच्या कुटुंबीयांना पंचवीस हजार रुपयांच्या मदतीचा धनादेश देण्यात आला. यचवेळी जिल्हा उपाध्यक्ष धनंजय जाधव, बाळासाहेब पाटील महागांवकर, शहराध्यक्ष दत्तात्रय जाधवर, प्रितम परदेशी, अण्णा सुरवसे, सुशांत गायकवाड, पंडित मिरगणे, भागवत पायघन, राजेश पवार आदी उपस्थित होते

तिघासह महिलेला मारहाण, महिलेचा विनयभंग ; चौघांना कोठडी

बार्शी -  प्लॉटींगची जमीन खरेदी विक्रीच्या पैशावरुन झालेल्या वादात महिलेचे मंगळसूत्र हिसकावून विनयभंग केला व तिघांना मारहाण केल्याच्या फिर्यादिवरुन बार्शी पोलिसांत मध्यस्ती व स्टँपविक्रेत्यांसह सहा जणांविरोधात गुन्हा दाखल झाला आहे. यातील पिडीत महिलेने स्वत: फिर्याद दाखल केली आहे.

महेश प्रकाश देवळे (वय 34 रा. उपळाई रोड) , आप्‍पा देवळे, दाद उर्फ किसन देवळे, रितेश वाघमारे (वय 22 रा. बारंगुळे प्‍ल्‍ॅट ), राहुल दशरथ बारंगळे (वय 21 रा. मंगळवार पेठ), सागर धनराज मगर (रा. शेंडगे प्‍ल्‍ॅट) व अन्‍य एक अनोळखी इसे तक्रारीतील आरोपींची नावे आहेत. पिडीत महिलेच्‍या कुटुंबाने 20 लाख रूपये देवून साठेखत केले होते. त्‍याची मुदत संपल्‍याने सदरची जमीन कायम खरेदी द्यावी अथवा दिलेली रक्‍कम परत मिळावी यासाठी त्‍यांच्‍यात वाद झाला होता.  यावेळी जनावरे बांधण्‍याच्‍या लोखंडी मेकने तिघांना मारहान केल्‍याची माहिती पोलिसांनी दिली. पद्मकृष्‍ण मंगल कार्यालयाजवळ शनिवारी सदरचा प्रकार घडला. यातील पिडीत महिला,तिचा पती व मुलगा जखमी झाले आहेत. महिलेचे पाच तोळे सोन्‍याचे मंगळसुत्र आरोपींनी नेल्‍याचे फिर्यादित म्‍हटले आहेत. याप्रकरणी आप्‍पा देवळे, दादा देवळे, सागर वाघमारे,राहुल बारंगुळे या चौघाना अटक करण्‍यात आली आहे. सहदिवाणी न्‍यायादिधीश प्रथम वर्ग न्‍यायादंडाधिकारी भागवत झिरपे यांच्‍या न्‍यायालयासमोर चौघांना हजर केले असता चार दिवसाची पोलिस कोठडीची शिक्षा सुनावण्‍यात आली असून रितेश वाघमारे व अन्य अनोळखीचा शेध घेण्‍याचे काम सुरू आहे. पोलिस उपनिरीक्षक ज्ञानेश्‍वर बेंद्रे हे पुढील तपास करित आहेत.

एस.टी. खाली सापडून वृध्‍द महिला ठार

 वैराग (महेश पन्हाळे)  वैराग बसस्थानकामध्ये बार्शी-सोलापूर या एस.टी. बस पुढील चाकाखाली सापडून हळदुगे (ता. बार्शी) येथील वृध्द महिलेचा मृत्यू झाला आहे. हा अपघात बुधवार, २५ फेब्रुवारी रोजी सकाळी ११.४५ वाजण्याच्या सुमारास घडला. वच्छला नरसिं

ह जगताप (वय ७0) असे त्या मृत वृध्द महिलेचे नाव आहे. दरम्यान, या अपघातानंतर बसस्थानकातील एस.टी. चालकांचा निष्काळजीपणा उघड झाला असून प्रवाशांतून संताप व्यक्त होत आहे. या अपघाताची नोंद वैराग पोलीस ठाण्यात करण्यात आली आहे.

      याबाबत वैराग पोलिसांनी दिलेली माहिती अशी की, बुधवार हा वैरागचा आठवडा बाजार दिवस असल्याने वैराग बस स्थानकात प्रवाशांची मोठी वर्दळ होती. दुपारी पाऊणे बारा दरम्यान बस स्थानकामध्येच हळदुगेवरुन आठवडा बाजारासाठी आलेल्या वृध्द वच्छला जगताप या एस.टी. बसमधून उतरून बसस्थानकातून बाजाराकडे निघाले असताना बार्शी-सोलापूर (बस क्र. एम.एच. २0 डी. ९३९७) या एस.टी. ने धडक दिल्याने पुढील चाकाखाली सापडून उजवा पाय चिरडला गेला व गंभीर जखमी झाल्या. त्यानंतर त्यांना तात्काळ रूग्णवाहिकेतून सोलापूर येथील शासकीय रूग्णालयात उपचारासाठी हलविण्यात आले. परंतु उपचारादरम्यान मोठय़ा प्रमाणात रक्तस्त्राव झाल्याने मृत्यू झाला. सदर महिलेच्या पश्‍चात चार मुली असून पतीचा यापूर्वीच निधनानंतर त्या हळदुगे येथे एकट्याच राहत होत्या.

महामार्गावरील झाडांची कत्तल

वैराग  (महेश पन्हाळे)  एका बाजूने शासन झाडे लावा, झाडे जगवा असा नारा देत असताना दुसर्‍या बाजूने शासनच झाडांची कत्तल करीत आहे, असे विदारक चित्र बाश्री-सोलापूर या राज्य महामार्गावर पहायला मिळत असून वटलेल्या व पडलेल्या झाडांच्या नावाखाली उभीही झाडे तोडून शासकीय झाडांची खुलेआम कत्तल करण्यात येत आहे. विशेष म्हणजे, याबाबत बाश्रीच्या सार्वजनिक बांधकाम उपविभाग मूग गिळून गप्पच आहे.करोडो रुपये खचरुन शासन झाडे लावण्याचा व जगवण्याचा प्रय▪करीत आहे. मात्र शासनाचेच काही विभाग याबाबत गंभीर नसल्याचे दिसून येत आहे. कित्येक वर्षांपासून बाश्री

-सोलापूर राज्य महामार्ग क्रमांक २0४ च्या दुतर्फा वाढलेली झाडे महामार्गासह गावांची शोभा वाढवित उभी आहेत. काही झाडे वादळी वारे, अवकाळी पाऊस, गारपीठ यामुळे पडली तर काही वठली. ही धोकादायक बनलेली झाडे केंव्हाही कोसळू शकत असल्याने ती तोडून टाकण्यासाठी सार्वजनिक बांधकाम उपविभाग बाश्री यांनी एका पत्राद्वारे जवळगावच्या इसमास ९ डिसेंबर २0१४ रोजी कामाचे आदेश दिले. या आदेशाप्रमाणे काम चालू असताना इतर झाडे तोडली जात असल्याचे समोर आले आहे.

  वटलेली आणि वाहतुकीस अडथळा करणारी पण पडलेली झाडे तोडण्याचे सहाय्याने तोडली जात आहेत. विशेष म्हणजे रस्त्याच्या रहदारीपासून दहा-दहा फूट आतमध्ये असलेली ही झाडे तोडली जात आहेत. जी झाडे अनेक वर्षांपासून आपले अस्तित्व जपत जगली. त्या झाडांनाच तोडले जात आहे. कामाचे आदेश देताना बांधकाम विभागाने पूर्वसूचना देवूनच झाडे तोडायची होती. याशिवाय झाडे तोडत असताना या विभागाचे शाखा अभियंता यांनी स्वत: उपस्थित रहावे, अशा सूचना देण्यात आल्या होत्या. मात्र या दोन्ही सूचनांना तिलांजली देत केवळ कामाचा आदेश दाखवत जाडांची राजरोसपणे कत्तल सुरू आहे. विशेष म्हणजे ही वृक्षतोड चालू असताना बांधकाम विभागाचे मैलकोले (कर्मचारी) प्रत्यक्ष हजर होते पण त्यांना याबाबतची पुसटशी कल्पनाही नव्हती. या खुलेआम वृक्षतोडीबाबत संबंधित विभागाच्या शाखा अभियंता व अभियंत्यांना याबाबत काहीच माहित नसल्याचेही समोर आले आहे. या वृक्षतोडीमुळे गरज नसणार्‍या झाडांच्याही फांद्या तोडण्यात आल्याचे दिसून येत आहे. जिवंत झाडे तोडण्याचा अधिकार यांना कोणी दिला, असा संतप्त सवाल प्रवाशी करीत आहेत.

        कोणती झाडे, कोण तोडत आहे, याची मला कल्पना नसून तोडण्यापूर्वी मला कोणत्याही सूचना संबंधिताने दिलेल्या नाहीत. तरी मी याबाबतची अधिक माहिती घेतो. मात्र कोणत्याही स्थितीमध्ये जिवंत झाडे तोडायची नाहीत.- ठाकूर, शाखा अभियंता.

           वैराग वाळलेली व पडलेली झाडे तोडण्यास सांगितले असून जिवंत झाडे तोडण्यास सांगितलेले नाहीत. त्यातूनही जर जिवंत झाडे तोडली गेली असल्यास योग्य ती कारवाई संबंधितांवर करण्यात येईल.   - एस.बी. बळी, अभियंता सार्व. बांधकाम उपविभाग.

बचत गट उत्पादित वस्तूंचे प्रदर्शन व विक्री

उस्मानाबाद -  बचत गटांच्या माध्यमातून महिला सक्षमीकरणाच्या प्रयत्नांचा एक भाग म्हणून बचत गटांनी बनविलेल्या विविध वस्तूंच्या विक्री व प्रदर्शनाच्या आद्या महोत्सवास गुरुवारी सुरुवात झाली. महिला बचत गटांच्या उत्पादनाचे मार्केटींग, क्षमताबांधणी व कौशल्यवृद्धी आणि बचत गटांसाठी अर्थसाह्य याबाबत जिल्हा परिषदेच्या माध्यमातून प्रयत्न करण्याची ग्वाही यावेळी देण्यात आली.

शहर पोलीस स्टेशनच्या समोरील दी उस्मानाबाद क्लब येथे जिल्हा ग्रामीण विकास यंत्रणा आयोजित आद्या महोत्सवाचा शुभारंभ विविध मान्यवरांच्या उपस्थितीत आज

करण्यात आला. जिल्हा परिषदेचे अध्यक्ष अॅड. कुलदीप (धीरज) पाटील, राज्य परिवहन महामंडळाचे अध्यक्ष जीवनराव गोरे, आमदार ज्ञानराज चौगुले यांच्यासह जिल्हा परिषदेच्या मुख्य कार्यकारी अधिकारी सुमन रावत, जिल्हा परिषदेच्या विविध विभागांचे सभापती सर्वश्री दत्तात्रय मोहिते, बाबुराव राठोड, हरिश डावरे, लता पवार, पंचायत समिती सभापती सर्वश्री असिफ मुल्ला, छायाताई वाघमारे, प्रेमलता लोखंडे, अतिरिक्त मुख्य कार्यकारी अधिकारी बी. एन. उबाळे, जिल्हा ग्रामीण विकास यंत्रणा प्रकल्प संचालक रुपाली सातपुते यांच्यासह जिल्हा परिषद सदस्य, पंचायत समिती सदस्य यावेळी उपस्थित होते. स्वित्झर्लंडच्या पेट्रो कॉलर आणि सॅम्युअल या महिला सक्षमीकरणासाठी कार्य करणाऱ्या कार्यकर्त्यांची उपस्थिती विशेष लक्षवेधी ठरली.

यावेळी आद्या-2014-15 या स्मरणिकेचे प्रकाशनही मान्यवरांच्या हस्ते करण्यात आले. यावेळी तालुकास्तरीय राजमाता जिजाऊ स्वावलंबन पुरस्कारांचे वितरणही मान्यवरांच्या हस्ते बचत गटांना करण्यात आले. 

यावेळी बोलताना श्री. गोरे म्हणाले की, ग्रामविकास विभागामार्फत बचत गटांना सक्षम करण्याचे उपक्रम सुरु आहेत. मात्र, या प्रक्रियेला बळ देण्याची गरज आहे.  चूल आणि मुल यातून महिलांनी बाहेर पडून भक्कम आधार उभा करण्याची गरज आहे. त्यासाठी बचत गटांना वेळेवर अर्थसाह्य मिळणे आवश्यक आहे. तसेच केंद्र शासनाच्या राष्ट्रीय महिला कोषमधून राज्यासाठी निधी मिळण्यासाठी प्रयत्न व्हायला हवा, अशी अपेक्षा त्यांनी व्यक्त केली. 

स्वित्झर्लंडच्या पेट्रा यांनी या उपक्रमाबद्दल कौतुकोद्गार काढून शुभेच्छा दिल्या.  आमदार चौगुले यांनी आपल्या भाषणात महिला बचत गटांनी अधिक चांगले काम करावे. पारंपरिक व्यवसायाबरोबरच बाजारपेठेची निकड लक्षात घेऊन व्यवसायवृद्धीसाठी प्रयत्न करावा, असे आवाहन केले. बॅंकांकडून बचत गटांना आर्थिक साह्य देण्याबाबत अडवणूक होत असल्याबाबत जिल्हा स्तरावर त्यासाठी पाठपुरावा करु, मात्र बचत गटांनी ज्या कारणांसाठी अर्थसाह्य घेतले आहे, त्याच कारणासाठी त्याचा उपयोग करावा आणि वेळेवर कर्ज परतफेड करावी, अशी सूचना केली. 

राज्य व केंद्र शासनाने विविध योजना सुरु केल्या आहेत. त्याचा संदर्भ देऊन या योजनेत लोकसहभाग महत्वाचा आहे. महिलांची त्यादृष्टीने विशेष जबाबदारी असल्याचे आमदार चौगुले यांनी सांगितले. राज्यात महिला आरोग्य अभियानाची आज सुरुवात झाली. त्यामुळे राज्याचे सार्वजनिक आरोग्यमंत्री तथा जिल्ह्याचे पालकमंत्री डॉ. दीपक सावंत या कार्यक्रमास येऊ शकले नाहीत. मात्र, त्यांनी या उपक्रमास शुभेच्छा दिल्याचे आ. चौगुले यांनी सांगितले. जि. प. अध्यक्ष अॅड. पाटील यांनी  महिलांना मुख्य प्रवाहात आणण्यासाठी महाराष्ट्र राज्य ग्रामीण जीवनोन्नती अभियानाच्या माध्यमातून प्रयत्न होत असल्याचे त्यांनी सांगितले. 

मुख्य कार्यकारी अधिकारी रावत यांनी महिला एका उपक्रमाच्या माध्यमातून एकत्र येत आहेत. ही मोठी गोष्ट असल्याचे सांगितले. जिल्ह्यात 1 हजार आठशे नवीन बचत गट आणि जवळपास 4 हजार 200 बचत गट पुनरुज्जीवित करुन सध्या सहा हजार बचत गट कार्यरत करण्यात आले आहेत, असे त्यांनी सांगितले. आद्या महोत्सवाच्या माध्यमातून बचत गटांच्या उत्पादनात दर्जेदारपणा आणून एक ब्रॅंडनेम विकसित करण्याचा प्रयत्न सुरु असल्याचे त्या म्हणाल्या. या प्रदर्शनात 34 हून अधिक स्टॉल लावण्यात आले असून तेथे महिला बचत गटांनी उत्पादित केलेल्या वस्तू ठेवण्यात आल्या आहेत. हे प्रदर्शन दि. 2 मार्चपर्यंत सुरु राहणार आहे.

उस्मानाबाद एस. टीत चालक कनिष्ठ पद भरती

उस्मानाबाद - माजी सैनिकांना सूचित करण्यात येते की, राज्य मार्ग परीवहन महामंडळ उस्मानाबाद विभागांतर्गत चालक कनिष्ट पदे रिक्त असून ती  माजी सैनिक संवर्गातून भरण्यात येणार आहे. 

           या पद भरतीची संपूर्ण माहिती www.mahast.in/www.maharojgar.gov.in या संकेतसथावर प्रसिध्द करण्यात आली आहे. पात्र माजी सैनिक उमेदवारानी ऑनलाइन पध्दतीने अर्ज www.mahast.in  या संकेतस्थळावर अर्ज भरावयाचे आहेत. ऑनलाईन अर्ज करण्याची अंतीम तारीख 31 मार्च 2015 आहेत. माजी सैनिकांनी या संधीचा जास्तीत जास्त लाभ घ्यावा, असे आवाहन  मेजर नि सुभाष सासने, जिल्हा सैनिक कल्याण अधिकारी, उस्मानाबाद यांनी केले आहे.  

दुग्ध व्यवसाय, शेळीपालन व कुक्कुट पालन प्रशिक्षण

 उस्मानाबाद -  महाराष्ट्र राजय उदयोजकताविकास केंद्राच्यावतीने परंडा येथे 

सुशिक्षीत बेरोजगार युवक व युवतीसाठी दुग्ध व्यवसाय, शेळीपालन व कुक्कुट  पालन प्रशिक्षण कार्यक्रम 5 मार्च ते 15 मार्च या 10 दिवसीय या कालावधीचे प्रशिक्षण आयोजित करण्यात आले आहे.

या प्रशिक्षणात संपूर्ण दुग्ध व्यवसायाचे महत्व, गायीच्या जाती, चा-यांचे नियोजन, लसीकरण, दुधाचे पॅकींग, दुधविक्री तसेच शेळी पालन, उस्मानाबाद शेळीचे महत्व, करडयाची निगा, आहार व आजाराविषयी माहिती ,अर्ध बंदिस्‍त व बंदीस्त शेडची, शेळ्यांच्या वेगवेगळया जातीची  माहिती व कुक्कुट पालनामध्ये गावरान व बॉयलची माहिती देण्यात येणार आहे. याशिवाय खादयाची व शेडची माहिती, विमा आदि व उदयोजकीय अभ्यासक्रमाविषयी दररोज तज्ञ डॉ. व्यक्तीचे मार्गदर्शन व यशस्वी उदयोजकांचे मार्गदशन यावेळी  करण्यात येणार आहेत.

उदयोजकीय  संभाषण कौशल्य, व्यक्मत्व विकास, प्रकल्प अहवाल, बँकिग अधिका-यांचे मार्गदर्शन कर्ज प्रस्ताव ,अहील्यादेवी होळकर महामंडळ, नाबार्ड आदि विषयी माहिती  देण्यात येणार आहे. इच्छुक युवक- युवतींनी अधिक अर्जासाठी व माहितीसाठी  कार्यक्रम समन्वयक संजय वैदय, मो. नं. 9579362310 पंचायत समिती कार्यालय,परंडा येथे संपर्क साधावा, असे आवाहन कनिष्ठ  प्रकल्प अधिकारी पांडुरंग कांबळे एम. सी.ई. डी द्वारा जिल्हा उदयोग केंद्र, उस्मानाबाद यांनी केले आहे.

सैन्‍यात अधिकारी होण्यासाठी युवक-युवतींना लाभ घ्‍यावे

उस्मानाबाद - भारतीय सैन्यदल,नौदल व वायुदलात अधिकारी होण्यासाठी पात्र उमेदवारांना एस एस बी  प्रशिक्षण वर्ग ठेवण्यात आले आहे. सदरच्या प्रशिक्षण वर्गात सैन्य दलातील तज्ञ अधिका-याकडून प्रशिक्षण देण्यात येणार आहे. कंबाईन्ड डीफेन्स सर्व्हीसेस या परीक्षेत उत्तीर्ण झालेल्या व स्पेशल एंट्रीव्दारे सैन्यदलात अधिकारी होवू इच्छिणा-या  तसेच महाराष्ट्रीय नवयुवक-युवतींना सशस्त्र सैन्य दलाकडून एस एस बी परीक्षेचे मुलाखत पत्र मिळण्याची शाश्वती आहे, अशा उमेदवाराना सर्व्हीसेस सीलेक्शन बोर्ड मुलाखतीच्या पूर्व तयारीसाठी छात्रपूर्व प्रशिक्षण केंद्र विभागीय महसूल आयुक्त कार्यालय, परीसर नाशिक रोड नाशिक येथे दि. 10 ते 19 मार्च या कालावधीत प्रशिक्षणाचे आयोजन करण्यात आले आहे. 

इच्छुक युवक-यूवतीं पात्र उदेवारांनी प्रवेशासाठी  5 मार्च रोजी सकाळी 11 वाजता जिल्हा सैनिक कल्याण कार्यालय, उस्मानाबाद येथे खालील प्रमाणे पात्रता धारक करीत असलेल्या उमदेवारांनी शैक्षणिक प्रमाणपत्र व गुणपत्रिकेच्या मुळ प्रतीसह मुलाखतीस हजर रहावे. अधिक माहीतीसाठी  नाशिक येथील कार्यालयाचा दुरध्वनी क्र. 0253-2451031  व 2451032 वर संपर्क साधण्याचे आवाहन करण्यात आले आहे. या प्रशिक्षणात मोफत विनामुल्य निवास व भोजणाची सोय करण्यात आली आहे. या प्रशिक्षणाचा जास्तीत जास्त लाभ घ्यावा, असे आवाहन जिल्हा  सैनिक कल्याण अधिकारी मेजर (नि) सुभाष सासने यांनी केले आहे.एस एस बी प्रवेश वर्गासाठी खालीलप्रमाणे कोणतीही एक पात्रता असणे आवश्यक असून व हया संबंधीचे पात्रता प्रमाणपत्र कोर्सला येताना घेवून येणे आवश्यक आहे.

कंबाइन्ड डिफेन्स सर्व्हीसेस एक्झामीनेशन युपीपएससी अथवा नॅशनल डिफेन्स ॲकडमी एक्झामीनेशन युपीएस पास झालेली असावी व त्यासाठी सर्व्हीसेस सिलेक्शन ग्रुप हेडक्वार्टरने एसएसबी साठी शिफारस केलेली असावी. टेक्नीकल ग्रॅज्युएट कोर्ससाठी एसएसबी मुलाखतीसाठी पात्र झालेले असावे. एन सी सी सी प्रमाणपत्र अ/ बी ग्रेडमध्ये उत्तीर्ण झालेली असावी व एन सी सी ग्रुप हेडक्वॉटर्रने एसएसबी साठी शिफारस केलेली असावी. टेक्निकल ग्रॅज्युएटसाठी एसएसबी मुलाखतीसाठी कॉल लेटर असावे, युनीर्व्हसीटी एन्ट्री स्कीमसाठी एसएसबी कॉल लेटर आलेले असावे अथवा एस एस बी साठी शिफारस केलेल्या यादीत नाव असणे आवश्यक असल्याचे पत्रकात नमुद केले आहे.

ग्रंथोत्सवात घुमणार बळीराजाची वेदना अन् संघर्षाचा हुंकार

उस्मानाबाद -   उस्मानाबाद जिल्हा माहिती कार्यालयाच्या वतीने दि. 2 ते 4 मार्च, 2015 या कालावधीत सांस्कृतिक सभागृह, आनंदनगर, उस्मानाबाद येथे ग्रंथोत्सव-2015 या ग्रंथप्रदर्शन व विक्री उपक्रमाचे आयोजन करण्यात आले आहे. मराठवाड्यातील शेतक-यांच्या वेदनेची जाणीव ठेवत आणि त्यांच्यातील परिस्थितीला सामोरे जाण्याची जिद्द, चिकाटी, आणि संघर्षाला सलाम करण्यासाठी ग्रंथोत्सव उपक्रमात बळीराजाच्या कविता हा विशेष कार्यक्रम ठेवण्यात आला आहे. या कार्यक्रमाबरोबरच जिल्ह्यातील निमंत्रित कवींची काव्यमैफीलही रसिक वाचकांच्या दृष्टीने खास आकर्षण ठरणार आहे. 

  सार्वजनिक बांधकाम विभागाच्या उस्मानाबाद येथील सांस्कृतिक सभागृह आनंदनगर येथे सलग तीन दिवस हा कार्यक्रम सुरु राहणार आहे.  दि. 2 मार्च  ते 4 मार्च रोजी होणा-या या उपक्रमात मराठवाड्यासह, सोलापूर, पुणे आणि मुंबई येथील ग्रंथ प्रकाशकांचा सहभाग राहणार आहे. त्याचबरोबर शासकीय ग्रंथागार, औरंगाबाद यांचा शासकीय प्रकाशनांचा स्टॉल याठिकाणी असणार आहे. या उपक्रमास मराठवाडा साहित्य परिषदेची उस्मानाबाद शाखा, नगरवाचनालय, जिल्हा ग्रंथालय अधिकारी कार्यालय, आकाशवाणी आणि जिल्हयातील सर्व प्रसारमाध्यम प्रतिनिधींचे सहकार्य लाभले आहे. दि. 2 मार्च रोजी सकाळी 8 वाजता साहित्य जागर दिंडीने या उपक्रमाला सुरुवात होईल. सकाळी 10 वाजता ज्येष्ठ साहित्यिक प्रा. भास्कर चंदनशिव यांच्या हस्ते महोत्सव स्थळी ग्रंथप्रदर्शनाचे उदघाटन होणार आहे. तर सायंकाळी 5 ते 6-30 या वेळेत जिल्हाधिकारी डॉ. प्रशांत नारनवरे यांच्या हस्ते या उपक्रमाचे उदघाटन होणार आहे. यावेळी जिल्हाधिकारी डॉ. नारनवरे यांचे आजचा युवक, अवांतर वाचन आणि स्पर्धा परीक्षा या विषयावर व्याख्यान होणार आहे.

 पहिल्या दिवशी सायंकाळचे सत्र (सायं 7 ते रात्री 9-30) निमंत्रित कवींच्या कवितांनी रंगणार आहे. जिल्ह्यातील मान्यवर कवींचा यात सहभाग असणार आहे.  यात डी. के. शेख,  शेखर गिरी, प्रा. भारत हांडिबाग, ॲड. मुकुंद सस्ते, सुधीर कुलकर्णी, शंकर मुगळे, शिवराज मेनकुदळे, देविदास पाटील, अर्चना बावीकर, प्रा. बाळ पाटील, पंडीत कांबळे, रुपेशकुमार जावळे, बाळ जमाले, अपर्णा चौधरी, हरिपाल मोरे, वंदना कुलकर्णी, बाळू घेवारे, पोपट माळी, दीपक खरात, रमेश बोर्डेकर, हणमंत पडवळ, अभिमन्यू इंगळे, प्रा. हनुमंत काळे, सचिन क्षीरसागर, कमलाकर भोसले, गजानन मुळे, स्वप्नाली अत्रे, विशाल वाघमारे, आनंद वीर, सतीश मडके,  शंकर कसबे, विजय परदेशी, मनीषा बडे, युवराज नळे, रेखा ढगे, मधुकर हुजरे यात सहभाग होणार असून ॲड. राज कुलकर्णी आणि भाग्यश्री वाघमारे या काव्यसंध्या कार्यक्रमाचे सूत्रसंचलन करणार आहेत.

दि. 3 मार्च रोजी सकाळी  11 वाजता जिल्ह्यातील ज्येष्ठ साहित्यिकांचा सत्कार प्रख्यात लेखक प्रा. मिलींद जोशी यांच्या हस्ते करण्यात येणार आहे. यात वेदकुमार वेदालंकार, योगीराज वाघमारे, अॅड. वा.मा. वाघमारे, श.मा. पाटील, भारत गजेंद्रगडकर, उत्तम लोकरे,  तु.दा. गंगावणे, बाबुराव कांबळे, गोविंद मैदरकर,  के. व्ही. सरवदे, शिवमूर्ती भांडेकर, भाऊराव सोमवंशी,  जयराज खुने, माधव गरड, राजेंद्र अत्रे, भ. ना. कदम, के. बी. सूर्यवंशी, सुभाष चव्हाण, शहाजी कांबळे आणि ज्ञानेश्वर ढावरे यांना सन्मानित करण्यात येणार आहे. जि. प. अध्यक्ष अॅड. कुलदीप (धीरज) पाटील या कार्यक्रमाच्या अध्यक्षस्थानी राहणार आहेत. 

त्याच दिवशी सायंकाळी 6 वाजता बळीराजाच्या कविता हा शेतक-यांची जीवनकहाणी शब्दातून मांडणाऱ्या विशेष काव्यमैफिलीचा कार्यक्रम होणार आहे. मराठवाड्यातील बालाजी इंगळे, प्रमोद माने, शंकर वाडीवाले, चंद्रशेखर मलकमपट्टे,  प्रा. ललित अधाने, अरुण पवार, प्रा. अरविंद हंगरगेकर, अंबादास केदार, किसन घारुळे आणि रवींद्र केसकर हे नामवंत कवी यात सहभाग घेणार आहेत.  

दि. 4 मार्च रोजी सायंकाळी 6 वाजता जिल्ह्यातील लोकप्रतिनिधींचा राजकारणापलीकडचे व्यक्तीमत्व उलगडणारा दिलखुलास संवाद कार्यक्रम होणार आहे. यात ज्येष्ठ आमदार मधुकरराव चव्हाण, आमदार राणा जगजीतसिंह पाटील, आमदार राहुल मोटे, आमदार ज्ञानराज चौगुले यांच्यासह औरंगाबाद शिक्षक विधानपरिषद मतदारसंघाचे आमदार विक्रम काळे आणि पदवीधर विधानपरिषद मतदारसंघाचे आमदार सतीश चव्हाण यांची उपस्थिती राहणार आहे. ग्रंथोत्सवात तीनही दिवस सकाळी 9 ते रात्री 9 वाजेपर्यंत ग्रंथप्रदर्शन रसिक वाचकांसाठी खुले राहणार असून जिल्ह्यातील रसिकांनी याचा लाभ घ्यावा, असे आवाहन करण्यात आले आहे.

नळदुर्गात प्राचीन जैन मंदिराचा जिर्णोध्‍दार भूमीपूजनाचा कार्यक्रम

नळदुर्ग - येथिल प्राचीन श्री आदिनाथ दिगंबर जैन मंदिराच्‍या नवीन मंदीर उभारणीच्‍या कामाचा शुभारंभ  गुरूवार दि. 26 फेब्रुवारी रोजी भूमीपूजन व शिलान्‍याससह विविध धार्मिक  कार्यक्रमाने होणार आहे. या कार्यक्रमात जैन बांधवांनी मोठया संख्‍येने उपस्थित राहावे, असे अवाहन श्री 1008 आदिनाथ दिगंबर जैन मंदिर ट्रस्‍ट नळदुर्गचे उपाध्‍यक्ष तथा जैन युवक मंडळाचे सुधीर पाटील व उपाध्‍यक्ष प्रविण कासार यांनी केले आहे. 

      नळदुर्ग शहरातील  अतिप्राचीन श्री 1008 आदिनाथ दिगंबर जैन मंदिर असून  या मंदिराची पडझड झाली होती. शहरातील जैन बांधवांनी या मंदिराचा जिर्णोध्‍दरीत नवीन मंदिर उभारण्‍याचा संकल्‍प केला त्‍याकरिता श्री 1008 आदिनाथ दिगंबर जैन मंदिर ट्रस्‍टची  स्‍थापना केली. या ट्रस्‍टचे अध्‍यक्ष म्‍हणून श्रेणीक पाटील, उपाध्‍यक्ष सुधीर पाटील, प्रविण कासार यांची निवड करण्‍यात आली. शहरातील सर्व जैन बांधवाचे प्रयत्‍न व जैन समाजातील दानशूर व्‍यक्‍तींच्‍या सहकार्याने या नूतन मंदिराची उभारणी करण्‍यात येत आहे. परमपूज्‍य श्री 108 सयंम सागरजी महाराज यांच्‍या कृपा अशिर्वादाने या मंदिराची उभारणी होत आहे. या भव्‍य मंदिराचे भूमीपूजन शिलान्‍यासाचा कार्यक्रम गुरूवार दि. 26  फेब्रुवारी रोजी होणार असून  सकाळी 9 वाजता कलश शोभा यात्रा, 9:30 वाजता ध्‍वजारोहण, 10 :30 वाजता अभिषेक आणि महाशांती धारा, 11 वाजता नूतन श्री 1008 आदिनाथ दिगंबर जैन मंदिराचे चित्र  आनावरण व दिप प्रज्‍वलनाचा कार्यक्रम होणार आहे. दुपारी 1 वाजता नवीन मंदिराच्‍या शिलान्‍यासाचा तसेच धार्मिक विधी संपन्‍न होणार आहेत. दुपारी 2 वाजता उपस्थितांना महाप्रसादाचे वाटप करण्‍यात येणार आहे.  

तुळजापूर पं.स. मध्‍ये निधी वितरणात सावळा गोधळ ?

नळदुर्ग -  तुळजापूर पंचायत समिती स्‍तरावरील निधी वितरणात सावळा गोंधळ होत असल्‍याचे चव्‍हाट्यावर आल्‍याने राजकीय वर्तुळात जोरदार चर्चा रंगत आहे. याप्रकरणी  पं.स. सदस्‍यात नाराजी व्‍यक्‍त केली जात आहे. दरम्‍यान तालुक्‍यातील सर्व गणांमध्‍ये हा निधी विभागून मिळावा यासाठी गटविकास अधिकारी यांच्‍याकडे सदस्‍यांनी तक्रार केली आहे.  परंतू सदस्‍यांनी निधीसाठीचे लेखीपत्र देवूनही वितरण होत नाही. त्‍यामुळे निधी समान वितरण व्‍हावे म्‍हणून काही पंचायत समिती सदस्‍यांनी पंचायत समिती गटविकास अधिकारी यांना प्राप्‍त झालेल्‍या निधीमध्‍ये समान वितरण व्‍हावे अशी मागणी केली आहे.   विद्यमान उपसभापती समान निधी वितरणाच्‍या बाबतीत बगल देत असून समान निधी न करता  स्‍वत:च्‍या सोयीच्‍या ठिकाणी हा निधी खर्ची करण्‍याच्‍या मानसिकतेत आहे. यापूर्वीच्‍या काही निधीमध्‍ये उपसभापतींनी मनमानी केली आहे.
       तुळजापूर पंचायत समितीमध्‍ये सतत समान निधी बाबत गोंधळच उडालेला कायम स्‍वरूपी चर्चेत आहे. तत्‍कालीन गटविकास अधिकारी तृप्‍ती ढेरे यांनी असाच गोंधळ उडाल्‍यावर समान निधी वितरण करण्‍याचा निर्णय केला होता. मात्र त्‍यालाही फाटा देण्‍यात येत आहे.
   अनेक सदस्‍यांनी 13 व्‍या वित्‍त आयोगातील पंचायत समिती स्‍तरावरील निधीचे सर्व गणामध्‍ये समान पध्‍दतीने वितरण व्‍हावे याबाबत दि. 1 सप्‍टेंबर 2012 रोजी निवेदन देवून याप्रकरणी आवाज उठविला होता. त्‍यानंतर दोन - तीन निधीमध्‍ये समान वितरण करण्‍यात आले होते. मात्र त्‍यानंतर त्‍याला फाटा देण्‍यात येत आहे. त्‍यामुळे पंचायत समितीमध्‍ये काय चालले हा प्रश्‍नचिन्‍ह नागरिकांसमोर येत आहे. याप्रकरणी उस्‍मानाबाद मुख्‍य कार्यकारी अधिकारी यांनी  चौकाशी करण्‍याची मागणी  होत आहे.

अल्‍पवयीन मुलीच्‍या विनयभंग प्रकरणी एकास तीन वर्ष सक्तमजुरी

नळदुर्ग -  नंदगाव ता. तुळजापूर येथील एका अल्पवयीन मुलीच्‍या विनयभंग केल्याप्रकरणी एका आरोपीस  उस्मानाबाद  अतिरिक्त सत्र न्यायाधीश  तथा विशेष न्यायाधीश एस.आय.पठाण यांनी तीन वर्षे सक्तमजुरीची शिक्षा सुनावली. ही घटना २0 मे २0१४ रोजी तुळजापूर तालुक्‍यातील  नंदगाव येथे घडली होती.

   गुरूसिध्दप्पा आनंद कोरे रा. नंदगाव ता. तुळजापूर असे सक्‍तमजुरी ठोठावलेल्‍या आरोपीचे नाव आहे.याप्रकरणी  अतिरिक्त शासकीय अभियोक्ता पी.वाय.जाधव यांनी दिलेल्या माहितीनुसार, तुळजापूर तालुक्यातील नंदगाव येथील एका  अल्पवयीन मुलीचा गावातीलच गुरूसिध्दप्पा आनंद कोरे याने २0 मे २0१४ रोजी विनयभंग केला होता. याबाबत पीडित मुलीच्या आईने नळदुर्ग पोलीसात गुन्हा दाखल केला होता. या प्रकरणाचा तपास हवलदार  एस.एस.मनगिरे यांनी  करून न्यायालयात दोषारोपपत्र दाखल केले होते. या प्रकरणाची येथील अतिरिक्त सत्र न्यायाधीश तथा विशेष न्यायाधीश एस.आय.पठाण यांच्या समोर सुनावणी झाली. या सुनावणीदरम्यान समोर आलेले पुरावे व अतिरिक्त शासकीय अभियोक्ता पी.वाय.जाधव यांनी केलेला युक्तीवाद ग्राह्य धरून विशेष न्यायाधीश एस.आय.पठाण यांनी आरोपी गुरूसिध्दप्पा आनंद कोरे यास भादंवि कलम ३५४ / अ व बालकाचे लैंगीक अत्याचारापासून संरक्षणाचा कायदाचे कलम ८ प्रमाणे दोषी धरून ३ वर्षे सक्तमजुरी व ३000 रूपये दंड, दंड न दिल्यास अणखी ६ महिने सक्तमजुरी अशी शिक्षा सुनावली. दंडाची रक्कम पीडित मुलीला देण्याचे आदेशही न्यायालयाने दिल्याचे अँड. जाधव यांनी सांगितले.

उपप्राचार्यपदी पवार यांची निवड

 बार्शी -  येथील श्री शिवाजी शिक्षण प्रसाक मंडळ संचलित श्री शिवाजी महाविद्यालयाच्या उपप्राचार्य पदी प्रा.चंद्रकांत पवार यांची संस्थेच्या वतीने निवड करण्यात आली. निवडीचे पत्र संस्थेचे जनरल सेक्रेटरी व्ही.एस.पाटील व प्राचार्य डॉ.मधुकर फरताडे यांच्याहस्ते देण्यात अले. यावेळी महाविद्यालयाचे प्रबंधक प्रमोद जाधाव, कार्यालय अधिक्षक भाऊसाहेब पाटील आदी उपस्थित होते.

 

नुतन उपप्राचार्य प्रा.चंद्रकांत पवार यांनी श्री शिवाजी महाविद्यालयात सुमारे ३४ वर्षे भौतिकशास्त्र या विषयात अध्यापनाचे कार्य केले आहे. महाविद्यालयातील त्यांना असलेला प्रदीर्घ अनुभवाचा लाभ उपप्राचार्य पदावर आल्यानंतर प्रशासकीय निर्णय घेताणा होणार आहे. त्यांच्या निवडीबद्दल संस्थेचे अध्यक्ष डॉ.बी.वाय.यादव, उपाध्यक्ष डॉ.जी.एम.पाटील, सहसचिव जयकुमार शितोळे, खजिनदार अरूण देबडवार यांच्यासह सर्व सदस्य, प्राध्यापक, शिक्षकेतर कर्मचारी यांनी अभिनंदन केले आहे. 

वाचण्यापेक्षा नाचण्यात गुंतलेली पिढी - इकारे

 बार्शी - आजकालची पिढी ही वाचण्यापेक्षा नाचण्यात गुंतलेली पिढी दिसून येते. मानवाच्या शरीराचे दोन भाग आहेत, एका भागासाठभ मिष्टान्नयुक्त खाद्यपदार्थ तर दुसरा मेंदूकडील भाग आहे त्याला बौध्दीक खाद्यांची गरज आहे. या दोन्ही भागांच्या विकासांसाठी सकस आहार पुरविल्याशिवाय योग्य वाढ होत प्रतिपादन साहित्यीक रामचंद्र इकारे यांनी केले.

बार्शीतील लक्ष्मीबाई जगदाळे हौसिंग सोसायटीमध्ये सुरु केलेल्या शिवसेवा वाचन संस्कृती वाचनालयाच्या उद्घाटनप्रसंगी ते बोलत होते. यावेळी व्यासपीठावर उद्घाटक वायुपुत्र जगदाळे, मधुकर डोईफोडे, धुमाळ सर, डॉ.सुनिल पाटील, किरण गाढवे, प्रा.शशिकांत धोत्रे, तुकाराम पाडे, महादेव देशमुख सर, पी.एस.पाडे आदी उपस्थित होते.

इकारे म्हणाले, वाचनालय सुरु करण्यामागे प्रत्येकाच्या घरात शिवाजी आणि त्यांच्या पाठीशी जिजाऊंसारखी माता खंबीरपणे उभी रहावी हा उद्देश आहे. आजकाल फेसबुक, व्हॉटस्‌अप, व्टिटरसारख्या सोशल मिडीयामध्ये गुंतलेल्या पिढीला महापुरुषांच्या ऐतिहासिक शौर्यकथा व आत्मचरित्रांच्या वाचनासाठी वेळ नसल्याने सध्याची समस्या निर्माण होत आहे. माणसा माणसांतील आत्मियता कमी होत असल्याने विभक्त कुटूंब पध्दती दिसून येते. छत्रपती शिवाजी महाराजांचे विचार व त्यांचा सविस्तर अभ्यास करणे गरजेचे आहे. चार अंध व्यक्तींनी हत्तींची वेगवेगळी व्याख्या केल्याप्रमाणे ज्ञानग्रहण केल्यास खरे शिवाजी महाराज समजणार नाहीत.

घरकुलाचे बांधकाम वेळेत पुर्ण करण्‍याचे अवाहन

उस्मानाबाद -  इंदिरा आवास योजना/ रमाई आवास योजनेअंतर्गत 5 हजार 114 घरकुल बांधकामाचे या जिल्हयास उददीष्ट असून अनूसूचित जाती व नवबौध्द घटकासाठी घरकुलाचे बांधकाम तातडीने होण्यासाठी गट विकास अधिकाऱ्यांनी  तात्काळ ग्रामसेवक, शाखा अभियंता, सहाय्यक अभियंता, लाभार्थींच्या बैठका घेवून कामे मुदतीत पूर्ण करावीत, जे या कामात दिरंगाई करतील त्यांच्यावर कार्यवाही करण्याचे निर्देशही जिल्हा परिषदेच्या मुख्य कार्यकारी अधिकारी सुमन रावत यांनी दिल्या. येथील जिल्हा परीषदेच्या कै. यशवंतराव चव्हाण सभागृहात जि.प.च्या मुख्य कार्यकारी अधिकारी सुमन रावत यांच्या अध्यक्षतेखाली जिल्हा ग्रामीण विकास यंत्रणेची सभेत रावत बोलत होते.

            श्रीमती रावत पुढे म्हणाल्या की, इंदीरा आवास योजनेअंतर्गत 2014-15 मध्ये 1 हजार 925 घरकुलाचे उदिष्ट देण्यात आले आहे. घरकुलाचे बांधकाम गट विकास अधिकाऱ्यांनी  फेब्रुवारी अखेर 100 टक्के पुर्ण करण्याच्या सूचना दिल्या. किरकोळ कामाअभावी कामे अपूर्ण असतील तर ती तात्‍काळ करुन घ्यावीत. ज्‍या ज्या लाभार्थ्यांनी पहिला हप्ता घेवून कामास सुरुवात केली नाही, अशा लाभार्थ्यांवर 420 च्या केसेस दाखल करुन कार्यवाही करण्यात यावे.असे निर्देशही त्यांनी या बैठकीत दिले.

  या बैठकीत महाराष्ट्र राज्‍य ग्रामीण जीवनोन्नती  अभियान माहे जानेवारी 2015 आर्थीक कामांचा आढावा घेण्यात आला. नॉन इंटेसीव्ह अंतर्गत उमरगा, कळंब, वाशी , भूम व परंडा या 5 तालुक्याचा समावेश करण्यात आला आहे. स्वयंसहायता गटांना खेळते भांडवलाचे 227 चे उददीष्ट देण्यात आले असता आतापर्यंत 248  साध्य करुन 109.25 टक्के काम पूर्ण झाल्याबदृल प्रकल्प संचालकाच्या  कामकाजाबाबत समाधान व्यक्त करुन सर्वांचे अभिनंदन करण्यात आले.

पुर्नगठीत स्वयंसहायता समुहाचे 160 चे उदिदष्ट असताना प्रत्यक्षात 130 साध्य करण्यात आले. त्याची टक्केवारी 81.25 आहे. वाशी तालुक्याने 20 पैकी 20 काम साध्य करुन 100 टक्के काम पूर्ण केले. उमरगा तालुक्‍यास 40 चे उदीष्ट देण्यात आले होते त्यापैकी 36 साध्य करुन 90 टक्के काम पूर्ण केले. कळंब तालुक्यास 40 चे उददीष्ट असताना 32 साध्‍य करुन 80 टक्के काम पूर्ण केले. परंडा तालुक्यास 20 चे उददीष्ट देण्यात आले  असता त्यापैकी 18 साध्य करुन 90 टक्के कामाची पूर्तता केली आहे. गटविकास अधिकारी वाशी, उमरगा, कळंब, परंडा यांनी योग्य नियोजन करुन  फेब्रुवारी अखेर 100 टक्के काम पूर्ण करण्याच्याबाबत सूचना यावेळी संबंधित गट विकास अधिकाऱ्यांना देण्यात आल्या.

स्वयंसहायता समूहाची बॅक जोडणी कार्यक्रमांतर्गत  बँकेस 542 प्रकरणे बँकेस पाठविण्यात आली असताना बँकेने 229 प्रकरणास प्रत्यक्ष वाटप करण्यांत आले. उर्वरीत 207 प्रकरणे बँकेकडे प्रलंबित असल्याने जिल्हा अग्रणी बंकेनी सर्व बँकर्सच्या बैठका तातडीने घेवून प्रलंबित प्रकरणे तातडीने  निकाली काढयाबाबत निर्देश दिले. एस बी आय बँकेकडे 118 प्रकरणाची प्रस्ताव सादर केले असताना प्रत्‍यक्षात 77 प्रस्ताव मंजूर केले आहे. एस बी एच बॅकेकडे 87 प्रस्ताव सादर केले असताना 61 प्रकरणे मंजूर केले. बी ओ एम बॅकेकडे 93 प्रस्ताव सादर केले असताना या बॅकेने 63 प्रस्ताव मंजूर केले आहे. एम जी बी बँकेकडे 233 प्रस्ताव पाठवले असता त्यापैकी 130 प्रकरणे मंजूर केले. बी ओ आय बँकेकडे 11 प्रस्ताव सादर केले असता बॅकेने 4 प्रकरणास मंजूरी  दिली. उर्वरीत प्रस्तावास बँकेने माहे फेब्रुवारी 2015 अखेपर्यंत मंजूर करण्याच्या सूचनाही सुमन रावत यांनी सर्व बॅक अधिकाऱ्यांना दिल्या. महाराष्ट्र राज्य ग्रामीण जीवन्नोती अभियांनातर्गत 18 ते 35 वयोगटातील दारीद्रय रेषेखालील युवक युवतींना प्रशिक्षण वेतन रोजगारासाठी दोन संस्थेंची निवड करण्याचे ठरले.‍

सामाजिक आर्थीक जात सर्व्हेक्षण-2011  अंतर्गत यादी प्रसिध्द करणे, दावे आक्षेप स्वीकारणे व अंतीम यादी विहीत मुदतीत प्रसिध्द करण्‍याची कार्यवाही सुरु असून सदया 936 अपीले प्राप्त झाली असून 416 प्रकरणे निकाली काढण्यात आली   आहेत. 520 अपीले निकाली काढण्याची कार्यवाही सुरु असल्याचे या बैठकीत सांगण्यात आले. गट विकास अधिकाऱ्यांनी काळजीपूर्वक कामे करावीत संबंधित कुटुंबाची माहिती विहीत प्रपत्रात बिनचूक भरुन सादर करण्याच्या सूचनाही या बैठकीत देण्यात आल्या.

समाज जडणघडणीत शिक्षकांचे योगदान महत्वाचे- भोसले

उस्मानाबाद - शिक्षक हा सोशल इंजिनीअर असतो. समाजाची  प्रगती केवळ शिक्षणामुळे  होते. समाज जडणघडणीत शिक्षकांचे महत्वाचे योगदान महत्वाचे असते. युवा-भावी शिक्षकांनी  समाज सुधारण्याच्या कामात झोकून देवून  सुसंस्कृत पिढी  निर्मीतीच्या कार्यात  योगदान दयावेत, असे आवाहन एस. एस. भोसले यांनी केले.

येथील जिल्हा शिक्षण व प्रशिक्षण संस्था उस्मानाबादवतीने उस्मानाबाद तालुक्यातील जिल्हा परीषद प्रशाला कौडगाव येथे डीटीएड व्दितीय वर्ष छात्रापध्यांपकांचे छात्रसेवाकाल शिबीर शिबीराचे उदघाटनप्रसंगी   भोसले बोलताना केले. 

           प्राचार्य डॉ. कमलादेवी आवटे यांच्या मार्गदर्शनाखाली सदर  शिबीर आयोजित करण्यात आले होते. आपल्या अध्यक्षीय भाषणात गट शिक्षणिकारी  श्रीमती शिंदे बोलताना म्हणाले की,‍या शिबीराच्या माध्यमातून  भावी शिक्षकांनी  विज्ञान युगाशी समन्यव ठेवून  आधुनिक तंत्रज्ञान अवगत करुन ज्ञान प्राप्त करण्याचा मौलीक सल्ला दिला. शाळेचे मुख्याध्यापक शेख यांनी सदयाच्या शिक्षणपध्दतीत तंत्रज्ञान आल्याने अमुलाग्रह बदल झाल्याचे नमुद केले. प्रास्ताविकात  श्री. गजधने यांनी शिबीर आयोजनामागील भुमीका स्पष्ट केली.

सूत्रसंचलन अंजली माळी यांनी केले तर आभार दहिहांडे पल्लवी यांनी केले. शिबीर यशस्वीतेसाठी मुख्याध्यापक आगाळे कांचन व उप मुख्याध्यापक आहेर निशा शाळेतील शिक्षकवृंद व  पोलीस पाटील विरसिंह थोरात यांनी परीश्रम घेतले. 

          येथील जिल्हा शिक्षण व प्रशिक्षण संस्था उस्मानाबादवतीने उस्मानाबाद तालुक्यातील जिल्हा परीषद प्रशाला देवळाली येथे डीटीएड व्दितीय वर्ष छात्रापध्यांपकांचे छात्रसेवाकाल शिबीर शिबीर मुख्याध्यापक छाया जाधव यांच्या अध्यक्षतेखाली घेण्यात आले या शिबीराचे उदघाटन श्री. मोकाशे पी एम विस्तार अधिकारी यांच्या हस्ते झाले. प्रमुख पाहूणे म्हणून भागवत देशमुख, प्रा. राजूगुरु होते. सूत्रसंचालन मुख्याध्यापक भोयटे पुजा यांनी केले तर आभार रवीना भोयटे यांनी  मानले.               

आत्महत्या केलेल्या शेतक-यांच्या वारसांना धनादेशाचे वितरण

उस्मानाबाद -   उस्मानाबाद तालुक्यातील नापीक व कर्जबाजारपणामुळे आत्महत्या केलेल्या 10 पात्र शेतक-यांच्या वारसास जिल्हा प्रशासानाच्यावतीने प्रत्येकी एक लाख रुपये अनुदान मंजूर केले आहे. संबंधीत शेतक-यांच्या वारसांना जिल्हाधिकारी डॉ. प्रशांत नारनवरे यांच्या हस्ते धनादेशाचे वितरण जिल्हाधिकारी कार्यालयात करण्यात आले.

यावेळी अतिरिक्त जिल्हाधिकारी जे. टी. पाटील, उपविभागीय  अधिकारी शिल्पा करमरकर, तहसीलदार सुभाष काकडे  आदि उपस्थित होते.

आत्महत्या केलेले उस्मानाबाद तालुक्यातील शेतकरी पुढीलप्रमाणे आहेत. यात बाबासाहेब जगताप रा.रुईभर,सुरेश नरटे, रा. दाऊतपूर,  यशवंत ऊर्फ दादा माळदवळकर, रा. सोनेगाव, उत्रेश्वर रोटे, रा. वरुडा, काका मुळे, रा. आरणी, महेबुबअली शेख, रा. सारोळा, बळीराम बोडके, रा. कोल्हेगाव, गणेश मगर, रा. वाघोली, भारतबाई निलंगे, रा. पाटोदा, आणि शंकर लांडगे, रा. मेंढा या आत्महत्या केलेल्या शेतक-यांचा समावेश आहे.

जिल्हास्तरावर वाचकांसाठी मार्चमध्‍ये ग्रंथोत्सवाची पर्वणी

उस्मानाबाद - -महाराष्ट्र शासनाचा मराठी भाषा विभाग, महाराष्ट्र राज्य साहित्य व संस्कृती मंडळ, माहिती व जनसंपर्क महासंचालनालय यांच्या वतीने वाचनसंस्कृती वाढविण्यासाठी जिल्हास्तरावर ग्रंथोत्सव उपक्रमाचे आयोजन करण्यात येत आहे. उस्मानाबाद जिल्हा माहिती कार्यालयाच्या वतीने दि. 2 ते 4 मार्च, 2015 या कालावधीत सांस्कृतिक सभागृह, आनंदनगर, उस्मानाबाद येथे ग्रंथोत्सव-2015 या ग्रंथप्रदर्शन व विक्री उपक्रमाचे आयोजन करण्यात आले आहे. मराठवाडा तसेच राज्यातील विविध मान्यवर पुस्तक प्रकाशकांचा सहभाग, विविध महाविद्यालयांच्या सहभागाने निघणारी साहित्य जागर दिंडी, युवकांसाठी अवांतर वाचन आणि स्पर्धा परीक्षेबाबतचे महत्व सांगणारे व्याख्यान, जिल्ह्यातील मान्यवर कवींचा सहभाग असणारा काव्यसंध्या हा कार्यक्रम, ज्येष्ठ साहित्यिकांचा सत्कार, शेतकऱ्यांच्या जीवनसंघर्षाची कहाणी कवितेतून मांडणाऱ्या मराठवाड्यातील नामवंत कवींची काव्य मैफील आणि जिल्ह्यातील लोकप्रतिनिधींचा राजकारणापलीकडचं जीवन प्रवास सांगणारा दिलखुलास संवाद हे या ग्रंथोत्सवाचं विशेष वैशिष्ट्य असणार आहे. 

सार्वजनिक बांधकाम विभागाच्या उस्मानाबाद येथील सांस्कृतिक सभागृह आनंदनगर येथे सलग तीन दिवस हा कार्यक्रम सुरु राहणार आहे. दि. 2 मार्च रोजी सकाळी 8 वाजता साहित्य जागर दिंडीने या उपक्रमाला सुरुवात होईल. शहरातील 7 शाळा-महाविद्यालयातून एकाचवेळी या दिंडीची सुरुवात होऊन ती सकाळी 10 वाजता कार्यक्रमस्थळी येईल. संबंधीत शाळा-महाविद्यालयांचे प्राचार्य, सहकारी शिक्षक, जिल्हा परिषदेच्या शिक्षण विभागाचे प्रतिनिधी, विद्यार्थी प्रतिनिधी, मराठवाडा साहित्य परिषदेचे  प्रतिनिधी, प्रसारमाध्यम प्रतिनिधी आणि जिल्ह्यातील वाचनालयांचे प्रतिनिधी यांचा या साहित्य जागर दिंडीत सहभाग असणार आहे. सकाळी 10 वाजता ज्येष्ठ साहित्यिक प्रा. भास्कर चंदनशिव यांच्या हस्ते ग्रंथप्रदर्शनाचे उदघाटन होणार आहे.

सायंकाळी 5 ते 6-30 या वेळेत ग्रंथोत्सवाच्या उदघाटनाचा सोहळा रंगणार आहे. जिल्हाधिकारी डॉ. प्रशांत नारनवरे यांच्या हस्ते या उपक्रमाचे उदघाटन होणार आहे. जिल्हा परिषदेच्या मुख्य कार्यकारी अधिकारी सुमन रावत, जिल्हा पोलीस प्रमुख अभिषेक त्रिमुखे यावेळी प्रमुख पाहुणे म्हणून उपस्थित राहणार आहेत. मराठवाडा साहित्य परिषदेच्या उस्मानाबाद शाखेचे अध्यक्ष नितीन तावडे, सार्वजनिक बांधकाम विभागाचे कार्यकारी अभियंता रणजीत हांडे, नगरपालिकेचे मुख्याधिकारी शशीमोहन नंदा यांची यावेळी प्रमुख उपस्थिती राहणार आहे. यावेळी जिल्हाधिकारी डॉ. नारनवरे यांचे आजचा युवक, अवांतर वाचन आणि स्पर्धा परीक्षा या विषयावर व्याख्यान होणार आहे.

पहिल्या दिवशी सायंकाळचे सत्र (सायं 7 ते रात्री 9-30) निमंत्रित कवींच्या कवितांनी रंगणार आहे. जिल्ह्यातील मान्यवर कवींचा यात सहभाग असणार आहे. 

दि. 3 मार्च रोजी सकाळी  11 वाजता जिल्ह्यातील ज्येष्ठ साहित्यिकांचा सत्कार प्रख्यात लेखक प्रा. मिलींद जोशी यांच्या हस्ते करण्यात येणार आहे. यावेळी प्रा. जोशी यांचे आचार्य अत्रे आणि पु.ल. देशपांडे- विनोदाची दोन शिखरे या विषयावर व्याख्यान होणार आहे. जिल्हा परिषदेचे अध्यक्ष ॲड. कुलदीप (धीरज) पाटील या कार्यक्रमाच्या अध्यक्षस्थानी राहणार आहेत. मराठवाडा विभागाचे माहिती संचालक राधाकृष्ण मुळी, अपर जिल्हाधिकारी जे.टी. पाटील, जिल्हा परिषदेचे अतिरिक्त मुख्य कार्यकारी अधिकारी बी. एन. उबाळे, जिल्हा कोषागार अधिकारी राहुल कदम यांची यावेळी प्रमुख उपस्थिती राहणार आहे. त्याच दिवशी सायंकाळी 6 वाजता बळीराजाच्या कविता हा शेतकऱ्यांची जीवनकहाणी शब्दातून मांडणाऱ्या विशेष काव्यमैफिलीचा कार्यक्रम होणार आहे. मराठवाड्यातील बालाजी इंगळे, प्रमोद माने, शंकर वाडीवाले, चंद्रशेखर मलकमपट्टे,  प्रा. ललित अधाने, अरुण पवार, प्रा. अरविंद हंगरगेकर, अंबादास केदार, किसन घारुळे आणि रवींद्र केसकर हे नामवंत कवी यात सहभाग घेणार आहेत.  

दि. 4 मार्च रोजी सायंकाळी 6 वाजता जिल्ह्यातील लोकप्रतिनिधींचा राजकारणापलीकडचे व्यक्तीमत्व उलगडणारा दिलखुलास संवाद कार्यक्रम होणार आहे. यात ज्येष्ठ आमदार मधुकरराव चव्हाण, आमदार राणा जगजीतसिंह पाटील, आमदार राहुल मोटे, आमदार ज्ञानराज चौगुले यांच्यासह औरंगाबाद शिक्षक विधानपरिषद मतदारसंघाचे आमदार विक्रम काळे आणि पदवीधर विधानपरिषद मतदारसंघाचे आमदार सतीश चव्हाण यांची उपस्थिती राहणार आहे.

ग्रंथोत्सवात तीनही दिवस सकाळी 9 ते रात्री 9 वाजेपर्यंत ग्रंथप्रदर्शन रसिक वाचकांसाठी खुले राहणार असून जिल्ह्यातील रसिकांनी याचा लाभ घ्यावा, असे आवाहन जिल्हा माहिती कार्यालय, उस्मानाबादच्या वतीने करण्यात आले आहे. या उपक्रमास मराठवाडा साहित्य परिषदेची उस्मानाबाद शाखा, नगरवाचनालय, जिल्हा ग्रंथालय अधिकारी कार्यालय, आकाशवाणी आणि जिल्हयातील सर्व प्रसारमाध्यम प्रतिनिधींचे सहकार्य लाभले आहे. 

बार्शी तालुक्‍यात स्‍वाईन फ्लूचा संशयित रूग्‍ण आढळाला

 वैराग (महेश पन्‍हाळे)  जिल्‍ह्यात स्‍वाईन फ्लूचे चे संशयित व बाधित रूग्‍ण वाढू लागले असून बार्शी तालुक्‍यामध्‍येही एक संशयित रूग्‍ण आढळला आहे. परिणामी बार्शी तालुक्‍यामध्‍येही हा आजार पसरण्‍याची शक्‍यता निर्माण झाली आहे. त्‍यामुळे तालुक्‍यातील आरोग्‍य यंत्रणेकडून याबाबत करण्‍यात येणारी जनजागृती व उपाययोजना आदी कामांचा आढावा जिल्‍हा परिषदेचे सभापती मकरंद निंबाळकर आणि बार्शी पंचायत समितीचे सभापती भाऊसाहेब काशिद यांनी घेतला.

            23 फेब्रुवारी पर्यत जिल्‍हृयातील 1 हजार 546 नागरिकांच्‍या केलेल्‍या तपासणीमध्‍ये 45 नमुने संशयित तर 21 बाधित आढळले आहे. त्‍यामुळे स्‍वाईन फ्लूचा प्रसार दिवसेंदिवस वाढत चालले असल्‍याचे दिसून येत आहे. या वाढत्‍या प्रमाणाला आवर घालण्‍यासाठी प्रशासनाच्‍या सोबत सामान्‍य नागरिकांनीही काळजी घेणे महत्‍वाचे आहे. स्‍वाईन फ्लूच्‍या वाढत्‍या प्रमाणामुळे ग्रामस्‍थांनी घाबरून न जाता काळजी घेणे महत्‍वाचे आहे. त्‍यासाठी आरोग्‍य प्रशासनाला उपाययोजना व जनजागृती करण्‍याचे आदेश देण्‍यात आले आहेत. हे आदेश योग्‍य तसा पाळला जातो का ? प्रशासन खरे सज्‍ज आहे का ? याची पाहणी करण्‍यासाठी  आरोग्‍य सभापती मकरंद निंबाळकर यांनी पालगाव प्राथमिक आरोग्‍य केंद्रास अचानक भेट देवून पाहणी केली. पाहणी दरम्‍यान बार्शी पंचायत समितीचे सभापती भाऊसाहेब काशिद हे उपस्थित होते. 

    गावो गाव जनजागृती करण्‍यात येत असल्‍याचे सांगितले. यावेळी पालगाव प्राथमिक आरोग्‍य केंद्राचे वैद्यकीय अधिकारी जयवंत गुंड यांनी प्रत्‍येक घराचा घर टू घर सर्वे करून संशयित व बाधित रूग्‍णांचा शोध घेण्‍याचे काम चालू असल्‍याचे सांगितले.  येथील  आरोग्‍य केंद्राची शस्‍त्रक्रिया विभागच बंद होता. प्रथम दर्शनी रूग्‍णचे रक्‍त सांडल्‍याचे आढळून आले. ते स्‍वच्‍छ न करात तसेच वाळलेले दिसत होते. याशिवाय एक शिपाईच आढळून आला. स्‍वाईन फ्लूचा वाढता प्रसार गांभीर्याने घ्‍यावा व काळजी कशी घ्‍यावी याचा प्रचार करावा असे सभापती मकरंद निंबाळकर यांनी यावेळी सांगितले. कोणत्‍याही स्थितीमध्‍ये घाबरून न जाता सर्वप्रथम काळजी व नंतर उपचार घ्‍यावेत. सर्व आरोग्‍य केंद्रामध्‍ये आवश्‍यक तो औषध उपलब्‍ध करून ठेवण्‍यात अल्‍याचेही निंबाळकर यांनी सांगितले. बार्शी तालुक्‍यातही रूग्‍ण आढळल्‍याने घबरून न जाता काळजी व उपाययोजना करण्‍यात यावे असे अवाहन पंचायत समिती सभपती भाऊसाहेब काशिद  यांनी केले.     

जलयुक्त शिवार अभियान चर्चासत्र

उस्मानाबाद -  भविष्यातील पाण्याची गरज लक्षात घेऊन आपले गाव, तालुका आणि जिल्हा जलयुक्त शिवार करण्यासाठी पाझर, साठवण तलाव,  सिमेंट नाला बंधारा, कोल्हापूर बंधाऱ्यांचे गेट दुरुस्ती व नवीन गेट बसविणे, गावातील ओढे-नाले यातील अशा विविध योजनेतील विकासाची कामे प्रस्तावित कामाबरोबरच पूनर्जीवित करण्याचे आवाहन केंद्रीय भुसंसाधन विभागाचे सदस्य डॉ. राजेंद्र सिंह यांनी   केले. 

  भूम येथील पंचायत समिती सभागृहात जलयुक्त शिवार अभियानातंर्गत ग्रामसेवक, कृषी सहायक, तलाठी आणि पोलीस पाटील यांच्या चर्चासत्राचे आयोजन करण्यात आले होते. त्यावेळी बोलतांना त्यांनी वरील आवाहन केले. यावेळी जलसंधारण विभागाचे सचिव प्रभाकर देशमुख, जिल्हाधिकारी डॉ. प्रशांत नारनवरे, अतिरिक्त जिल्हाधिकारी जे.टी पाटील, जिल्हा परिषदेचे अतिरिक्त मुख्य कार्यकारी अधिकारी बी.एन.उबाळे, उपविभागीय अधिकारी संतोष राऊत, निवासी उपजिल्हाधिकारी श्रीरंग तांबे, लघु पाटबंधारे विभागाचे कार्यकारी अभियंता श्री. देवकर, जलबिरादरीचे सुनील जोशी, जिल्हा अधीक्षक कृषी अधिकारी शंकर तोटावार, तहसीलदार अरविंद बोळंगे, पंचायत समिती सभापती अण्णा भोगील, गटविकास अधिकारी श्री.उगलमुगले, भूजल सर्वेक्षण यंत्रणेचे वरिष्ठ शास्त्रज्ञ प्रमोद रेड्डी यांची उपस्थिती होती. 

डॉ.सिंह म्हणाले की, जिल्ह्यातील गावांचा जलयुक्त शिवार अभियांनात समावेश  करण्यात आला आहे. त्या-त्या गावातील प्रतिष्ठित व्यक्तीने गावातील मतभेद विसरुन आपले गाव जलयुक्त करण्यासाठी पुढाकार घेऊन तात्काळ कामे सुरु करावीत. पाणी वापरासाठी योग्य नियोजन करुन प्रत्येक शेतकऱ्यांनी आपल्या शेतातील पाणी आपल्या  जमिनीमध्ये पुनर्भरण करण्याची वेळ आली आहे.  दिवसेदिवस पर्जन्यमान प्रमाण कमी होत आहे. भविष्यात आपली पिढी शेती करण्यासाठी गावात राहावी, यासाठी जलयुक्त गाव करण्याची गरज आहे, असे सांगून पुढे म्हणाले की, शासकीय अनुदानाची अपेक्षा ठेवू नका योजना पूर्नजीवीत करुन प्रशासनाकडून निधी मिळवू शकता, त्यासाठी जिल्ह्यात राजस्थान पॅटर्न राबवून जिल्हा सुजलाम सुफलाम करण्याचे आवाहन त्यांनी केले. 

जलसंधारण सचिव श्री.देशमुख म्हणाले की, ग्रामीण अर्थव्यवस्था उभी करावयाची असेल तर लोकसहभागाबरोबरच त्यांच्या सहकार्याची गरज आहे. प्रत्येक नागरिकांनी भविष्यकालीन मुलांच्या उन्नतीसाठी पाण्याची देणगी दिली पाहिजे.भूगर्भातील पाणी पातळी वाढविण्यासाठी  विहीर, बोअरचे पुनर्भरण करणे जरुरी आहे. शासकीय योजनेला स्वत:ची योजना म्हणून स्विकारली पाहिजे. पाण्याचे विकेंद्रीकरण होऊ नये, यासाठी पाण्याचे साठे उपलब्ध करुन ठेवावेत. पाण्याचा कार्यक्षम वापर करण्यासाठी पिण्याच्या, जनावरांसाठीच्या पाण्याचा, पिकांसाठीच्या पाण्याचा ताळेबंद करुन समितीमार्फत पाण्याचा योग्य नियोजनात्मक वापर करावा. ब्रिटिश कालीन बंधारे, जुनी स्ट्रक्चर शोधून खोलीकरण व रुंदीकरण करुन गाळ काढावा. या योजनेसाठी जिल्हा वार्षीक योजना, एकामिक पाणलोट आणि आमदार निधीतून निधी मिळण्यासाठी प्रथम लोकसहभाग महत्वाचा असल्याचेही त्यांनी यावेळी सांगितले.  

            जिल्हाधिकारी डॉ.नारनवरे म्हणाले की, जलयुक्त शिवार करण्यासाठी आपण आपल्या कामात पारदर्शक राहणे आवश्यक आहे. लोकांमध्ये जलयुक्त शिवार करण्यासाठी गावातील प्रतिष्ठित मान्यवरानी समन्वय समिती करुन जनजागृती करण्याचे आवाहन केले.  

         चर्चासत्राचे प्रास्ताविक जोशी यांनी  तर आभार मेघराज गायकवाड यांनी मानले.   

महिलेचा विनयभंग

पांगरी -  दुचाकीवर बसून आलेल्या महिलेस जंगलातील रस्त्याने घेऊन जावून तिचा विनयभंग केल्याची घटना काल दी.23 सोमवारी येरमाळा-पांगरी मार्गावरील येडेश्वरी साठवण तलाव मार्गावरील रस्त्यावर घडली.सचिन गोडसे वय 28 रा.पांगरी असे विनयभंग केल्याप्रकरणी गुन्हा नोंद झालेल्या आरोपीचे नांव आहे.

  याबाबत पिडीत महिलेने पांगरी पोलिसात दिलेल्या फिर्यादीत म्हटले आहे की उककडगाव येथे जाण्यासाठी येडेश्वरी मंदिरासमोर  उभी राहिली होती.दरम्यान त्या महिलेच्या ओळखीच्या इसमाने सादर महिलेस सचिन गोडसे याच्या दुचाकीवर बसवून तिस उककडगाव येथे सोडण्यास सांगितले.गाडी येडेश्वरी मंदिराच्या पायथ्याला आल्यानंतर आरोपीने गाडी दुसर्‍याच रस्त्याने घालण्याचा प्रयत्न केला असता सादर महिलेने गाडी कुठे नेतोस असे विचारून दुचाकीवरून उडी मारली.नंतर आरोपीने तिच्या जवळ येऊन तिचे हात धरून तिच्याशी झोंबाझोंबी केली॰महिलेच्या फिर्‍यादिवरून सचिन गोडसे याच्याविरुद्ध सोमवारी रात्री उशिरा विनयभंग केल्याप्रकरणी गुन्हा दाखल करण्यात आला आहे.त्यास अटक करण्यात आली आहे.अधिक तपास पोलिस उपनिरीक्षक राजू राठोड करत आहेत

विनापरवाना 10 हजाराची दारू जप्‍त

पांगरी (गणेश गोडसे)पांगरी ता.बार्शी पोलिसांनी विनापरवाना दारू विक्रेत्यांवर छापे टाकून त्यांच्याकडून दहा हजार रुपये किमतीची देशी,विदेशी दारू जप्त केली.सोमनाथ नारायणकर (रा.पांगरी),व शिवाजी डोईफोडे (रा.कळंबवाडी)अशी विनापरवाना दारू विक्री केल्याप्रकरणी गुन्हा दाखल झालेल्यांची नांवे आहेत.

 रविकांत चंद्रकांत लगदिवे यांनी पांगरी पोलिसात दिलेल्या फिर्यादीत म्हटले आहे की आरोपी सोमनाथ संभाजी नारायणकर हा इसम त्याच्या राहत्या घरच्या पाठीमागे असलेल्या पत्र्याच्या शेडमध्ये विनापरवाणा देशी,विदेशी दारू विकत असल्याची माहिती मिळाल्यावरून त्यांनी अधिकार्‍यांसाह त्या पत्रा शेडमध्ये छापा टाकून तेथून 55 देशी दारूच्या,36 उमंग दारूच्या,18 मेकडोल,10 किंगफिशर,व अकरा ओफिसर्च चॉइस असा सात हजार पाचशे रुपयांचा माल तेथून हस्तगत केला.तेथील इसमाकडे दारू धंद्याबाबत चौकशी केली असता नारायणकर याचा असल्याचे सांगण्यात आले.ही कारवाई स.पो.नी.सोमनाथ वाघ,कोलेकर,नागरगोजे आदींनी केली.

  दुसर्‍या घटनेत पोलिसांनी कळंबवाडी हद्दीतील वास्तवार छापा टाकून विनापरवाना देशी दारूची विक्री करणार्‍या शिवाजी डोईफोडे याच्यावर गुन्हा दाखल केला.आरोपींनी आपल्या कब्जात विना परवाना,बिगरपास परमीटशीवाय देशी विदेशी दारू जवळ बाळगून विक्री केल्याप्रकरणी महाराष्ट्र दारूबंदी कल्मानव्ये गुन्हा नोद करण्यात आला आहे.अधिक तपास हवालदार धन्नाप्पा शेटे,व सुधाकर ठाकर हे करत आहेत.

खैरावचे ग्रामीण साहित्य संमेलन

बार्शी (मल्लिकार्जुन धारूरकर) काही ठिकाणी होत असलेल्या साहित्य संमेलनात एकीकडे कोट्यावधी रुपयांचा चुराडा झाल्याचे दिसून येते. खैरावसारख्या अत्यंत दुर्लक्षीत, निर्जन आणि भौतिक सुविधांपासून कोसो दूर असलेल्या गावात मात्र उपलब्ध साधन, साहित्यांच्या जोरावर विना खर्चाचे परंतु साहित्यीकांना मनमुराद आणि मनसोक्त आनंद देणारे ग्रामीण साहित्य संमेलन सादर होते. मागील बारा वर्षांपासून या ठिकाणी ग्रामीण साहित्यीकांना व्यक्त होण्यासाठी चांगले व्यासपीठ उपलब्ध होते त्याची यावर्षी तपपूर्ती झाली आहे. साहित्यात जी भाषा समृध्द तीची संस्कृती तेवढीच समृध्द असते. साहित्य म्हणजे माणसाला व्यक्त होण्याचे साधन आहे असे प्रतिपादन ज्येष्ठ साहित्यिक शिवाजी चाळक यांनी केले.

खैराव (ता.माढा) येथील संत तुकडोजी महाराज साहित्य नगरी गुरूवर्य नागटिळक व्यासपीठावर आयोजित १२ व्या ग्रामीण मराठी साहित्य संमेलना निमित्त ते बोलत होते. यावेळी व्यासपीठावर सोलापूर जिल्हा कॉंग्रेस कमिटीचे उपाध्यक्ष विक्रांत पाटील, सामाजि कार्यकर्ते विक्रम सावळे, बार्शी शहर कॉंग्रेस कमिटीचे अध्यक्ष जीवन आरगडे, मागासवर्गीय संघटनेचे अध्यक्ष सुहास कांबळे, अतुल कोलते, चंद्रकांत गायकवाड, बालाजी डोईफोडे, गजेंद्र साखरे, कुबेर थिटे, महारूद्र जाधव, विजय बोराडे, प्राचार्य सुभाष नागटिळक, बाळासाहेब जाधव उपस्थित होते.

प्रारंभी संमेलनाचे उदघाटन डॉ.दीपक जगताप यांच्या हस्ते करण्यात आले. श्री.चाळक म्हणाले, मराठी भाषेला २ हजार ३५० वर्षाचा इतिहास आहे. मराठी भाषा ही सर्वात समृध्द, समर्थ व संपन्न आहे. ग्रामीण साहित्य हे विशेषतः स्त्रीयांनी लोकगीत किंवा लोकभाषेव्दारे समृध्द केले. साहित्य संमेलनाच्या तपपूर्ती निमित्त संयोजक फुलचंद नागटिळक यांनी त्यांना शुभेच्छा दिल्या. यावेळी उदघाटक डॉ.जगताप यांनी ग्रामीण भागात होणारे हे साहित्य संमेलन महत्वपूर्ण असल्याचे सांगितले.

संमेलना दरम्यान विविध गुणदर्शनाच्या कार्यक्रमात प्रामुख्याने स्त्री भ्रूण हत्या, लोकगीते, पोवाडे, गवळणी, लावणी, अफजल खानाचा वध हे ऐतिहासिक नाटक सावित्रीबाई फुले प्रशालेने सादर केला. कवि संमेलनात शंकर कसबे, विमल माळी, शशिकला गुंजाळ, बाळासाहेब जाधव, सचिन काळे, भारत कदम, नयना राजमाने, सविता धर्माधिकारी, मिनाक्षी वाघचौरे, प्रसाद मोहिते, संतोष चव्हाण, प्रा.विजयसिंह पाटील, चंद्रकांत नलावडे, महारूद्र जाधव, अमर बोराटे या कविंनी कविता सादर केल्या.

संमेलन यशस्वीतेसाठी स्वागताध्यक्ष प्रताप नागटिळक, कार्याध्यक्ष गोविंदराव पाटील, विठ्ठल पाटील, संदीपान नागटिळक, अरूण साठे, प्रा.हनुमंत नागटिळक, प्रा.नारायण मगर, प्रा.धनाजी नागटिळक, महादेव शेळके, पोपट नागटिळक, चंद्रकांत नागटिळक, दिनकर नागटिळक, समाधान नागटिळक, विजयसिंह साठे, शंकर नागणे, संदीप मोटे, विजयसिंह पाटील, प्रवीण क्षीरसागर, सुनील घोडके, धनाजी नागटिळक, दिलीप नागटिळक, अच्युत नागटिळक, प्रवीण नागटिळक, शंकर नागटिळक, सचिन नागणे, रणजित रणपिसे, भीमराव क्षीरसागर, व खैराव ग्रामस्थ, नागनाथ यात्रा समिती यांनी परिश्रम घेतले. तर संमेलनाचे बोधचिन्ह महारूद्र जाधव यांनी तयार केले.

ग्रामीण साहित्य पुरस्कार प्रा.वामन जाधव, आदर्श शिक्षक पुरस्कार शिवाजीराव गोरे, आदर्श पत्रकार महादेव आवारे, पुरूषोत्तम बुधकी (खानापूर बेळगांव), आदर्श वैद्यकीय सेवा डॉ.दीपक जगताप, कवयत्री पुरस्कार प्रा.दर्शना देशमुख, सामाजिक संतोष चितळे, डॉ.कैलास गोरे, कृषी साहित्यिक चंद्रकांत नलावडे, सावित्रीबाई फुले सौ.जयश्री जयवंत नाईक, आदर्श ग्रंथालय राहूल सार्वजनिक वाचनालय, शिंदेवाडी ता.माढा, जीवन गौरव वसंत नागटिळक, मायमराठीचा वारसदार चारूदत्त साहित्य सेवा मंडळ कवठे महंकाळ यांना संयोजकांच्या वतीने पुरस्कार देऊन गौरविण्यात आले.