मोहा येथील विद्यालयाच्‍या नूतन इमारतीचे गृहमंत्र्यांच्‍या हस्‍ते उदघाटन

कळंब (भिकाजी जाधव) :- मोहा (ता. कळंब) येथील भुमीपुत्र कै. शिक्षण महर्षी ज्ञानदेव मोहेकर यांनी मराठवाड्यातील बहुजन समाजातील तरुणांची शैक्षणिक गरज लक्षात घेऊन मोहा (ता. कळंब) येथे सन 1951 साली उभारलेल्‍या ज्ञान प्रसारक मंडळ येरमाळा संचलित ज्ञान प्रसारक माध्‍यमिक व उच्‍च माध्‍यमिक विद्यालयाच्‍या नुतन इमारतीचे उदघाटन दि. 3 फेब्रुवारी रोजी गृहमंत्री ना. आर.आर. पाटील यांच्‍या हस्‍ते होणार आहे. त्‍याचबरोबर शिक्षण महर्षी ज्ञानदेव मोहेकर अॅग्रो इंडस्‍ट्रीज प्रा.लि. चे भुमीपुजन व कोनशिला अनावरण समारंभ मान्‍यवरांच्‍या उपस्थितीमध्‍ये संपन्‍न होणार असल्‍याची माहिती ज्ञान प्रसारक मंडळाचे सचिव प्राचार्य डॉ. अशोकराव मोहेकर यांनी दिली.

           या कार्यक्रमाच्‍या अध्‍यक्षस्‍थानी उस्‍मानाबाद जिल्‍ह्याचे पालकमंत्री ना. मधुकरराव चव्‍हाण हे तर प्रमुख पाहुणे म्‍हणून स्‍वच्‍छता व पाणीपुरवठा मंत्री ना. दिलीपराव सोपल, उस्‍मानाबाद जिल्‍ह्याचे खासदार डॉ. पद्मसिंह पाटील, आ. राणाजगजितसिंह पाटील, आ. राहुल मोटे, आ. ओमराजे निंबाळकर, आ. सतीश चव्‍हाण, आ. विक्रम काळे, महाराष्‍ट्र राज्‍य परिवहन मंडळाचे अध्‍यक्ष जीवनराव गोरे, ज्ञान प्रसारक मंडळाचे अध्‍यक्ष आबासाहेब बारकुल आदी मान्‍यवर उपस्थित राहणार आहेत.

       मोहा व परिसरामध्‍ये ऊसाचे क्षेत्र मोठ्या प्रमाणावर असल्‍यामुळे या ठिकाणी ऊस उद्योगासाठी अनुकूल असे वातावरण आहे. त्‍याचबरोबर शेतक-यांची विविध साखर कारखान्‍यांकडून होणारी हेळसांड लक्षात घेऊन या ठिकाणी शिक्षण महर्षी ज्ञानदेव मोहेकर अॅग्रो इंडस्ट्रिज प्रा.लि. ची उभारणी करण्‍यात येत आहे. या अॅग्रो इंडस्ट्रिजमुळे स्‍थानिक शेतक-यांचा ऊस गाळपाचा प्रश्‍न मिटणार आहे. त्‍याचबरोबर शेतक-यांचा आर्थिक स्‍तर उंचावुन स्‍थानिक तरुणांना रोजगाराची संधी मिळणार आहे. या कारखान्‍यातून मुख्‍यतः सेंद्रीय गुळ, गुळ पावडर, काकवी, मॉलिसेस (गुळाचा द्रावण) व आधुनिक काळातील मानवाच्‍या गरजा लक्षात घेता अतिशय पौष्‍टीक व आरोग्‍यवर्धक अशी उत्‍पादने या अॅग्रो इंडस्ट्रिजमधून घेण्‍यात येणार आहेत.

      तरी या कार्यक्रमास कळंब तालुक्‍यासह परिसरातील नागरिकांनी उपस्थित राहण्याचे अावाहन ज्ञान प्रसारक मंडळाचे सचिव प्राचार्य डॉ. अशोकराव मोहेकर, चेअरमन हनुमंत मडके यांनी केले आहे.        

अन्न सुरक्षा योजनेचा ना. चव्हाण यांच्या हस्ते शनिवारी शुभारंभ

उस्मानाबाद -: अन्न,नागरी पुरवठा व ग्राहक संरक्षण विभागांतर्गत राष्ट्रीय अन्न सुरक्षा अधिनियम-2014 चा शुभारंभ  वाघोली (ता. उस्‍मानाबाद) येथे शनिवार दि. 1 फेब्रुवारी रोजी सकाळी 10-15 वाजता आणि दुपारी 1 वाजता काक्रंबा (ता. तुळजापूर) येथे  राज्याचे पशुसंवर्धन, दुग्धविकास व मत्स्य व्यवसाय मंत्री तथा जिल्ह्याचे पालकमंत्री मधुकरराव चव्हाण यांच्या  हस्ते होणार आहे.
           यावेळी खासदार डॉ. पद्मसिंह पाटील, जिल्हा परिषदेचे अध्यक्ष डॉ. सुभाष व्हट्टे, आमदार सर्वश्री ओमराजे निंबाळकर, आमदार राणा जगजितसिंह पाटील, गोदावरी खोरे विकास महामंडळाचे उपाध्यक्ष आमदार राहूल मोटे, ज्ञानराज चौगुले, विक्रम काळे, बसवराज पाटील, दिलीपराव देशमुख, सतिष चव्हाण, जिल्हाधिकारी डॉ. के. एम. नागरगोजे, मुख्य कार्यकारी अधिकारी एस. एल. हरिदास आदि उपस्थित राहणार आहेत. 

    या कार्यक्रमास बहुसंख्येने उपस्थित रहावे, असे आवाहन अप्पर जिल्हाधिकारी जे. टी. पाटील, निवासी उपजिल्हाधिकारी संजय गायकवाड, उपविभागीय अधिकारी प्रशांत सुर्यवंशी व जिल्हा पुरवठा अधिकारी आर. पी. मिराशे यांनी केले आहे.

उद्योजकता विकास प्रशिक्षण कार्यक्रम

उस्मानाबाद :- महाराष्ट्र कृषी उद्योग विकास महामंडळ व महाराष्ट्र उद्योजकता  विकास केंद्र आयोजित उद्योजकता प्रशिक्षण कार्यक्रमांतर्गत  दि. 12 फेब्रुवारी ते 29 मार्च या कालावधीत वय 18 ते 35 वयोगटातील 12 वी पास /कृषि पदविका असलेल्या युवक-युवतींसाठी पशिक्षण आयोजित करण्यात आले आहे.
   या प्रशिक्षण कार्यक्रमामध्ये उद्योजकता स्वत:मध्ये कशी रुजवावी, लघु उद्योग ते उत्पादन उद्योगाची माहिती, परवाना, कच्चा माल,अन्न व भेसळ, अन्नधान्य प्रक्रिया उद्योग, फुड टेक्नोलॉजी, फलोत्पादन, औषधी वनस्पती, हरीतगृह, शेडनेट हाऊस ग्रीन हाऊस उभारणी, कर्ज प्रस्ताव, मार्केटींग, कृषी आधारावर प्रकल्प,कृषि उद्योगाचे व्यवस्थापन, कृषि उत्पादन,  खरेदी विक्रीचे तंत्र, व्यक्तिमत्व विकास प्रशिक्षण, प्रकल्प अहवाल तयार करणे, जाहिरात व विक्री कला, यशस्वी उद्योजकांचे अनुभव, संबंधित उद्योग प्रकल्पांना भेटी, उद्योग निवडीचे तंत्र, बाजारपेठ सर्वेक्षण व विश्लेषण, सुक्ष्म, मध्यम लघुउद्योग सिध्दी प्रेरणा प्रशिक्षण, एस.एस.आय. रजिस्ट्रेशन, एम.आय.डी.सी. भूखंड, आय.एस.आय. ट्रेडमार्क संबंधी माहिती, लोगो परवाना, उद्योगाला लागणारे परवाने,अन्नधान्य प्रक्रीया उद्योग, महाराष्ट्र राज्य फलोत्पादन आणि औषधी, वनस्पती, कुलस्टोरेज, वेअर हाऊस उभारणी संबंधी माहिती, जिल्हा उद्योग केंद्र व खादी ग्रामोद्योग कर्ज योजनांची माहिती देण्यात येणार आहे. यासंबंधी अधिक माहिती व प्रवेश अर्जाकरिता सुरवसे सुमितकुमार यांचेशी मो.नं. 9921771935 यांच्याशी संपर्क साधावा, असे आवाहन पांडुरंग कांबळे, क.प्रकल्प अधिकारी, एमसीईडी व्दारा जिल्हा उद्योग केंद्र, प्रशासकीय इमारतीसमोर, उस्मानाबाद यांनी केले आहे.               

ना.चव्हाण यांच्या हस्ते ईटकूर येथे पशुवैद्यकीय दवाखाना लोकार्पण

उस्मानाबाद -: जिल्हा परिषद, उस्मानाबाद अतंर्गत प्राथमिक आरोग्य केंद्र, ईटकूर येथील नवीन इमारत बांधकाम भूमिपूजन व पशवैद्यकीय दवाखाना  श्रेणी -2,च्या नवीन इमारतीचा उद्घाटन लोकार्पण सोहळा आज शुक्रवार दि. 31 जानेवारी रोजी राज्याचे पशुसंवर्धन, दुग्धविकास व मत्स्य व्यवसाय मंत्री तथा जिल्ह्याचे पालकमंत्री ना. मधुकरराव चव्हाण यांच्या व मान्यवरांच्या उपस्थितीत पार पडला.
     यावेळी आमदार बसवराज पाटील, आमदार ओमप्रकाश राजेनिंबाळकर, जिल्हा परिषदेचे उपाध्यक्ष संजय पाटील दुधगावकर, समाजकल्याण सभापती दगडू धावारे, महिला व बालकल्याण सभापती  सविता कोरे, कृषी व पशुसंवर्धन सभापती पंडीत जोकार, जिल्हा परिषदेचे मुख्य कार्यकारी अधिकारी  एस.एल.हरिदास, अति.मुख्य कार्यकारी अधिकारी सुर्यकांत हजारे, जिल्हा परिषद सदस्य बालाजी अडसूळ, न.प.कळंबचे नगराध्यक्ष शिवाजी कापसे, कळंब पं.स.सभापती सौ. छायाताई वाघमारे, उपसभापती लक्ष्मण आडसूळ, मधुकर तावडे, भाऊसाहेब उंबरे, धनंजय रणदिवे, सरपंच चांदणीताई मोरे, उपसरपंच महादेव आडसूळ,जिल्हा आरोग्य अधिकारी डॉ.आर.आर.हाश्मी आदि उपस्थित होते.
     ईटकूर येथे जिल्हा वार्षीक योजनेतंर्गत प्राथमिक आरोग्य केंद्राची मुख्य इमारत बांधकाम करणे, बाहय पाणी पुरवठा, झेंडा कट्टा, पाणी पुर्नभरण, इमारत पाडणे, सादिल खर्च  यासाठी अंदाजपत्रकीय किंमत 99.75 लक्ष लागणार आहे. तर पशुवैद्यकीय दवाखान्याची इमारत व संरक्षण भिंत बांधकाम व विद्युतीकरणासाठी 29 लाख 41 हजार 237 रुपये खर्च झाले आहेत.
      यावेळी अनंत आडसूळ, रविंद्र केसकर आदि पत्रकार व ईटकूर गावातील ग्रामस्थ मोठया संख्येने उपस्थित होते.   

ग्रंथफेरीने होणार ग्रंथोत्सवाची सुरुवात; 4 ते 6 फेब्रुवारीदरम्यान साहित्य रसिकांना पर्वणी

उस्मानाबाद :- वाचनसंस्कृतीचा प्रचार आणि प्रसार करण्यासाठी जिल्हा माहिती कार्यालयाच्या वतीने 4 ते 6 फेब्रुवारी  या कालावधीत ग्रंथोत्सव-2014 या उपक्रमाचे आयोजन करण्यात आले आहे. सार्वजनिक बांधकाम विभागाच्या सांस्कृतिक सभागृह, आनंदनगर येथे हा ग्रंथोत्सव होणार असून यानिमित्त दि. 4 फेब्रुवारी रोजी सकाळी 8 वाजता शहराच्या विविध भागात असणा-या शाळा-महाविद्यालयातून  निघणारी ग्रंथदिंडी हे एक आगळे वैशिष्ट्य या उपक्रमाचे राहणार आहे.
       राज्याच्या सांस्कृतिक धोरणानुसार या उपक्रमांचे आयोजन राज्यातील सर्व जिल्ह्यात करण्यात येत आहे. स्थानिक पातळीवर जिल्हा माहिती कार्यालयाच्या वतीने या उपक्रमाचे आयोजन करण्यात आले आहे.
         दि. 4 फेब्रुवारी रोजी सकाळी 8 वाजता शहरातील विविध 7 शाळा-महाविद्यालयातून ही फेरी निघेल. वाचनसंस्कृती आणि ग्रंथ-पुस्तकांचे महत्व सांगणारे फलक विद्यार्थ्यांच्या हाती राहणार आहेत.
या ग्रंथफेरीत रामकृष्ण परमहंस महाविद्यालय, व्यंकटेश महाजन महाविद्यालय, श्रीपतराव भोसले हायस्कूल, जिल्हा शिक्षण व प्रशिक्षण संस्था (डायट), छत्रपती हायस्कूल, तेरणा महाविद्यालय आणि सरस्वती महाविद्यालय सहभागी होणार आहेत. संबंधित महाविद्यालयाचे प्राचार्य-मुख्याध्यापक, मराठी विभागप्रमुख, राष्ट्रीय सेवा योजना समन्वयक, विद्यार्थी प्रतिनिधी, मराठी अभ्यास मंडळ सदस्य, जिल्हा परिषदेच्या माध्यमिक व प्राथमिक शिक्षण विभागाचे अधिकारी व प्रतिनिधी, मराठवाडा साहित्य परिषदेचे प्रतिनिधी आणि प्रसारमाध्यम प्रतिनिधी आणि विद्यार्थी सहभागी होणार आहेत.
      शहर वाहतूक पोलीसांच्या सहकार्याने वाहतुकीला अडथळा येणार नाही, अशा पद्धतीने ही फेरी निघणार आहे. रामकृष्ण परमहंस महाविद्यालयातून निघणारी ग्रंथफेरी जिल्हा परिषद कन्या प्रशाला-डॉ. बाबासाहेब आंबेडकर पुतळा-समतानगरमार्गे सांस्कृतिक सभागृह येथे येईल.
       महाजन महाविद्यालयातून निघणारी फेरी सांजा रोडमार्गे छत्रपती शिवाजी महाराज पुतळा- जिल्हाधिकारी कार्यालय-पोलीस अधीक्षक कार्यालयमार्गे ग्रंथोत्सवाच्या ठिकाणी येईल. भोसले हायस्कूल येथून निघणारी ग्रंथफेरी जिजाऊ मॉंसाहेब चौक-आनंदनगर (पाटबंधारे कार्यालयमार्गे) कार्यक्रमस्थळी येईल.  जिल्हा शिक्षण व प्रशिक्षण संस्था (डायट) येथून निघणारी ग्रंथफेरी डीआयसी रोडमार्गे सेंट्रल बिल्डींग- पोलीस निवास वसाहतमार्गे कार्यक्रमस्थळी येईल. तेरणा महाविद्यालायाची ग्रंथफेरी संत ज्ञानेश्वर मंदिर- भानूनगर-सेंट्रल बिल्डींगमार्गे कार्यक्रमस्थळी येईल. सरस्वती महाविद्यालयातून निघणारी ग्रंथफेरी बॅंक कॉलनी-पोलीस निवास वसाहतमार्गे कार्यक्रमस्थळी येणार आहे.
      छत्रपती शिवाजी हायस्कूल येथून निघणारी ग्रंथफेरी सिव्हील हॉस्पिटल- जिल्हाधिकारी निवासस्थान-डॉ. बाबासाहेब आंबेडकर पुतळा-समतानगरमार्गे कार्यक्रमस्थळी येईल.

शहरी पुरुष होमगार्ड प्रशिक्षण

उस्मानाबाद :- शहरी पोलीस होमगार्ड प्रशिक्षण अप्पर पोलीस अधीक्षक बाळकृष्ण भांगे यांच्या मार्गदर्शनाखाली सुरु करण्यात आले असून यात 47 प्रशिक्षणार्थ्यांनी प्रशिक्षण घेत आहेत. प्रशिक्षणाचे उदघाटन माजी  जिल्हा समादेशक व्य्रकटराव गुंड यांच्या हस्ते करण्यात आले.
    प्रशिक्षणात केंद्र नायक बी. बी. नाईक यांनी केले. शिबीरात शारिरीक कवायत पदाचे प्रशिक्षण देण्यात  येत असून शासकिय दुध डेअरी भूम येथील दुध संकलनाविशयी माहिती देण्यात आली .
    शिबीर यशस्वीतेसाठी  कॉटर मास्टर एस. आर. मारवाडी, शिबीर प्रमुख बी. जी. काळे, निदेशक इ. जे. सुतार, एस. एस. देवकुळे यांनी परिश्रम घेतले.

पळसपमध्ये रविवारी ग्रामीण साहित्य संमेलन

उस्मानाबाद : पळसप (ता.जि. उस्‍मानाबाद) येथे रविवार दि. 2 डिसेंबर रोजी तिसरे मराठवाडा ग्रामीण साहित्य संमेलनाचे आयोजन करण्‍यात आले आहे. या संमेलनाचे अध्यक्ष म्हणून प्रा.इंद्रजित भालेराव यांची निवड करण्यात आली आहे.
    स्व. आमदार वसंतराव काळे यांच्या 8 व्या जयंतीनिमित्त शिक्षणमहर्षी वसंतराव काळे प्रतिष्ठान आणि किसान वाचनालयाच्या वतीने संमेलन आयोजित करण्यात आले आहे. संमेलनाचे उद्घाटन ग्रामविकासमंत्री जयंतराव पाटील यांच्या हस्ते करण्यात येणार आहे. यावेळी प्राचार्य रा. रं. बोराडे, खासदार रजनीताई पाटील, आमदार राणाजगजितसिंह पाटील, सतीश चव्हाण उपस्थित राहणार आहेत. यावेळी साहित्यप्रेमींनी उपस्थित रहावे, असे आवाहन आमदार विक्रम काळे यांनी केले आहे.

जकेकुरवाडी शाळेला पुरस्‍कार मिळाल्‍याद्दल शिक्षकांचा सत्‍कार

उमरगा (लक्ष्‍मण पवार) :- ग्रामीण भागातील प्राथमिक शिक्षणाचा गुणवत्‍ता विकास कार्यक्रमांतर्गत शाळा स्‍वयं मूल्‍यमापनात जिल्‍हा परिषद जकेकुरवाडी शाळेला पुरस्‍कार मिळाल्‍याबद्दल शाळेतील सर्व शिक्षकांचे व शाळा व्‍यवस्‍थापन समितीच्‍या सर्व सदस्‍यांचा सत्‍कार करण्‍यात आला.

          यावेळी सभापती अक्षरताई सोनवणे, उपसभापती बाबा काझी, जि.प. सदस्‍य धनश्री ढंगे, जि.प. सदस्‍या विजया गायकवाड, पं.स. सदस्‍य वाकडे गुरुलिंग, गटविकास अधिकारी बी. खांडागळे, मुल्‍यांकन समिती सदस्‍य गुरुगुरे, पं.स. सदस्‍या रेखा कांबळे, गटशिक्षणाधिकारी सुधा साळुंके, विस्‍ताराधिकारी एस.एम. राऊत, डी.बी. बनसोडे आदीजण उपस्थित होते.

नळदुर्गात रिपाइं कार्यकर्त्‍यांचा जल्‍लोष

नळदुर्ग :- रिपब्लिकन पार्टी ऑफ इंडियाचे राष्‍ट्रीय अध्‍यक्ष रामदास आठवले यांची महायुतीच्‍या माध्‍यमातून राज्‍यसभेवर खासदार म्‍हणून निवड झाल्‍याबद्दल येथील रिपाई कार्यकर्त्‍यांनी फटाक्‍यांची अतिषबाजी करुन पेढे वाटून आनंदोत्‍सव साजरा केला.
       शिवसेना-भाजपा-रिपाई महायुतीच्‍या माध्‍यमातून राज्‍यसभेवर खासदार म्‍हणून रामदास आठवले यांच्‍या निवडीचा बिनविरोध उमेदवारी अर्ज दाखल होताच नळदुर्ग येथे रिपाईचे जिल्‍हा उपाध्‍यक्ष दुर्वास बनसोडे, तालुकाध्‍यक्ष एस.के. गायकवाड, उपाध्‍यक्ष दत्‍ता बनसोडे यांच्‍या प्रमुख उपस्थितीत कार्यकर्त्‍यांनी नळदुर्ग बसस्‍थानकासमोर, भिमनगर, बौद्धनगर आदी ठिकाणी फटाक्‍याची आतिषबाजी करून पेढे वाटून जल्‍लोष केला. निरपेक्ष भावनेने रामदास आठवले यांना राज्‍यसभेवर पाठवून रिपब्लिकन पक्षाला सन्‍मानाने एन. डी.ए मध्‍ये समाविष्‍ट करून घेतल्‍याबद्दल महायुतीचे राष्‍ट्रीय नेतृत्‍व राजनाथ सिंह, नरेंद्र मोदी, गोपीनाथ मुंडे, उध्‍दव ठाकरे, प्रकाश जावडेकर, देवेंद्र फडणवीस, विनोद तावडे आदींचे रिपाई कार्यकर्त्‍यांनी अभिनंदन केले.
   या प्रसंगी रिपाईचे महादेव कांबळे, विठ्ठल बाबू बनसोडे, यूवा अघाडीचे तालुकाध्‍यक्ष अरूण लोखंडे, तालुका संघटक विलास गायकवाड, अनिल लोंढे, मल्‍हारी लोंढे, गिरजाप्‍पा बनसोडे, शकील काझी, केशव गायकवाड सह  कार्यकर्ते उपस्थित होते.

नळदुर्ग विविध क्षेत्रातील मान्‍यवरांचा सत्‍कार

नळदुर्ग :- येथे विविध क्षेत्रातील मान्‍यवरांचा भारतीय संविधानाची प्रास्‍ताविका व शाल, बुके देवून सत्‍कार करुन गौरव करण्‍यात आला.
     विविध पक्ष, संस्‍था, संघटनेच्‍या कार्यकर्त्‍यांनी एकत्रित येवून गठीत केलेल्‍या सत्‍कार संयोजन समीतीच्‍यावतीने नळदुर्ग येथील शासकीय विश्रामगृह येथे पंचायत समिती उपसभापती प्रकाश चव्‍हाण यांची शासनाच्‍या तांडा वस्‍ती सुधार योजनेच्‍या जिल्‍हा समीतीच्‍या अध्‍यक्षपदी निवड झाल्‍याबद्दल तर लहूजी शक्‍ती सेनेचे सोमनाथ कांबळे यांची संघटनेच्‍या महाराष्‍ट्र राज्‍य कोअर प्रदेश अध्‍यक्षपदी निवड झाल्‍याबद्दल तसेच फुले शाहू आंबेडकर चळवळीमधील कार्यकर्ते सुभाष मच्छिंद्र बनसोडे हे निवृत्‍त झाल्‍याबद्दल वरील सर्वांचे अनुक्रमे संविधानाची प्रास्‍ताविका व शाल, बूके देवून सत्‍कार करण्‍यात आला.
    या कार्यक्रमाच्‍या अध्‍यक्षस्‍थानी रिपाईचे जिल्‍हाउपाध्‍यक्ष दुर्वास बनसोडे तर प्रमुख पाहूणे म्‍हणून शहराध्‍यक्ष बाबासाहेब बनसोडे व लहुजी शक्‍तीसेनेचे शिवाजी गायकवाड आदी उपस्थित होते. याप्रसंगी आर.एस. गायकवाड, यूवा आघाडीचे तालुकाध्‍यक्ष अरूण लोखंडे यांनी आपले विचार व्‍यक्‍त केले.  प्रास्‍ताविक भैरवनाथ कानडे यांनी तर सुत्रसंचालन एस. के. गायकवाड यांनी केले.

बार्शीत सिध्दांत शिखामणी ग्रंथदिंडी व तुलाभारचे आयोजन

बार्शी (मल्लिकार्जून धारुरकर) : येथील दहिवडकर मठाचे लिंगैक्य वरसिध्द शिवाचार्य यांच्या जन्मशतमान उत्सवानिमित्त तसेच गुरुसिध्द शिवाचार्य दहिवडकर महाराज यांच्या एकसष्ठीनिमित्त शिवनाम सप्ताहाची सुरुवात करण्यात आली.
    दि. ३० जानेवारी ते ६ फेब्रुवारी दरम्यान होत असलेल्या या शिवनाम सप्ताहामध्ये परमरहस्य पारायण, शिवपाठ, रुद्राभिषेक, धार्मिक प्रवचन, आरती, दिक्षाविधी, महाप्रसाद, भजन आदी कार्यक्रम दहिवडकर मठ येथे होत आहेत. या सप्ताहाबरोबरच दि. ५ फेब्रुवारी रोजी काशी जगद्गुरु डॉ.चंद्रशेखर शिवाचार्य महास्वामी यांची भव्य शोभायात्रा तसेच सिध्दांत शिखामणी ग्रंथदिंडी शहरातील प्रमुख मार्गावरुन काढण्यात येत आहे. श्रीगुरु गुरुसिध्द शिवाचार्य दहिवडकर महाराज यांच्या एकसष्ठीनिमित्त तुलाभार संत मन्मथस्वामी सेवा संघाच्या वतीने लिंगायत बोर्डिंग येथे सायंकाळी ६ वाजता करण्यात येत आहे.
    या कार्यक्रमासाठी रेवणसिध्द शिवाचार्य परंडकर, डॉ.जयसिध्देश्वर गौडगावकर, मुक्तेश्वर वेळापूरकर, निलकंठ धारेश्वरकर, प्रभुदेव माढेकर, महादेव वाईकर, गंगाधर औंधकर, रविशंकर रायपाटनकर आदी शिवाचार्य उपस्थित राहणार आहेत. कार्यक्रम यशस्वीतेसाठी महेश वाईकर, प्रशांत कानडे, धनंजय धारुरकर, शैलेश घाणेगावकर, बाबा शिराळ, उमेश घरबडे, रामचंद्र महाजन, विजय थळकरी, शाम थळपती, अनिल खराडे, अभिजीत गंगावणे, शिवा स्वामी, महादेव स्वामी आदी परिश्रम घेत आहेत.

लेखा व कोषागारांचा इतिहास

महाराष्ट्र शासनाने वित्त विभागाच्या नियंत्रणाखाली 1 जानेवारी 1962 पासून लेखा व कोषागारे संचालनालयाची स्थापना करून कोषागाराचे नियंत्रण संचालक, लेखा व कोषागारे, महाराष्ट्र राज्य मुंबई  यांच्याकडे विभागप्रमुख या नात्याने सोपविण्यात आले.  1962 पूर्वी जिल्हा कोषागारे वित्त विभागाच्या प्रत्यक्ष नियंत्रणाखाली होती आणि शासन सचिव, वित्त विभाग हे जिल्हा कोषागारांचे विभागप्रमुख होते.  यापूर्वी वित्त विभागाने 1 एप्रिल 1955 पासून जुन्या मुंबई राज्यातील कोषागारे महसूल विभागाकडून आपल्या नियंत्रणाखाली आणली. भुतपूर्व हैद्रराबाद राज्यातील कोषागारे ही त्या शासनाच्या वित्त विभागाच्या नियंत्रणाखाली होती व राज्य पुनर्रचनेनंतर, दिनांक 1 नोव्हेंबर 1956 पासून ती थेट मुंबई राज्याच्या वित्त विभागाच्या नियंत्रणाखाली आली. तथापि विदर्भातील कोषागारे ही महसूल विभागाच्या प्रशासकीय नियंत्रणाखाली होती ती 1 जानेवारी 1958 पासून वित्त विभागाच्या नियंत्रणाखाली घेण्यात आली.
    राज्यातील सर्व जिल्हा कोषागारे ही संचालनालय, लेखा व कोषागारे, मुंबई यांच्यामार्फत शासनाच्या वित्त विभागाच्या प्रशासकीय नियंत्रणाखाली आणली.  मात्र तहसीलच्या ठिकाणी असलेली उपकोषागारे महसूल विभागाच्या नियंत्रणाखाली होती.  ही उपकोषागारे संचालक, लेखा व कोषागारे, मुंबई यांच्यामार्फत वित्त विभागाच्या प्रशासकीय नियंत्रणाखाली आणण्यासाठी दिनांक 1 एप्रिल 1964 रोजी 24 उपकोषागारांचा एक गट व दिनांक 1 जून 1968 रोजी 98 उपकोषागारांचा आणखी एक गट वित्त विभागाच्या प्रशासकीय नियंत्रणाखाली आणण्यात आला.  आता राज्यातील सर्व 290 उपकोषागारे वित्त विभागाच्या प्रशासकीय नियंत्रणाखाली आहेत.  दि. 1 जानेवारी 1962 पासून लेखा व कोषागारे संचालनालयाची स्थापना करण्यात आल्यानंतर शासनाच्या व्यवहारासंबंधीच्या लेख्यांचे काम पाहणारी पुढील कार्यालये व संलग्नित शाखा या संचालनालयाच्या नियंत्रणाखाली आणल्या.
      सर्व जिल्हा कोषागार कार्यालये. वित्त विभागाचे कोषागार निरीक्षण पथक.  अधिदान व लेखा कार्यालय, मुंबई .  मुख्य लेखापरीक्षक, स्थानिक निधी लेखा, मुंबई यांचे कार्यालय.  भांडार पडताळणी विभाग. लेखा कार्यालये (प्रशिक्षण), वित्त विभागातील दक्षता पथक शाखा. 
     अधिदान व लेखा कार्यालय मुंबई या कार्यालयाची मुख्यालयाचे प्रदानाचे काम पार पाडण्यासाठी दिनांक 1 एप्रिल 1955 रोजी स्थापना करण्यात आली.  हे काम यापूर्वी  महालेखापाल, मुंबई यांच्याकडून पार पाडण्यात येत होते.
    लेखा प्रशिक्षण कार्यालयाकडून कोषागार लिपिकांना आणि इतर विभागातील व कार्यालयातील लेखाविषयक कामकाज पार पाडणाऱ्या लिपिकांना प्रशिक्षणांची सोय उपलब्ध करुन देण्यात आलेली आहे.  सध्या मुंबई, नागपूर, पुणे, औरंगाबाद, नाशिक,अमरावती येथे प्रशिक्षण वर्ग आहेत.
    1 जानेवारी 1962 पासून लेखा व कोषागारे संचालनालय स्थापन झाल्यानंतर वित्त विभागास दुय्यम असलेल्या लेखा कार्यालयातील पर्यवेक्षकीय संवर्गाची पुनर्रचना वित्त विभागाखेरीज इतर शासकीय विभागाच्या प्रशासकीय नियंत्रणाखालील लेखाविषयक बाबीचे काम पाहणारी पदे विचारात घेऊन एकत्रित राज्यासाठी वित्त विभागाच्या प्रशासकीय नियंत्रणाखाली  शासनाने  फेब्रुवारी 1965 पासून महाराष्ट्र वित्त व लेखा सेवेची स्थापना केली.  यामध्ये निरनिराळ्या शासकीय विभागांमधील लेखाविषयक कामे करणाऱ्या सर्व राजपत्रित व अराजपत्रित पर्यवेक्षी पदांचा समावेश करण्यात आला.  यामुळे केवळ निरनिराळ्या शासकीय विभागांमध्येच नव्हे तर, महामंडळ, प्रकल्प, विद्यापीठे, मंडळे जिल्हा परिषदा, वाणिज्यिक विभाग, स्थानिक निधी लेखापरिक्षा कार्यालय इत्यादीमध्ये देखील लेखाविषयक व वित्तीय जबाबदारीची कामे करण्यासाठी पुरेशी अर्हता व अनुभव असलेले प्रशिक्षित कर्मचारी उपलब्ध होऊ शकतात.  तसेच यामुळे कर्मचाऱ्यांना सर्वांगीण अनुभव मिळण्याच्या दृष्टीने, त्यांची अदलाबदल करण्याची सोय उपलब्ध होते.  1 फेब्रुवारी 1965 रोजी या सेवेमध्ये एकूण 375 कर्मचारी होते. ही संख्या दिनांक 1 मार्च 2010 रोजी 2540 इतकी झालेली आहे.
    1 जानेवारी 1962 पासून लेखा व कोषागारे संचालनालय स्थापन झाल्यानंतर पुणे व नागपूर येथे दोन प्रादेशिक कार्यालयेही स्थापन करण्यात आली.  सन 1980 नंतर महसूल विभागाप्रमाणे प्रादेशिक कार्यालयाची पुनर्रचना करुन अमरावती, औरंगाबाद, नाशिक, कोकण विभाग अशी चार प्रादेशिक कार्यालये स्थापन करण्यात आली.  उपसंचालक (सध्या सहसंचालक) लेखा व कोषागारे यांना प्रादेशिक विभागप्रमुख म्हणून घोषित करण्यात आले. 
भांडार पडताळणी शाखा
    लोकलेखा समितीने 1944-45 च्या विनियोजन लेख्यावरील लेखा अहवाल व केलेल्या शिफारशीनुसार शासन निर्णय, वित्त विभाग, क्रमांक 9281/33, दिनांक 16 ऑक्टोबर 1952 अन्वये वित्त विभागाचा एक भाग म्हणून स्वतंत्र भांडार पडताळणी शाखेची स्थापना करण्यात आली.  त्यानंतर 1 जानेवारी 1962 पासून स्थापना करण्यात आलेल्या लेखा व कोषागारे संचालनालयाकडे वित्त विभागाची भांडार पडताळणी शाखा  विलीन करण्यात आली.  शासन निर्णय, वित्त विभाग क्रमांक डीएटी-1064/584/सी-12 दिनांक 1 फेब्रुवारी 1965 अन्वये महाराष्ट्र वित्त व लेखा सेवा दिनांक 1 फेब्रुवारी 1965 स्थापन करण्यात आली आणि भांडार पडताळणी अधिकारी व भांडार निरीक्षक या पदांचा उक्त सेवेच्या अनुक्रम गट-ब व गट-ब (अराजपत्रित) मध्ये अंतर्भाव करण्यात आला.
    भांडार पडताळणी शाखेमार्फत शासनाच्या विविध विभागीय कार्यालयाच्या ताब्यातील साठ्यांची व भांडारांची पडताळणी करण्याचा प्रमुख उद्देश साठ्याची प्रत्यक्ष शिल्लक आणि पुस्तकी शिल्लक यांचा मेळ घेणे असा आहे.  त्यासोबतच प्रत्यक्ष शिल्लक साठा पुस्तकात दर्शविलेल्या भांडार वर्णनाशी जुळतो किंवा नाही हे ही तपासले जाते.  वस्तुच्या / साठ्याच्या वापराचे प्रमाण जास्त आहे काय ? तसेच दर्शविण्यात आलेली तूट योग्य व समर्थनीय आहे काय ? ह्याचीही पडताळणी भांडार पडताळणी शाखेतील अधिकारी/कर्मचारी करतात. साठा व भांडारे यांचे खरेदी प्रक्रिया तसेच आवश्यकता ह्या बाबींची तपासणी ही या शाखेमार्फत होत असते.  विशिष्ट कालावधीनंतर खराब होऊ शकणाऱ्या आणि उपयोगात नसणाऱ्या भांडाराच्या जादा साठ्यांची विल्हेवाट इतर भांडाराकडे (आवश्यक असेल तेथे) वर्ग करुन लावता येईल काय ? याबाबत उपयुक्त सुचनाही केल्या जातात.  थोडक्यात भांडारे व वस्तुचे साठे यांचा योग्य व परिणामकारक वापर होण्याच्या दृष्टिने भांडार पडताळणी चिकित्सक दृष्टिने करण्यात येते.

राज्य अभिलेख देखभाल अभिकरण
    केंद्र शासनाने दिनांक 01/04/2004 पासून लागू केलेली नवीन परिभाषिक अंशदान निवृत्तीवेतन योजना महाराष्ट्र राज्यात लागू करण्याचा निर्णय शासनाने घेतला.  या निर्णयास अनुसरुन दिनांक 01/11/2005 पासून सदर योजनेची  अंमलबजावणी करण्याबाबत दिनांक 31/10/2005 च्या शासन निर्णयान्वये आदेश निर्गमित करण्यात आले.
    सदर योजने खालील कपाती प्रत्यक्षात सप्टेंबर, 2007 पासून सुरु झाल्या असून पूर्वीच्या कालावधीतील थकबाकी प्रत्येक महिन्यासोबत एक महिना या प्रमाणे करण्यात येत आहे.  या योजनेखाली माहे डिसंंेबर, 2013 अखेर 164481 एवढ्या शासकीय कर्मचाऱ्यांची नोंदणी झाली आहे
व्हर्चुअल ट्रेजरी - वित्त विभागाच्या ई-पेमेंट व्यवस्थेची अंमलबजावणी
    महाराष्ट्र शासनाच्या कर व करेत्तर रकमा "इंटरनेट बँकींग" सुविधेचा वापर करुन करदात्यांना इलेक्ट्रॅानिक पध्दतीने भरता याव्यात, यासाठी शासन वित्त विभागाने "शासकीय जमा लेखांकन पध्दत" (GRAS) ही प्रणाली विकसित केली आहे.
    महाराष्ट्र शासनाच्या वित्त विभागने इलेक्ट्रॉनिक पध्दतीने शासनाच्या जमा करण्याचे म्हणजे ई-रिसिट म्हणून स्विकारण्याचे ठरविले आहे.  यासाठी वित्त विभागाने शासकीय जमा लेखांकन प्रणालीच्या (ई-पेमेंट सिस्टीम) स्वरुपात अशी व्यवस्था विकसित व कार्यान्वित केली आहे की, ज्यायोगे करदात्यांस या संकेतस्थळाचा उपयोग करुन ई-चलन भरणे व त्याचे ऑन लाईन प्रदान जमालेखांकन प्रणालीद्वारे करता येईल.  भारतीय रिझर्व्ह बँकेच्या विशिष्ट मानंकातंर्गत राष्ट्रीयकृत बँकेद्वारे प्रचलित स्वरुपासोबत ई-पेमेंट हे अतिरिक्त स्वरुपाचे प्रदान व्यवस्था आहे.  ह्या व्यवस्थेअंतर्गत कोठूनही व कधीही प्रदानाची सोय उपलब्ध आहे.  तसेच यशस्वीपणे व्यवहार पूर्ण झाल्यावर तात्काळ ऑन लाईन चलनाची सुविधा उपलब्ध आहे.  या व्यवस्थेद्वारे महाराष्ट्र राज्याचे कर राष्ट्रीयकृतबँकेच्या इंटरनेट अकाऊंटचा उपयोग करुन ऑनलाईन चलन भरण्याची सोय आहे.
प्रशासन
    सद्य:स्थितीत संचालक, लेखा व कोषागारे हे खातेप्रमुख असून त्यांचे मुख्यालय नरिमन पॉईंट, मुंबई येथे आहे.  त्यंाना सहाय्यक म्हणून मुंबई येथील मुख्यालयाच्या कार्यालयात दोन सहसंचालक, दोन उपसंचालक, एक सहाय्यक संचालक आणि एक रचना व कार्यपध्दती अधिकारी आहेत आणि प्रशासकीय सोयीसाठी विभागीय स्तरावर सहा सहसंचालक असून त्यांचे अधिनस्त विभागातील कार्यालये आणि कोषागारांचे प्रशासनासाठी ते जबाबदार आहेत.  अधिदान व लेखाधिकारी मुंबई, मुख्यलेखापरिक्षक मुबंई हे सुध्दा संचालनालयाच्या अधिनस्त असून संचालक, लेखा व कोषागारे मुंबई यांचे प्रशासकीय नियंत्रण आहे.
    संचालक, लेखा व कोषागारे हे खातेप्रमुख म्हणून प्रशासन, पर्यवेक्षण व त्यांचे प्रशासकीय अधिनस्त असलेल्या कार्यालयाची कार्यक्षमता, कोषागार कार्यपध्दती, महाराष्ट्र वित्त व लेखा सेवेसाठी नियुक्ती नियम, विभागीय लेखा परीक्षेसाठी नियम व अभ्यासक्रम, प्रशिक्षण, जिल्हा कोषागार व उपकोषागाराचे निरीक्षण, विविध शासकीय खाते व कार्यालय यांना लेखा व वित्त बाबीविषयी मार्गदर्शन करण्यासाठी जबाबदार आहेत.  नियतकालिक तपासणी, अचानक भेटी, चर्चा इत्यादी माध्यमातूनसुध्दा सर्वसाधारण नियंत्रण ठेवले जाते.
    आजमितीस महाराष्ट्रात एकूण 33 जिल्हा कोषागारे आणि 290 उपकोषागारे आहेत.  एका वर्षात 1/3 कोषागारांची वार्षिक तपासणी केली जाते.  उर्वरित जिल्हा कोषागारांची तपासणी व त्याचबरोबर तीन वर्षातून एकदा सर्व उपकोषागारांची  तपासणी हे विभागीय सहसंचालक यांचे कडून केली जाते आजमितीस नियमित संचालकाव्यतिरिक्त 25 संचालक दर्जाची पदे आहेत.  49 पदे सहसंचालक संवर्गातील, 131 पदे गट-अ (वरिष्ठ) संवर्गातील, 295 पदे गट-अ (कनिष्ठ) संवर्गातील, 953 पदे गट ब (राजपत्रित) संवर्गातील आहेत. या मंजूर पदापैकी  3 - संचालक दर्जाची  13 - सहसंचालक संवर्गातील, 16 - गट-अ (वरिष्ठ) संवर्गातील, 36 -  गट-अ (कनिष्ठ) संवर्गातील, 201 - गट ब (राजपत्रित) संवर्गातील संवर्गातील पदे रिक्त आहेत.
    सर्वसाधारण जिल्हयामध्ये महाराष्ट्र वित्त व लेखा सवंर्गातील गट अ (वरिष्ठ) चे 1 पद, गट अ (कनिष्ठ)ची 4 पदे, गट ब ची 15 पदे आणि गट ब (अराप) ची 16 पदे आहेत.  त्याप्रमाणे कोषागारे संवर्गातील उपलेखापाल, वरिष्ठ लिपिक, कनिष्ठ लिपिक, सेवक आणि स्थानिक निधी लेखा संवर्गातील ग्रेड 1 लेखापरीक्षक, ग्रेड 2 लेखापरीक्षक, लिपिक व सेवक असे जवळपास एकूण 100 अधिकारी व कर्मचारी कार्यरत आहेत.  कोषागार कार्यालय आणि स्थानिक निधी लेखा कार्यालयाव्यतिरिक्त जिल्हा परिषद, जिल्हाधिकारी, कृषि विभाग, शिक्षण विभाग, दुग्ध व्यवसाय विभाग, सामाजिक न्याय विभाग, मुद्रांक विभाग, भुजल सर्वेक्षण विभाग,ग्राहक तक्रार मंच इत्यादी विभागातील वेगवेगळया कार्यालयात हे अधिकारी व कर्मचारी सेवेत आहेत.

- अण्णाराव भुसणे 
अप्पर कोषागार अधिकार  लातूर
                                                                                                               

पालकमंत्री मधुकरराव चव्हाण जिल्हा दौ-यावर

उस्मानाबाद :- राज्याचे पशुसंवर्धन, दुग्धविकास व मत्स्यविकास मंत्री तथा जिल्हयाचे पालकमंत्री मधुकरराव चव्हाण उस्मानाबाद जिल्हयाच्या दौ-यावर येत  असून  त्यांचा दौ-याचा  कार्यक्रमांचा तपशिल पुढीलप्रमाणे आहे.
        शुक्रवार, दि. 31 जानेवारी, 2014  रोजी सकाळी 10-10 वाजता सोलापूरहून शासकीय विश्रामगृह, उस्मानाबाद येथे आगमन व राखीव. स. 10-20 वा. उस्मानाबादहून ईटकुर, (ता.कळंबकडे) प्रयाण. स. 11 वा. प्राथमिक आरोग्य केंद्र भूमीपूजन व पशुवैद्यकिय दवाखाना लोकार्पण सोहळा कार्यक्रमास उपस्थिती.  (स्थळ- ईटकुर), दु. 3 वा. ईटकुरहून उस्मानाबादकडे प्रयाण. दु.3-45 वा. शासकीय विश्रामगृह, उस्मानाबाद येथे आगमन व राखीव.  सोईनुसार अणदूरहून (ता. तुळजापूरकडे) प्रयाण. आगमन, राखीव व मुक्काम.
      शनिवार, दि. 1 फेब्रुवारी रोजी सकाळी 9-30 वा. अणदूरहून उस्मानाबादकडे प्रयाण. स. 10-30 वा. शासकीय विश्रामगृह, उस्मानाबाद  येथे आगमन व राखीव.      स.11 वा. अन्न सुरक्षा कायदा-2014 योजनेचा शुभारंभ. (स्थळ-वाघोली, ता.उस्‍मानाबाद),दु.1 वा. वाघोलीहून तुळजापूरकडे प्रयाण. दु.1-30 वा.  शासकीय विश्रामगृह, तुळजापूर येथे आगमन व राखीव. दु. 2 वाजता अन्न सुरक्षा कायदा-2014 योजनेचा शुभारंभ. (स्थळ- काक्रंबा, ता.तुळजापूर), सायं. 4-30 वा. काक्रंबा येथून तुळजापूरकडे प्रयाण. सायं.5 वा. अणदूर येथे आगमन व राखीव. सायं. 7 वा. अणदूरहून सोलापूरकडे प्रयाण.
        रविवार, दि. 2 फेब्रु रोजी सायं. 7 वाजता सोलापूरहून अणदूरकडे प्रयाण.सायं.8 वा अणदूर येथे आगमन व मुक्काम.
        सोमवार, 3 फेब्रु. रोजी  स. 9 वा. अणदूरहून मोहा, (ता.कळंबकडे) प्रयाण.  स. 10-50 वा. मोहा येथे आगमन व राखीव. स. 11 वा. ज्ञानप्रसारक मंडळ, येरमाळा संचलित ज्ञान प्रसारक माध्यमिक व उच्च माध्यमिक विद्यालयाच्या नवीन इमारतीचा उदघाटन कार्यक्रमास उपस्थिती. (स्थळ-मोहा, ता. कळंब), स. 11-30 वा. शिक्षण महर्षि ज्ञानदेव मोहेकर ॲग्रेा इंडस्ट्रीज लि. मोहा येथील गुळ पावडर व कृषी उद्योग निर्मिती कारखान्याचा भूमीपूजन कार्यक्रमास उपस्थिती. (स्थळ-मोहा), ता. कळंब, दु. 1-30 वा. मोहाहून औरंगाबादकडे प्रयाण.   

विनाअपघात सेवा केलेल्या चालकांचा शुक्रवारी होणार सत्कार

उस्मानाबाद -: महाराष्ट्र राज्‍य मार्ग परिवहन महामंडळांतर्गत 25 वर्षे किंवा त्यापेक्षा जास्त वर्षे विना अपघात सेवा केलेल्या चालकांचे तसेच प्रवाशी वाढवा विशेष अभियान योजनेअंतर्गत उस्मानाबाद जिल्ह्यातील 7 चालकांचा प्रत्येकी सात चालक  व एक वाहकास रुपये 5 हजार रुपये पारितोषीक देवून पालकमंत्री मधुकरराव चव्हाण, पाणीपुरवठा व स्वच्छता मंत्री दिलीपराव सोपल आणि खासदार डॉ. पद्मसिंह पाटील यांच्या हस्ते सत्कार करण्यात येणार आहे. पुष्पक मंगल कार्यालय, उस्मानाबाद येथे शुक्रवार,  दि. 31 जानेवारी रोजी सकाळी 10-30 वाजता हा कार्यक्रम होईल.
    कार्यक्रमाच्या अध्यक्षस्थानी राज्य परिवहन महामंडळाचे अध्यक्ष जीवनराव गोरे हे राहतील. यावेळी खासदार रजनीताई पाटील, डॉ. जनार्दन वाघमारे, जिल्हा परिषदेचे अध्यक्ष डॉ. सुभाष व्हट्टे,  तर आमदार सर्वश्री ओमराजे निंबाळकर, राणा जगजितसिंह पाटील, गोदावरी खोरे विकास महामंडळाचे उपाध्यक्ष आमदार राहूल मोटे, ज्ञानराज चौगुले, विक्रम काळे, बसवराज पाटील, दिलीपराव देशमुख, सतिष चव्हाण, जिल्हाधिकारी डॉ. के. एम. नागरगोजे, मुख्य कार्यकारी अधिकारी एस. एल. हरिदास, पेालीस अधीक्षक सचिन पाटील, राज्य परिवहन महामंडळाचे उपाध्यक्ष व व्यवस्थापकीय संचालक विकास खारगे, उप प्रादेशिक परिवहन अधिकारी संजय मेत्रेवार आदि उपस्थित राहणार आहेत.
    या कार्यक्रमास बहुसंख्येने उपस्थित रहावे, असे आवाहन प्रादेशिक व्यवस्थापक अ. ना. गोहत्रे, विभाग नियंत्रणक नवनीत भानप यांनी केले आहे.

जिल्हाधिकारी कार्यालयात हुतात्म्यांना अभिवादन

उस्मानाबाद :- देशाच्या स्वातंत्र्यासाठी प्राणार्पण केलेल्या हुतात्म्यांच्या स्मरणार्थ येथील जिल्हाधिकारी कार्यालयात  जिल्हाधिकारी डॉ. के. एम. नागरगोजे यांच्या अध्यक्षतेखाली सोमवारी दोन मिनीटे स्तब्धता पाळून हुतात्म्यांना आदरांजली वाहण्यात आली. अप्पर जिल्हाधिकारी जे.टी. पाटील,  उपजिल्हाधिकारी सर्वश्री शिल्पा करमरकर, के.ए. तडवी, बी. एस. चाकूरकर यांच्यासह विविध विभागांचे अधिकारी व कर्मचारी यावेळी उपस्थित होते.
     विविध शासकीय कार्यालयातही हुतात्मा दिनानिमित्त  दोन मिनीटे स्तब्धता पाळून हुतात्म्यांना आदरांजली वाहण्यात आली.

इ. १२ वी परिक्षेचे प्रवेशपत्रे, प्रात्यक्षिक साहित्याचे ४ फेब्रुवारी रोजी वितरण

उस्मानाबाद -: लातूर विभागीय मंडळाच्या कार्यकक्षेतील कनिष्ठ महाविद्यालयाच्या सर्व मुख्याध्यापक व प्राचार्यांना सूचित करण्यात येते की, इ. 12 वी फेब्रु/ मार्च- 2014 च्या परिक्षेचे प्रवेशपत्रे व प्रात्यक्षिक परीक्षेचे साहित्याचे वितरण  दि. 4 फेब्रुवारी रोजी साकळी 11 ते सायंकाळी 5 या वेळेत  येथील जिल्हा परिषद (कन्या) प्रशाला या केंद्रावर वितरीत  करण्यात येणार आहे.
     तरी संबधितांनी आपला प्रतिनिधी अधिकार पत्रासह वितरण केंद्रावर पाठवून परीक्षेचे साहित्य घेवून जावे, असे आवाहन  मंडळाच्या लातूर विभागीय सचिवांनी केले आहे.                                               

युवक-युवतींना सैन्य व पोलीस दलात भरतीचे प्रशिक्षण

उस्मानाबाद :- सैन्य व पोलीस दलात भरती होवू इच्छिणा-या युवक- युवतींना सैन्य व पोलीस दलात भरतीपुर्व प्रशिक्षण मेस्को कॅरिअर अॅकॅडमी करंजेनाका, सातारा येथे देण्यात येणार  असून  इच्छुकांनी या संधीचा लाभ घ्यावा, असे आवाहन जिल्हा सैनिक कल्याण अधिकारी मेजर (नि) सुभाष सासने यांनी केले आहे.
     सदरहू प्रशिक्षण  30 दिवसाचे  असून हे प्रशिक्षण 5 फेब्रुवारी  ते  6 मार्च 2014 या कालावधीचे आहे. या प्रशिक्षण कालावधीत निवास व भोजन  शुल्क रक्कम 6 हजार  भरावे लागणार आहे. महाराष्ट्र माजी सैनिक महामंडळ मेस्को व्दारा मेस्को कॅरिअर अकॅडमीतर्फे हे प्रशिक्षण देण्यात येणार असून आहे.
   इच्छुकांनी अधिक माहितीसाठी मोबाईल क्र.7588624043 किंवा 9420697807  संपर्क साधावा अथवा महाराष्ट्र माजी सैनिक महामंडळ मेस्केाच्या http://mescoltd.co.in/pages/mcasataraAbout.aspx संकेतस्थळावर संपर्क साधावा,असेही आवाहन करण्यात आले आहे.

मतदार दिनानिमित्त विविध कार्यक्रम

उस्मानाबाद :- जिल्हा शिक्षण व प्रशिक्षण संस्थेच्यावतीने प्रजासत्ताक दिनानिमित्त ध्वजारोहणाचा कार्यक्रम प्राचार्य डॉ. कमलादेवी आवटे यांच्या हस्ते संपन्न झाला. मतदार दिनाचे औचित्य साधून संस्थेच्यावतीने  विविध स्पर्धा घेण्यात आल्या. स्पर्धेत यशस्वी विद्यार्थ्यांचे  प्रथम, व्दितीय, तृतीय क्रमांक प्राप्त केलेल्या विजेत्यास पुष्पगुच्छ देवून योवळी सत्कार करण्यात आला.
    यावेळी विद्यार्थ्‍यांनी देशभक्तीपर गीत सादर केली. डॉ. आवटे यांनी विद्याथ्या्रंना आपला देश व  देशातील राज्यघटनेचे महत्व पटवुन देवून विद्यार्थ्यांना  राज्यघटनेबाबत सखोल मार्गदर्शन केले.
     यावेळी  डॉ.  जटनुरे, श्रीमती मेनकुदळे ,श्रीमती बनसोडे, पौळ, गजधने, श्रीमती भोसले यांनी आपले मनोगत व्यक्त्‍केले. कार्यक्रम यशस्वीतेसाठी संस्थेतील अधिकारी व कर्मचाऱ्यांनी परिश्रम घेतले. सूत्रसंचलन कु. अश्विनी चौबे तर आभार कु. अंजली माळी यांनी  केल्यानंतर वंदेमारतम या गीताने कार्यक्‌रमांची सांगता झाली.

बोगस नंबरमुळे दोघे चोरटे पोलिसांच्या हाती

बार्शी (मल्लिकार्जून धारुरकर) : बनावट नंबर वापरुन चोरीचे वाहन चालविणार्‍या दोन संशयीतांना नितीन मुंढे यांनी बार्शी पोलिसांच्या ताब्यात दिले. सदरच्या चोराने हे वाहन चोरुन आणल्याचे आढे वेढे घेत तात्काळ कबूल केले असून आणखी बर्‍याच वाहन चोर्‍या उघड होण्याची शक्यता आहे.
    याबाबत अधिक माहिती अशी, पुणे येथे वाहतूक शाखेत काम करणारे नितीन मारुती मुंढे हे १० दिवसांच्या अर्जित रजेवर गावाकडे आले होते. आपल्या मित्राकडे थोडावेळ भेट करुन इकडच्या तिकडच्या गप्पा आणि आणखी काही बोलण्यासाठी विनोद ननवरे यांच्याकडे दुपारी आले होते. गप्पा मारणे सुरु होते यावेळी अचानकपणे समोरुन एका दुचाकीवर दोघेजण निघून गेले नेहमीच्या सवयीप्रमाणे त्यांचे लक्ष त्या नंबरवर होते. नंबरची सिरीयल, वाहन, त्याचा रंग इत्यादी अनेक बारकावे काही क्षणात टिपले असता त्यांना सदरच्या वाहन क्रमांकावरुन त्या वाहनाविषयी शंका निर्माण झाली. सदरचे वाहन आणि त्याचा वाहन क्रमांक जुळून येत नसल्याचे गणित त्यांनी काही क्षणात मनातल्या मनात केले. आणि आपल्या मित्राला त्याचे वाहन घे आपण त्या वाहनाचा पाठलाग करु मला शंका येत असल्याचे म्हटले. मित्राच्या वाहनावर दोघेजण निघाले असता काही मिनीटातच ते दोघे संशयीत पुन्हा माघारी त्या दिशेने येतांना दिसल्याने त्या दोघांना रस्त्यात अडवून विचारपूस केली. यावेळी त्यांनी उलटसुलट उत्तरे दिली आणि जणू काही आपणच या वाहनाचे खरे मालक व विचारपूस करणार्‍याचा काहीच संबंध नसल्याप्रमाणे ते दोघे संशयीत उर्मट भाषेत बोलू लागले. मुंढे यांनी आपण पोलिस असल्याचे सांगताच त्यांच्या भाषेत बदल झाला आणि पोपटासारखे बोलण्यास सुरुवात केली. त्यांनी त्यांचे नांव वाहन चालविणारा अशोक काळे आणि सोबत असलेल्या दुसर्‍याने अंकुश पवार असल्याचे सांगीतले. त्या दोघांना पोलिस ठाण्याकडे नेत असतांना त्यांनी मुंढे यांना काही रक्कम देण्याचे आमिषही दाखविले परंतु मुंढे यांनी कोणत्याही आमिषाला बळी न पडता रोजच्याप्रमाणे आपले कर्तव्य पार पाडले ते वाहन आणि त्या दोन संशयीतांना बार्शी पोलिसांच्या ताब्यात दिले. पोलिस निरीक्षक सालार चाऊस यांच्यासमक्ष हजर करुन सुट्टीवर जरी असले तरी आपली नजर आणि प्रामाणिकपणा व दैनंदिन जीवनात चोर कशा प्रकारे सर्वसामान्यांत मिसळून फिरतांना दिसत आहेत याचा नमुना दाखवून दिला.
        ज्या संशयीतांना ताब्यात घेतले आहे त्यांची नावे खरी आहेत का, त्यांनी आणखी किती वाहनांची चोरी केली, असल्यास त्याची विल्हेवाट कशा प्रकारे लावली. त्यांच्या पाठीशी कोण आहे, आजपर्यंत गुन्हेगारी क्षेत्रात त्यांचे रेकॉर्ड तयार आहे का असल्यास किती गुन्ह्याशी त्यांचा संबंध येतो या प्रश्‍नांची उत्तरे बार्शी पोलिसांनी कसून तपास केल्यास समोर येतील.

शेतकरी संघटनेचा महावितरण कार्यालयात घेराव

बार्शी (मल्लिकार्जून धारुरकर) : कमी दाबातील विजेचा पुरवठा आणि खंडीत विज पुरवठा यासाठी शेतकरी संघटनेच्या वतीने महावितरणच्या विभागीय कार्यालयात घेराव घालण्यात आला.
    यावेळी शेतकरी संघटनेचे युवक जिल्हाध्यक्ष शंकर गायकवाड, तालुका कार्यध्यक्ष हनुमंत भोसले, नांदणीचे वनराज यादव यांच्यासह तालुक्यातील सुमारे शंभर कार्यकर्ते उपस्थित होते. यावेळी उपकार्यकारी अभियंता एस.पी. वडगणे, तालुका सहाय्यक अभियंता एस.एस. कोंडगुळे यांना लेखी निवेदन देण्‍यात आले. कार्यकर्त्‍यांनी दोन तास घेराव घातल्‍यानंतर अधिका-यांनी चार ते पास दिवसात वीजपुरवठा सुरळीत करण्‍याचे लेखी आश्‍वासन दिले.

कळंब येथे अतिरिक्‍त जिल्‍हा व सत्र न्‍यायालय सुरु करण्‍याची मागणी

कळंब (भिकाजी जाधव) :- कळंब येथे अतिरिक्‍त जिल्‍हा व सत्र न्‍यायालय सुरु व्‍हावेत, या मागणीसाठी शनिवार दि. १ फेब्रुवारी रोजी सकाळी अकरा वाजता कळंब तहसिल कार्यालयासमोर एकदिवसीय लाक्षणिक उपोषण सर्व पक्षीय कळंब तालुका विकास नागरीक कृती समितीच्‍यावतीने करण्‍यात येणार आहे.

        कळंब येथे अतिरिक्‍त जिल्‍हा व सत्र न्‍यायालय आणि दिवाणी न्‍यायालय वरिष्‍ठ स्‍तर हे न्‍यायालये सुरु व्‍हावेत, यासाठी नागरीक, वकील संघाकडून गेली पंचवीस वर्षे पाठपुरावा केला जात आहे. परंतु याची दखल घेतली जात नाही. कळंब न्‍यायालयात दाखल प्रकरणे, पॅक्‍टीस करणा-या वकीलांची संख्‍या, निर्णयानंतर अपिलासाठी जिल्‍हा व सत्र न्‍यायालयातील प्रकरणे, या सर्व गोष्‍टींचा विचार व्‍हावा, अशी मागणी नागरीकांतून होत आहे.

      सदरील न्‍यायालय कळंब येथे सुरु व्‍हावे, या मागणी साठीच्‍या उपोषण आंदोलनात सर्वपक्षीय कार्यकर्ते व नागरिकांनी सहभागी व्‍हावे, असे आवाहन सर्वपक्षीय कळंब तालुका विकास नागरीक कृती समितीच्‍यावतीने करण्‍यात आले आहे.

उमरगा येथील महिलांच्या कार्यशाळेचा समारोप

उस्मानाबाद -: श्री छत्रपती शिवाजी महाविद्यालय, उमरगा येथे आयोजित डॉ.बाबासाहेब आंबेडकर मराठवाडा विद्यापीठ, औरंगाबाद बहि:शाल शिक्षण मंडळ पुरस्कृत वसंतराव नाईक यांच्या जन्मशताब्दी वर्षानिमित्त (पंचायतराज) तालुक्यातील नुतन महिला ग्रामपंचायत सदस्यांसाठी महाविद्यालयाच्या सभागृहात दोन दिवशीय प्रशिक्षण कार्यशाळा आयोजित करण्यात आली होती.
      या कार्यशाळेच्या अध्यक्षस्थानी उमरगा पंचायत समिती सभापती अक्षरताई सोनवणे तर उदघाटक म्हणून गटविकास अधिकारी बी. बी. खंडागळे हे होते. यावेळी पंचायत राज प्रशिक्षण केंद्र, मुरुडचे महेंद्र पांगळ, प्राचार्य डॉ. एन. डी. शिंदे, निर्मलग्राम अभियानचे रमाकांत गायकवाड, कार्यक्रम अधिकारी एस. पी. इंगळे, कॉमर्स विभाग प्रमुख तथा बहि:शाल शिक्षण मंडळाचे समन्वयक प्रा.डॉ. संजय अस्वले, पंचायत समितीचे  विस्तार अधिकारी किरनाळे आदिंची व्यासपीठावर उपस्थिती होती. 
     खंडागळे म्हणाले की, महिला मेळाव्यातून महिलांना त्यांच्या  हक्काची जाणीव होईल. विकासकामात महिलांना सहभागी करुन घ्यावे. तरच तालुक्यांचा विकास होईल.
     सौ. सोनवणे यांनी महिलांना दिलेले आरक्षण हेच प्रगतीची सुरुवात आहे. महिलांना या मेळाव्यातून महिला कायद्याची ओळख होईल व या महिला त्यांच्या हक्कासाठी प्रयत्न करतील, असे सांगितले. 
       यावेळी प्राचार्य शिंदे म्हणाले की, आदर्श समाज घडविण्यासाठी महिलांचा सहभाग महत्वाचा आहे. या भागातील महिलांनी पुढे यावे, यासाठी महाविद्यालयात महिला मेळाव्याचे आयोजन करण्यात आले आहे. याचा तालुक्यातील महिलांनी जास्तीत जास्त लाभ घेऊन कार्यक्षम पिढी निर्माण करण्यासाठी मोलाचे सहकार्य करण्याचे आवाहन त्यांनी केले. यावेळी राष्ट्रीय सेवा योजना जिल्हा समन्वयक श्रीमती स्वामी यांनी मार्गदर्शन केले.
प्रशिक्षण सत्र
    गायकवाड यांनी मार्गदर्शन करतांना सांगितले की, पंचायत राज संस्थामार्फत विविध पदावर काम करुन आदर्श ग्राम करण्यासाठी व गाव हांगणदारी मुक्त करुन पर्यावरण संतुलनासाठी सहभाग घेण्याचे आवाहन उपस्थित महिला प्रतिनिधींना केले. श्री. पांगळ यांनी पंचायत राज महिला सदस्यांचे अधिकार व हक्क व कर्तव्य विषयक माहिती देऊन गावचा विकास साधण्यासाठी मासिक सभा, ग्रामसभा, वार्ड सभा घेऊन  महिलांमध्ये जनजागृतीची गरज असल्याचे सांगितले. देवीकुमार पाठक यांनी महिलांना पाण्याचे महत्व पटवून देऊन रेन वॉटर हार्वेस्टिंगचे तंत्र प्रत्येकांनी वापरावे. जलसंवर्धनासाठी महिलांनी पुढाकार घेण्याचे आवाहनही त्यांनी  केले.
   प्रा.डॉ.अस्वले यांनी पंचायतराज ग्रामपंचायत अधिनियम कायदा, जिल्हास्तरीय शासन आणि ग्रामसभेची भूमिका आणि महिला सदस्यांचे कार्ये व अधिकार या विषयावर या कार्यशाळेत मार्गदर्शन केले.
      जिल्हा माहिती कार्यालयाच्या वतीने अशोक माळगे यांनी महाराष्ट्र शासनाने मुखपत्र असणाऱ्या लोकराज्य मासिकाबाबत माहिती देऊन घरोघरी लोकराज्य पोहचविण्यासाठी महिला सदस्यांनी पुढाकार घेण्याबाबत सांगितले. तसेच प्रत्येक गावांनी लोकराज्य ग्राम करण्याचेही त्यांनी सागून जिल्हा माहिती कार्यालयाच्या वतीने दि.4 ते 6 फेब्रुवारी या काळात सांस्कृतिक सभागृह, आनंद नगर, उस्मानाबाद येथे आयोजित ग्रंथोत्सव-2014 ची माहिती देऊन सर्वांनी सहभागी व्हावे,असे सांगितले.   
      यावेळी समारोप सत्रात महिला सदस्यांनी विचारलेल्या प्रश्नांचे निराकरण करण्यात येऊन उपप्राचार्य डॉ. डी.एल.बिराजदार यांच्या उपस्थितीत कार्यशाळेचा समारोप करण्यात आला. या दोन दिवशीय महिला कार्यशाळेस जिल्हा परिषदेच्या सदस्य, पंचायत समिती सदस्य, नुतन महिला सरपंच, सदस्य  यांनी  सहभाग घेतला. कार्यशाळेचे सूत्रसंचालन डॉ.अस्वले यांनी करुन आभार मानले.

आज हुतात्म्यांना आदरांजली वाहण्यासाठी दोन मिनीटे मौन पाळण्याचे आवाहन

उस्मानाबाद :- देशाच्या स्वातंत्र्यासाठी प्राणार्पण केलेल्या हुतात्म्यांच्या स्मरणार्थ आदर व्यक्त करण्यासाठी  दिनांक 30 जानेवारी रोजी दरवर्षी  संपूर्ण देशभर 2 मिनीटे मौन (स्तब्धता) पाळून त्यांना आदरांजली वाहण्यात येते. जिल्ह्यातही गुरुवार, ‍दिनांक 30 जानेवारी रोजी सकाळी 11 वाजता दोन मिनीटे मौन पाळून हा दिवस हुतात्मा  दिन म्हणून पाळण्यात येणार असल्याची माहिती जिल्हाधिकारी,उस्मानाबाद यांनी एका पत्रकाव्दार दिली आहे .
     गुरुवारी, सकाळी 10 - 59 वाजेपासून 11 वाजेपर्यंत इशारा भोंगा वाजविण्यात येईल. हा इशारा भोंगा संपल्यानंतर सर्व शासकीय/ निमशासकीय कार्यालय/ आस्थापना/ शैक्षणिक संस्था/ विद्यापीठ यामधील अधिकारी/ कर्मचारी /शिक्षक/ शिक्षकतेत्र कर्मचारी /विद्यार्थी तसेच नागरीकांनी दोन मिनिटे मौन पाळण्याचे आवाहन करण्यात आले आहे. सकाळी  ठिक 11 वाजून 2 मिनीटांनी मौन संपल्यासंबधीचा इशारा भोंगा 11 वाजून 3 मिनीटापर्यंत वाजविण्यात येईल. जेथे भोंग्याची  व्यवस्था नसेल तेथे वरीलप्रमाणे  ठिक 11 वाजता मौन पाळण्याबाबत योग्य ते निर्देश संबंधितांना देण्याबाबत  आणि  हुतात्म्यांना योग्य त्या आदराने आणि गंभीरपणे आदरांजली वाहण्याबाबत सर्वांनी दक्षता घ्यावी, असे आवाहन करण्यात  आले आहे. 

स्टार स्वरोजगार संस्थेची आढावा बैठक संपन्न

सोलापूर :-  जिल्ह्याची लीड बँक बँक ऑफ इंडिया यांच्यामार्फत चालविण्यात येणारी स्टार स्वरोजगार संस्थेची आढावा बैठक बँक ऑफ इंडिया झोनल मॅनेजर एम.के.श्रीवास्तव यांच्या अध्यक्षतेखाली पार पडली.
    या बैठकीत प्रशिक्षण अधिकारी वाय. यु. जिकरे यांनी सन 2013 मध्ये स्टार स्वरोजगार संस्थेद्वारे 488 प्रशिक्षणार्थींना प्रशिक्षण देण्यात आल्याची माहिती दिली. यामध्ये 308 दारिद्रयरेषखालील प्रशिक्षणार्थींचा समावेश असून पुढील महिन्यात माळशिरस, कुर्डुवाडी आणि बार्शी येथे प्रशिक्षण आयोजित करणार असल्याचा उल्लेख केला.
    जिल्हा ग्रामीण विकास यंत्रणेकडून 31 मार्च पर्यंतच्या दाखल प्रकरणांची सर्व रक्कम मिळाली असून सन 2013-14 मधील दाखल प्रकरणांची रक्कम त्वरित मिळविण्याविषयी श्री. श्रीवास्तव यांनी सुचीत केले.
संस्थेच्या मालकीच्या इमारतीचे काम लवकरच करण्यात येणार असून यामध्ये कॉम्प्युटर लॅब, निवास व्यवस्था, भोजन व्यवस्था इ. सह इतर अनेक सुविधा उपलब्ध करुन देणार असल्याचे श्री. जिकरे यांनी सांगितले. बैठकीमध्ये सन 2014-15 करीता लागणा-या संस्थेच्या खर्चाचे अंदाजपत्रकही सादर करण्यात आले.
   बैठकीस नाबार्डचे विजय काळे, अग्रणी बँकेचे माधव कोरवार, आयटीआय मंद्रुपचे प्राचार्य आणि जिल्हा ग्रामीण विकास यंत्रणेचे प्रतिनिधी उपस्थित होते.

कर्मवीर जगदाळेमामांच्या जयंतीनिमित्त विविध कार्यक्रमाचे आयोजन

बार्शी (मल्लिकार्जून धारुरकर) : शिवाजी शिक्षण प्रसारक मंडळाचे संस्थापक कर्मवीर डॉ. मामासाहेब जगदाळे यांची जयंती बार्शीत समाजदिन म्हणून दि. ४ फेब्रुवारी रोजी दरवर्षी साजरी करण्यात येते. त्यांच्या जयंतीचे हे १११ वे वर्ष असून जयंतीनिमित्त संस्थेच्या वतीने विविध उपक्रमांचे आयोजन करण्यात आले असल्याची माहिती संस्थाध्यक्ष डॉ.बी.वाय.यादव यांनी दिली.
    सोमवारी दि. ३ फेब्रुवारी रोजी सेवानिवृत्त, गुणवत्ताधारक विद्यार्थी व शिक्षकांचा सत्कार प्रा.गंगाधर बनभरे यांच्या हस्ते करण्यात येणार आहे. मंगळवारी दि. ४ रोजी सकाळच्या सत्रात जनजागरण मिरवणूक, दुपारच्या सत्रात वीरमाता, वीरपत्नी, सामाजिक, शैक्षणिक, कृषि आणि वैद्यकिय क्षेत्रातील कर्तबगार मान्यवरांचा गौरव करण्यात येत आहे. या कार्यक्रमासाठी ग्रामविकास मंत्री ना. जयंत पाटील, पाणीपुरवठा व स्वच्छतामंत्री दिलीप सोपल, खासदार डॉ.पद्मसिंह पाटील, माजी खासदार शिवाजी कांबळे, माजी आमदार राजेंद्र राऊत, नगराध्यक्ष कादर तांबोळी यांना निमंत्रित करण्यात आले आहे.
    या कार्यक्रमाच्या यशस्वीतेसाठी संस्थेचे जनरल सेक्रेटरी व्ही.एस.पाटील, सहसेक्रेटरी डॉ.जी.एम.पाटील, जयकुमार शितोळे, खजिनदार अरुण देबडवार, प्राचार्य मधुकर फरताडे आदी प्रयत्न करीत आहेत.

प्रजासत्ताकनिमित्त ४५ दात्यांचे रक्तदान

बार्शी : येथील शेर-ए-हिंद टिपू सुलतान सोशल फाऊंडेशनच्या वतीने प्रजासत्ताक दिनाचे औचित्य साधून रक्तदान शिबीर व गुणवंताचा सत्कार करण्यात आला. या शिबीरात ४५ रक्तदात्यांनी रक्तदान केले यावेळी सुवर्णपदक विजेता पियुष सितापराव यांचा सत्कार करुन गौरविण्यात आले. यावेळी सलिम चौधरी, निसार सय्यद, इलियास शेख, वसीम शेख, असिफ शेख, शकील सय्यद, मोहसिन तांबोळी, अय्याज शेख, शहानवाज शेख आदी मान्यवर उपस्थित होते. राष्ट्रगीताने शिबीराची सांगता करण्यात आली.

दोन्ही पक्षकारांच्या वकिलांनी तत्परता दाखविल्याने दिवाणी न्यायालयात जलद न्याय

बार्शी (मल्लिकार्जून धारुरकर) : किचकट प्रकरणे व इतर अनेक कारणामुळे वर्षानुवर्षे प्रकरणे प्रलंबित राहिलेली अनेक उदाहरणे आपण ऐकत आलो आहोत. परंतु दोन्ही पक्षकारांच्या वकिलांनी तत्परता दाखविल्यास वादी प्रतिवादींना किती लवकर न्याय मिळू शकतो याचे उत्तम उदाहरण बार्शीत पहायला मिळाले आहे.
    दिवाणी न्यायालयातील सह दिवाणी न्याशाधिश (क.स्तर) मा.शेख अकबर शेख जाफर यांच्या कोर्टात दिवाणी दावा दाखल झाला आणि अवघ्या चार महिन्यांत त्यांना बार्शी न्यायालयाने न्याय दिला आहे.
      एका कुटूंबातील पती-पत्नीचे कोणतेही संबंध मागील पंधरा वर्षांपासून राहिले नसल्याने पत्नीने पोटगीच्या दाव्या दाखल केला. याचा निकाल देतांना न्यायालयाने दावा मान्य केला व पतीच्या वडिलोपार्जीत जमीनीवरुन पत्नीस तिचा हक्क मिळवून दिला. सदरच्या हुकूमनाम्याची घटना समजल्याने यातील प्रतिवादीची बहिण असलेल्या महिलेने न्यायालयात धाव घेतली. यामध्ये वडिलोपार्जीत जमीनीचा एकत्र हिस्यातील आपला हिस्सा स्वतंत्र मिळाला नसल्याने त्यावर कोणताही बोजा दाखविण्यात येऊ नये व तिने आपला हिस्सा स्वतंत्र मिळावा अशी मागणी केली. दोन्ही बाजूंचे लेखी, तोंडी पुरावे आणि युक्तीवाद झाल्यानंतर न्या.शेख अकबर शेख जाफर यांनी न्याय दिला. वादीच्या वतीने अॅड्.सी.पी.विश्वरुपे, प्रतिवादीच्या वतीने अॅड.पी.आर.करंजकर, अॅड्.एस.के.शिंदे यांनी काम पाहिले.

वसतीगृह उभारणीस शाहू महाराजांचा आदर्श

बार्शी (मल्लिकार्जून धारुरकर) : गरीब व गरजू विद्यार्थ्यांच्या सोयीकरिता अल्पदरात सुरु केलेल्या छत्रपती शाहू महाराज विद्यार्थी वसतीगृह कौतुकास्पद असल्याचे गौरवोद्गार युवराज छत्रपती संभाजीराजे (कोल्हापूर) यांनी काढले. भविष्यात वसतीगृहाचा विस्तार करुन जास्त विद्यार्थ्यांची सोय करावी अशी अपेक्षाही त्यांनी व्यक्त केली.
    सर्वसामान्यांना शिक्षणाची सोय सुकर व्हावी याकरिता अमोल नवले यांनी सुरु केलेल्या वसतीगृहास सदिच्छा भेट दिली यावेळी ते बोलत होते. यावेळी संभाजी ब्रिगेडचे प्रदेशाध्यक्ष प्रविणदादा गायकवाड, मराठा सेवा संघाचे प्रदेशाध्यक्ष कामाजी पवार, कार्याध्यक्ष शांताराम कुंजीर, तालुकाध्यक्ष अनंत काशीद, राष्ट्रवादी नगरसेवकांचे गटनेते नागेश अक्कलकोटे आदी उपस्थित होते.

भगवा ध्‍वज विटंबनेप्रकरणी नळदुर्ग बंदला प्रतिसाद ; दोघांना अटक

नळदुर्ग :- ध्‍वज फाडून विटंबना केल्‍याप्रकरणी समाजकंटकावर कडक कारवाई करावी, या मागणीसाठी तसेच घटनेच्‍या निषेधार्थ बुधवार दि. 29 जानेवारी रोजी नळदुर्ग शहर बंदचा इशारा दिला होता. त्‍यानुसार नळदुर्ग शहरातील मुख्‍य बाजारपेठ बंद होती. तर अन्‍य ठिकाणी संमिश्र प्रतिसाद मिळला. जळकोट व अणदूर गाव पूर्णपणे बंद असल्‍याचे दिसून आले. याप्रकरणी दोघा आरोपींना पोलिसांनी अटक केली आहे.
      याप्रकरणी नळदुर्ग शहरातील तीनशेपेक्षा अधिक नागरिकांनी पोलीसांना व संबंधितांना निवेदन दिले. नळदुर्ग शहरापासून जवळच असलेल्‍या महामार्गावरील आलियाबाद शिवारात आपलं घर समोरील दरीत असलेले श्री  विरभ्रदेश्‍वरचे पुरातन मंदीर आहे. दरवर्षी 25 जानेवारी रोजी या ठिकाणी यात्रा भरते. त्‍या निमित्‍ताने महापुजा व महाभिषेक करण्‍यात येतो. प्रत्‍येक‍वर्षी जुना भगवा ध्‍वज काढून नवा ध्‍वज लावण्‍यात येतो. दि. 25 जानेवारी रोजी जुना भगवा ध्‍वज काढून नवीन ध्‍वज लावण्‍यात आला होता. दि. 27 जानेवारी रोजी काही समाजकंटकांनी हा भगवा ध्‍वज फाडून विटंबना केल्‍याचे उघ्‍डकीस आले. यामुळे हिंदू बांधवांच्‍या भावना दुखावल्‍या असून पोलिसांनी त्‍या समाजकंटकांना तात्‍काळ अटक करुन त्‍यांच्‍यावर कडक कारवाई करावी, अशी मागणी निवेदनाद्वारे केली होती. निवेदन देताना शिवसेनेचे उपजिल्‍हाप्रमुख तथा नगरसेवक कमलाकर चव्‍हाण, नगरसेवक नितीन कासार, संजय बताले, माजी नगरसेवक अमृत पुदाले, सुधीर हजारे, शिवसेनेचे उपतालुकाप्रमुख सरदारसिंग ठाकूर, शहरप्रमुख संतोष पुदाले, भाजपाचे शहराध्‍यक्ष पद्माकर घोडके, सुशांत भूमकर, धिमाजी घुगे यांच्‍यासह जवळपास 300 ते 400 तरुण उपस्थित होते.
    दरम्‍यान, या घटनेच्‍या निषेधार्थ आज बुधवार रोजी नळदुर्ग शहर बंदचे आवाहन करण्‍यात आले होते. त्‍यास उत्‍सफुर्त प्रतिसाद मिळला. तर सकाळी 10 वाजता नळदुर्ग येथील भवानी चौकात निषेध सभा घेण्‍यात आली. यावेळी नगराध्‍यक्ष शहबाज काझी, नगरसेवक नितीन कासार, शिवसेनेचे नगरसेवक कमलाकर चव्‍हाण, संजय बताले, प्रा. जावेद काझी, अमृत पुदाले, सचिन डुकरे, सरदारसिंग ठाकुर, संतोष पुदाले, शरद बागल यांच्‍यासह शेकडो नागरिक उपस्‍थित होते.
          पोलिसात दि. 29 रोजी महेश सिध्‍देश्‍वर कोप्‍पा दिलेल्‍या फिर्यादीत म्‍हटले आहे की, दि. 28 रोजी माझ्या शेतात सकाळी साडेआठ वाजण्‍याच्‍या सुमारास काम करीत असताना हायवे रोड लगत असलेल्‍या लिंबाच्‍या झाडावर लावलेला भगवा ध्‍वज कोणीतरी अज्ञात समाज कंटकाने फाडुन तुकडे केल्‍याचे दिसले. त्‍यामुळे आमच्‍या धार्मिक भावाना दुखावल्‍या. त्‍यावरून पोलिसानी तपासाचे चक्रे वेगाने फिरवुन सय्यद गौस फयाज रिझवी (वय 23), सय्यद मस्‍तान ताहेरअली (वय 22) दोघे रा. महंमद पनाह गल्‍ली, नळदुर्ग याना अटक केली असुन पुढील तपास सहाय्यक पोलीस निरीक्षक संतोष गायकवाड हे करीत आहेत.

अंदोरा बँक फोडीतील दरोडेखोर गजाआड

परंडा :- अंदोरा (ता. कळंब) येथील स्टेट बँक ऑफ हैदराबादच्या शाखेत 26 जानेवारी रोजी दरोडा टाकून साडेअकरा लाख रुपयांची लूट केली होती. याप्रकरणी स्थानिक गुन्हे शाखा व परंडा पोलिसांनी एका अट्टल दरोडेखोरास सोमवारी मध्यरात्री अटक केली आहे.
    अंदोरा (ता. कळंब) येथील स्टेट बँक ऑफ हैदराबादच्या शाखेमध्ये प्रजासत्ताक दिनाच्या पूर्वसंध्येला दरोडा टाकून साडेअकरा लाख रुपये दरोडेखोराने लंपास केले. याप्रकरणी पोलिस अधीक्षक सचिन पाटील यांच्या मार्गदर्शनाखाली उस्मानाबाद स्थानिक गुन्हे शाखेचे पोलिस निरीक्षक माधव गुंडिले, परंडा येथील साहाय्यक पोलिस निरीक्षक गुरुनाथ चव्हाण, गणेश वाघमोडे, महादेव राऊत, सुभाष तांबरे यांनी संयुक्त कारवाई करून सागर माणिक पौळ याला जेऊर (ता. करमाळा) येथून अटक केली. सागर पौळ हा बँक फोडीतील अट्टल गुन्हेगार असून, यापूर्वी अंबी पोलिस ठाण्यांतर्गत झालेल्या गुन्ह्यात तो फरार झाला होता. परंडा पोलिसांनी पौळ याला स्थानिक गुन्हे शाखेकडे सोपविले आहे.

तांड्यावरील चार घरे जळून खाक

प्रतिकात्‍मक

नळदुर्ग : तुळजापूर तालुक्‍यातील जळकोटवाडी (नळ) येथील भांगी तांड्यावरील गोपिनाथ रामा राठोड यांच्या घरास आग लागल्याने विद्युत वायरिंग जळून ठिणग्या पडून आगीच्या भक्षस्थानी पडले. यात तब्बल पाच लाखाचे नुकसान झाले.
    जळकोटवाडी (नळ) येथील भांगी तांड्यावरील गोपिनाथ रामा राठोड हे स्वत: पत्नीसह चार मुले, सुना, एक मुलगी, नातवंडासह विभक्तपणे मात्र एकाच घरात वेगवेगळ्या खोल्यात राहतात. प्रत्येकजण शेतमजुर असल्याने दि. २४ रोजी सकाळीच कामासाठी सर्वजण बाहेर गेले होते. लहान मुले शाळेला गेली होती. त्यामुळे घरात कोणीही गेले नसल्याने घर कुलूपबंद होते. त्यामुळे मनुष्यहानी झाली नाही हे सुदैव. विज भारनियमनामुळे सकाळी १० नंतर विजेचा प्रवाह चालु होतो. विज प्रवाह चालु झाल्याने घरातील वायरिंग जळून ठिणग्या पडल्याने दु. १ ते २ च्या दरम्यान आग लागून कपडे, अंथरून, पांघरून क्षणार्थात पेटल्याने घरातील गोदरेज कपाट चार नग, फ्रिज दोन नग, कुलर दोन नग, टि.व्ही. २ नग, शिलाई मशिन एक नग, छतावरील फॅन ३ नग, दिवाणी पलंग एक नग, ज्वारी ६ पोते, तुर २ पोते, साळी ५ पोते, सोयाबिन ४ पोत, चार कुटूंबाची भांडी, पत्रे ३६ नग यासह घरात ठेवलेले सोने ६ तोळे, रोख रक्कम ५० हजार, असे एकूण पाच लाख रूपयांचे नुकसान झाल्याचे जळकोट सज्जाचे तलाठी आर. एम. औटी, जळकोट मंडळ अधिकारी ए. जी. कुलकर्णी यांनी प्रत्यक्ष घटनास्थळी जाऊन पंचनामा केल्याने स्पष्ट झाले. जळीतग्रस्त कुटूंबांनी नुकसान भरपाई तात्काळ मिळावी अशी विनंती लेखी अर्जाद्वारे तहसीलदारांकडे केली आहे.

भगवा ध्‍वज विटंबनाप्रकरणी आज नळदुर्ग शहर बंद

नळदुर्ग :- भगवा ध्‍वज फाडून त्‍याची विटंबना करणा-या  समाजकंटकावर कठोर कारवाई करण्‍याची मागणी नळदुर्ग शहरातील हिंदू बांधवांच्‍यावतीने  सहाय्यक पोलीस निरीक्षक संतोष गायकवाड यांच्‍याकडे निवेदनाद्वारे करण्‍यात आली आहे.  यावेळी पोलीस ठाण्‍यात 300 ते 400 तरुणांनी एकत्र येऊन हे निवेदन दिले. दरम्‍यान या घटनेच्‍या निषेधार्थ आज बुधवार रोजी नळदुर्ग शहर बंदची हाक देण्‍यात आली आहे. तसेच शहरातील भवानी चौकात सकाळी दहा वाजता निषेध सभेचे आयोजन करण्‍यात आले आहे.
    नळदुर्ग शहरापासून पूर्वेकडे असलेल्‍या आलियाबाद शिवारात राष्‍ट्रीय महामार्गालगत श्री वीरभद्रेश्‍वरचेेेे मंदीर आहे. दरवर्षी दि. 25 जानेवारी रोजी या ठिकाणी यात्रेनिमित्‍त महापूजा व महाभिषेक करण्‍यात येतो. या ठिकाणी मोठ्या प्रमाणात भाविक येत असल्‍याने मंदीर परिसर सुशोभित करण्‍याबरोबरच त्‍या ठिकाणी परंपरेनुसार असणारा भगवा ध्‍वज लावला जातो. दि. 25 जानेवारी रोजी जुना भगवा ध्‍वज काढून नवीन ध्‍वज लावण्‍यात आला होता. दि. 27 जानेवारी रोजी काही समाजकंटकांनी हा भगवा ध्‍वज फाडून विटंबना केली आहे. यामुळे हिंदू बांधवांच्‍या भावना दुखावल्‍या असून पोलिसांनी या समाजकंटकांना तात्‍काळ अटक करुन त्‍यांच्‍यावर कडक कारवाई करावी, अशी मागणी निवेदनाद्वारे करण्‍यात आली आहे.
    निवेदन देताना शिवसेनेचे उपजिल्‍हाप्रमुख तथा नगरसेवक कमलाकर चव्‍हाण, नगरसेवक नितीन कासार, संजय बताले, माजी नगरसेवक अमृत पुदाले, सुधीर हजारे, शिवसेनेचे उपतालुकाप्रमुख सरदारसिंग ठाकूर, शहरप्रमुख संतोष पुदाले, भाजपाचे शहराध्‍यक्ष पद्माकर घोडके, सुशांत भूमकर, धिमाजी घुगे यांच्‍यासह जवळपास 300 ते 400 तरुण उपस्थित होते.
    दरम्‍यान, या घटनेच्‍या निषेधार्थ आज बुधवार रोजी नळदुर्ग शहर बंदचे आवाहन करण्‍यात आले आहे. तर सकाळी 10 वाजता नळदुर्ग येथील भवानी चौकात निषेध सभेचे आयोजन करण्‍यात आले आहे. पोलीस निरीक्षक संतोष गायकवाड यांनी याप्रकरणी गुन्‍हा दाखल करुन आरोपींना अटक करण्‍याचे आश्‍वासन दिले.

दि. ४ फेब्रुवारीपासून उस्मानाबादेत ग्रंथोत्सवास प्रारंभ

उस्मानाबाद -: राज्य शासनाचा मराठी भाषा विभाग, महाराष्ट्र राज्य साहित्य व संस्कृती मंडळ आणि माहिती व जनसंपर्क महासंचालनालय यांच्यावतीने उस्मानाबाद येथे दि. 4 ते 6 फेब्रुवारी या कालावधीत ग्रंथोत्सव-2014 या उपक्रमाचे आयोजन करण्यात आले आहे. 

    ख्यातनाम ग्रामीण कथाकार व साहित्यिक प्रा. डॉ. भास्कर चंदनशिव आणि जिल्हाधिकारी डॉ. के.एम. नागरगोजे यांच्या हस्ते दि. 4 रोजी सकाळी 10 वाजता या ग्रंथोत्सवाचे उदघाटन होणार आहे. मराठवाड्यासह राज्यभरातील ग्रंथविक्रेत्यांचा सहभाग, शासकीय प्रकाशनांची उपलब्धता आणि साहित्यविषयक उपक्रमांची रेलचेल हे या ग्रंथोत्सवाचे वैशिष्ट्य राहणार आहे. सार्वजनिक बांधकाम विभागाच्या सांस्कृतिक सभागृह, आनंदनगर येथे हा ग्रंथोत्सव होणार आहे.
       मागील सलग दोन वर्ष उस्मानाबाद जिल्ह्यातील साहित्य रसिकांनी या उपक्रमाला भरभरुन प्रतिसाद दिला. हे या उपक्रमाचे तिसरे वर्ष असून राज्याच्या सांस्कृतिक धोरणानुसार या उपक्रमांचे आयोजन राज्यातील सर्व जिल्ह्यात करण्यात येत आहे. स्थानिक पातळीवर जिल्हा माहिती कार्यालयाच्या वतीने या उपक्रमाचे आयोजन करण्यात आले आहे. यावर्षी शहराच्या विविध शाळा-महाविद्यालयांतून निघणारी ग्रंथदिंडी, प्रसिद्ध कवी-गीतकार-चित्रपट अभिनेते किशोर कदम अर्थात कवी सौमित्र यांच्याशी दिलखुलास गप्पांचा कार्यक्रम, प्रसिद्ध अभिनेत्री मृणाल कुलकर्णी व ख्यातनाम वकील रुचिर कुलकर्णी या जोडीशी मनमोकळ्या गप्पा, वैज्ञानिक जिज्ञासा जागविणारा कुतूहल विज्ञानाचे हा कार्यक्रम आणि जिल्ह्यातील मान्यवर कवींची बहारदार काव्यमैफील आणि विविध विषयांवरील पुस्तक खरेदी करण्याची ग्रंथप्रदर्शनाच्या माध्यमातून मिळणारी संधी हे याचे वैशिष्ट्य राहणार आहे.
       दि. 4 फेब्रुवारी रोजी सकाळी 8 वाजता शहरातील विविध भागातून ग्रंथफेरी काढण्यात येणार आहे. सकाळी 10 वाजता ग्रंथोत्सवाचे उदघाटन होणार असून या कार्यक्रमास औरंगाबाद विभागाचे माहिती संचालक राधाकृष्ण मुळी, मराठवाडा साहित्य परिषदेचे उस्मानाबाद शाखेचे अध्यक्ष नितीन तावडे, जिल्हा ग्रंथालय अधिकारी ह.रा. डेंगळे आदींची उपस्थिती राहणार आहे.
       त्याच दिवशी सायंकाळी 6 वाजता सामाजिक भान जपणारे कवी-गीतकार-चित्रपट अभिनेते किशोर कदम यांच्याशी गप्पांचा कार्यक्रम होणार आहे. कवयित्री व पोलीस निरीक्षक अश्विनी भोसले आणि कवी-पत्रकार रवींद्र केसकर हे त्यांच्याशी संवाद साधतील.
        दि. 5 फेब्रुवारी रोजी सकाळी 11 वाजता ‘कुतूहल विज्ञानाचे’ हा कार्यक्रम आयोजित करण्यात आला आहे. यांत उस्मानाबाद जिल्ह्यातील वटवाघळांवर संशोधन करणारे डॉ. महेश गायकवाड हे प्रात्यक्षिकांसह संवाद साधणार आहेत तर अणूऊर्जा-समज व गैरसमज याबाबत तारापूर अणूऊर्जा प्रकल्पातील संशोधक ए.पी.कुलकर्णी हे सखोल माहिती देणार आहेत.
      त्याच दिवशी सायंकाळी 6 वाजता अभिनेत्री मृणाल कुलकर्णी-रुचिर कुलकर्णी यांच्याशी मनमोकळ्या गप्पांचा ‘जोडी तुझी माझी’ हा कार्यक्रम होईल. पत्रकार महेश पोतदार आणि कवयित्री व गटशिक्षणाधिकारी तृप्ती अंधारे या जोडीशी संवाद साधणार आहेत.
     दि. 6 रोजी सायंकाळी 6 वाजता जिल्ह्यातील मान्यवर कवींची बहारदार  काव्यमैफील रंगणार आहे. यात माधव गरड, राजेंद्र अत्रे, बालाजी इंगळे, डी.के. शेख, देवीदास पाटील, प्रा. हनुमंत काळे, शेखर गिरी, युवराज नळे, पंडित कांबळे, सतीश मडके, भाग्यश्री वाघमारे, प्रमोद माने, डॉ. विजय परदेशी, शंकर कसबे, बालाजी पाटील, विजय गायकवाड हे कवी सहभागी होणार असून रवींद्र केसकर सूत्रसंचलन करणार आहेत.
जिल्हा प्रशासन, जिल्हा परिषद प्रशासन, पोलीस प्रशासन यांच्या सहकार्याने हा उपक्रम होत असून मराठवाडा साहित्य परिषद, उस्मानाबाद शाखा, जिल्हा ग्रंथालय अधिकारी कार्यालय, नगरवाचनालय, नगरपरिषद वाचनालय यांचे या आयोजनामध्ये सहकार्य लाभले आहे.
      या सर्व कार्यक्रमांना जिल्ह्यातील साहित्यरसिकांनी उपस्थित राहण्याचे तसेच तीनही दिवस सकाळी 9 ते रात्री 9 पर्यंत सुरु राहणाऱ्या ग्रंथप्रदर्शनातील पुस्तक विक्रीचा लाभ घेण्याचे आवाहन जिल्हा माहिती कार्यालयाच्या वतीने करण्यात आले आहे. 

अल्पसंख्याक आयोगाचे अध्यक्ष मुनाफ हकीम यांचा उस्मानाबाद दौरा

उस्मानाबाद :- महाराष्ट्र राज्य अल्पसंख्याक आयोगाचे अध्यक्ष मुनाफ हकीम, सर्वश्री दत्तात्रय गायकवाड, डॉ. मुमताज सय्यद, सुरजिसिंग खुंगर सदस्यांचे पथक दोन दिवस जिल्ह्याच्या दौ-यावर येत असून त्यांचा दौ-याचा कार्यक्रम पुढीलप्रमाणे आहे.
         बुधवार, दि.29 जानेवारी रोजी सायंकाळी बीडहून उस्मानाबादकडे प्रयाण करतील. सायंकाळी 7 वाजता शासकीय विश्रामगृह, उस्मानाबाद येथे आगमन व राखीव.
     गुरुवार, दि. 30 रोजी सकाळी 10 ते 12 या वेळेत अल्पसंख्याक समाजाच्या व्यक्तीची भेट,  राखीव. दुपारी 2 वाजता जिल्हाधिकारी, पोलीस अधीक्षक, मुख्य  कार्यकारी अधिकारी, शिक्षणाधिकारी, नगरपालिका प्रशासन व इतर संबंधित अधिकारी यांच्यासमवेत बैठक. अल्पसंख्याक योजनांचा आढावा घेतील. दु. 4 वा. पत्रकार परिषद. सायंकाळी 5 वाजता उस्मानाबादहून लातूरकडे प्रयाण करतील.  

पालकमंत्र्यांच्या हस्ते हरित महाराष्ट्र अभियान कार्यक्रमाचा शुभारंभ

उस्मानाबाद :- दैनंदिन गरजेकरीता वनांवर अवलंबून राहवे लागते. लोकांच्या सहभागामुळे वनसंरक्षण व व्यवस्थापन करणे, वनावरील ताण कमी करणे, वनांची नैसर्गिक पुनर्मिर्मीती होण्यासाठी प्रजासत्ताक दिनी जिल्ह्याचे पालकमंत्री मधुकरराव चव्हाण यांच्या हस्ते पोलीस मुख्यालयाच्या आवारात हरित महाराष्ट्र अभियान कार्यक्रमाचा शुभारंभ पालकमंत्री मधुकरराव चव्हाण यांच्या हस्ते वृक्षारोपण करुन करण्यात आला.
       याप्रसंगी जिल्हा परिषदेचे अध्यक्ष डॉ. सुभाष व्हट्टे, आमदार राणा जगजितसिंह पाटील, आमदार ओमराजे निंबाळकर, उपाध्यक्ष संजय पाटील दुधगावकर, जिल्हाधिकारी डॉ.के.एम. नागरगोजे, पोलीस अधिक्षक सचिन पाटील, मुख्य कार्यकारी अधिकारी एस.एल. हरिदास, विभागीय वन  अधिकारी बी एन कदम आणि अप्पासाहेब पाटील आदिंच्या हस्ते वृक्षारोपण करुन या अभियानाचा शुभारंभ करण्यात आला.
       या कार्यक्रमाचे आयोजन वन परिक्षेत्र अधिकारी बी. एच. कोळगे यांनी केले. कार्यक्रम यशस्वीतेसाज्ञठी वन परिमंडळ अधिकारी एम ए खोबरे, वन रक्षक मुंढे, गांधले,घोरपडे,दांडगे यांनी मोलाची कामगिरी केली.      

परीक्षा केंद्र परिसरात प्रतिबंधात्मक आदेश

उस्मानाबाद :- महाराष्ट्र लोकसेवा आयोगाच्या वतीने घेण्यात येणारी विषयांकित  परीक्षा रविवार,दि.2 फेब्रुवारी,2014 रोजी होत आहे. श्रीपतराव भोसले हायस्कूल, (जूनी इमारत),  श्रीपतराव भोसले ज्युनिअर कॉलेज (नवीन इमारत तळमजला), श्रीपतराव भोसले ज्युनिअर कॉलेज (नवीन इमारत पहिला मजला),  श्रीपतराव भोसले ज्युनिअर कॉलेज (नवीन इमारत दुसरा मजला), श्रीपतराव भोसले ज्युनिअर कॉलेज (नवीन इमारत तिसरा मजला) आणि रामकृष्ण परमहंस महाविद्यालय, उस्मानाबाद या परीक्षा केंद्रांवर ही  परीक्षा होत असून परीक्षा केंद्र परिसरात फौजदारी प्रक्रिया संहिता 1973 चे कलम 144 अन्वये सकाळी 10-30 ते दुपारी 1 आणि दु. 2-30 ते सायंकाळी 5 या कालावधीत  होणार असल्याने  2  फेब्रुवारी रोजी सर्व परीक्षा केंद्राचे परिसरात सकाळी 8 ते सायंकाळी  6  वाजेपर्यंत  प्रतिबंधात्मक आदेश  लागू करण्यात आल्याचे अपर जिल्हादंडाधिकारी  संजय  गायकवाड यांनी कळविले आहे.
    या आदेशानुसार परीक्षा केंद्राच्या 100 मीटर परिसरात घोषणा देण्यास, परीक्षार्थी अथवा अन्य व्यक्तीकडून शांततेस बाधा निर्माण होईल असे कृत्य करण्यास मनाई करण्यात आली आहे. याशिवाय या परिसरातील झेरॉक्स सेंटर्स , पानपट्टी, टायपींग सेंटर, एस.टी.डी.बुथ, ध्वनीक्षेपक, कॉम्पूटर सेंटर्स तसेच इंटरनेट कॅफे बंद राहतील. परीक्षा केंद्र परिसरात मोबाईल, सेल्यूलर फोन, फॅक्स, ई-मेल व इतर पसार माध्यमे घेऊन प्रवेश करण्यास मनाई करण्यात आली आहे. परीक्षा केंद्रांवर कोणत्याही वाहनास प्रतिबंध असेल. केवळ संबंधित परीक्षा केंद्रांवर नेमणूक केलेले अधिकारी/ कर्मचारी, शासकीय कामावरील अधिकारी व कर्मचारी, संबंधित शाळेचे मुख्याध्यापक,शिक्षक, कर्मचारी आणि उमेदवारांनाच परीक्षा केंद्रांवर प्रवेश असेल. परीक्षा केंद्राच्या 100 मीटर आवारात 5 किंवा त्यापेक्षा अधिक व्यक्तींना एकत्र येता येणार नाही. हे आदेश संबंधित दिवशी सकाळी 8 ते सायंकाळी 6 वाजेपर्यंत लागू राहणार आहेत.

जिल्हा परिषद बांधकाम विभागाची विविध कामांच्या निविदेबाबत आवाहन

उस्मानाबाद :- जिल्हा परिषद  बांधकाम विभागाची विविध कामांच्या निविदेबाबत आवाहन कार्यकारी अभियंता (बांधकाम), जिल्हा परिषद, उस्मानाबादतर्फे ता. परंडा येथील भांडारगृह इमारत दुरुस्ती, भूम येथील  जिल्हा परिष्द प्रशाला दुरुस्ती, उमरगा येथील महिला बाल कल्याण इमारत दरुस्ती, आणि तुळजापूर तालुक्यातील सिंदफळ येथील प्राथमिक आरोग्य उपकेंद्र इमारतीची दुरुस्तीसाठी जिल्हा परिषदेकडील योग्य त्या वर्गातील नोंदणीकृत ठेकेदार/ कंत्राटदारांकडून वर्ग 9 कडुन  निवीदा मागविण्यात येत आहे. कोऱ्या निवीदेचा नमुना कार्यकारी अभियंता (बांधकाम) जिल्हा परिषद, उस्मानाबादकडून 29 जानेवारी ते दि. 6 फेब्रुवारी पर्यत कार्यालयीन वेळेत (रविवार व सुटीचा दिवस वगळून) देण्यात मिळतील. निवीदा 7 फेब्रुवारी रोजी दुपारी 4 वाजेपर्यंत स्वीकारुन नियमानुसार विहीत कालावधीत उघडण्यात येतील.
    संबंधित वर्ग 9 च्या ठेकेदार /कंत्राटदारांनी याची नोंद घेवून आपल्या निवीदा वेळेत पाठवावेत,असे आवाहन कार्यकारी अभियंता (बांधकाम), जिल्हा परिषद, उस्मानाबाद यांनी केले आहे.

गुणवत्ता नियंत्रण चाचणी साहित्यासाठी निवीदा पाठविण्‍याचे आवाहन

उस्मानाबाद :- कार्यकारी अभियंता (बांधकाम), जिल्हा परिषद, उस्मानाबाद गुणवत्ता नियंत्रण चाचणी साहित्य फिल्ड लॅब इक्युपमेंटची  खरेदीसाठी जाहिर निविदा व्दिनोंद लिफाफा पध्दतीने मागविण्यात येत आहे. को-या निविदा फॉर्म यांच्या कार्यालयात रुयये 100 चा राष्ट्रीयकृत बँकेचा धनादेश अथवा रोखीने पाठविल्यास परवठाधारकास दि. 1 फेब्रुवारीपर्यंत सकाळी 10 ते सायंकाळी 5-30 वाजेपर्यंत (रविवार व सुटीचा दिवस वगळून) देण्यात येतील. निवीदा पुर्णपणे भरुन कार्यकारी अभियंता,( बांधकाम), जिल्हा परिषद यांच्याकडे सादर करावेत.
    निवीदा 1 फेब्रुवारी रोजी शासन प्रचति नियमाप्रमाणे उघडण्यात येतील.अधिक माहिती व फॉर्म/ निवीदेसाठी कार्यकारी अभियंता, (बांधकाम), जिल्हा परिषद, उस्मानाबादशी संपर्क साधावा,असे आवाहन करण्यात आले आहे.                    

पोलीस अधीक्षक पाटील यांच्या हस्ते पोलीस नाईक यांचा सत्कार

उस्मानाबाद :- येथील जिल्हा पोलीस अधीक्षक कार्यालयात जिल्हा विशेष शाखेत पोलीस नाईक या पदावर कार्यरत असलेले कर्मचारी सदाशिव भागवत धुपेकर यांनी उत्कृष्ट कामगिरी बजावल्याबदृदल त्यांचा प्रजासत्ताक दिनी  पोलीस अधीक्षक सचिन पाटील यांच्या हस्ते  सत्कार करण्यात आला.श्री. धुपेकर यांच्या उत्कृष्ट कामगिरीमुळे त्यांना हा मान मिळाला.   

उस्मानाबादेत गुरुवारी रोजगार मेळावा

उस्मानाबाद :- जिल्हा रोजगार व स्वयंरोजगार मार्गदर्शन केंद्र,उस्मानाबाद आयोजित पुणे, जिल्हयातील खाजगी क्षेत्रातील उद्योजक/कंपनी यांचेकडील विविध पदे भरण्यासाठी गुरुवार, दि. 30 जानेवारी रोजी सकाळी 10-30 वा. जिल्हा रोजगार व स्वयंरोजगार मार्गदर्शन केंद्र, मध्यवर्ती प्रशासकीय इमारत, तळमजला, उस्मानाबाद येथे रोजगार मेळाव्याचे आयोजन करण्यात आले आहे. इच्छुक पुरुष व महिला उमेदवारांनी या रोजगार मेळाव्याचा जास्तीत जास्त लाभ घ्यावा, असे आवाहन सहायक संचालक, जिल्हा रोजगार व स्वयंरोजगार मार्गदर्शन केंद्र, उस्मानाबाद यांनी एका प्रसिध्दीपत्रकाव्दारे केले आहे.
         या मेळाव्यात जिल्ह्यातील पुरुष व महिला बेरोजगार उमेदवारांसाठी 4 उद्योजक 330 पदासाठी पात्र व इच्छुक उमेदवारांच्या मुलाखती घेवून निवड प्रक्रिया करणार आहेत.
डेक्कन मॅनेजमेंट कन्सलन्टन्स ,फिनिशिंग स्कुल, इंद्रावणे पुणे अंतर्गत याझकी इंडिया  लि. वाघोली, पुणे यांचेतर्फे 100 पदावर पुरुष व महिलांसाठी एस. एस. सी. किंवा एच. एस. सी. किंवा आय. टी. आय. कोणताही ट्रेड उत्तीर्ण  उमेदवार जॅाब ट्रेनी पदासाठी मुलाखती देऊ शकतील.
        महिंद्रा कोनव्हर्स लि पीरंगुट, पुणे हे  ट्रेनीची 50 पदे भरणार आहेत. त्यासाठी एस. एस. सी. किंवा एच. एस. सी. किंवा आय. टी.आय. कोणताही ट्रेड उत्तीर्ण,  18 ते 30 वयोगट अशी पात्रता आहे.
      साणसवाडी पुणे  येथील कल्याणी फोर्ज लि., यांचेतर्फे जॉब ट्रेनिची 100 पदासाठी 18 ते 30 या वयोगटातील  एस. एस. सी. किंवा एच. एस. सी. किंवा आय. टी. आय. कोणताही ट्रेड उत्तीर्ण  उमेदवारांची  निवड करण्यात येईल.
       महिंद्रा हिनोदय इंडस्ट्रीज लि. उर्से, ता मावळ, जि. पुणे यांचेकडे ट्रेनिची 80 पदासाठी 18 ते 25 वयोगटातील एस. एस. सी. किंवा एच. एस. सी. किंवा आय. टी. आय. कोणताही फिटर,मोल्डर,इलेक्ट्रीशियन,टर्नर,मशिनिष्ठ आदि ट्रेड उत्तीर्ण उमेदवार  जॅाब ट्रेनी पदासाठी मुलाखती देऊ शकतील.
      कॅन्टीन ,निवास, ट्रान्सपोर्टेशन आदि सोयी, सुविधा संबंधित कंपनीच्या नियमानुसार प्रत्यक्ष मुलाखतीचे वेळी कंपनीचे अधिकारी  माहिती देतील.  वरील पदासाठी पात्र असलेल्या पुरुष व महिला उमेदवारानी त्यांचे शैक्षणीक पात्रता, वय, अनुभव आदि मुळ प्रमाणपत्र व जिल्हा रोजगार व स्वयंरोजगार मार्गदर्शन केंद्राचे नोंदणी कार्ड ,पासपोर्ट आकाराचे फोटो ,स्वत:चा बायोडाटा आदि कागदपत्रांसह प्रत्यक्ष मुलाखतीसाठी रोजगार मेळाव्याच्या ठिकाणी स्वखर्चाने उपस्थित राहून लाभ घ्यावा, असे आवाहन करण्यात आले आहे.

संभाजीराजेंच्‍या हस्ते बार्शीतील छत्रपती संभाजीराजे चौक नामकरण फलकाचे अनावरण

बार्शी (मल्लिकार्जून धारुरकर) : येथील शासकिय तंत्रनिकेतन (आय.टी.आय.) जवळील चौकास छत्रपती संभाजीराजे चौक असे नामकरण करण्यात आले असून याचे अनावरणही युवराज संभाजीराजे भोसले (कोल्हापूर) यांच्या हस्ते करण्यात आले आहे.
      संभाजी ब्रिगेड आणि बार्शी नगरपरिषदेने संयुक्तपणे या कार्यक्रमाचे आयोजन केले होते. दि.२६ जानेवारी रोजी हा कार्यक्रम पार पडला यावेळी. यावेळी नगराध्यक्ष कादर तांबोळी, राष्ट्रवादी नगरसेवकांचे गटनेते नागेश अक्कलकोटे,रमेश पाटील, देविदास शेटे, बप्पा कसबे, अंबादास शेटे, रामभाऊ मेनकुदळे, आनंद काशीद आदी उपस्थित होते.

बार्शीतील किल्ला दर्गाहचा प्रश्‍न निकाली

बार्शी (मल्लिकार्जून धारुरकर) : बार्शीतील हिंदू-मुस्लिम बांधवांचे श्रध्दास्थान असलेल्या दस्तगीर दर्गाहच्या दुरुस्तीचा प्रश्‍न मागील काही वर्षांपासून रखडल्याने सामाजिक कार्यकर्त्यांनी उपोषणाचा मार्ग स्विकारला होता. या प्रश्‍नासाठी ना.सोपल यांनी १५ लाखांचा निधी मंजूर करुन कामाला सुरुवात करुन प्रश्‍न निकाली काढल्याची माहिती गटनेते नागेश अक्कलकोटे यांनी दिली.
    हा किल्ला दर्गाह सुमारे ५० फुट उंच, पुरातन आहे याच्या बाहेरील बुरुजाची बाजू तसेच भिंती २००७ मधील अतिवृष्टीने ढासळल्या, सदरच्या जागेची मालकी शासनाची असल्याने दर्गाहच्या भक्तांनी दुरुस्तीची मागणी केली होती. या कामाचा शुभारंभ रविवारी दि.२६ रोजी माजी नगराध्यक्ष योगेश सोपल यांच्या हस्ते करण्यात आला.
     यावेळी ट्रस्टचे अध्यक्ष अॅड्. अब्दुलगन्नी तांबोळी, नगराध्यक्ष कादर तांबोळी, उपनगराध्यक्ष राहुल कोंढारे, राष्ट्रवादीचे माजी नगरसेवक ऍड्.असिफ तांबोळी, उस्मानअली शाह, गुलमहंमद आतार, गुलाबभाई शेख, मुर्तजभाई शेख, मौला मुलाणी, इम्तियाज तांबोळी, आबा पवार, दत्ताआण्णा शिंदे, डॉ.म्हेत्रे, भाऊ मंडलिक, अंबादास शिंदे, श्रीकांत शिंदे, बप्पा कसबे, रमेश पाटील, मंगलताई शेळवणे, अरुणा परांजपे, संदिप बारंगुळे, मनिष चव्हाण, ऍड्.विकास जाधव, ऍड्.नितीन सोडळ आदी उपस्थित होते.
    दस्तगीर दर्गाह किल्ला तटबंदीसाठी १५ लाखांचा निधी ना.सोपल यांनी मंजूर केला असून किल्ल्याचा अनमोल ठेवा जतन करण्यासठी पश्‍चिमेकडील संरक्षक तटबंधीसाठी आणखी १५ लाखांचा निधी मंजूर करण्याचे तसेच बार्शीसह काटेगाव, मालवंडी आदी ठिकाणी हिंदू मुस्लिम समाजाच्या श्रध्दास्थान असलेल्या दर्गाहची जपवणूक करण्यासाठी शासन स्तरावरुन सर्वतोपरी मदतीचे आश्वासन देण्यात आले आहे. मुस्लिम कब्रस्तान अंतर्गत कॉंक्रीट रस्ते, संरक्षक भिंत, मदिना मस्जिद शेजारील लेंडीनाल्यावरील कॉंक्रीटीकरण, शादीखाना, आतार समाज सभागृह संरक्षक भिंत, रमजानभाई तांबोळी सभागृह विस्तारीकरण आदी कामेही मार्गी लागली आहेत.

माणसाने पुस्‍तकांशी गोष्‍टी करावी : पाटील

नळदुर्ग :- मन आणि विचार समृध्‍दीसाठी माणसाने पुस्‍तकांशी गोष्‍टी करावी, मंदिराएवढे महत्‍त्‍व ग्रंथालयाला असून त्‍यासाठी या ज्ञान मंदिरात सतत गेले पाहिजे, असे प्रतिपादन मराठवाडा ग्रंथालय संघाचे कार्यवाहक ज्ञानेश्‍वर पाटील यांनी केले.
         मानेवाडी (ता. तुळजापूर) येथे प्रजासत्‍ताक दिनाचे औचित्‍य साधून यशवंतराव चव्‍हाण सार्वजनिक वाचनालयाचे उदघाटन करण्‍यात आले. त्‍याप्रसंगी ते पाटील हे बोलत होते. कार्यक्रमाच्‍या अध्‍यक्षस्‍थानी ज्‍येष्‍ठ नागरीक बलभीमराव कटके तर प्रमुख पाहुणे म्‍हणून पंचायत समिती सदस्‍य साहेबराव घुगे, ग्रामसेवक आर.एस. नवगिरे, जय मल्‍हार युवा मंचचे तालुकाध्‍यक्ष इंद्रजित देवकर आदीजण उपस्थित होते. प्रारंभी ज्ञानेश्‍वर पाटील यांच्‍या हस्‍ते विद्येची देवता सरस्‍वती यांच्‍या पूजनाने व फित कापून उदघाटन करण्‍यात आले. मानेवाडी येथे प्रथमच वाचनालयाची सुरुवात होत असल्‍याने पंचायत समिती सदस्‍य साहेबराव घुगे यांनी चार हजार रुपयांची व इंद्रजित देवकर यांनी दोन हजारांची ग्रंथ संपदा वाचनालयाला प्रदान केली. याप्रसंगी जिल्‍हा परिषद शाळेच्‍या चिमुकल्‍यांनी सारे आम्‍ही एक आहोत याची दर्शन घडविणारी मुख नाटिका सादर केली.
          यावेळी बोलताना साहेबराव घुगे म्हणाले की, उशिरा का होईना गावातील युवकांनी पुढाकार घेऊन वाचनालयाची सुरुवात केली असून यामध्‍ये सातत्‍य ठेवून वाचन संस्‍कृती वाढवावी, याचा परिणाम पुढील काळात गावच्‍या अनेक वस्‍तीवर दिसून येईल, असे सांगितले. याप्रसंगी ग्रामसेवक नवगिरे यांनी आपले विचार मांडले. या कार्यक्रमास माजी उपसरपंच राम माने, ग्रामपंचायत सदस्‍या रेखा देवकर, उपसरपंच शाहूराज माने, महेश बर्वे, तंटामुक्‍त समितीचे भिमराव टकले, आनंद हाके, मनोहर माने, माजी सरपंच भारताबाई हाके, सतीश हाके, पारुबाई लकडे यांच्‍यासह विद्यार्थी, महिला, नागरीक मोठ्या संख्‍येनी उपस्थित होते. कार्यक्रमाचे प्रास्‍ताविक व सूत्रसंचालन महादेव माने यांनी केले. ज्ञानेश्‍वर पाटील व ग्रामसेवक नवगिरे यांनी वाचनालयास 51 पुस्‍तके देण्‍याचे जाहीर केले.

दोन चिमुकल्यांसह आईची विहिरीत उडी घेऊन आत्महत्या

लोहारा : दोन चिमुकल्यांना साडीच्या साह्याने पोटाला बांधून एका विवाहितेने विहिरीत उडी घेऊन स्वत:सह तिघांचीही जीवनयात्रा संपवली. ही घटना तोरंबा (ता. लोहारा) येथे रविवार दि. 26  जानेवारी रोजी सकाळी आठ वाजण्‍या सुमारास घडली.
    वैशाली ऊर्फ भगतबाई नारायण मोरे (वय 27 वर्षे, रा. तोरंबा, ता. लोहारा) या महिलेने समाधान (वय 3 वर्षे) व चंद्रशेखर (वय 1 वर्षे) या आपल्या दोन मुलांना साडीने पोटाला बांधून गावाच्या शिवारातील आपल्याच शेतातील विहिरीत उडी मारून आत्महत्या केली. सुरुवातीला या प्रकरणी घटनेची अकस्मात मृत्यू म्हणून नोंद झाली होती. नंतर वैशाली यांचे बंधू आबा हरिदास शिंदे (रा. भातांगळी, ता. लोहारा) यांच्या फिर्यादीवरून पती नारायण बब्रुवान मोरे, सासरा बब्रुवान, सासू केशरबाई व हणमंत काळे यांच्यावर आत्महत्येस प्रवृत्त केल्याप्रकरणी गुन्हा दाखल करण्यात आला आहे. मालवाहू जीप घेण्यासाठी दोन लाख रुपये आणण्यासाठी वैशाली यांचा चौघांनी छळ केल्याचा आरोप फिर्यादीत आहे. याप्रकरणी अधिक तपास पोलिस निरीक्षक रामचंद्र कुंभार करीत आहेत.

राष्‍ट्रवादीच्‍या कार्यकर्ता मार्गदर्शन मेळाव्यास प्रतिसाद

उस्मानाबाद : राष्ट्रवादी काँग्रेसच्‍या भटक्या विमुक्त जाती-जमाती सेलच्यावतीने उस्‍मनाबाद येथे जिल्‍ह्यातील कार्यकर्त्‍यांचा मेळावा आयोजित करण्‍यात आला होता. या मेळाव्‍यास उत्‍तम प्रतिसाद मिळाला.
    उस्‍मानाबाद येथील राष्ट्रवादी भवनात झालेल्या या मेळाव्याच्या अध्यक्षस्थानी आमदार राणाजगजितसिंह पाटील हे होते. तर प्रमुख पाहुणे म्हणून सेलचे प्रदेश सरचिटणीस मनोहरराव वाडेकर, जिल्हाध्यक्ष पांडुरंग लाटे, उपाध्यक्ष दयानंद राठोड, युवक प्रदेश सरचिटणीस विद्यानंद राठोड आदींची उपस्थिती होती.
    यावेळी आ.राणाजगजितसिंह पाटील बोलताना म्हणाले, समाजातील प्रत्येक घटकाच्या अडचणी सोडविण्यासाठी पक्षाच्या वतीने प्रयत्न केला जात असून, येत्या काळात युवकांनी स्वत:च्या पायावर सक्षमपणे उभे रहावे. यासाठी पक्षाच्या वतीने सर्वतोपरी सहकार्य केले जाईल, असेही ते म्‍हणाले.
    यावेळी डिकसळ (ता. कळंब) येथील राहुल रजपूत, मुफीक पठाण, नाना पुरीजनक जाधव, अक्षय कानडे, ऋषिकेश टकले, किरण नाईकवाडे, धनंजय बोंदर, , समीर पठाण, गजानन शिंपले, प्रणव भालेराव, किशोर कांबळे, सूरज धावारे, सचिन जाधवर, शशिकांत गायकवाड, अजय वाघमारे, अक्षय शिंदे आदींनी राष्ट्रवादी काँग्रेस पक्षात प्रवेश केला.