३५ वर्षांची निष्ठा डावलली; एमआयएमने दिला न्याय' ; धाराशिव जिल्ह्यात गावागावांत संघटन विस्ताराचा निर्धार; सर्व समाज घटकांना सोबत घेऊन जनतेच्या प्रश्नांवर लढणार – शहाबाज काझी

'३५ वर्षांची निष्ठा डावलली; एमआयएमने दिला न्याय' ; धाराशिव जिल्ह्यात गावागावांत संघटन विस्ताराचा निर्धार; सर्व समाज घटकांना सोबत घेऊन जनतेच्या प्रश्नांवर लढणार – शहाबाज काझी

नळदुर्ग, दि. ३१ जुलै : शिवाजी नाईक 

"काँग्रेसमध्ये तब्बल ३५ वर्षे प्रामाणिकपणे काम करूनही माझ्यावर अन्याय झाला. नगराध्यक्षपदाची उमेदवारी डावलण्यात आली. मात्र एमआयएमने माझ्या कार्याची दखल घेत न्याय दिला. आता धाराशिव जिल्ह्यातील प्रत्येक तालुका आणि गावात पक्षसंघटन उभारून सर्व जाती-धर्मातील नागरिकांना सोबत घेत जनतेच्या प्रश्नांसाठी प्रभावी लढा उभारणार," असा ठाम निर्धार एमआयएमचे नवनियुक्त धाराशिव जिल्हाध्यक्ष तथा नळदुर्गचे माजी नगराध्यक्ष शहाबाज काझी यांनी व्यक्त केला.

जिल्हाध्यक्षपदाची जबाबदारी स्वीकारल्यानंतर प्रथमच माध्यमांशी ("तुळजापूर लाईव्ह"शी) संवाद साधताना काझी म्हणाले, "एमआयएमला धाराशिव जिल्ह्यात अधिक सक्षम पर्याय म्हणून उभे करण्यासाठी व्यापक संघटनात्मक मोहीम राबविण्यात येणार आहे. प्रत्येक तालुका, शहर आणि गावात पक्षाच्या शाखा मजबूत केल्या जातील. जुने-नवे कार्यकर्ते, युवक, महिला आणि सर्व समाज घटकांना विश्वासात घेऊन जिल्हा व तालुका समित्यांची पुनर्बांधणी केली जाईल. जनतेच्या अडीअडचणी सोडविणे आणि त्यांच्या हक्कासाठी संघर्ष करणे, हेच माझे पहिले प्राधान्य राहील."

काझी यांनी काँग्रेसमधील आपल्या राजकीय प्रवासाचा उल्लेख करताना सांगितले की, "मी जवळपास साडेतीन दशके काँग्रेसचा निष्ठावंत कार्यकर्ता म्हणून काम केले. प्रत्येक निवडणुकीत पक्षाच्या विजयासाठी झटत राहिलो. अनेकांनी सत्तेच्या राजकारणासाठी पक्ष बदलले; मात्र मी काँग्रेसची साथ कधीही सोडली नाही. परंतु नळदुर्ग नगरपालिकेच्या निवडणुकीत नगराध्यक्षपद सर्वसाधारण प्रवर्गासाठी असतानाही माझी उमेदवारी डावलण्यात आली.त्यांनी नाव न घेता काँग्रेसशी कोणताही संबंध नसलेल्या व्यक्तीला पक्षाने उमेदवारी   दिली. त्यामुळे केवळ माझ्यावरच नव्हे, तर पक्षासाठी निष्ठेने काम करणाऱ्या कार्यकर्त्यांवर आणि मुस्लिम समाजाच्या भावनांवरही अन्याय झाला."

ते पुढे म्हणाले, "ज्यांना उमेदवारी देण्यात आली, त्यांनी यापूर्वी अनेक पक्ष बदलले होते. तरीही त्यांच्यावर विश्वास दाखविण्यात आला, तर वर्षानुवर्षे पक्षासाठी झटणाऱ्या कार्यकर्त्याला बाजूला करण्यात आले. ही बाब मनाला वेदना देणारी होती. त्यामुळे काँग्रेसमधील अन्याय सहन न झाल्याने मी एमआयएममध्ये प्रवेश करण्याचा निर्णय घेतला."

"एमआयएमने मला नगराध्यक्षपदाची उमेदवारी देऊन सन्मान दिला. अत्यंत चुरशीच्या निवडणुकीत माझा अल्प मतांनी पराभव झाला. मात्र पक्ष नेतृत्वाने माझ्या कार्यावर विश्वास ठेवत धाराशिव जिल्हाध्यक्षपदाची महत्त्वाची जबाबदारी सोपविली. या विश्वासाला पात्र ठरत जिल्ह्यात पक्ष अधिक सक्षम करण्यासाठी आणि सर्वसामान्यांच्या न्याय हक्कांसाठी सातत्याने संघर्ष करणार," असे काझी यांनी स्पष्ट केले.

ठळक मुद्दे 

धाराशिव जिल्ह्यात प्रत्येक तालुका व गावात एमआयएमची संघटनात्मक बांधणी.

जुने-नवे कार्यकर्ते, युवक व महिलांना समान संधी.

सर्व जाती-धर्मातील नागरिकांना सोबत घेऊन जनतेच्या प्रश्नांवर संघर्ष.

काँग्रेसमध्ये अन्याय झाल्याचा आरोप; एमआयएमने न्याय दिल्याचा दावा.

जिल्हाध्यक्षपदाची जबाबदारी स्वीकारत पक्षविस्तारावर भर.

धर्मसेवेच्या ५३ वर्षांच्या अखंड तपश्चर्येला मानाचा मुजरा; अहंकारी परिवाराचा ब्राह्मण युवकांकडून भव्य गौरव

धर्मसेवेच्या ५३ वर्षांच्या अखंड तपश्चर्येला मानाचा मुजरा; अहंकारी परिवाराचा ब्राह्मण युवकांकडून भव्य गौरव

नळदुर्ग, दि. ३१ जुलै :

नळदुर्गच्या धार्मिक, सांस्कृतिक आणि अध्यात्मिक परंपरेला गेली तब्बल ५३ वर्षे अखंडपणे जपणाऱ्या अहंकारी परिवाराचा गुरुपौर्णिमेच्या पावन मुहूर्तावर ब्राह्मण युवकांच्या वतीने अत्यंत उत्साहपूर्ण वातावरणात भव्य सत्कार करण्यात आला. 

भागवत सप्ताहाच्या माध्यमातून शेकडो भाविकांमध्ये भक्तीचा जागर निर्माण करणाऱ्या या परिवाराच्या सेवाभावी कार्याचा यावेळी कृतज्ञतेने गौरव करण्यात आला.

नळदुर्ग शहरात आदर्श शिक्षक वसंतराव अहंकारी गुरुजी यांच्या मार्गदर्शनाखाली अहंकारी परिवाराकडून गेली ५३ वर्षे अखंड भागवत सप्ताहाचे आयोजन केले जात आहे.

 सात दिवस चालणाऱ्या या सप्ताहामुळे संपूर्ण शहर भक्तिमय वातावरणाने भारावून जाते. दररोज शेकडो महिला भागवत कथा श्रवणासाठी उपस्थित राहतात, तर १५० ते २०० भाविकांना महाप्रसादाचा लाभ दिला जातो.

गुरुपौर्णिमेच्या दिवशी सप्ताहाची सांगता करण्यात आली, या दिवशी नळदुर्गसह परिसरातील  भाविक उत्सवात सहभागी झाले.  भाविकांसाठी महाप्रसादाचे आयोजन करून सेवा, श्रद्धा आणि संस्कारांची परंपरा अहंकारी परिवार आजही अविरतपणे जपत आहे. या उल्लेखनीय धार्मिक योगदानाचा गौरव म्हणून ब्राह्मण युवकांनी कृतज्ञतापूर्वक हा सत्कार सोहळा आयोजित केला.

नळदुर्ग ब्राह्मण समाजाचे माजी अध्यक्ष व माजी नगरसेवक विनायक अहंकारी यांच्या संकल्पनेतून हा सन्मान सोहळा पार पडला.

यावेळी सौ. वनमाला व वसंतराव अहंकारी, सौ. माधुरी व बळवंत अहंकारी, सौ. अश्विनी व विकास अहंकारी, सौ. वर्षा व वैभव अहंकारी, सौ. अदिती व योगेश अहंकारी तसेच सौ. राणी व सुनील पाटील यांच्यासह संपूर्ण अहंकारी परिवाराचा शाल, श्रीफळ व सन्मानचिन्ह देऊन गौरव करण्यात आला.

याप्रसंगी प्रदीप जोशी, उमेश नाईक, सचिन भूमकर, अजित भुमकर ,प्रदीप ग्रामोपाध्ये, संदीप वैद्य, राजकुमार वैद्य, संतोष नाईक, अजय देशपांडे, सौरभ रामदासी, संकेत भूमकर, स्मितेश जोशी, मयूर जोशी, मनोज कुलकर्णी, आशुतोष नाईक यांच्यासह ब्राह्मण समाजातील अनेक युवक व मान्यवर मोठ्या संख्येने उपस्थित होते.

धार्मिक परंपरेचा वारसा जपत समाजात भक्ती, संस्कार आणि सेवाभावाची अखंड ज्योत प्रज्वलित ठेवणाऱ्या अहंकारी परिवाराच्या कार्याला उपस्थितांनी यावेळी मनःपूर्वक दाद दिली.

भरधाव एसटीची ट्रकला भीषण धडक; चालकासह दोघांचा मृत्यू, १० प्रवासी गंभीरउमरगा आगाराच्या बसचा शेळगी पुलावर भीषण अपघात; बसचा पुढील भाग चक्काचूर

भरधाव एसटीची ट्रकला भीषण धडक; चालकासह दोघांचा मृत्यू, १० प्रवासी गंभीर

उमरगा आगाराच्या बसचा शेळगी पुलावर भीषण अपघात; बसचा पुढील भाग चक्काचूर

नळदुर्ग, दि. ३१ जुलै :

सोलापूर येथील मार्केट यार्डजवळील शेळगी पुलावर शुक्रवारी पहाटे महाराष्ट्र राज्य परिवहन महामंडळाच्या उमरगा आगाराच्या बसने समोरील ट्रकला पाठीमागून जोरदार धडक दिल्याने भीषण अपघात झाला. या अपघातात बसचालकासह एका महिला प्रवाशाचा जागीच मृत्यू झाला, तर १० प्रवासी गंभीर जखमी झाले. या दुर्घटनेमुळे काही काळ परिसरात एकच खळबळ उडाली.

बसचालक दादाराव बनसोडे 

मिळालेल्या माहितीनुसार, उमरगा आगाराची बस (क्र. एमएच-१४ एलबी-०३८०) पुण्याहून सोलापूर बसस्थानकात आल्यानंतर तेथून उमरगाच्या दिशेने निघाली होती. पहाटेच्या सुमारास मार्केट यार्ड परिसरातील शेळगी पुलावर समोरील ट्रक (क्र. एमएच-१३ एसएक्स-३९४९) याला बसने पाठीमागून जोरदार धडक दिली. धडकेची तीव्रता एवढी होती की, बसचा संपूर्ण पुढील भाग अक्षरशः चक्काचूर झाला. अपघातानंतर प्रवाशांच्या बॅगा व साहित्य रस्त्यावर विखुरलेले दिसून आले.

या भीषण अपघातात बसचालक दादाराव भालचंद्र बनसोडे (वय ४३, रा. चिवरी उमरगा, ता.तुळजापूर जि. धाराशिव) व नागुबाई राम रेवगे (वय ४८, रा. अणदूर, ता. तुळजापूर, जि. धाराशिव) यांचा मृत्यू झाला.

अपघातात जखमी झालेल्यांमध्ये रामचंद्र प्रभाकर देवघे (अणदूर), विकास प्रकाश पाटील (आळंद, जि. गुलबर्गा), माणिक नागप्पा वायचळ (तांदूळवाडी, ता. दक्षिण सोलापूर), रामलिंग ब्रह्मानंद कापसे (धाराशिव), अभिषेक दीपक चव्हाण (उमरगा), अनिकेत सुभाष राठोड (सातारा), अभिजीत अरुण चव्हाण (नळदुर्ग), नागोराव किस्तू तोडसांग (किणवर, जि. परभणी), अनुराधा अर्जुन चव्हाण (तुळजापूर) आणि तुलसीदास मनोहर पाचंगे (गुंजोटी, ता. उमरगा) यांचा समावेश आहे. सर्व जखमींना तातडीने रुग्णालयात दाखल करण्यात आले असून त्यांच्यावर उपचार सुरू आहेत.

घटनेची माहिती मिळताच सोलापूर पोलिस, वाहतूक पोलिस व फॉरेन्सिक पथकाने घटनास्थळी धाव घेत पंचनामा केला. अपघाताचे नेमके कारण अद्याप स्पष्ट झाले नसून, पोलिस अधिक तपास करीत आहेत.

ग्रामीण विद्यार्थ्यांना योग्य मार्गदर्शन मिळाल्यास तेही यशाचे शिखर गाठतात : डॉ. जितेंद्र कानडे ; श्री श्री गुरुकुलमध्ये नीट २०२६ मधील गुणवंत विद्यार्थ्यांचा उत्साहात सत्कार

ग्रामीण विद्यार्थ्यांना योग्य मार्गदर्शन मिळाल्यास तेही यशाचे शिखर गाठतात : डॉ. जितेंद्र कानडे ; श्री श्री गुरुकुलमध्ये नीट २०२६ मधील गुणवंत विद्यार्थ्यांचा उत्साहात सत्कार

अणदूर, दि. ३१ जुलै :

तुळजापूर तालुक्यातील अणदूर येथील श्री श्री गुरुकुलमध्ये राष्ट्रीय पात्रता व प्रवेश परीक्षा (नीट) २०२६ मध्ये उल्लेखनीय यश संपादन करणाऱ्या विद्यार्थ्यांचा सत्कार समारंभ उत्साहपूर्ण वातावरणात पार पडला. कार्यक्रमाच्या अध्यक्षस्थानी संस्थेचे संस्थापक अध्यक्ष तथा जिल्हा परिषद सदस्य डॉ. जितेंद्र कानडे होते.

यावेळी मुख्याध्यापक लक्ष्मण नरे, पालक मल्लिनाथ लंगडे, भारत बुरजे, सिद्धाराम पाटील यांची प्रमुख उपस्थिती होती. नीट परीक्षेत यशस्वी ठरलेले समर्थ लंगडे (५९४ गुण), प्रणव बुरजे (५२० गुण) आणि समृद्धी पाटील (४८० गुण) यांचा डॉ. कानडे यांच्या हस्ते शाल, पुष्पहार व पुष्पगुच्छ देऊन गौरव करण्यात आला.

यावेळी मार्गदर्शन करताना डॉ. जितेंद्र कानडे म्हणाले, ग्रामीण भागातील विद्यार्थ्यांमध्ये गुणवत्ता आणि जिद्द विपुल प्रमाणात असते. मात्र, त्यांना योग्य दिशा आणि मार्गदर्शन मिळणे आवश्यक आहे. योग्य मार्गदर्शनाच्या बळावर ग्रामीण भागातील विद्यार्थी स्पर्धा परीक्षांमध्येही उल्लेखनीय यश संपादन करू शकतात. वैद्यकीय क्षेत्रातील वाढती स्पर्धा लक्षात घेता सातत्यपूर्ण अभ्यास, आत्मविश्वास आणि शालेय जीवनापासूनच नीटसारख्या स्पर्धा परीक्षांची पायाभूत तयारी करणे अत्यंत महत्त्वाचे असल्याचे त्यांनी सांगितले. विद्यार्थ्यांमध्ये भक्कम पाया निर्माण करण्याचे कार्य श्री श्री गुरुकुल करत असल्याचेही त्यांनी नमूद केले.

पालक प्रतिनिधी मल्लिनाथ लंगडे यांनी विद्यार्थ्यांवर अवास्तव अपेक्षांचे ओझे न टाकता त्यांच्या आवडीच्या क्षेत्रात शिक्षण घेण्याची संधी उपलब्ध करून देणे ही पालकांची जबाबदारी असल्याचे सांगितले.

सत्कारमूर्ती समर्थ लंगडे याने सातत्यपूर्ण अभ्यास, योग्य नियोजन, शिक्षकांचे मार्गदर्शन आणि पालकांचे सहकार्य यामुळे हे यश मिळाल्याचे सांगितले. समृद्धी पाटील हिने कठोर परिश्रम, आत्मविश्वास आणि चिकाटीच्या जोरावर मोठे ध्येय गाठण्याचा संदेश देत समाजसेवेची भावना जोपासून उत्कृष्ट डॉक्टर बनण्याचे आवाहन केले. तसेच मुलींनी शिक्षण घेऊन स्वावलंबी बनावे, असेही ती म्हणाली.

कार्यक्रमाचे प्रास्ताविक मुख्याध्यापक लक्ष्मण नरे यांनी केले. सूत्रसंचालन ज्ञानेश्वर बंडगर यांनी, तर आभार रामेश्वर सावंत यांनी मानले. कार्यक्रमाच्या यशस्वीतेसाठी विशाल महाबोले, मंजुषा जोशी तसेच शिक्षकेतर कर्मचाऱ्यांनी परिश्रम घेतले.

भाजप ओबीसी आघाडीच्या नूतन पदाधिकाऱ्यांचा नळदुर्गात सत्कारपक्षवाढीसाठी 'एसआयआर' कामाचा आढावा; पदाधिकारी-कार्यकर्त्यांची बैठक संपन्न

भाजप ओबीसी आघाडीच्या नूतन पदाधिकाऱ्यांचा नळदुर्गात सत्कार

पक्षवाढीसाठी 'एसआयआर' कामाचा आढावा; पदाधिकारी-कार्यकर्त्यांची बैठक संपन्न

नळदुर्ग, दि. ३१ जुलै :

भारतीय जनता पक्षाच्या ओबीसी आघाडीच्या धाराशिव जिल्हा पदाधिकाऱ्यांच्या नुकत्याच झालेल्या निवडीनंतर नळदुर्ग येथील भाजप कार्यालयात नूतन पदाधिकाऱ्यांचा नगराध्यक्ष व नगरसेवकांच्या वतीने सत्कार करून पुढील वाटचालीस शुभेच्छा देण्यात आल्या.

भाजप ओबीसी आघाडीच्या धाराशिव जिल्हा कोषाध्यक्षपदी धिमाजी घुगे यांची, तर जिल्हा कार्यकारिणी सदस्यपदी संजय विठ्ठल जाधव यांची निवड झाली आहे. या निवडीबद्दल नगराध्यक्ष बसवराज धरणे तसेच नगरसेवकांच्या हस्ते त्यांचा सत्कार करण्यात आला.

यावेळी भाजपचे सुशांत भूमकर, नगरसेवक तानाजी जाधव, शशिकांत पुदाले, रिजवान काजी, छमाबाई राठोड, निरंजन राठोड, प्रवीण गायकवाड, अभियंता स्वप्नील काळे, श्रमिक पोतदार, पद्माकर घोडके, सुदर्शन पुराणिक, सुनील उर्फ बबन चौधरी, अक्षय भोई, किशोर नळदुर्गकर, उमेश नाईक, संदीप गायकवाड तसेच आमदार राणाजगजितसिंह पाटील यांचे स्वीय सहाय्यक अबुल हसन रजवी आदी उपस्थित होते.

दरम्यान, सत्कार समारंभापूर्वी भाजप कार्यालयात पदाधिकारी व कार्यकर्त्यांची बैठक घेण्यात आली. बैठकीत पक्षसंघटना अधिक बळकट करण्याच्या दृष्टीने 'एसआयआर' कामाचा आढावा घेण्यात आला. तसेच पक्षविस्तार आणि आगामी संघटनात्मक उपक्रमांसंदर्भात सविस्तर चर्चा करण्यात आली.

कुलस्वामिनीच्या चरणी अभिनेत्री प्राजक्ता माळी; तुळजाभवानी मंदिरात सहकुटुंब पूजा-अर्चा

कुलस्वामिनीच्या चरणी अभिनेत्री प्राजक्ता माळी; तुळजाभवानी मंदिरात सहकुटुंब पूजा-अर्चा

तुळजापूर, दि. ३१ जुलै :

मराठी चित्रपटसृष्टी आणि दूरचित्रवाणी विश्वातील प्रसिद्ध अभिनेत्री प्राजक्ता माळी हिने कुलस्वामिनी श्री तुळजाभवानी मंदिर येथे सहकुटुंब दर्शन घेत पारंपरिक पद्धतीने पूजा-अर्चा केली. गुरुवारी (दि. ३०) रात्री मुख्य शेजारती (प्रक्षाळपूजा) प्रसंगी ती मंदिरात उपस्थित होती.

दरवर्षीप्रमाणे यंदाही प्राजक्ता माळीने देवीची ओटी भरून कुलधर्म आणि कुलाचार विधीवत पार पाडला. या धार्मिक विधीचे पौरोहित्य भोपे पुजारी स्वराज कदम आणि भोपे पुजारी मंडळाचे अध्यक्ष अमरराजे कदम यांनी केले.

दर्शनानंतर मंदिर संस्थानच्या वतीने अप्पर जिल्हाधिकारी उपेंद्र तामोरे यांच्या हस्ते प्राजक्ता माळी यांचा श्रीफळ, देवीची साडी आणि तुळजाभवानी मातेची प्रतिमा देऊन सत्कार करण्यात आला.

यावेळी प्राजक्ता माळी यांनी देवीच्या दर्शनाचा आनंद व्यक्त करत भाविकांशी संवाद साधला. तुळजापूर मंदिर परिसरात सध्या विकास आराखड्याअंतर्गत विविध कामे सुरू असल्याने भाविकांना काही प्रमाणात गैरसोयीचा सामना करावा लागू शकतो. मात्र, भविष्यात मंदिर अधिक भव्य आणि सुविधायुक्त होण्यासाठी ही कामे आवश्यक असल्याचे सांगत, मंदिर प्रशासनाला सहकार्य करण्याचे आणि मोठ्या संख्येने आई तुळजाभवानीच्या दर्शनासाठी येण्याचे आवाहन त्यांनी केले.

प्राजक्ता माळी यांच्या आगमनामुळे मंदिर परिसरात भाविकांमध्ये उत्साहाचे वातावरण निर्माण झाले होते. त्यांच्या दर्शनासाठी आणि भेटीसाठी अनेक भाविकांनी गर्दी केली.

स्वातंत्र्यानंतर हगलूर तांड्यावर ‘लाल परी’चे आगमन ; एसटी बससेवेचा शुभारंभ; विद्यार्थी, ग्रामस्थांसाठी दिलासादायक निर्णय

स्वातंत्र्यानंतर हगलूर तांड्यावर ‘लाल परी’चे आगमन ; एसटी बससेवेचा शुभारंभ; विद्यार्थी, ग्रामस्थांसाठी दिलासादायक निर्णय

तुळजापूर, दि. ३० :

तुळजापूर तालुक्यातील  हगलूर तांडा येथील ग्रामस्थांची तब्बल पाऊणशे वर्षांची प्रतीक्षा अखेर संपुष्टात आली असून महाराष्ट्र राज्य मार्ग परिवहन महामंडळाची (एसटी) बस सेवा गुरुवारी विधिवत सुरू करण्यात आली. ‘लाल परी’च्या आगमनाने संपूर्ण तांड्यावर उत्साहाचे वातावरण निर्माण झाले असून ग्रामस्थांनी आनंदोत्सव साजरा केला.

ग्रामीण भागातील विद्यार्थ्यांना शिक्षणासाठी सुरक्षित व नियमित प्रवासाची सुविधा उपलब्ध करून देण्याच्या उद्देशाने हा उपक्रम राबविण्यात आला. अनेक वर्षांपासून एसटी सेवेच्या प्रतीक्षेत असलेल्या हगलूर तांड्याला अखेर परिवहन महामंडळाने दिलासा दिल्याने ग्रामस्थांनी समाधान व्यक्त केले.

या उपक्रमाच्या यशस्वी अंमलबजावणीसाठी विभाग नियंत्रक अजय पाटील, विभागीय वाहतूक अधिकारी मथुरा जाधवर, आगार प्रमुख महेश रामपुरे, सुधीर बामणकर व महेश डुकरे यांच्या मार्गदर्शनाखाली नळदुर्गचे वाहतूक नियंत्रक अनिल हांडे व मुकुंद वैद्य यांनी विशेष पुढाकार घेतले. 

त्यांच्या सातत्यपूर्ण पाठपुराव्यामुळे आणि प्रशासनाशी साधलेल्या प्रभावी समन्वयातून ही बससेवा प्रत्यक्षात सुरू झाली.

नवीन बससेवेच्या शुभारंभा निमित्त बसची विधिवत पूजा नळदुर्गच्या नगरसेविका सुमन ठाकूर यांच्या हस्ते करण्यात आली. यावेळी सागर हजारे, बलदेव ठाकूर, जमन ठाकूर यांच्यासह ग्रामस्थ, महिला व मोठ्या संख्येने विद्यार्थी उपस्थित होते.

या मार्गावर चालक एन. आर. रोडे आणि वाहक ए. व्ही. मुगळे सेवा बजावणार असून त्यांच्या माध्यमातून प्रवाशांना नियमित व सुरक्षित प्रवासाची सुविधा मिळणार आहे.

यापूर्वी हगलूर तांड्यातील विद्यार्थ्यांना शाळा व महाविद्यालयात जाण्यासाठी खुप दुरपर्य़त पायी प्रवास करावा लागत होता. आता एसटी सेवा सुरू झाल्याने विद्यार्थ्यांचा वेळ, श्रम आणि खर्च वाचणार असून शिक्षणाचा मार्ग अधिक सुकर झाला आहे. ग्रामस्थांनी या निर्णयाबद्दल महाराष्ट्र राज्य मार्ग परिवहन महामंडळाचे आभार मानले आहेत.

विद्यार्थ्यांच्या चेहऱ्यावर आनंद फुलवणारा कांता चॅरिटेबल ट्रस्टचा सेवाभावी उपक्रम; कंटेकुर येथील जिल्हा परिषद शाळेत विद्यार्थ्यांना मोफत शालेय बॅग व साहित्याचे वितरण

विद्यार्थ्यांच्या चेहऱ्यावर आनंद फुलवणारा कांता चॅरिटेबल ट्रस्टचा सेवाभावी उपक्रम

कंटेकुर येथील जिल्हा परिषद शाळेत विद्यार्थ्यांना मोफत शालेय बॅग व साहित्याचे वितरण

मुरूम, दि. ३० जुलै :

शिक्षणाला प्रोत्साहन देत विद्यार्थ्यांच्या शैक्षणिक वाटचालीला बळ देण्याच्या उद्देशाने कांता चॅरिटेबल ट्रस्टच्या वतीने कंटेकुर (ता. उमरगा) येथील जिल्हा परिषद प्राथमिक शाळेत इयत्ता पहिली ते आठवीच्या सर्व विद्यार्थ्यांना शाळेच्या बॅगा आणि आवश्यक शैक्षणिक साहित्याचे मोफत वाटप करण्यात आले. या उपक्रमामुळे विद्यार्थ्यांच्या चेहऱ्यावर आनंद फुलला असून पालक, शिक्षक आणि ग्रामस्थांनी ट्रस्टच्या सामाजिक बांधिलकीचे कौतुक केले.

मंगळवारी (दि. २९) आयोजित कार्यक्रमात ट्रस्टचे संस्थापक धनराज जाधव व सचिव नूपुर जाधव यांच्या हस्ते विद्यार्थ्यांना शालेय साहित्याचे वितरण करण्यात आले. शिक्षण हा समाजाच्या विकासाचा भक्कम पाया असून कोणताही विद्यार्थी केवळ आर्थिक अडचणीमुळे शिक्षणापासून वंचित राहू नये, या उद्देशातून हा उपक्रम राबविण्यात आल्याचे धनराज जाधव यांनी सांगितले.

यावेळी बोलताना त्यांनी समाजसेवा ही केवळ मदत नसून समाजाप्रती असलेली जबाबदारी असल्याचे अधोरेखित केले. शिक्षण, आरोग्य, शेतकरी सहाय्य, युवकांना प्रोत्साहन आणि विविध सामाजिक उपक्रमांद्वारे गरजूंपर्यंत मदतीचा हात पोहोचविण्याचे कार्य कांता चॅरिटेबल ट्रस्ट सातत्याने करत असल्याचेही त्यांनी नमूद केले.

या उपक्रमामुळे विद्यार्थ्यांना शैक्षणिक साहित्याची मोलाची मदत मिळाली असून शिक्षणाबाबत समाजात सकारात्मक संदेश पोहोचल्याची भावना उपस्थितांनी व्यक्त केली. भविष्यातही अशा सेवाभावी उपक्रमांची परंपरा कायम ठेवावी, अशी अपेक्षाही ग्रामस्थांनी व्यक्त केली.

कार्यक्रमास सरपंच विजयाबाई जमादार, मुख्याध्यापक लक्ष्मीकांत पटणे, केंद्रप्रमुख बबिता महानुर, शालेय व्यवस्थापन समितीच्या उपाध्यक्ष राजश्री निंबर्गे, तंटामुक्ती समितीचे अध्यक्ष कमलाकर पांचाळ, उपाध्यक्ष राम मुडगे, पोलीस पाटील लक्ष्मण पांचाळ यांच्यासह शिक्षक, पालक, ग्रामस्थ आणि विविध क्षेत्रातील मान्यवर मोठ्या संख्येने उपस्थित होते.

कळंब तालुक्याचे ज्येष्ठ नेते विश्वंभर पाटील यांचे निधन ; हसेगाव (के)च्या विकासाला दिली नवी दिशा; राजकीय, सामाजिक क्षेत्रात हळहळ

कळंब तालुक्याचे ज्येष्ठ नेते विश्वंभर पाटील यांचे निधन ; हसेगाव (के)च्या विकासाला दिली नवी दिशा; राजकीय, सामाजिक क्षेत्रात हळहळ

कळंब, दि. ३० जुलै :

 कळंब तालुक्यातील ज्येष्ठ नेते, हसेगाव (के) येथील माजी सरपंच तथा विविध कार्यकारी सेवा सहकारी सोसायटीचे माजी चेअरमन विश्वंभर जनार्धन पाटील यांचे बुधवारी रात्री अकराच्या सुमारास हृदयविकाराच्या झटक्याने निधन झाले. ते ८२ वर्षांचे होते. त्यांच्या निधनाने कळंब तालुक्याच्या राजकीय, सामाजिक व सहकार क्षेत्रात शोककळा पसरली आहे.

विश्वंभर पाटील यांनी तब्बल ३५ वर्षे हसेगाव (के)च्या सरपंचपदाची धुरा सांभाळत गावाच्या विकासाला नवी दिशा दिली. त्यांच्या कार्यकाळात सरकारी दवाखाना, पाणीपुरवठा योजना, भूमिगत गटार व्यवस्था, जिल्हा परिषद शाळेत वृक्षलागवड, पेव्हर ब्लॉक, पेपरलेस ग्रामपंचायत तसेच सीसीटीव्ही यंत्रणा अशा अनेक विकासकामांची प्रभावी अंमलबजावणी करण्यात आली.

गावकऱ्यांच्या सुख-दुःखात नेहमी धावून जाणारे, सर्वसामान्यांच्या अडीअडचणी सोडविणारे लोकाभिमुख नेतृत्व म्हणून त्यांची ओळख होती. कळंब कृषी उत्पन्न बाजार समितीच्या स्थापनेतही त्यांचे महत्त्वपूर्ण योगदान राहिले. तालुक्याच्या राजकीय, सामाजिक, धार्मिक आणि शैक्षणिक क्षेत्रात त्यांनी मोलाची भूमिका बजावली.

ते पद्मश्री शंकर बापू आपेगावकर यांचे पुतणे, तर संदिपान महाराज हसेगावकर यांचे बंधू होते. कृषी उत्पन्न बाजार समितीचे संचालक विलास पाटील व तंटामुक्ती समितीचे अध्यक्ष किरण पाटील यांचे ते वडील होत.

त्यांच्या पश्चात पत्नी प्रभावती विश्वंभर पाटील,

मुली मीरा विष्णू गपाट, सुवर्णा सुबोध सुरवसे, भाऊ, सुना, नातवंडे असा परिवार आहे.

त्यांच्यावर गुरुवारी सकाळी ११ वाजता हसेगाव (के) येथे शोकाकुल वातावरणात अंत्यसंस्कार करण्यात आले. त्यांना पुत्र विलास पाटील व किरण पाटील यांनी मुखाग्नी दिला. यावेळी तालुका व जिल्ह्यातील राजकीय, सामाजिक, शैक्षणिक, धार्मिक आणि सांस्कृतिक क्षेत्रातील मान्यवरांसह हजारो नागरिक उपस्थित होते.

त्यांचे रक्षाविसर्जन शुक्रवारी सकाळी ८ वाजता करण्यात येणार असल्याची माहिती कुटुंबीयांनी दिली.

येडोळा–नळदुर्ग रस्त्याची दुरवस्था; खड्ड्यांमुळे अपघातांचा धोका वाढला ; महिनाभरात दुरुस्तीची ग्रामस्थांची मागणी

येडोळा–नळदुर्ग रस्त्याची दुरवस्था; खड्ड्यांमुळे अपघातांचा धोका वाढला ; महिनाभरात दुरुस्तीची ग्रामस्थांची मागणी

नळदुर्ग, दि. ३० जुलै : 

तुळजापूर तालुक्यातील येडोळा ते नळदुर्ग या प्रमुख मार्गाची दुरवस्था झाल्याने नागरिकांसह विद्यार्थी आणि वाहनचालकांना मोठा त्रास सहन करावा लागत आहे. रस्त्यावर ठिकठिकाणी मोठमोठे खड्डे पडल्याने दुचाकी वाहने घसरून अपघात होण्याचा धोका वाढला असून, तातडीने दुरुस्तीची मागणी ग्रामस्थांकडून करण्यात येत आहे.

येडोळा गावातील नागरिकांच्या दैनंदिन व्यवहारांसाठी नळदुर्ग हे मुख्य व सोयीचे केंद्र आहे. शासकीय कामकाज, बाजारपेठ, आरोग्य सेवा तसेच शालेय व महाविद्यालयीन शिक्षणासाठी नागरिकांना दररोज नळदुर्गला जावे लागते. मात्र, गावापासून नळदुर्गकडे जाणारा सुमारे एक किलोमीटरचा रस्ता अत्यंत खराब झाल्याने प्रवास जीवघेणा ठरत आहे.

विशेषतः पावसाळ्यात रस्त्यावर चिखल होवुन खड्ड्यांमध्ये पाणी साचत असल्याने रस्त्याचा अंदाज येत नाही. त्यामुळे दुचाकी घसरून अपघात होण्याच्या घटना घडत असून वाहनचालकांना मोठी कसरत करावी लागत आहे. याकडे संबंधित जिल्हा परिषद प्रशासनाचे दुर्लक्ष होत असल्याची भावना ग्रामस्थांनी व्यक्त केली आहे.

येडोळा हे लहान गाव असल्याने बहुतांश कामांसाठी नागरिकांना नळदुर्गवरच अवलंबून राहावे लागते. त्यामुळे या मार्गाची तातडीने दुरुस्ती करून नागरिकांना सुरक्षित प्रवासाची सुविधा उपलब्ध करून द्यावी, तसेच येत्या महिनाभरात रस्त्याचे काम हाती घ्यावे, अशी जोरदार मागणी ग्रामस्थांनी केली आहे.

जिल्हाध्यक्षपदाच्या निवडीबद्दल शाहबाज काझी यांचा सत्कार; समर्थकांकडून एमआयएम कार्यालयात अभिनंदन; पुढील वाटचालीस शुभेच्छा

जिल्हाध्यक्षपदाच्या निवडीबद्दल शाहबाज काझी यांचा सत्कार; समर्थकांकडून एमआयएम कार्यालयात अभिनंदन; पुढील वाटचालीस शुभेच्छा

नळदुर्ग, दि. ३० जुलै :

एआयएमआयएमच्या धाराशिव जिल्हाध्यक्षपदी माजी नगराध्यक्ष शाहबाज काझी यांची निवड झाल्याबद्दल त्यांच्या समर्थकांनी नळदुर्ग शहरातील पक्षाच्या कार्यालयात सत्कार करून अभिनंदन केले. यावेळी कार्यकर्त्यांमध्ये उत्साहाचे वातावरण पाहायला मिळाले.

अझर रब्बानी शेख मित्र परिवाराच्या वतीने आयोजित या सत्कार सोहळ्यात शाहबाज काझी यांना पुष्पहार व शाल- घालून  गौरविण्यात आले. यावेळी जाबेर कुरेशी, अली कुरेशी यांच्यासह पक्षाचे पदाधिकारी, कार्यकर्ते व समर्थक  उपस्थित होते.

यावेळी उपस्थितांनी शाहबाज काझी यांच्या राजकीय कारकिर्दीचा गौरव करत जिल्हाध्यक्ष म्हणून पक्ष संघटना अधिक मजबूत करण्यासाठी त्यांच्या नेतृत्वाखाली प्रभावी काम होईल, असा विश्वास व्यक्त केला. शाहबाज काझी यांनी सत्काराबद्दल उपस्थितांचे आभार मानत पक्षाची संघटनात्मक बांधणी अधिक सक्षम करण्यासाठी सर्वांना सोबत घेऊन काम करण्याचा निर्धार व्यक्त केला.

झरेगावच्या दत्त मठात गुरुपौर्णिमेचा भक्तिरंग; 'दासबोध'वर काका महाराजांचे प्रबोधन

झरेगावच्या दत्त मठात गुरुपौर्णिमेचा भक्तिरंग; 'दासबोध'वर काका महाराजांचे प्रबोधन

तुळजापूर, दि. २९ (उमाजी गायकवाड) :

 बार्शी-तुळजापूर मार्गावरील झरेगाव येथील जागृत श्री सद्गुरू दत्त मठात बुधवारी (दि. २९) गुरुपौर्णिमा उत्सव विविध धार्मिक कार्यक्रमांनी आणि भक्तिमय वातावरणात उत्साहात साजरा झाला. 'दिगंबरा दिगंबरा श्रीपाद वल्लभ दिगंबरा' च्या जयघोषाने मंदिर परिसर दुमदुमून गेला.

पहाटेपासूनच भाविकांनी दर्शनासाठी मोठी गर्दी केली होती. श्री दत्त महाराजांच्या मूर्तीला पंचामृत अभिषेक, विशेष पूजाअर्चना, भजन आणि नामस्मरणाने वातावरण भक्तिरसात न्हाऊन निघाले. बालगायिका राजनंदिनी लंगडे व राजमुद्रा लंगडे यांनी सादर केलेल्या सुमधुर भजनांनी भाविकांची मने जिंकली.

दुपारी गुरुवर्य काका महाराज झरेगावकर यांच्या प्रमुख उपस्थितीत झालेल्या प्रवचनात समर्थ रामदास स्वामींच्या 'दासबोध' ग्रंथातील जीवनमूल्ये, गुरु-शिष्य परंपरेचे महत्त्व आणि दत्तभक्तीचे आध्यात्मिक अधिष्ठान यावर सखोल मार्गदर्शन करण्यात आले.

यावेळी बोलताना काका महाराज म्हणाले, "समर्थांचा 'दासबोध' हा केवळ ग्रंथ नसून जीवनाला योग्य दिशा देणारा मार्गदर्शक आहे. सद्गुरूंचे मार्गदर्शन आणि दासबोधातील विचार माणसाला संकटांवर मात करण्याची प्रेरणा देतात."

गुरुपौर्णिमेनिमित्त मंदिर ट्रस्टच्या वतीने भव्य अन्नदान व महाप्रसादाचे आयोजन करण्यात आले. जवळपास २० हजारांहून अधिक भाविकांनी महाप्रसादाचा लाभ घेतला. बार्शी, वैराग, धाराशिव, तुळजापूरसह विविध भागांतून आलेल्या भाविकांनी मंदिर परिसर गजबजून गेला. फुलांची आकर्षक सजावटही भाविकांचे लक्ष वेधून घेत होती.

झरेगाव ग्रामस्थ व मंदिर ट्रस्ट यांच्या संयुक्त विद्यमाने संपूर्ण उत्सव शांततापूर्ण आणि शिस्तबद्ध वातावरणात पार पडला.

चौकट : अध्यात्माचा संदेश

"गुरुविण कोण दाखवी वाट, गुरुविण कोण बुजावी गाठ! 'दासबोध'चा अभ्यास माणसाला प्रपंच आणि परमार्थ या दोन्ही मार्गांवर यशस्वीपणे वाटचाल करण्याची प्रेरणा देतो," असे गुरुवर्य काका महाराज झरेगावकर यांनी सांगितले.

भाविकांची भावना

"जिथे सद्गुरूंची कृपा, तिथे संकटांचे निवारण होते. झरेगावच्या गुरुपौर्णिमा सोहळ्याने भक्ती, अध्यात्म आणि समर्पणाचा सुंदर संगम अनुभवायला मिळाला," अशी भावना स्थानिक भाविक श्रीराम पोटभरे यांनी व्यक्त केली.

नगरपालिकेच्या ढिसाळ कारभाराविरोधात काँग्रेसचा हल्लाबोल; १५ दिवसांत चौकशीचा लेखी शब्द घेऊनच उपोषण स्थगित ,सर्वपक्षीय नेत्यांची एकजूट

नगरपालिकेच्या ढिसाळ कारभाराविरोधात काँग्रेसचा हल्लाबोल; १५ दिवसांत चौकशीचा लेखी शब्द घेऊनच उपोषण स्थगित

सर्वपक्षीय नेत्यांची एकजूट; कचरा, पाणी, रस्ते व कथित भ्रष्टाचाराच्या मुद्द्यावर प्रशासनाला घेरले

नळदुर्ग, दि. २९  जुलै:( अझहर शेख) :

 नळदुर्ग नगरपालिकेच्या ढिसाळ कारभाराविरोधात आणि प्रशासकीय काळातील कथित भ्रष्टाचाराच्या आरोपांवर काँग्रेससह सर्वपक्षीय लोकप्रतिनिधींनी बुधवारी जोरदार हल्लाबोल केला. काँग्रेसचे गटनेते मारुती सुदाम खारवे यांच्या नेतृत्वाखाली नगरपरिषद कार्यालयासमोर बुधवारी सकाळी ११ ते सायंकाळी ५ या वेळेत एकदिवसीय लाक्षणिक उपोषण करण्यात आले. आंदोलनाची तीव्रता वाढताच प्रशासनाने १५ दिवसांत चौकशी करून अहवाल सादर करण्याचे लेखी आश्वासन दिल्यानंतर उपोषण स्थगित करण्यात आले.

शहरातील कचरा व्यवस्थापन, पाणीपुरवठा, रस्त्यांची दुरवस्था आणि प्रशासकीय काळातील कथित अनियमितता या प्रश्नांकडे प्रशासनाचे लक्ष वेधण्यासाठी हे आंदोलन छेडण्यात आले होते. उपोषणस्थळी नागरिकांची मोठी गर्दी झाली होती.

आंदोलकांनी नगरपालिकेसमोर अनेक मागण्या मांडल्या. शहरातील स्वच्छता व्यवस्थेचा बोजवारा उडाल्याचा आरोप करत नियमित स्वच्छता न करणाऱ्या ठेकेदारावर दंडात्मक कारवाई करून त्याला तातडीने काळ्या यादीत टाकावे, अशी मागणी करण्यात आली. गेल्या सहा महिन्यांपासून बंद असलेला डंपिंग ग्राउंडवरील खतनिर्मिती प्रकल्प त्वरित सुरू करावा, अशीही मागणी करण्यात आली.

प्रशासकीय काळात झालेल्या वृक्षलागवडीत मोठ्या प्रमाणावर अनियमितता झाल्याचा आरोप करत या प्रकरणाची जिल्हाधिकाऱ्यांमार्फत विशेष चौकशी समिती (एसआयटी) मार्फत चौकशी करून दोषींवर गुन्हे दाखल करावेत, अशी मागणी आंदोलकांनी केली. तसेच नागरिकांना शुद्ध पिण्याच्या पाण्याचा नियमित पुरवठा करावा, 'अमृत २.०' योजनेची कामे गतीने पूर्ण करून पाईपलाईनसाठी खोदलेले रस्ते तातडीने पूर्ववत करावेत, अशीही मागणी करण्यात आली.

नगरपरिषदेची परवानगी न घेता सौरऊर्जा निर्मितीसाठी उभारण्यात आलेल्या आवाडा कंपनीच्या टॉवरची चौकशी करून दंडात्मक कारवाई करावी, तसेच पारस कंपनीने अपूर्ण ठेवलेल्या विकासकामांची मुदतवाढ रद्द करून कंपनीला काळ्या यादीत टाकावे, अशी मागणीही करण्यात आली.

आंदोलनाची दखल घेत मुख्याधिकाऱ्यांनी,व भाजपचे नगरसेवक दत्तात्रय दासकर, तानाजी जाधव, शशिकांत पुदाले, यांनी उपोषणस्थळी येऊन गटनेते तथा नगरसेवक मारुती  खारवे, उपगटनेते आकाश कुलकर्णी,  सुधीर पोतदार, इमाम शेख, गफूर कुरेशी,  कमलबाई गायकवाड, मन्नाबी कुरेशी, जुलेखाबेगम इनामदार, सईद बागवान,आदी 

आंदोलकांशी चर्चा केली. प्रशासकीय काळातील कामांच्या चौकशीसाठी मुख्याधिकाऱ्यांच्या अध्यक्षतेखाली स्वतंत्र चौकशी समिती गठित करण्यात येईल आणि १५ दिवसांच्या आत अहवाल सादर करून संबंधित प्रश्नांवर कार्यवाही केली जाईल, असे लेखी आश्वासन प्रशासनाने दिले. त्यानंतर आंदोलकांनी उपोषण स्थगित करण्याची घोषणा केली.

काँग्रेसचे जिल्हाध्यक्ष उमेश राजेनिंबाळकर, माजी जिल्हाध्यक्ष अँड धीरज पाटील, तालुका अध्यक्ष अँड अरविंद बेडगे, शिंदे सेनेचे शहापुर जि. प.सदस्य सुनिल बनसोडे,माजी नगरसेवक नितिन कासार, अमृत पुदाले, उद्धव ठाकरे सेनेचे माजी उपजिल्हा प्रमुख कमलाकर चव्हाण, तालुका उपप्रमुख सरदारसिंग ठाकुर, नळदुर्ग शहर प्रमुख संतोष पुदाले, संदीप सुरवसे, खालेद इनामदार यांच्यासह अनेकांनी उपोषणस्थळी  आंदोलनाला भेट देत पाठिंबा दिला.

"मागण्या पूर्ण न झाल्यास तीव्र आंदोलन"

"नागरिकांच्या मूलभूत हक्कांसाठीचा संघर्ष सुरूच राहील. प्रशासनाने १५ दिवसांत ठोस कारवाई केली नाही, तर यापेक्षाही तीव्र आंदोलन छेडण्यात येईल," असा इशारा काँग्रेसचे गटनेते मारुती सुदाम खारवे यांनी दिला.

आता प्रशासनाने दिलेल्या लेखी आश्वासनाची प्रत्यक्ष अंमलबजावणी होते का आणि १५ दिवसांत चौकशी अहवाल सादर होतो का, याकडे नळदुर्गकरांचे लक्ष लागले आहे.

 

गुरुपौर्णिमेच्या शुभमुहूर्तावर मिल रोलर पूजन; श्री सिध्दीविनायक परिवाराचे कारखाने गळीत हंगामासाठी सज्ज

गुरुपौर्णिमेच्या शुभमुहूर्तावर मिल रोलर पूजन; श्री सिध्दीविनायक परिवाराचे कारखाने गळीत हंगामासाठी सज्ज

देवकुरुळी, दि. २९ जुलै :

गुरुपौर्णिमेच्या पवित्र आणि मंगलमय मुहूर्तावर श्री सिध्दीविनायक अॅग्रीटेक इंडस्ट्रीज लिमिटेड, देवकुरुळी (युनिट क्र. १) आणि श्री सिध्दीविनायक ग्रीनटेक इंडस्ट्रीज लिमिटेड, खामसवाडी (युनिट क्र. २) या दोन्ही कारखान्यांमध्ये हंगाम २०२६-२७ च्या मिल रोलर पूजनाचा विधीवत समारंभ उत्साहात पार पडला. या पूजन सोहळ्याने आगामी गळीत हंगामाच्या तयारीला औपचारिक सुरुवात झाली.

श्री सिध्दीविनायक परिवाराचे संस्थापक दत्ताभाऊ कुलकर्णी यांच्या मातोश्री श्रीमती मीनाताई कुलकर्णी यांच्या हस्ते विधिवत पूजन करण्यात आले. यावेळी दत्ताभाऊ कुलकर्णी यांच्या पत्नी सौ. दिपाली कुलकर्णी यांच्यासह बालाजी कोरे, दिनेश कुलकर्णी, प्रतिक देवळे, गणेश कामटे, राजकुमार जाधव, अरविंद गोरे, मंगेश कुलकर्णी, प्रथमेश आवटे, विकास उबाळे उपस्थित होते.

तसेच कारखान्यातील विभागप्रमुख, अधिकारी, कर्मचारी, ऊस वाहतूकदार आणि शेतकरी बांधव मोठ्या संख्येने या समारंभास उपस्थित राहिले. धार्मिक वातावरणात संपन्न झालेल्या या सोहळ्यामुळे कारखाना परिसरात उत्साहाचे वातावरण निर्माण झाले होते.

यावेळी आगामी गळीत हंगाम यशस्वी करण्यासाठी सर्व संबंधित घटकांनी परस्पर समन्वय, शिस्त आणि कार्यक्षमतेने काम करण्याचे आवाहन करण्यात आले. शेतकरी हिताला सर्वोच्च प्राधान्य देत आधुनिक तंत्रज्ञान, सक्षम व्यवस्थापन आणि गुणवत्तापूर्ण सेवांच्या बळावर हंगाम २०२६-२७ विक्रमी आणि यशस्वी करण्याचा निर्धार यावेळी व्यक्त करण्यात आला. कारखान्याच्या प्रगतीत शेतकरी, कर्मचारी आणि ऊस वाहतूकदार यांचे योगदान महत्त्वाचे असल्याचेही उपस्थितांनी नमूद केले.

३५ वर्षांनी रंगला बीएस्सी फिशरी बॅचचा स्नेहमेळावा; सेवापूर्ती निमित्त डॉ. दस्तगीर मुजावर यांचा गौरव

३५ वर्षांनी रंगला बीएस्सी फिशरी बॅचचा स्नेहमेळावा; सेवापूर्ती निमित्त डॉ. दस्तगीर मुजावर यांचा गौरव

नळदुर्ग, दि. २९ जुलै :

कला, विज्ञान व वाणिज्य महाविद्यालय, नळदुर्ग येथील सन १९९०-९१ च्या बीएस्सी (मत्स्यशास्त्र) शाखेतील माजी विद्यार्थ्यांचा तब्बल ३५ वर्षांनंतर स्नेहमेळावा उत्साहात पार पडला. दीर्घ काळानंतर एकत्र आलेल्या वर्गमित्रांनी महाविद्यालयीन आठवणींना उजाळा देत भावनिक क्षण अनुभवले. यावेळी सेवापूर्ती निमित्त नेत्रतज्ज्ञ डॉ. दस्तगीर मुजावर यांचा मित्रपरिवाराच्या वतीने विशेष सत्कार करण्यात आला.

बीएस्सी फिशरी ग्रुपमधील सुमारे २० वर्गमित्रांनी आयोजित केलेल्या या "गेट-टुगेदर" कार्यक्रमात जुन्या आठवणी, मैत्रीचे बंध आणि महाविद्यालयीन जीवनातील विविध प्रसंगांना उजाळा मिळाला. ३५ वर्षांच्या कालावधीनंतर अनेक मित्रांची प्रत्यक्ष भेट होत असल्याने सुरुवातीला काहींना एकमेकांची ओळखही पटत नव्हती. मात्र काही क्षणांतच जुन्या आठवणींनी वातावरण भावूक आणि आनंदमय झाले.

यावेळी उपस्थितांनी मैत्रीचे महत्त्व अधोरेखित करत, "जगाच्या पाठीवर अनेक माणसे भेटतात; पण रोज भेट न होताही मनापासून आठवण काढणारे मित्र लाभणे हे भाग्याचे लक्षण आहे," अशा भावना व्यक्त केल्या.

खानापूर (ता. तुळजापूर) येथील वर्गमित्र तथा लोहारा येथे गेली ३० वर्षे नेत्रतज्ज्ञ म्हणून उल्लेखनीय सेवा बजावणारे डॉ. दस्तगीर मुजावर यांच्या सेवापूर्ती निमित्त मित्रपरिवाराच्या वतीने त्यांचा शाल, श्रीफळ व स्मृतिचिन्ह देऊन यथोचित गौरव करण्यात आला.

या स्नेहमेळाव्यास डॉ. दस्तगीर मुजावर, डॉ. दीपक जगदाळे, डॉ. सिद्धेश्वर बाड, ॲड. सयाजी शिंदे, वसंत वडगावे, राजेंद्र काळप्पा, महेश कदम, मिलिंद कुलकर्णी, सुधीर पाटील, सोमनाथ गायकवाड, राहुल लिमये, उद्धव कोठे, किसन साखरे, धनराज बरबडे, संजय पंडित, डॉ. आनंद काटकर यांच्यासह अनेक वर्गमित्र उपस्थित होते.

कार्यक्रमाचे प्रास्ताविक डॉ. सिद्धेश्वर बाड यांनी केले. सूत्रसंचालन डॉ. प्रसन्न कंदले यांनी तर आभार एस. के. गायकवाड यांनी  मानले. कार्यक्रमाचा समारोप जुन्या आठवणींना उजाळा देत आणि मैत्रीचे बंध अधिक दृढ करण्याच्या निर्धाराने झाला.

वाढत्या चोरींनी पुजारी नगरवासीयांमध्ये धास्ती,पोलीस गस्त वाढविण्याची नागरिकांची मागणी; तुळजापूर पोलीस ठाण्यात निवेदन सादर

वाढत्या चोरींनी पुजारी नगरवासीयांमध्ये धास्ती, पोलीस गस्त वाढविण्याची नागरिकांची मागणी; तुळजापूर पोलीस ठाण्यात निवेदन सादर

तुळजापूर, दि. २९ जुलै: 

शहरातील नळदुर्ग रोडलगतच्या पुजारी नगर परिसरात सातत्याने वाढत असलेल्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे. या घटनांना आळा घालण्यासाठी नियमित पोलीस गस्त वाढवून प्रभावी प्रतिबंधात्मक उपाययोजना राबविण्याची मागणी परिसरातील नागरिकांनी बुधवारी तुळजापूर पोलीस ठाण्याचे पोलीस निरीक्षक यांच्याकडे निवेदनाद्वारे केली.

निवेदनात म्हटले आहे की, पुजारी नगर सोसायटीमध्ये सुमारे १५० हून अधिक रो-हाऊस व निवासी घरे असून मोठ्या संख्येने नागरिक वास्तव्यास आहेत. गेल्या काही महिन्यांपासून परिसरात घरफोडीचे प्रयत्न, दुचाकी चोरी, घरासमोरील साहित्य, विद्युत उपकरणे तसेच इतर मौल्यवान वस्तू चोरीला जाण्याच्या घटना सातत्याने घडत आहेत. त्यामुळे नागरिकांमध्ये असुरक्षिततेची भावना वाढीस लागली आहे.

विशेषतः रात्रीच्या वेळी संशयित व्यक्तींचा वाढलेला वावर चिंतेचा विषय ठरत असून, ज्येष्ठ नागरिक, महिला आणि लहान मुलांच्या सुरक्षेचा प्रश्नही ऐरणीवर आला आहे. चोरीच्या वाढत्या घटनांमुळे संपूर्ण परिसरात भीतीचे वातावरण निर्माण झाल्याने पोलीस प्रशासनाने तातडीने लक्ष घालावे, अशी मागणी नागरिकांनी केली आहे.

पुजारी नगरसह हनुमान नगर, मस्के प्लॉटिंग, समता नगर, हेलिपॅड परिसर, श्रीराम नगर, शहाणे मंगल कार्यालय परिसर, फिल्टर टाकी परिसर, सहयोग नगर, छत्रपती शिवाजी नगर, विश्वनाथ नगर, हनुमान टेकडी, सप्ताळ नगर, अजिंक्य कॉलनी आणि ओम गणेश कॉलनी या भागांत नियमित पोलीस गस्त वाढविणे, रात्री विशेष गस्त पथके तैनात करणे, संशयित व्यक्तींवर बारकाईने लक्ष ठेवणे तसेच आवश्यक त्या ठिकाणी सीसीटीव्ही यंत्रणा उभारण्यासाठी मार्गदर्शन करण्याची मागणी निवेदनात करण्यात आली आहे.

नागरिकांच्या या निवेदनाची दखल घेऊन तातडीने प्रभावी कार्यवाही करावी, जेणेकरून परिसरात सुरक्षिततेची भावना निर्माण होईल, अशी अपेक्षा नागरिकांनी व्यक्त केली.

यावेळी उपनगराध्यक्ष रामचंद्र रोचकरी, प्रक्षाळ मंडळाचे अध्यक्ष विशाल रोचकरी, पुजारी नगर फाऊंडेशनचे अध्यक्ष गणेश पुजारी, उमाजी गायकवाड, श्रावण पवार, सिद्धेश्वर इंगोले, विकास कोळगे, सोमनाथ पुजारी, अनिल आगलावे यांच्यासह परिसरातील अनेक नागरिक उपस्थित होते.

धाराशिवमध्ये गुटखा तस्करीवर पोलिसांचा मोठा घाव; छाप्यात १७ लाख ८२ हजाराचा प्रतिबंधित गुटखा व दोन वाहने जप्त; एकाला रंगेहात अटक

धाराशिवमध्ये गुटखा तस्करीवर पोलिसांचा मोठा घाव; छाप्यात १७ लाख ८२ हजाराचा प्रतिबंधित गुटखा व दोन वाहने जप्त; एकाला रंगेहात अटक

धाराशिव, दि. २९ जुलै :

 धाराशिव शहरात अवैध गुटखा तस्करीविरोधात पोलिसांनी धडक कारवाई करत तब्बल १७ लाख ८२ हजार २९७ रुपयांचा प्रतिबंधित गुटखा, पानमसाला आणि दोन चारचाकी वाहने जप्त केली. या कारवाईत एका आरोपीला रंगेहात ताब्यात घेण्यात आले असून त्याच्याविरुद्ध अन्न सुरक्षा व अन्न व औषध प्रशासनाशी संबंधित कायद्यांनुसार गुन्हा दाखल करण्यात आला आहे.

पोलिसांनी दिलेल्या माहितीनुसार, दि. २७ जुलै रोजी सायंकाळी ६ वाजण्याच्या सुमारास परीक्षावधीन पोलीस उपअधीक्षक अमोल मोहिते यांना गुप्त माहिती मिळाली होती. शम्स चौक परिसरात टोयोटा इनोव्हा कारमधून आणलेला अवैध गुटखा दुसऱ्या वाहनात भरून बेकायदेशीर विक्रीसाठी रवाना करण्यात येणार असल्याची माहिती मिळताच पोलिसांनी तातडीने सापळा रचला.

गाझी स्कूल परिसरात अचानक छापा टाकला असता सलमान गुलाम शेख (रा. इंदापूर, ता. वाशी, जि. धाराशिव) हा एमएच-२४-व्ही-१६४२ क्रमांकाच्या इनोव्हा कारमधून गुटख्याची पोती काढून एमएच-१२-एसएफ-४०७० क्रमांकाच्या महिंद्रा पिकअपमध्ये भरत असताना रंगेहात आढळून आला.

झडतीदरम्यान महाराष्ट्र शासनाने प्रतिबंधित केलेला बादशहा, गोवा, विमल, डायरेक्टर स्पेशल, राज निवास, V1 तंबाखू, प्रिमियम जर्दा, शॉट लक्झरी च्युइंग टोबॅको आदी विविध ब्रँडचा गुटखा, पानमसाला व तंबाखू मोठ्या प्रमाणात जप्त करण्यात आला. तसेच वाहतुकीसाठी वापरण्यात आलेली इनोव्हा व महिंद्रा पिकअप अशी दोन वाहनेही पोलिसांनी ताब्यात घेतली. जप्त मुद्देमालाची एकूण किंमत १७ लाख ८२ हजार २९७  इतकी आहे.

या प्रकरणी धाराशिव शहर पोलीस ठाण्यात आरोपीविरुद्ध अन्न सुरक्षा व मानके अधिनियम तसेच अन्न व औषध प्रशासनाशी संबंधित कायद्यांनुसार गुन्हा दाखल करण्यात आला असून पुढील तपास सुरू आहे.

ही कारवाई पोलीस अधीक्षक रितू खोखर व अपर पोलीस अधीक्षक सचिन पांडकर यांच्या मार्गदर्शनाखाली परीक्षावधीन पोलीस उपअधीक्षक अमोल मोहिते, पोलीस निरीक्षक कुमार दराडे, पोलीस उपनिरीक्षक अक्षय डिघोळे तसेच त्यांच्या पथकाने यशस्वीरीत्या पार पाडली.

नागरी प्रश्नांवर काँग्रेस आक्रमक; कथित गैरव्यवहारांच्या चौकशीसाठी आज लाक्षणिक उपोषण

नागरी प्रश्नांवर काँग्रेस आक्रमक; कथित गैरव्यवहारांच्या चौकशीसाठी आज लाक्षणिक उपोषण

नळदुर्ग, दि. २९ जुलै :

नळदुर्ग शहरातील वाढत्या नागरी समस्या, रखडलेली विकासकामे आणि नगरपालिकेच्या प्रशासनाच्या कार्यकाळात झालेल्या कथित गैरव्यवहारांची चौकशी करण्याच्या मागणीसाठी काँग्रेसच्या नगरसेवकांनी आज (बुधवारी) नगरपालिकेसमोर एकदिवसीय लाक्षणिक उपोषण करण्याचा निर्णय घेतला आहे.

शहरातील नागरिकांच्या मूलभूत सुविधांबाबत वारंवार प्रश्न उपस्थित करूनही प्रशासनाकडून अपेक्षित प्रतिसाद मिळत नसल्याचा आरोप नगरसेवकांनी केला आहे. यापूर्वी नगरपरिषदेच्या सर्वसाधारण सभांमध्ये तसेच विविध निवेदनांच्या माध्यमातून अनेकदा प्रश्न मांडण्यात आले. मात्र त्यावर ठोस उपाययोजना न झाल्याने आंदोलनाचा मार्ग स्वीकारावा लागत असल्याचे त्यांनी स्पष्ट केले.

उपोषणाच्या माध्यमातून नगरसेवकांनी प्रशासनासमोर अनेक महत्त्वाच्या मागण्या मांडल्या आहेत. त्यामध्ये घनवन वृक्षलागवड योजनेतील कथित भ्रष्टाचाराची सखोल चौकशी करून संबंधितांवर कारवाई करणे, घनकचरा व्यवस्थापनाच्या ठेकेदाराचा करार रद्द करून सक्षम पर्यायी व्यवस्था उभी करणे, शहरात अवादा कंपनीने उभारलेल्या कथित बेकायदेशीर टॉवरची चौकशी करून दंडासह रक्कम वसूल करणे, तसेच नगरपालिकेच्या तांत्रिक सल्लागाराला देण्यात आलेल्या कामांची तपासणी करणे या मागण्यांचा समावेश आहे.

याशिवाय, अमृत २.० पाणीपुरवठा योजना तातडीने पूर्ण करून शहरात नियमित पाणीपुरवठा सुरू करावा, तसेच या योजनेसाठी खोदण्यात आलेले रस्ते त्वरित दुरुस्त करून पिचिंगची कामे पूर्ण करावीत, अशीही मागणी करण्यात आली आहे.

या आंदोलनाकडे शहरवासीयांसह राजकीय वर्तुळाचे लक्ष लागले असून, प्रशासन या मागण्यांवर कोणती भूमिका घेते याकडे सर्वांचे लक्ष केंद्रित झाले आहे.

केंद्रीय प्राथमिक शाळेतील शिष्यवृत्तीधारक विद्यार्थ्यांचा गुणगौरव; गुणवंतांना कौतुकाची थाप; पालक-शिक्षकांच्या उपस्थितीत सत्कार सोहळा

केंद्रीय प्राथमिक शाळेतील शिष्यवृत्तीधारक विद्यार्थ्यांचा गुणगौरव; गुणवंतांना कौतुकाची थाप; पालक-शिक्षकांच्या उपस्थितीत सत्कार सोहळा

नळदुर्ग, दि. २८ जुलै :

नळदुर्गच्या जिल्हा परिषद केंद्रीय प्राथमिक शाळेतील इयत्ता चौथी व पाचवी शिष्यवृत्ती परीक्षेत यश संपादन केलेल्या गुणवंत विद्यार्थ्यांचा मंगळवारी उत्साहपूर्ण वातावरणात गुणगौरव सोहळा पार पडला. विद्यार्थ्यांच्या यशाचे कौतुक करत त्यांना पुढील शैक्षणिक वाटचालीसाठी शुभेच्छा देण्यात आल्या.

यावेळी इयत्ता पाचवीतील ओवेस शेख, तृष्णा सुरवसे, विद्या पन्हाळकर व रोशनी राठोड तसेच इयत्ता चौथीतील आदिल इनामदार आणि क्रांतिवीर बागडे या विद्यार्थ्यांचा बीट नळदुर्ग-अणदूरचे विस्ताराधिकारी राऊत यांच्या हस्ते सत्कार करण्यात आला.

कार्यक्रमास शालेय व्यवस्थापन समितीचे अध्यक्ष संतोष पुदाले, उपाध्यक्षा कविता कलशेट्टी, सदस्या मर्जिना शेख यांची प्रमुख उपस्थिती होती. यावेळी गुणवंत विद्यार्थी, त्यांचे पालक, शिक्षक व ग्रामस्थ मोठ्या संख्येने उपस्थित होते.

विस्ताराधिकारी राऊत यांनी विद्यार्थ्यांच्या यशाचे अभिनंदन करत सातत्यपूर्ण अभ्यास, जिद्द आणि मेहनतीच्या बळावर भविष्यातही मोठे यश संपादन करण्याचे आवाहन केले. तसेच शाळेच्या शैक्षणिक गुणवत्तेचे कौतुक करून विद्यार्थ्यांना घडविण्यासाठी परिश्रम घेणाऱ्या शिक्षकांचे विशेष अभिनंदन केले. उपस्थित मान्यवरांनीही गुणवंत विद्यार्थ्यांना पुढील शैक्षणिक वाटचालीसाठी शुभेच्छा देत अशाच यशाची परंपरा कायम ठेवण्याचा विश्वास व्यक्त केला.

शासनाच्या योजनांचा लाभ थेट लाभार्थ्यांच्या हाती; नळदुर्गच्या नागरिकांना लाखोंच्या धनादेशांचे वितरण

शासनाच्या योजनांचा लाभ थेट लाभार्थ्यांच्या हाती; नळदुर्गच्या नागरिकांना लाखोंच्या धनादेशांचे वितरण

नळदुर्ग, दि. २८ जुलै :

तुळजापूर येथे आयोजित 'छत्रपती शिवाजी महाराज महसूल समाधान शिबिरा'त  मंगळवारी नळदुर्ग शहरातील विविध शासकीय योजनांच्या लाभार्थ्यांना आमदार राणाजगजितसिंह पाटील व नगराध्यक्ष बसवराज धरणे यांच्या हस्ते लाखो रुपयांच्या धनादेशांचे वितरण करण्यात आले. शासनाच्या विविध लोककल्याणकारी योजनांचा लाभ थेट पात्र नागरिकांपर्यंत पोहोचविण्याच्या उद्देशाने आयोजित या शिबिराला उत्स्फूर्त प्रतिसाद मिळाला.

कार्यक्रमास अप्पर जिल्हाधिकारी ज्योती पाटील, उपविभागीय अधिकारी ओंकार कुलकर्णी, तहसीलदार अरविंद बोळंगे, अप्पर तहसीलदार प्रमोद गायकवाड, पंचायत समिती सभापती विक्रमसिंह देशमुख यांच्यासह विविध विभागांचे अधिकारी व पदाधिकारी उपस्थित होते.

मुख्यमंत्री देवेंद्र फडणवीस यांच्या वाढदिवसानिमित्त तसेच दिवंगत उपमुख्यमंत्री अजित पवार यांच्या जयंतीनिमित्त महसूल मंत्री चंद्रशेखर बावनकुळे यांच्या संकल्पनेतून तुळजापूर विधानसभा मतदारसंघस्तरीय 'छत्रपती शिवाजी महाराज महसूल समाधान शिबिर' आयोजित करण्यात आले होते.

यावेळी नळदुर्ग येथील बिस्मिल्ला महिला बचत गटाला मंजूर झालेल्या कर्जापोटी १० लाखांचा धनादेश गटाच्या सचिव सईदा बाबुलाल शेख यांच्याकडे सुपूर्द करण्यात आला. तसेच रमाई आवास योजनेअंतर्गत लाभार्थी नंदा संतोष कोकणचे यांना २.५० लाखांचा धनादेश देण्यात आला. याशिवाय नगरपरिषदेचे कर्मचारी अण्णा जाधव, शहाजी येडगे आणि सौ. मयुरी जाधव यांना प्रधानमंत्री आवास योजनेअंतर्गत प्रत्येकी २.५० लाखांचे धनादेश वितरित करण्यात आले.

याप्रसंगी समुदाय संघटक राणुबाई सपकाळ, रेश्मा राठोड, वहिदा सौदागर यांच्यासह लाभार्थी  उपस्थित होते.

यावेळी बोलताना आमदार राणाजगजितसिंह पाटील म्हणाले, "'शासन आपल्या दारी' ही संकल्पना अशा महसूल समाधान शिबिरांमधून प्रत्यक्षात साकार होत आहे. शासनाच्या लोककल्याणकारी योजनांचा लाभ समाजातील शेवटच्या घटकापर्यंत प्रभावीपणे पोहोचत असून, त्यामुळे नागरिकांचा प्रशासनावरील विश्वास अधिक दृढ होत आहे."

आई-वडील व जामीनदाराच्या बनावट सह्यांवर ६ लाखांचे कर्ज?; तत्कालीन बँक अधिकाऱ्यासह तिघांविरुद्ध गुन्हा

 आई-वडील व जामीनदाराच्या बनावट सह्यांवर ६ लाखांचे कर्ज?; तत्कालीन बँक अधिकाऱ्यासह तिघांविरुद्ध गुन्हा

नळदुर्ग, दि. २८ जुलै :

आई-वडील तसेच जामीनदाराच्या कथित बनावट सह्यांच्या आधारे महाराष्ट्र ग्रामीण बँकेच्या नळदुर्ग शाखेतून तब्बल ६ लाखांचे कर्ज उचलून फसवणूक केल्याप्रकरणी दोघा भावांसह तत्कालीन शाखा अधिकाऱ्याविरुद्ध नळदुर्ग पोलीस ठाण्यात गुन्हा दाखल करण्यात आला आहे. या घटनेमुळे बँकिंग व्यवहारातील सुरक्षिततेबाबत प्रश्नचिन्ह निर्माण झाले आहे.

याप्रकरणी आनंद माणिकराव चिनगुंडे (वय ५३, रा. नंदगाव, ता. तुळजापूर) यांनी दिलेल्या फिर्यादीवरून हिरालाल माणिकराव चिनगुंडे, बसवंत माणिकराव चिनगुंडे (दोघे रा. नंदगाव, ता. तुळजापूर) तसेच महाराष्ट्र ग्रामीण बँकेच्या नळदुर्ग शाखेचे तत्कालीन शाखा अधिकारी पंडित आसाराम जुकते यांच्याविरुद्ध गुन्हा नोंदविण्यात आला आहे.

फिर्यादीनुसार, ३१ मे २०२५ रोजी सकाळी सुमारे ११.३० वाजता फिर्यादीचे वडील माणिकराव चिनगुंडे हे आजारी असताना आणि आई इंदुमती चिनगुंडे यांचे निधन झालेले असतानाही त्यांच्या तसेच जामीनदाराच्या कथित खोट्या व बनावट सह्या करण्यात आल्या. या सह्यांच्या आधारे कर्ज खात्याचे नूतनीकरण करून ६ लाखांचे कर्ज मंजूर करण्यात आले व फिर्यादीची फसवणूक झाल्याचा आरोप करण्यात आला आहे.

या प्रकरणी आनंद चिनगुंडे यांनी २७ जुलै २०२६ रोजी दिलेल्या प्रथम खबरावरून नळदुर्ग पोलीस ठाण्यात भारतीय न्याय संहिता (बीएनएस) कलम ३१८(४), ३३६(३), ३३९, ३१६(५) व ३(५) अन्वये गुन्हा दाखल करण्यात आला आहे. या प्रकरणाचा पुढील तपास नळदुर्ग पोलीस करीत आहेत.

काँग्रेसच्या नगराध्यक्षापासून एआयएमआयएमच्या जिल्हाध्यक्षपदापर्यंत;शाहबाज काझींच्या राजकीय प्रवासाला नवी दिशा

काँग्रेसच्या नगराध्यक्षापासून एआयएमआयएमच्या जिल्हाध्यक्षपदापर्यंत;

शाहबाज काझींच्या राजकीय प्रवासाला नवी दिशा

नळदुर्ग, दि. २८ जुलै :

एआयएमआयएम पक्षाच्या धाराशिव  जिल्हाध्यक्षपदी नळदुर्ग येथील माजी नगराध्यक्ष शाहबाज काझी यांची नियुक्ती करण्यात आली आहे. पक्षाचे महाराष्ट्र प्रदेशाध्यक्ष तथा माजी खासदार इम्तियाज जलील यांनी सोशल मिडियावर या नियुक्तीची घोषणा करत काझी यांना पुढील राजकीय वाटचालीस शुभेच्छा दिल्या.

या नियुक्तीमुळे नळदुर्ग शहरातून प्रमुख राजकीय पक्षाचा जिल्हाध्यक्ष होण्याचा मान प्रथमच शाहबाज काझी यांना मिळाला आहे. काँग्रेस पक्षातील निष्ठावंत कार्यकर्त्यापासून एआयएमआयएमच्या जिल्हाध्यक्ष पदापर्यंतचा त्यांचा राजकीय प्रवास विशेष ठरला आहे.

शाहबाज काझी यांनी १९९२ मध्ये काँग्रेसच्या तिकिटावर नळदुर्ग नगरपरिषदेत प्रथमच नगरसेवक म्हणून निवडणूक जिंकली. त्यानंतर सलग सहा कार्यकाळ नगरसेवक म्हणून त्यांनी जनतेचे प्रतिनिधित्व केले. याच काळात त्यांनी एक वर्ष नगराध्यक्षपदाची धुराही यशस्वीपणे सांभाळली.

गेल्या नगरपालिका निवडणुकीपूर्वी त्यांनी एआयएमआयएममध्ये प्रवेश केला. पक्षाकडून नगराध्यक्षपदाची उमेदवारी मिळाल्यानंतर त्यांनी निवडणूक लढविली. अत्यंत चुरशीच्या झालेल्या या निवडणुकीत त्यांचा निसटता पराभव झाला. सुमारे चार हजार मते मिळवत ते दुसऱ्या क्रमांकावर राहिले आणि शहरातील आपला जनाधार कायम असल्याचे सिद्ध केले.

राजकीय कारकिर्दीत त्यांनी काँग्रेस अल्पसंख्याक विभागाचे प्रदेश सचिव, दक्षिण सोलापूरचे निरीक्षक तसेच जिल्हा काँग्रेस कमिटीचे उपाध्यक्ष म्हणून जबाबदाऱ्या सांभाळल्या. याशिवाय संजय गांधी निराधार योजनेच्या तालुका समितीवर सदस्य म्हणून काम केले आहे. तुळजाभवानी साखर कारखान्याचे संचालक म्हणूनही त्यांनी काम पाहिले असून सध्या बालाघाट शिक्षण संस्थेचे सहसचिव म्हणून कार्यरत आहेत.

त्यांच्या या निवडीबद्दल पक्षाचे राष्ट्रीय अध्यक्ष तथा खासदार असदुद्दीन ओवैसी, छत्रपती संभाजीनगर महानगरपालिकेचे विरोधी पक्षनेते समीर साजिद बिल्डर, धाराशिवचे नगरसेवक अझर मुजावर, अझहर शेख यांच्यासह पक्षाच्या पदाधिकारी व कार्यकर्त्यांनी अभिनंदन करून पुढील वाटचालीस शुभेच्छा दिल्या आहेत.

वन्यजीव जगतील तरच मानव जीवन वाचणार (आंतरराष्ट्रीय व्याघ्र दिन विशेष – २९ जुलै २०२६) लेखक - डॉ. प्रितम भि. गेडाम

  

वन्यजीव जगतील तरच मानव जीवन वाचणार (आंतरराष्ट्रीय व्याघ्र दिन विशेष – २९ जुलै २०२६)

 लेखक - डॉ. प्रितम भि. गेडाम

पृथ्वीवरील प्रत्येक जीव आपल्या स्वतंत्र अस्तित्वाने आणि वैशिष्ट्यपूर्ण भूमिकेद्वारे नैसर्गिक समतोल राखण्यासाठी महत्त्वपूर्ण योगदान देतो. अन्नसाखळीतील प्रत्येक घटक आवश्यक आहे, कारण एखाद्या एका जीवाचेही असंतुलन संपूर्ण परिसंस्थेवर परिणाम करू शकते. आजच्या काळात मनुष्याला वगळता इतर सर्व जीव निसर्गसंवर्धनात आपली भूमिका पार पाडत आहेत. स्वच्छ हवा, शुद्ध पाणी आणि पुरेसे अन्न हे सर्वांच्या जीवनासाठी आवश्यक असून ते फक्त पर्यावरण निरोगी आणि संतुलित असेल तरच उपलब्ध होऊ शकते. सूक्ष्मजीव माती सुपीक बनवतात, तर पक्षी आणि वन्यप्राणी बियांचा प्रसार करून नवीन वनस्पती व जंगलांच्या वाढीस मदत करतात. जंगलातील जीव सुरक्षित राहिले तर जंगल हिरवेगार राहते, ऋतुचक्र संतुलित राहते, जलस्रोत सुरक्षित राहतात आणि नैसर्गिक संसाधनांचे संरक्षण होते. त्यामुळे प्रदूषण कमी होते, रोगांचा धोका घटतो आणि जीवनमान अधिक चांगले होते. प्रत्यक्षात वन्यजीव हे निसर्गाचे खरे रक्षक आहेत, कारण पर्यावरणीय समतोल राखण्यात त्यांची अत्यंत महत्त्वाची भूमिका असते. मनुष्याशिवाय निसर्ग स्वतःला पुन्हा वेगाने सावरू शकतो; परंतु निसर्गाशिवाय मानवजीवनाची कल्पनाही अशक्य आहे. त्यामुळे निसर्ग आणि वन्यजीवांचे संरक्षण करणे ही आपली सर्वात मोठी जबाबदारी आहे.

प्रत्येक सजीवाला आपल्या नैसर्गिक अधिवासात जगण्याचा अधिकार आहे. मात्र, गेल्या काही दशकांमध्ये वाढलेल्या मानवी हस्तक्षेपामुळे वन्यजीव आणि मानव यांच्यातील संघर्ष मोठ्या प्रमाणात वाढला आहे. या संघर्षात दोघांनाही जीवितहानीचा सामना करावा लागतो. स्वातंत्र्यपूर्व काळात राजे-महाराजे आणि इंग्रजांनी मोठ्या प्रमाणावर शिकार केल्यामुळे अनेक वन्यप्राण्यांची संख्या अत्यंत कमी झाली. अनेक प्रजाती कायमस्वरूपी नामशेष झाल्या. वन्यजीवांची झपाट्याने घटणारी संख्या रोखण्यासाठी सरकारने विविध कायदे केले आहेत. आयआयटी बॉम्बे आणि सस्त्रा विद्यापीठातील संशोधकांच्या संशोधनानुसार, २०१५ ते २०१९ या कालावधीत देशात प्रत्येक १ चौ.कि.मी. जंगलवाढीच्या बदल्यात सुमारे १८ चौ.कि.मी. जंगल नष्ट झाले. नैसर्गिक, दाट आणि जुनी जंगले झपाट्याने नाहीशी होत आहेत. हीच परिस्थिती कायम राहिली तर त्या जंगलांमध्ये राहणाऱ्या वन्यजीवांचे अस्तित्व गंभीर संकटात येईल.

देशात वाढत्या शहरीकरणामुळे पारंपरिक शेती कमी होत आहे. शहराजवळच्या खेडोपाडी काँक्रीटची जंगले उभी राहत असून नैसर्गिक जंगले आकुंचन पावत आहेत आणि मानवी हालचाली सातत्याने वाढत आहेत. जंगलाजवळ निसर्गाच्या सानिध्यात फार्महाऊस उभारण्याचा कल वाढला आहे. विकासाच्या नावाखाली जंगलातून महामार्ग बांधले जात आहेत तसेच जंगलतोड करून उत्खनन सुरू आहे. यामुळे वन्यजीवांचे नैसर्गिक अधिवास थेट नष्ट होत आहेत आणि वर्षानुवर्षे नैसर्गिक आपत्तींची तीव्रता वाढत आहे.

ज्या जंगलांमध्ये वाघ राहतात, तेथील परिसंस्था अधिक समृद्ध आणि संतुलित असते. वाघ हा केवळ एक वन्यप्राणी नसून संपूर्ण जंगलाचा संरक्षक आहे. त्याच्या अस्तित्वासाठी विशाल, सुरक्षित आणि मानवी हस्तक्षेपापासून मुक्त अधिवास आवश्यक असतो. अशा अधिवासांचे संरक्षण केल्याने असंख्य वन्यप्राणी, वनस्पती, सूक्ष्मजीव आणि संपूर्ण जैवविविधता सुरक्षित राहते. वाघ शाकाहारी प्राण्यांची संख्या नियंत्रित ठेवतो, त्यामुळे वनस्पतींचा अतिवापर टळतो आणि नैसर्गिक समतोल अबाधित राहतो. सुरक्षित जंगले अधिक प्रमाणात कार्बन शोषून घेतात आणि हवामान बदलाचे दुष्परिणाम कमी करण्यास मदत करतात. तसेच दाट जंगले पावसाच्या पाण्याचा प्रवाह नियंत्रित करून पुराची तीव्रता कमी करतात आणि कोट्यवधी लोकांना गोड्या पाण्याचा पुरवठा करतात. त्यामुळे वाघ आणि त्यांच्या अधिवासाचे संरक्षण म्हणजे संपूर्ण पर्यावरणाचे संरक्षण होय. हे संरक्षण मानवजीवन, शेती, जलस्रोत आणि भावी पिढ्यांसाठी अत्यंत आवश्यक आहे.

दरवर्षी २९ जुलै रोजी "आंतरराष्ट्रीय व्याघ्र दिन" साजरा केला जातो. या दिवसाचा उद्देश संकटग्रस्त मोठ्या मांजरांच्या प्रजाती आणि त्यांच्या नैसर्गिक अधिवासाच्या संरक्षणाबाबत जनजागृती करणे हा आहे. वाघ हा भारताचा राष्ट्रीय प्राणी आहे. "वाघ वाचवा, जंगल वाचवा, निसर्ग वाचवा" हा संदेश याच कारणासाठी दिला जातो, कारण वाघ टिकले तरच आपणही सुरक्षित राहू. ही बाब प्रत्येकाने समजून घेणे अत्यंत आवश्यक आहे. ग्लोबल टायगर फोरमच्या माहितीनुसार, जगभरातील जंगलांमध्ये केवळ ५,६६० वाघ शिल्लक आहेत. राष्ट्रीय व्याघ्र संवर्धन प्राधिकरण यांच्या "भारतातील वाघांची स्थिती: सह-भक्षक आणि भक्ष्य – २०२२" या अहवालानुसार त्यापैकी ३,६८२ वाघ भारतात आढळतात. दरवर्षी रस्ते अपघात, शेतांमधील विजेचा धक्का, उघड्या विहिरीत पडणे आणि अवैध शिकारीमुळे असंख्य वन्यजीवांचा अकाली व दुर्दैवी मृत्यू होतो. विदर्भ (महाराष्ट्र) येथील वृत्तपत्रांमध्ये विशेषतः वाघांच्या मृत्यूच्या घटना वारंवार प्रसिद्ध होत असतात. सातत्याने वाढणारे वाघांचे मृत्यू हे गंभीर चिंतेचे कारण आहे. गेल्या सहा महिन्यांत महाराष्ट्रात २४ वाघांचा मृत्यू झाला आहे. तसेच २०२५ मध्ये मध्यप्रदेशात ५४ वाघांचा, तर महाराष्ट्राचे वनमंत्री गणेश नाईक यांच्या माहितीनुसार महाराष्ट्रात ४१ वाघांचा मृत्यू झाला.

वर्ल्ड वाईड फंड फॉर नेचर यांच्या माहितीनुसार प्रत्येक वाघाच्या अंगावरील पट्ट्यांचा नमुना वेगळा असतो, जसा प्रत्येक माणसाच्या बोटांच्या ठशांचा नमुना वेगळा असतो. मादी वाघीण आपल्या पिल्लांशी संवाद साधण्यासाठी कानामागील पांढऱ्या खुणांचा संकेत म्हणून वापर करते. जगातील निम्म्याहून अधिक वाघ भारतात आढळतात, ही आपल्या देशाच्या समृद्ध जैवविविधतेची मोठी साक्ष आहे. वाघ गुरगुरणे, डरकाळी फोडणे, कण्हणे, फुत्कार काढणे आणि धापा टाकण्यासारख्या विविध आवाजांद्वारे संवाद साधतात. शास्त्रज्ञांच्या मते वाघ सुमारे २० लाख वर्षांपासून पृथ्वीवर अस्तित्वात आहेत. मात्र, गेल्या शंभर वर्षांत मानवी हस्तक्षेप, जंगलतोड आणि अवैध शिकारीमुळे त्यांच्या संख्येत सुमारे ९७ टक्क्यांची घट झाली आहे. त्यामुळे त्यांना संकटग्रस्त प्रजाती मानले जाते. आजही अवैध शिकार हा त्यांच्या अस्तित्वासमोरील सर्वात मोठा धोका आहे. वर्ल्ड वाईड फंड फॉर नेचर आशियामध्ये त्यांच्या संवर्धनासाठी सातत्याने कार्यरत आहे. २०१६ मध्ये काही भागांत वाघांची संख्या वाढल्याची नोंद झाली असली, तरी दक्षिण-पूर्व आशियात त्यांची संख्या अजूनही घटत आहे.

मनुष्यासारख्या बुद्धिमान प्राण्याकडे आज कायदेशीर अधिकार, प्रगत तंत्रज्ञान, प्रसारमाध्यमे, शासनव्यवस्था, न्यायव्यवस्था, सोशल मीडिया, नातेवाईक, मित्रपरिवार आणि समाज असे अनेक आधार उपलब्ध आहेत. तरीसुद्धा उच्चशिक्षित आणि जागरूक असूनही अनेक प्रसंगी माणूस स्वतःला असहाय्य आणि फसवला गेल्यासारखे अनुभवतो. स्वतःच्या समस्यांच्या निराकरणासाठी सरकारी कार्यालये, लोकप्रतिनिधी आणि न्यायालयांचे उंबरठे झिजवूनही अनेकदा त्याला समाधानकारक न्याय मिळत नाही. पावसाळ्यात पूर, उन्हाळ्यात दुष्काळ, उष्णतेची लाट आणि पाण्याची टंचाई, हिवाळ्यात धुके, हायपोथर्मिया तसेच विविध नैसर्गिक आपत्ती अशा संकटांना मानवालाही सामोरे जावे लागते. सर्व प्रकारच्या सुविधा उपलब्ध असूनही जर माणूस अशा परिस्थितीत हतबल होत असेल, तर त्याच्या तुलनेत वन्यप्राण्यांची अवस्था किती कठीण असेल, याची कल्पनाही करणे अवघड आहे.

क्षणभर मुक्या वन्यजीवांच्या दृष्टीकोनातून विचार करून पाहूया. त्यांना माणसाकडून कोणतीही अपेक्षा नसते. त्यांना केवळ निसर्गाकडून अन्न आणि पाण्याची गरज असते. मानवी हस्तक्षेप नसल्यास निसर्ग सर्व सजीवांचे पालनपोषण करण्यास पूर्णपणे सक्षम आहे. मग आपणच वन्यजीवांना त्रास देत आहोत का? की वन्यजीव आपल्याला त्रास देत आहेत? वाढत्या मानव–वन्यजीव संघर्षाला नेमके जबाबदार कोण? या प्रश्नांचा वेळेवर, संवेदनशीलतेने आणि सखोलपणे विचार करणे आज अत्यंत आवश्यक आहे. वन्यजीवांचे संरक्षण ही केवळ शासनाची जबाबदारी नसून प्रत्येक नागरिकाचे कर्तव्य आहे. जंगलांचे संवर्धन, नैसर्गिक अधिवासांचे संरक्षण, अवैध शिकारीला आळा, पर्यावरणपूरक विकास आणि निसर्गाविषयी संवेदनशील दृष्टिकोन स्वीकारल्याशिवाय मानव आणि वन्यजीव यांच्यातील समतोल कायम राहू शकणार नाही. वन्यजीव टिकले तरच जंगले टिकतील, जंगले टिकली तरच पर्यावरण सुरक्षित राहील आणि पर्यावरण सुरक्षित राहिले तरच मानवजातीचे भविष्य सुरक्षित राहील. म्हणूनच – "वन्यजीव वाचवा, निसर्ग वाचवा आणि मानवजातीचे अस्तित्व सुरक्षित ठेवा."

लेखक – डॉ. प्रीतम भी. गेडाम

ईमेल आयडी: prit00786@gmail.com

धाराशिवच्या शेतकऱ्यांसाठी आनंदवार्ता; खरीप २०२५ च्या पीकविम्याचे ₹३३७ कोटी वाटप सुरू- आमदार राणाजगजितसिंह पाटील

धाराशिवच्या शेतकऱ्यांसाठी आनंदवार्ता; खरीप २०२५ च्या पीकविम्याचे ₹३३७ कोटी वाटप सुरू- आमदार राणाजगजितसिंह पाटील 

धाराशिव, दि. २८ :

धाराशिव जिल्ह्यातील शेतकरी बांधवांसाठी दिलासादायक बातमी असून, खरीप २०२५ हंगामाच्या पीकविमा भरपाईचे वितरण सुरू झाले आहे. पात्र शेतकऱ्यांच्या बँक खात्यात एकूण ३३७ कोटींची विमा रक्कम जमा होण्यास प्रारंभ झाल्याची माहिती आमदार राणाजगजितसिंह पाटील यांनी दिली.

पीकविमा प्रकरणात राज्य सरकारने घेतलेल्या निर्णयाला केंद्रीय समितीनेही दुजोरा देत पीकविमा कंपनीचे अपील फेटाळून लावले. त्यानंतर पात्र शेतकऱ्यांना पुढील सात दिवसांत विमा रक्कम वितरित करण्याचे आदेश संबंधित कंपनीला देण्यात आले होते. त्या आदेशाची अंमलबजावणी आता प्रत्यक्षात सुरू झाली असून, जिल्ह्यातील हजारो शेतकऱ्यांच्या खात्यात विमा रक्कम जमा होऊ लागली आहे.

नैसर्गिक संकटांमुळे नुकसान सहन करणाऱ्या शेतकऱ्यांसाठी ही भरपाई मोठा आर्थिक आधार ठरणार आहे. दीर्घ प्रतीक्षेनंतर पीकविमा वितरणाला सुरुवात झाल्याने शेतकऱ्यांमध्ये समाधानाचे वातावरण निर्माण झाले आहे.

याबाबत बोलताना आमदार राणाजगजितसिंह पाटील म्हणाले, "हा केवळ आर्थिक दिलासा नसून शेतकऱ्यांच्या संयमाचा, शासनावरील विश्वासाचा आणि न्यायासाठीच्या लढ्याचा विजय आहे. पात्र प्रत्येक शेतकऱ्याला त्याचा हक्काचा पीकविमा मिळावा, यासाठी शासन कटिबद्ध आहे."

गुरूपौर्णिमेनिमित्त श्री क्षेत्र अचलबेट येथे घोड्यांच्या गोल रिंगणाचा भव्य सोहळापाच पालख्यांचे आगमन; हजारो भाविकांच्या उपस्थितीत कीर्तन, पालखी व रिंगण उत्सव रंगणार

गुरूपौर्णिमेनिमित्त श्री क्षेत्र अचलबेट येथे घोड्यांच्या गोल रिंगणाचा भव्य सोहळा

पाच पालख्यांचे आगमन; हजारो भाविकांच्या उपस्थितीत कीर्तन, पालखी व रिंगण उत्सव रंगणार

मुरूम, ता. उमरगा, दि. २७ :

उमरगा तालुक्यातील कराळी-तुरोरी परिसरातील श्री क्षेत्र अचलबेट देवस्थान पायथ्याशी गुरूपौर्णिमेनिमित्त बुधवारी (दि. २९) सायंकाळी ४.३० वाजता पारंपरिक घोड्यांच्या गोल रिंगणाचा भव्य सोहळा होणार असून, पंचक्रोशीसह महाराष्ट्र व कर्नाटकातील हजारो भाविकांच्या उपस्थितीत हा धार्मिक उत्सव भक्तिमय वातावरणात साजरा होणार आहे.

गुरूपौर्णिमेच्या औचित्याने सद्गुरू उज्वलानंद महाराज यांच्या पादुकांची पालखी यात्रा सोमवारी (दि. २७) औराद शहा (ता. निलंगा) येथून प्रारंभ झाली. रथ, नगारा, टाळकरी, वारकरी, पताकाधारी व विनेकऱ्यांच्या दिमाखदार सहभागाने पालखी हलगरा, थोर माकणी, तळीखेड पाटी, अनसरवाडा पाटी मार्गे निलंगा येथे पोहोचणार आहे. तेथे हभप. महेश महाराज (संताई आश्रम, माकणी) यांचे कीर्तन होऊन पालखीचा मुक्काम राहणार आहे.

मंगळवारी (दि. २८) पालखी निलंगा येथून दादगी, लिंबाळा, मदनसुरी मोड, भुतमुगळी, हरीजवळगा मार्गे हासोरी येथे पोहोचेल. या ठिकाणी हभप. दिवेगावकर महाराज यांच्या कीर्तन सेवेचा लाभ भाविकांना मिळणार आहे.

गुरूपौर्णिमेच्या दिवशी (दि. २९) सकाळी हासोरी येथून कासार शिर्शी, दुधनाळ पाटी, कदमापूर पाटी, कुन्हाळी, त्रिकोळी पाटी, मुळज व तुरोरी मार्गे पालखी श्री क्षेत्र अचलबेट देवस्थान पायथ्याशी दाखल होईल. याचवेळी कर्नाटकातील बसवकल्याण तालुक्यातील एकंबा, नवचंदवाडी, फुलदरवाडी व मळगीवाडी या चार गावांमधूनही पालख्या येणार आहेत. एकूण पाच पालख्यांच्या आगमनानंतर टाळ-मृदंगाच्या गजरात आणि जयघोषात घोड्यांच्या गोल रिंगणाचा पारंपरिक सोहळा रंगणार आहे.

रिंगणात एका घोड्यावर चोपदार तर दुसऱ्या घोड्यावर सद्गुरू उज्वलानंद महाराज यांच्या पादुका विराजमान असतील. हा सोहळा भाविकांसाठी विशेष आकर्षण ठरणार आहे.

याच दिवशी सायंकाळी ७ ते ९ या वेळेत हभप. अनिल महाराज पाटील (बार्शी) यांचे सुश्राव्य कीर्तन होणार असून, पंचक्रोशीतील हजारो भाविक या धार्मिक सोहळ्यास उपस्थित राहतील, अशी अपेक्षा व्यक्त करण्यात आली आहे.

सेवक व भक्त परिवाराच्या वतीने सर्व भाविकांनी मोठ्या संख्येने उपस्थित राहून गुरूपौर्णिमा उत्सवाचा लाभ घ्यावा, असे आवाहन करण्यात आले आहे.

नळदुर्ग उपजिल्हा रुग्णालयातील कारभारावर प्रश्नचिन्ह ; वैद्यकीय अधीक्षकांच्या कथित दुर्लक्षामुळे मनमानी?; चौकशी करून दोषींवर कारवाईची नागरिकांची मागणी

नळदुर्ग उपजिल्हा रुग्णालयातील कारभारावर प्रश्नचिन्ह ; वैद्यकीय अधीक्षकांच्या कथित दुर्लक्षामुळे मनमानी?; चौकशी करून दोषींवर कारवाईची नागरिकांची मागणी

नळदुर्ग, दि. २५ जुलै :

 नळदुर्ग येथील उपजिल्हा रुग्णालयातील कथित गैरव्यवस्थापन आणि आरोग्य सेवेतील त्रुटींवर 'तुळजापूर लाईव्ह' ने मागील आठवड्यात प्रकाशझोत टाकल्यानंतर नागरिकांमध्ये तीव्र प्रतिक्रिया उमटू लागल्या आहेत. रुग्णालयाचा बहुतांश कारभार कंत्राटी डॉक्टर व आरोग्य कर्मचाऱ्यांवर सुरू असल्याचा आरोप होत असून, या संपूर्ण प्रकरणाची आरोग्य सेवा परिमंडळ उपसंचालकांनी चौकशी करून दोषींवर कठोर कारवाई करावी, अशी मागणी नागरिकांतून होत आहे.

दरम्यान, उपजिल्हा रुग्णालयाचे वैद्यकीय अधीक्षक धाराशिव शहरात कथित खासगी प्रॅक्टिसमध्ये व्यस्त असल्याची चर्चा सुरू झाल्याने या प्रकरणाला अधिकच गंभीर वळण मिळाले आहे. यामुळे शासकीय आरोग्य सेवेबाबत नागरिकांमध्ये तीव्र नाराजी व्यक्त होत आहे.

नागरिकांच्या म्हणण्यानुसार, वैद्यकीय अधीक्षकांच्या  दुर्लक्षामुळे काही कायमस्वरूपी डॉक्टर व कर्मचाऱ्यांचा मनमानी कारभार वाढला असून, रुग्णांना वेळेवर उपचार मिळत नसल्याने मानसिक व आर्थिक त्रास सहन करावा लागत आहे. त्यामुळे संपूर्ण प्रकरणाची निष्पक्ष चौकशी करून कर्तव्यात कसूर करणाऱ्यांवर कठोर कारवाई करावी, अशी मागणी जोर धरत आहे.

सुमारे पाच वर्षांपूर्वी सुरू झालेल्या या उपजिल्हा रुग्णालयातील बाह्यरुग्ण विभागाची वेळ सकाळी ८ ते दुपारी १ आणि सायंकाळी ४ ते ७ अशी निश्चित आहे. मात्र, प्रत्यक्षात ही वेळ पाळली जात नसल्याची रुग्णांची तक्रार आहे. कायमस्वरूपी नियुक्त डॉक्टर व कर्मचारी वेळेवर उपस्थित राहत नसल्याने रुग्णांची मोठी गैरसोय होत आहे. मुख्यालयी वास्तव्यास राहून सेवा देणे अपेक्षित असतानाही  सुसज्ज निवासस्थानांमध्ये अनेक डॉक्टर व कर्मचारी वास्तव्यास नसल्याचे समोर आले आहे.

सध्या रुग्णालयाचा बहुतांश कारभार कंत्राटी डॉक्टर व कर्मचाऱ्यांवर सुरू असून, कायमस्वरूपी अधिकारी व कर्मचारी स्वतःची कामेही कंत्राटी कर्मचाऱ्यांकडून करून घेत असल्याचा आरोप केला जात आहे. त्यामुळे आरोग्य व्यवस्थेतील शिस्त आणि उत्तरदायित्वावर प्रश्नचिन्ह निर्माण झाले आहे.

प्रारंभीचे प्रभारी वैद्यकीय अधीक्षक डॉ. इस्माईल मुल्ला यांच्या कार्यकाळात सर्वसामान्य रुग्णांना दर्जेदार आरोग्य सेवा उपलब्ध करून देण्यासाठी सातत्याने प्रयत्न केले होते, अशी भावना आजही परिसरातील नागरिक व्यक्त करतात. नळदुर्गपासून सोलापूर, तुळजापूर, धाराशिव आणि उमरगा ही शहरे दूर असल्याने परिसरातील शंभरहून अधिक गावांतील नागरिकांसाठी हे उपजिल्हा रुग्णालय महत्त्वाचे आरोग्य केंद्र ठरत आहे. त्यामुळे येथील आरोग्यसेवा सक्षम करण्यासाठी शासनाने तातडीने हस्तक्षेप करावा, अशी मागणी होत आहे.

दरम्यान, धाराशिवचे जिल्हा शल्यचिकित्सक डॉ. धनंजय चाकुरकर यांच्याशी संपर्क साधून वैद्यकीय अधीक्षकांनी खासगी प्रॅक्टिससाठी आरोग्य विभागाची परवानगी घेतली आहे का, याबाबत विचारणा करण्यात आली. त्यावेळी "सध्या व्हिडिओ कॉन्फरन्स सुरू आहे," असे सांगत त्यांनी वैद्यकीय अधीक्षकांशी दूरध्वनीवर संपर्क करून दिला.

रुग्णाचा अनुभव

नळदुर्ग येथील ज्येष्ठ नागरिक भास्कर भोसले म्हणाले, "काही दिवसांपूर्वी उपचारासाठी उपजिल्हा रुग्णालयात गेलो. केसपेपर काढून डॉक्टरांकडे तपासणीसाठी गेल्यानंतर माझी व्यवस्थित तपासणी न करता केवळ लक्षणे ऐकून औषधे देण्यात आली.रुग्णांना व्यवस्थित वागणुक मिळत नाही. माझे समाधान न झाल्याने अखेर खासगी दवाखान्यात उपचार घ्यावे लागले."

"मुख्यालयी उपस्थिती अपेक्षित" – डॉ. जितेंद्र कानडे

जिल्हा परिषद सदस्य डॉ. जितेंद्र कानडे म्हणाले, "वैद्यकीय अधीक्षक हे प्रशासकीय व वैद्यकीय जबाबदारीचे पद आहे. त्यामुळे त्यांच्याकडून मुख्यालयी उपस्थित राहून रुग्णालयाचे २४ तास व्यवस्थापन अपेक्षित आहे. 

ॲड. अरविंद बेडगे, तुळजापूर तालुका काँग्रेस अध्यक्ष :

"महाराष्ट्र नागरी सेवा (वर्तणूक) नियम, १९७९ मधील नियम २४ नुसार कोणताही शासकीय कर्मचारी शासनाची पूर्वपरवानगी घेतल्याशिवाय खासगी व्यवसाय किंवा रोजगार करू शकत नाही. हा नियम शासकीय वैद्यकीय अधिकाऱ्यांनाही लागू आहे. त्यामुळे संबंधित प्रकरणात वस्तुस्थितीची निष्पक्ष चौकशी करून, नियमांचे उल्लंघन झाल्याचे आढळल्यास दोषींवर तातडीने शिस्तभंगाची कारवाई करावी. शासकीय आरोग्यसेवेवरील नागरिकांचा विश्वास अबाधित ठेवणे ही प्रशासनाची जबाबदारी आहे."

नळदुर्ग जि.प. प्रशालेचा शिष्यवृत्ती परीक्षेत दबदबा; दहा विद्यार्थी शिष्यवृत्तीस पात्र; अरबिया शेख प्रथम, गुणवंत विद्यार्थ्यांवर अभिनंदनाचा वर्षाव

नळदुर्ग जि.प. प्रशालेचा शिष्यवृत्ती परीक्षेत दबदबा; दहा विद्यार्थी शिष्यवृत्तीस पात्र; अरबिया शेख प्रथम, गुणवंत विद्यार्थ्यांवर अभिनंदनाचा वर्षाव

नळदुर्ग, दि. २६ जुलै :

महाराष्ट्र राज्य परीक्षा परिषदेतर्फे घेण्यात आलेल्या इयत्ता सातवी शिष्यवृत्ती परीक्षेत नळदुर्ग येथील जिल्हा परिषद प्रशालेच्या विद्यार्थ्यांनी घवघवीत यश संपादन करत शाळेच्या शैक्षणिक गुणवत्तेचा पुन्हा एकदा ठसा उमटविला आहे. यंदा शाळेतील तब्बल १० विद्यार्थी शिष्यवृत्तीस पात्र ठरल्याने परिसरात आनंदाचे वातावरण निर्माण झाले आहे.

या परीक्षेत अरबिया माजिद शेख हिने २४६ गुण मिळवत प्रथम क्रमांक पटकावला. तिच्या पाठोपाठ अमीना फैयाज शेख (२३० गुण), अबीरा वसीम मोज्जन (२२६), फरहान मुन्ना फकीर (२२२), सानिया मझहर शाह (२०४), अलिजा एहसान काझी (१९८), अल्फिया जमीर शेख (१९४), अलिया अहमद शेख (१९४), नौमान राजेभाई पठाण (१६८) आणि नूरजहान ख्वाजा शेख (१६६) यांनीही उल्लेखनीय यश मिळवत शिष्यवृत्तीसाठी पात्रता मिळवली.

विद्यार्थ्यांच्या या यशामागे मुख्याध्यापक निजामोद्दीन इनामदार, शिक्षिका शमशाद बेगम दखनी, सय्यद तस्नीम, परिचर युसूफ शेख तसेच शिक्षकेतर कर्मचाऱ्यांचे मार्गदर्शन व परिश्रम मोलाचे ठरल्याचे सांगितले जात आहे.

या सर्व गुणवंत विद्यार्थ्यांचे, त्यांच्या पालकांचे तसेच शाळेच्या शिक्षकवृंदाचे सर्व स्तरांतून अभिनंदन होत असून, जिल्हा परिषद प्रशालेने नळदुर्गच्या शैक्षणिक क्षेत्रातील गुणवत्ता आणि यशाची परंपरा कायम राखल्याची भावना व्यक्त होत आहे.

आषाढी एकादशीनिमित्त श्री रामतीर्थ देवस्थानात भक्तिभावाचा महासागर

आषाढी एकादशीनिमित्त श्री रामतीर्थ देवस्थानात भक्तिभावाचा महासागर

हनुमान चालीसा पठण, महाअभिषेक, भव्य वारी शोभायात्रा व महाप्रसादाने भाविक तृप्त

नळदुर्ग, दि. २६ जुलै : 

आषाढी एकादशीच्या पावन पर्वानिमित्त येथील श्री रामतीर्थ देवस्थान मंदिरात विविध धार्मिक कार्यक्रम मोठ्या भक्तिभावाने व उत्साहात पार पडले. दिवसभर मंदिर परिसरात भक्तांची मोठी गर्दी उसळली होती.

श्री रघुवीर महाराज यांच्या कृपाआशीर्वादाने तसेच महंत श्री विष्णु महाराज यांच्या मार्गदर्शनाखाली सकाळी श्री हनुमान चालीसा पठण, महाआरती व महाप्रसादाचे आयोजन करण्यात आले. श्रीराम व हनुमान भक्तांनी मोठ्या श्रद्धेने चालीसा पठणात सहभागी होत महाआरतीचा लाभ घेतला.

सकाळी ७.३० वाजता श्री महादेव, श्रीराम व श्री हनुमान यांचा आकर्षक शृंगार करण्यात आला. त्यानंतर सकाळी १०.१५ वाजता आषाढी एकादशीनिमित्त महाअभिषेक संपन्न झाला. सायंकाळी ५.१५ वाजता मंदिर परिसरातून भव्य आषाढी वारी शोभायात्रा काढण्यात आली. टाळ-मृदंगाच्या गजरात आणि विठ्ठल नामाच्या जयघोषात भाविकांनी शोभायात्रेत उत्स्फूर्त सहभाग नोंदविला.

यावेळी १०८ तुपाचे दीप प्रज्वलित करून तसेच १०८ रुचकीच्या पानांचा हार अर्पण करत श्री हनुमानाची विशेष आरती करण्यात आली. या धार्मिक सोहळ्यामुळे मंदिर परिसर भक्तिरसाने न्हाऊन निघाला.

कार्यक्रमानंतर श्री रामतीर्थ देवस्थानाच्या वतीने भाविकांना महाप्रसादाचे वितरण करण्यात आले. या धार्मिक सोहळ्याच्या यशस्वी आयोजनासाठी श्री रामतीर्थ देवस्थान समितीने पुढाकार घेतले.

३१ जुलैपूर्वी पीक विमा भरा; एल-निनोच्या संकटात संरक्षणाची संधी; हमीपत्राच्या अटीबाबत संभ्रम; अट रद्द करण्यासाठी केंद्राकडे राज्याचा पाठपुरावा

३१ जुलैपूर्वी पीक विमा भरा; एल-निनोच्या संकटात संरक्षणाची संधी; हमीपत्राच्या अटीबाबत संभ्रम; अट रद्द करण्यासाठी केंद्राकडे राज्याचा पाठपुरावा

धाराशिव, दि. २६ जुलै : 

खरीप हंगामात नैसर्गिक आपत्ती, कीड व रोगांमुळे होणाऱ्या संभाव्य आर्थिक नुकसानीपासून संरक्षण मिळविण्यासाठी जिल्ह्यातील सर्व पात्र शेतकऱ्यांनी ३१ जुलै २०२६ पूर्वी प्रधानमंत्री पीक विमा योजनेत सहभागी व्हावे, असे आवाहन जिल्हा अधीक्षक कृषी अधिकारी राजेंद्र साळवे यांनी केले आहे.

यंदा एल-निनोच्या प्रभावामुळे राज्यासह धाराशिव जिल्ह्यातही पावसाचे प्रमाण सरासरीपेक्षा कमी राहिले आहे. अनेक भागांत समाधानकारक पाऊस झालेला नसून, पुढील कालावधीतही कमी पावसाचा अंदाज हवामान विभागाने व्यक्त केला आहे. त्यामुळे खरीप पिकांच्या वाढीवर व उत्पादनावर परिणाम होण्याची शक्यता लक्षात घेता, पीक विमा हे शेतकऱ्यांसाठी महत्त्वाचे सुरक्षा कवच ठरणार असल्याचे कृषी विभागाने स्पष्ट केले आहे.

प्रधानमंत्री पीक विमा योजनेअंतर्गत www.pmfby.gov.in⁠� या पोर्टलवर ऑनलाइन अर्ज प्रक्रिया सुरू आहे. योजनेचा लाभ घेण्यासाठी शेतकऱ्यांकडे Farmer ID (Agristack Farmer ID) असणे आणि ई-पीक पाहणीमध्ये पिकांची वेळेत नोंद झालेली असणे आवश्यक आहे. कर्जदार व बिगर कर्जदार अशा दोन्ही प्रकारच्या शेतकऱ्यांनी अंतिम मुदतीपूर्वी अर्ज सादर करावेत, असे आवाहन करण्यात आले आहे.

दरम्यान, कॉमन सर्व्हिस सेंटर (CSC) मार्फत अर्ज करताना "कोणत्याही बँकेतून पीक कर्ज घेतलेले नसल्याबाबत स्वयंघोषणापत्र/हमीपत्र" सादर करण्याची अट असल्याने अनेक शेतकऱ्यांमध्ये संभ्रम निर्माण झाला आहे. त्यामुळे अर्ज भरण्याचे प्रमाण अपेक्षेपेक्षा कमी असल्याचे कृषी विभागाच्या निदर्शनास आले आहे.

हा संभ्रम दूर करण्यासाठी कृषी आयुक्तालय, महाराष्ट्र राज्य यांनी संबंधित हमीपत्राची अट रद्द करण्याची विनंती केंद्र शासनाकडे केली असून, जिल्हास्तरावरूनही ही अट शिथिल करण्याबाबत प्रस्ताव पाठविण्यात आल्याची माहिती देण्यात आली आहे.

पीक विमा अर्ज भरण्याबाबत तांत्रिक अडचण अथवा अधिक माहितीसाठी शेतकऱ्यांनी संबंधित सहाय्यक कृषी अधिकारी, मंडळ कृषी अधिकारी किंवा तालुका कृषी अधिकारी कार्यालयाशी संपर्क साधावा, असेही कृषी विभागाने आवाहन केले आहे.

कॉक्रोच जनता पार्टीचा मोर्चा आता नळदुर्गकडे वळणार का?

कॉक्रोच जनता पार्टीचा मोर्चा आता नळदुर्गकडे वळणार का?

नळदुर्ग,दि.२६ जुलै 

पेपरफुटीच्या प्रकरणात दिल्ली हादरवून केंद्रीय शिक्षण मंत्र्यांचा राजीनामा घेण्याइतकी ताकद दाखवणारी 'कॉक्रोच जनता पार्टी' आता नळदुर्गच्या दिशेने दुर्बीण फिरवणार का, असा प्रश्न शहरभर  चौका चौकात चर्चेचा विषय ठरला आहे.

नळदुर्ग नगरपालिकेच्या प्रशासकीय कारभारात नागरिकांच्या मते अनेक प्रश्न अजूनही धूळ खात पडले आहेत. नागरी सुविधांचा बोजवारा, कथित आर्थिक अनियमितता, तत्कालीन मुख्याधिकाऱ्यांच्या कार्यकाळातील कथित भ्रष्टाचाराच्या चौकशीची मागणी आणि त्यावर प्रशासनाची शांत भूमिका. यामुळे नागरिकांच्या संयमाचा बांध सुटू लागला आहे.

याच पार्श्वभूमीवर नगरपालिकेतील विरोधी पक्ष असलेल्या काँग्रेसच्या १० नगरसेवकांनी २९ जुलै रोजी लाक्षणिक उपोषणाचा इशारा दिला आहे.

आता शहरात मिश्कील चर्चा सुरू आहे...

"दिल्लीत पेपरफुटीचा वास लागला आणि कारवाई झाली... नळदुर्गच्या नगरपालिकेतील कथित घोटाळ्यांचा वास अजून कोणाच्या नाकापर्यंत पोहोचलेलाच नाही का?"

नागरिकांचेही म्हणणे तितकेच बोलके आहे...

"कॉक्रोच शोधण्याची मोहीम देशभर सुरू आहे; पण नळदुर्गच्या फायलींमध्ये लपलेले 'कॉक्रोच' बाहेर काढण्यासाठीही एखादे स्प्रे मशीन येणार का?"

आता २९ जुलैच्या उपोषणाकडे सर्वांचे लक्ष लागले असून, या आंदोलनानंतर चौकशीची फाईल पुढे सरकते की पुन्हा एखाद्या कपाटात 'विश्रांती' घेते, हे पाहणे औत्सुक्याचे ठरणार आहे!

'ज्ञानोबा-तुकाराम'च्या जयघोषाने नळदुर्ग दुमदुमले; आषाढी एकादशीनिमित्त भव्य पालखी सोहळा उत्साहात

'ज्ञानोबा-तुकाराम'च्या जयघोषाने नळदुर्ग दुमदुमले; आषाढी एकादशीनिमित्त भव्य पालखी सोहळा उत्साहात

नळदुर्ग, दि. २६ जुलै :

आषाढी एकादशीच्या पावन पर्वानिमित्त नळदुर्ग शहर भक्तिरसात न्हाऊन निघाले. ज्ञानेश्वर माऊली भजनी मंडळ व शिवशाही तरुण मंडळाच्या संयुक्त विद्यमाने शनिवारी शहरातून पारंपरिक व भक्तिमय वातावरणात भव्य पालखी मिरवणूक काढण्यात आली. टाळ-मृदंगाच्या निनादात, भजन-कीर्तनाच्या सुरावटीत आणि "'ज्ञानोबा-तुकाराम''च्या अखंड जयघोषात निघालेल्या या मिरवणुकीने संपूर्ण शहरात भक्तीची अनोखी अनुभूती दिली.

मराठा गल्ली येथील विठ्ठल-रुक्मिणी मंदिरातून मिरवणुकीला प्रारंभ झाला. शहरातील प्रमुख मार्गांवरून मार्गक्रमण करत पालखी पुन्हा मंदिरात दाखल झाली. मार्गावर विविध ठिकाणी भाविकांनी पालखीचे दर्शन घेत पुष्पवृष्टी केली, तर महिला-पुरुषांनी फुगड्या खेळत आणि हरिनामाचा गजर करत भक्तिरसाचा आनंद लुटला.

मिरवणुकीतील आणखी एक आकर्षण म्हणजे संत ज्ञानेश्वर, संत तुकाराम आदी संतांच्या वेशभूषेत सहभागी झालेली चिमुकली बालके. त्यांच्या निरागस आणि पारंपरिक वेशभूषेने उपस्थितांचे लक्ष वेधून घेतले.

भवानी चौकात नगराध्यक्ष बसवराज धरणे यांच्या हस्ते पालखीचे पूजन करण्यात आले. यावेळी अनेक मान्यवर व नागरिक उपस्थित होते. रूपामाता मल्टीस्टेट को-ऑपरेटिव्ह शाखेच्या वतीने वारकरी व भाविकांना केळी तसेच पिण्याच्या पाण्याचे वाटप करून सेवाभाव जपण्यात आला.त्याचबरोबर दिंडी गेल्यानंतर रुपामाताच्या कर्मचाऱ्यांनी मार्गावरील स्वच्छता केली.

मिरवणुकीनंतर विठ्ठल-रुक्मिणी मंदिरात महाप्रसादाचे वितरण करण्यात आले. वारकरी आणि भाविकांसाठी फराळाचीही व्यवस्था करण्यात आली. या भक्तिमय सोहळ्याच्या यशस्वी आयोजनासाठी ज्ञानेश्वर माऊली भजनी मंडळ, शिवशाही तरुण मंडळ तसेच स्थानिक कार्यकर्त्यांनी परिश्रम घेतले. भक्ती, सेवा आणि सामाजिक ऐक्याचा संदेश देणारा हा पालखी सोहळा नळदुर्गकरांसाठी संस्मरणीय ठरला.

आषाढी एकादशीच्या पावन पर्वावर सकल हिंदू समाजाच्या आवाहनानुसार मांस मच्छी विक्री करणा-या व्यवसायिकांनी आपला व्यवसाय बंद पाळले.

अणदूर गटाच्या विकासाला नवे बळ; सर्व गावांचा विकास आराखडा निश्चित; योजनांची प्रभावी अंमलबजावणी करण्याचे डॉ. जितेंद्र कानडे यांचे निर्देश

अणदूर गटाच्या विकासाला नवे बळ; सर्व गावांचा विकास आराखडा निश्चित;  योजनांची प्रभावी अंमलबजावणी करण्याचे डॉ. जितेंद्र कानडे यांचे निर्देश

अणदूर, दि. २५ जुलै :

तुळजापूर तालुक्यातील अणदूर जिल्हा परिषद गटातील गावांच्या सर्वांगीण विकासाला गती देण्यासाठी लोकप्रतिनिधी, ग्रामपंचायत पदाधिकारी आणि विविध शासकीय विभागांच्या अधिकाऱ्यांची संयुक्त बैठक उत्साहात पार पडली. गावनिहाय विकासकामांचा आढावा घेत भविष्यातील विकासाचा आराखडा निश्चित करण्यात आला. नागरिकांच्या मूलभूत गरजा, प्रलंबित प्रश्न आणि प्राधान्यक्रमाने करावयाच्या कामांवर यावेळी सखोल चर्चा झाली.

हुतात्मा स्मारक येथे झालेल्या या बैठकीच्या अध्यक्षस्थानी जिल्हा परिषद सदस्य डॉ. जितेंद्र कानडे होते. पंचायत समिती सदस्य रणवीर चव्हाण व अणदूरचे सरपंच रामचंद्र आलुरे यांची प्रमुख उपस्थिती होती. अणदूर, धनगरवाडी, चिवरी, आरळी खुर्द, बसवंतवाडी, बोराणदीवाडी, देवसिंगा तुळ, वडगाव देव आणि गंधोरा या गावांतील विकासकामांचा स्वतंत्रपणे आढावा घेऊन आवश्यक कामांना प्राधान्य देण्याचा निर्णय घेण्यात आला.

बैठकीत मार्गदर्शन करताना डॉ. कानडे यांनी राज्य व केंद्र शासनाच्या सर्व कल्याणकारी योजनांचा लाभ पात्र नागरिकांपर्यंत वेळेत पोहोचविण्यासाठी प्रशासनाने जबाबदारीने काम करावे, अशी सूचना केली. मंजूर विकासकामे निर्धारित मुदतीत पूर्ण करण्याबरोबरच नागरिकांच्या तक्रारींकडे संवेदनशीलतेने पाहून त्यांचे तातडीने निराकरण करावे, असेही त्यांनी स्पष्ट केले.

यावेळी माजी ग्रामपंचायत सदस्य बाळकृष्ण घोडके पाटील, गंधोराचे उपसरपंच संजय भोसले, ग्रामपंचायत सदस्य डॉ. विवेक बिराजदार, अप्पा गायकवाड, बालाजी शिंदे, सचिन शिंदे, ,  सरपंच मुकेश सगट, धनगरवाडीचे सरपंच नागनाथ घोडके, उपसरपंच राम कदम, अनिकेत घोडके यांच्यासह विविध गावांतील पदाधिकारी व ग्रामस्थ मोठ्या संख्येने उपस्थित होते.

समिती सचिव म्हणून विस्तार अधिकारी श्रीमती नाईक, विस्तार अधिकारी तीर्थकर, विस्तार अधिकारी नडगिरे तसेच ग्रामविकास अधिकारी संजय माशाळे यांनी बैठकीचे नियोजन केले. कृषी, पशुसंवर्धन, आरोग्य, शिक्षण, ग्रामीण पाणीपुरवठा, महिला व बालविकास, समाजकल्याण, बांधकाम आदी विभागांचे अधिकारी व कर्मचारीही बैठकीस उपस्थित होते.

जनतेच्या दारी नळदुर्ग नगरपालिका; इंदिरानगरच्या 'जनता दरबारा'त ३३ तक्रारी, काही तक्रारी जागेवरच निकाली

जनतेच्या दारी नळदुर्ग नगरपालिका; इंदिरानगरच्या 'जनता दरबारा'त ३३ तक्रारी, 

 काही तक्रारी जागेवरच निकाली

नळदुर्ग, दि. २५ जुलै :

आमदार राणाजगजितसिंह पाटील यांच्या मार्गदर्शनाखाली नागरिकांच्या समस्या थेट जाणून घेऊन त्यांचे तातडीने निराकरण करण्याच्या उद्देशाने नळदुर्ग नगरपालिकेच्या वतीने प्रभाग क्र. २ मधील इंदिरानगर सभागृहात शनिवारी (दि. २५) आयोजित करण्यात आलेल्या 'जनता दरबार' उपक्रमाला नागरिकांचा उत्स्फूर्त प्रतिसाद लाभला. 

या दरबारात विविध नागरी सुविधांशी संबंधित ३३ तक्रारींची नोंद करण्यात आली. यापैकी काही तक्रारींचे जागेवरच निराकरण करण्यात आले, तर उर्वरित प्रकरणांवर संबंधित विभागांना तातडीने कार्यवाही करण्याचे आदेश देण्यात आल्याची माहिती नगराध्यक्ष बसवराज धरणे यांनी दिली.

जनता दरबारात शासकीय जागेवरील निवासी अतिक्रमणे नियमानुकूल करून पात्र लाभार्थ्यांना प्रधानमंत्री आवास योजना व रमाई आवास योजनेचा लाभ मिळवून देण्याची मागणी, शहरातून जाणाऱ्या खंडोबा रोडवर गतीरोधक उभारणे, घरासमोरून गेलेल्या धोकादायक वीजवाहिन्या सुरक्षित करणे, वीज समस्या , बुजलेल्या गटार-नाल्यांची स्वच्छता, तसेच विविध मूलभूत नागरी सुविधांबाबत नागरिकांनी तक्रारी मांडल्या.

प्रत्येक तक्रारीची स्वतंत्र नोंद घेऊन संबंधित अधिकाऱ्यांना तात्काळ कार्यवाहीच्या सूचना देण्यात आल्या. नागरी सुविधांशी संबंधित प्रश्नांना प्राधान्याने सोडविण्यात येईल, अशी ग्वाहीही यावेळी देण्यात आली. नागरिकांच्या अडचणी संयमाने ऐकून त्यावर सकारात्मक भूमिका घेतल्याने उपस्थितांनी या उपक्रमाचे स्वागत केले.

यावेळी नगराध्यक्ष बसवराज धरणे, उपनगराध्यक्ष नय्यर जागीरदार, शिवसेना (शिंदे गट) नेते ज्ञानेश्वर घोडके, नगरसेविका सुमन ठाकूर, नगरसेवक निरंजन राठोड, शशिकांत पुदाले, माजी नगरसेवक किशोर नळदुर्गकर, बलदेव ठाकूर,  धिमाजी घुगे, श्रमिक पोतदार, सुदर्शन पुराणिक, विशाल डुकरे, अभिजित लाटे, संदीप गायकवाड, रियाज शेख, सौदागर कांबळे यांच्यासह मोठ्या संख्येने नागरिक उपस्थित होते.

नगराध्यक्ष बसवराज धरणे यांनी सांगितले की, "जनता दरबारात प्राप्त झालेल्या प्रत्येक तक्रारीचे टप्प्याटप्प्याने निराकरण करण्यात येईल. नागरिकांना दर्जेदार व वेळेवर नागरी सुविधा उपलब्ध करून देणे ही नगरपालिकेची प्राथमिक जबाबदारी असून, प्रशासन आणि लोकप्रतिनिधी यांच्या समन्वयातून नागरिकांचे प्रश्न जलदगतीने सोडविण्यास प्राधान्य दिले जाईल."

प्रभागनिहाय जनता दरबाराच्या माध्यमातून नागरिकांपर्यंत प्रशासन पोहोचविण्याचा हा उपक्रम प्रभावी ठरत असून, शहरातील विविध भागांत अशाच प्रकारचे जनता दरबार नियमितपणे आयोजित करण्यात येणार असल्याचे यावेळी स्पष्ट करण्यात आले.

आषाढी एकादशीच्या पार्श्वभूमीवर नळदुर्ग शहरात मटन-चिकन दुकाने बंद ठेवण्याची मागणीसकल हिंदू समाजाचे पोलिसांना निवेदन; धार्मिक भावना जपण्यासाठी कारवाईची अपेक्षा

आषाढी एकादशीच्या पार्श्वभूमीवर नळदुर्ग शहरात चिकन व मटन दुकाने बंद ठेवण्याची मागणी

सकल हिंदू समाजाचे पोलिसांना निवेदन; धार्मिक भावना जपण्यासाठी कारवाईची अपेक्षा

नळदुर्ग, दि. २४ जुलै : 

आषाढी एकादशीच्या पवित्र पर्वानिमित्त नळदुर्ग शहरातील सर्व मटन, चिकन व इतर मांसविक्रीची दुकाने शनिवार (दि. २५) रोजी एक दिवस बंद ठेवावीत, अशी मागणी सकल हिंदू समाज, नळदुर्ग यांच्या वतीने नळदुर्ग पोलीस ठाण्याचे पोलीस निरीक्षक, नगरपालिका प्रशासनास  निवेदनाद्वारे करण्यात आली आहे.

निवेदनात म्हटले आहे की, आषाढी एकादशी हा हिंदू धर्मातील अत्यंत पवित्र आणि श्रद्धेचा दिवस मानला जातो. या दिवशी हजारो भाविक उपवास करून मंदिरांमध्ये दर्शन घेतात. तसेच शहरात भजन, कीर्तन, दिंड्या व विविध धार्मिक कार्यक्रमांचे आयोजन केले जाते. त्यामुळे या दिवसाचे पावित्र्य कायम राहावे आणि कोणाच्याही धार्मिक भावना दुखावल्या जाणार नाहीत, यासाठी शहरातील सर्व मटन, चिकन व इतर मांसविक्रीची दुकाने एक दिवसासाठी बंद ठेवण्याबाबत आवश्यक आदेश देऊन त्याची प्रभावी अंमलबजावणी करावी, अशी मागणी करण्यात आली आहे.

या निर्णयामुळे शहरातील धार्मिक वातावरण अधिक सुसंवादी राहण्यास मदत होईल, असा विश्वास निवेदनात व्यक्त करण्यात आला आहे. पोलीस व न.प. प्रशासनाने या मागणीची गांभीर्याने दखल घेऊन आवश्यक ती कार्यवाही करावी, अशी अपेक्षाही निवेदनाद्वारे व्यक्त करण्यात आली आहे.निवेदनावर गणेश मोरडे यांची स्वाक्षरी आहे.सदरील निवेदन पोलिस हवालदार राजेंद्र गायकवाड यांनी स्विकारले आहे.

धार्मिक भावना जपण्यावर भर

आषाढी एकादशीच्या दिवशी शहरातील धार्मिक कार्यक्रमांना मोठ्या प्रमाणावर भाविकांची उपस्थिती असते. त्यामुळे धार्मिक वातावरण अबाधित राहावे आणि सामाजिक सलोखा कायम राहावा, या उद्देशाने मांसविक्रीची दुकाने एक दिवस बंद ठेवण्याची मागणी सकल हिंदू समाजाने केली आहे.