महिला सेवक पदे माजी सैनिकासाठी आरक्षित

     उस्मानाबाद - जिल्हृयातील माजी सैनिकांना कळविण्यात येते की, सरळसेवा भरती सन 2015 आरोग्य सेवक (महिला) संवर्गामधील पदे माजी सैनिकाच्या महिला उमेदवारासाठी  भरण्यात येत आहेत. आरोग्य विभाग, जिल्हा परिषद,पुणे अंतर्गत आरोग्य सेवक महिला या संवर्गाची नोंव्हेबर 2015 मध्ये भरती प्रक्रिया राबविण्यात येणार आहे. सदर पदासाठी शैक्षणिक पात्रता माध्यमिक शालांत परीक्षा उत्तीर्ण आणि सहायक परिचारीका प्रसविका परिक्षा उत्तीर्ण आणि सहायक परिचारीका प्रसविका परिक्षा उत्तीर्ण(ए.एन.एम. 18महिन्याचे प्रशिक्षण उत्तीर्ण)अणि महाराष्ट्र परिचार्या मध्ये किंवा विदर्भ परिचर्य परिषेदेमध्ये नोंदणी झालेली असेल किंवा अशा महिला उमेदवार पात्र असतील. या करीता शैक्षणिक अर्हता धारक पात्र माजी सैनिकांच्या पत्नी व पाल्य (महिला) उमेदवारांची नावे जिल्हा सैनिक कल्याण कार्यालय, उस्मानाबाद यांच्याकडे 15 नोव्हेंबर 2015 पर्यंत पाठवावे. तरी या संधीचा माजी सैनिकांनी जास्तीत जास्त लाभ घ्यावा असे मेजर ( नि ) सुभाष सासने, जिल्हा सैनिक कल्याण अधिकारी, उस्मानाबाद यांनी कळविले आहे.

शैक्षणिक संस्था: हरकती नोंदी बाबत मुदतवाढ

                   

   उस्मानाबाद - महाराष्ट्र शैक्षणिक संस्था(शुल्क विनियमन) अधिनियमन 2011 राज्यात लागू करण्यात आला आहे.महाराष्ट्र शैक्षणिक संस्था( शुल्क विनिमयन)नियम 2015 शासनाने 24 सप्टेंबर 2015 अन्वये प्रसिध्द केले आहे.

     या नियमावलीचे प्रारूप प्राथमिक शिक्षण संचालनालयाच्या http://www.depmah.com या संकेत स्थळावर उपलब्ध करून देण्यात आले आहे.या मसुद्याच्या सबंधीत हरकती,आक्षेप किंवा सुचना 23 आक्टोंरबर 2015 पुर्वी depmah@gmail.com या ई-मेलवर अथवा समक्ष/टपालाने आयुक्त शिक्षण (बालभारती) महाराष्ट्र राज्य,पाठयपुस्तक निर्मित व अभ्यासक्रम संशोधन मंडळ, सेनापती बापट मार्ग, पुणे -4 यांच्याकडे पाठवाव्यात, असे शिक्षण संचालक (प्राथमिक) यांनी कळविले होते. तथापि सदर आक्षेप किंवा सुचना नोंदविण्या बाबत 5 नोव्हेंबर पर्यत मुदत वाढ देण्यात आली आहे, असे शिक्षण उपसंचालक (प्राथमिक) यांनी एका पत्रकाद्वारे कळविले आहे.  

विधानसभाध्यक्ष हरिभाऊ बागडे जिल्हा दौ-यावर

    उस्मानाबाद - राज्य विधानसभेचे अध्यक्ष  हरिभाऊ बागडे हे रविवार, दिनांक 1 नोव्हेंबर रोजी जिल्हा दौऱ्यावर येत असून त्यांच्या दौऱ्याचा तपशील पुढीलप्रमाणे आहे. 

             सकाळी  10-30 वाजता औरंगाबादहून साईनगर, रांजणी, ता. कळंब येथे आगमन आणि नॅचरल शुगर ॲन्ड अलाईड इंडस्ट्रीज लिमिटेडमार्फत रांजणी गावास शुद्ध पाणी देण्यासाठी आरओ प्लान्टचे उदघाटन. सकाळी 11 वाजता नॅचरल शुगर ॲन्ड अलाईड इंडस्ट्रीज लिमिटेडचा सन 2015-16 चा 16 व्या गळीत हंगाम शुभारंभ कार्यक्रमास उपस्थिती. दुपारी 1 ते 2 वाजेपर्यंत राखीव. दुपारी 2 वाजता मोटारीने रांजणीहून येवती, ता. उस्मानाबादकडे प्रयाण. दुपारी 2-45 वाजता येवती येथे लोकसेवा समिती संचलित संस्थेच्या आश्रमशाळा आणि चारा छावणीस भेट. त्यानंतर सोईनुसार येवतीहून औरंगाबादकडे प्रयाण. 

सरदार पटेल आणि स्व. इंदिरा गांधी यांना आदरांजली

       उस्मानाबाद    -   राष्ट्रीय एकता दिनाच्या निमित्ताने देशाचे पहिले गृहमंत्री सरदार वल्लभभाई पटेल यांच्या प्रतिमेस येथील जिल्हाधिकारी कार्यालयातील सभागृहात पुष्पचक्र वाहून आदरांजली वाहण्यात आली. तसेच माजी पंतप्रधान स्व. इंदिरा गांधी यांच्या पुण्यतिथीनिमित्त त्यांच्या प्रतिमेस पुष्पहार घालून आदरांजली वाहण्यात आली.

    यावेळी निवासी उपजिल्हाधिकारी उद्धव घुगे, तहसीलदार शिवकुमार स्वामी, नायब तहसीलदार राजाराम पाचभाई यांच्यासह विविध विभागांचे अधिकारी-कर्मचारी उपस्थित होते. 

           तत्पूर्वी, आज सकाळी जिल्हाधिकारी कार्यालयापासून एकता दौडचे आयोजन करण्यात आले होते. या दौडमध्ये विविध विभागांच्या अधिकारी-कर्मचारी यांच्यासह विविध सामाजिक संघटनांचे पदाधिकारी, प्रसारमाध्यम प्रतिनिधी तसेच विविध शाळांचे विद्यार्थी सहभागी झाले होते.

                                                     

अनुदानावर नव्हे तर बाजार अर्थव्यवस्थेवर टिकून रहावे-अरुण जेटली

मुंबई - स्थावर मालमत्ता क्षेत्रात विकासाची खूप क्षमता असून मंदीचा काळ लवकरच संपुष्टात येईल, असा विश्वास केंद्रीय अर्थमंत्री अरुण जेटली यांनी व्यक्त केली. 

    मुंबईत ‘स्थावर मालमत्ता विकास क्षेत्रात बँकिंग आणि अर्थक्षेत्राची भूमिका’ या विषयावर भारतीय स्थावर मालमत्ता विकासक संघटना संघ अर्थात क्रेडाई-बँकॉन 2015 यांच्या वतीने आयोजित कार्यक्रमात ते आज बोलत होते. भारतीय अर्थव्यवस्थेचा विचार करता स्थावर मालमत्ता क्षेत्र हे येणाऱ्या काळात प्रमुख क्षेत्र ठरेल, मात्र, या क्षेत्राने अनुदानावर अवलंबून न राहता बाजार अर्थव्यवस्थेवर अवलंबून रहावं, असं ते म्हणाले.

     पंतप्रधान नरेंद्र मोदी यांच्या ‘सर्वांसाठी घरकुल’ या प्रकल्पासाठी सरकार कटिबध्द असून त्या दृष्टीने सकारात्मक पावलं उचलत आहेत, असं ते म्हणाले. सर्वांसाठी घरकुल या प्रकल्पासाठी जमिनीची स्वस्त दरात उपलब्धता हे कठीण नाही तर जमिनीची सहज उपलब्धता हे मोठं आव्हान असल्याचं त्यांनी स्पष्ट केलं. जर या संदर्भातील प्रक्रिया आपण अवघड केली तर लोकांना परवडणाऱ्या दरात घरं उपलब्ध होऊ शकणार नाहीत, असं त्यांनी सांगितलं.

   भारतीय अर्थव्यवस्थेच्या विकासासाठी वसाहती, उपनगर वसाहती आणि स्मार्ट शहरं यांच्या गरजेवर त्यांनी भर दिला.

क्रेडाईच्या वतीने सादर करण्यात आलेल्या कर प्रस्तावासंदर्भात जेटली म्हणाले की, आयकर कायद्याच्या आढाव्या घेणाऱ्या नवनियुक्त समितीसमोर स्थावर मालमत्ता क्षेत्राने आपले सादरीकरण करावे.

चलनफुगवटा नियंत्रणात असून भारतीय रिझर्व्ह बँकेनेसुध्दा वर्षभरात चार वेळा व्याजदरात कपात केली असून स्थावर मालमत्ता क्षेत्रावर याचा सकारात्मक परिणाम दिसून येईल, असं त्यांनी स्पष्ट केले. सार्वजनिक क्षेत्रातील बँकांच्या पुनर्भांडवलीकरणामुळे बँकिंग क्षेत्राला आणखी बळकटी मिळेल, असेही त्यांनी सांगितले.

   सुधारणांसाठी आपले सरकार कटिबध्द असल्याचे मुख्यमंत्री देवेंद्र फडणवीस यांनी आपल्या भाषणात सांगितले. उद्योग क्षेत्रात पूरक वातावरण उपलब्ध करून देण्यासाठीच्या ई-प्लॅटफॉर्म निर्मितीद्वारे संपूर्ण पारदर्शकता आणली जाईल, असा विश्वास त्यांनी व्यक्त केला. स्थावर मालमत्ता क्षेत्राने महागड्या घरांऐवजी किफायतशीर घरांवर भर द्यावा आणि मागणी आणि पुरवठा यातील दरी भरून काढावी असे फडणवीस म्हणाले.

शितल मेहता यांचे निधन

उस्मानाबाद-  सकल जैन समाजाचे माजी अध्यक्ष तथा महाराष्ट्र चेंबर ऑफ कॉमर्सचे गव्‍हर्नर कॉन्सलिंग मेंबर   शितल वसंतराव मेहता यांचे शनिवारी रोजी सकाळी  हदय विकाराने निधन झाले. मृत्यु समयी त्यांचे वय ५९ वर्ष होते. त्यांच्या पश्चात्य पत्नी, भाऊ, एक मुलगा, एक मुलगी, नातवंडे असा परिवार आहे.

    शितल मेहता हे कुशल संघटक व मनमिळावू असल्यामुळे सर्वच स्तरातील लोकांना ते परिचित होते. उस्मानाबाद रोटरी क्लबचे संस्थापक अध्यक्ष शितल मेहता असून एक गाव-एक गणपतीचे जनक होते. त्यानंतर ही योजना संबंध राज्यात राबविण्यात आली. मराठवाडा चेंबर ऑफ कॉमर्सचे उपाध्यक्ष, उस्मानाबाद नगर वाचनालयाचे संचालक, भारतीय जैन संघटनेचे विभागीय सदस्य, डॉ.बाबासाहेब आंबेडकर मल्टीस्टेटचे संचालक पदावर शितल मेहता काम पाहता होते. 

पटेल , गांधी यांना आदराजली

उस्मानाबाद : सरदार वल्लभभाई पटेल व माजी पंतप्रधान स्व. इंदिरा गांधी यांच्या पुण्यतिथीनिमित्त रूपामाता अर्बन बँकेच्यावतीने प्रतिमेस पुष्पहार अर्पण करून श्रध्दांजली वाहण्यात आली. यावेळी चेअरमन अॅड. व्यंकटराव गुंड, मुख्य कार्यकारी अधिकारी भगीरथ जोशी, विभागीय व्यवस्थापक मिलींद खांडेकर, व्यवस्थापक कुंडलिक लांडगे आदी कर्मचारी उपस्थित होेते. 

छाया : राहुल कोरे.

उस्‍मानाबाद : पटेल यांच्या जयंतीनिमित्त दौड

उस्मानाबाद : सरदार वल्लभभाई पटेल यांच्या जयंतीनिमित्त काढण्यात आलेल्या एकता दौडचा शुभारंभ निवासी उपजिल्हाधिकारी साहेबराव  घुगे यांनी हिरवा झेंडा दाखवून केला. यावेळी तहसीलदार सुभाष काकडे, नायब तहसीलदार राजेश जाधव, जिल्हा उपनिबंधक शिवाजी बडे, नितीन तावडे, विष्णू इंगळे, पत्रकार मोतीचंद बेदमुथा, संतोष जाधव आदी उपस्थित होते.

छाया : राहुल कोरे

ऑटोरीक्षा परवान्याचे नुतनीकरणाबाबत आवाहन

 

उस्मानाबाद - राज्यातील रद्द/व्यपगत ऑटोरीक्षा परवान्याचे नुतनीकरण करण्यासाठी शासनाने 16 नोंव्हेबर पर्यत मुदत वाढ देण्यात आली असून ही अंतिम मुदत  दिली आहे. जिल्ह्यात ऑटोरिक्षा परवान्याची संख्या एकूण-2016 आहे. 16नोंव्हेबरपर्यत ऑटोरिक्षा परवाना नुतनीकरण करून घ्यावेत,  असे आवाहन  उप प्रादेशिक परिवहन अधिकारी, उस्मानाबाद यांनी केले आहे. 

          सदरील परवाने मुदतीत नुतनीकरण न केल्यास मोटार वाहन कायदा 1988 मधील तरतुदीनुसार परवाने कायम स्वरूपी रद्द करण्यात येतील. याबाबत कार्यालयाने परवाने तसेच योग्यता प्रमाणपत्र नुतनीकरण न केलेल्या वाहनांची कागदपत्रे तपासणी मोहिम सुरू करण्यात आली असून दोषी वाहनांवर योग्य ती कार्यवाही करण्‍याचा इशारा देण्‍यात आला आहे. 

अधिकारी पदाच्या पुर्व प्रशिक्षणाची मोफत संधी

     उस्मानाबाद -  संघ लोकसेवा आयोग, नवी दिल्ली यांचे मार्फत दि.14 फेब्रुवारी रोजी घेण्यात येणाऱ्या कम्बाईड डिफेंन्स सर्व्हिसेस या संरक्षण दलातील अधिकरी पदाच्या परीक्षेकरीता एम्प्लॉयमेंट न्यूज मध्ये 7 नोंव्हेबर रोजी जाहिरात प्रसिध्द करण्यात येणार आहे. केंद्रीय  लोकसेवा आयोगाकडे ऑनलाईन अर्ज पोहचण्याची अंतिम मुदत 8 डिसेंबर 2015 पर्यंत असल्याची माहिती जिल्हा सैनिक कल्याण अधिकारी, उस्मानाबाद यांनी दिली आहे.      

            कम्बाईड डिफेंन्स सर्व्हिसेस या परीक्षेद्वारा कायम स्वरूपी व अल्प मुदतीचे कमीशनसाठी निवड करण्यात येत असते. जे उमेदवार पदवीधर असून सीडीएस परीक्षेचा फॉर्म ऑनलाईन भरून पाठवतील व रोजगार समाचार मध्ये दिलेल्या शैक्षणिक, शारिरीक, वयोगट पात्रतेनुसार पात्र आहेत. अशाच उमेवारांची निवड परीक्षापुर्व प्रशिक्षणाच्या तयारीसाठी छात्रपुर्व प्रशिक्षण केंद्र, नाशिक रेाड, नाशिक येथे करण्यात येईल. दि.17 नोंव्हेबर 2015 ते 30 जानेवारी 2016 या कालावधीत प्रशिक्षण आहे. निवासाची व भोजनाची व्यवस्था शासनामार्फत करण्यात आली आहे. सीडीएस परीक्षेचा ऑनलाईन फॉर्म भरण्यासठी http://www.upsconline.nic.in या संकेतस्थळावर उपलब्ध आहे.

            आय एम ए साठी, नेवहेल अॅकडमी, एअर फोर्स अकॅडमी वऑफीसर्स ट्रेनिग ॲकेडमी (महिलांसाठी) या सर्वांसाठी वयोमर्यादा 2 जानेवारी 1993 ते 1 जानेवारी 1998 च्या दरम्यान जन्मलेले अविवाहीत भारतीय युवक. तसेच शैक्षणिक पात्रता आय.एम.ए.वओ.टी.ए साठी कोणत्याही शाखेचा पदवीधर असावा. नेव्हल अकॅडमी -अभियांत्रिकी पदविधर असावा,एअर फोर्स अकॅडमी मान्यताप्राप्त विद्यापिठाचा पदविधर किंवा (भैातिक शास्त्र व गणित 12 वी स्तर विषयासह).  

          तरी जिल्हृतील जास्तीत जास्त पात्र उमेदवारांनी सैन्य दलातील अधिकारी पदाच्या संधीचा लाभ घेण्यासाठी जिल्हा सैनिक कार्यालय येथे दि.5 नोंव्हेबर रोजी पदवी पर्यतच्या सर्व मुळ प्रमाणपत्र व गुणपत्रिकासह आणि ऑनलाईलन फॉर्म भरल्यानंतर त्याची प्रिंट घेवून मुलाखतीच्या वेळेस दाखविल्या शिवाय उमेदवारांची निवड करण्यात येणार नाही. मुलाखतीच्या वेळी वस्तुनिष्ठ पध्दतीची लेखी परीक्षा व तोंडी मुलाखत जिल्हा सैनिक कल्याण अधिकारी यांच्या कडून घेण्यात येईल. 

          अधिक माहिती करीता छात्रपुर्व प्रशिक्षण केंद्र, नाशिक यांचा दुरध्वनी क्रमांक 0253-2415031,2451032 येथे कार्यालयीन वेळेत प्रत्यक्ष अथवा दुरध्वनीवर संपर्क  साधावा, असे आवाहन जिल्हा सैनिक कल्याण अधिकारी , मेजर (नि) सुभाष सासने यांनी एका पत्रकाद्वारे केले आहे. 

पंतप्रधान शिष्यवृत्तीसाठी अर्ज करण्याचे आवाहन

          उस्मानाबाद -  जिल्हृयातील सर्व माजी सैनिकांना/विधवांना कळविण्यात येते की, केंद्रीय सैनिक बोर्ड, नवी दिल्ली यांचेकडून शैक्षणिक वर्ष 2015-16 साठी पंतप्रधान शिष्यवृत्ती योजेनेची घोषणा करण्यात आली. तरी जिल्हृयातील पात्र माजी सैनिक/विधवानी आपल्या पाल्यासाठी शैक्षणिक वर्ष 2015-16 मध्ये व्यवसायिक पदवी अभ्यासक्रमास प्रवेश घेतले आहेत, त्यांनी आवेदन पत्र, चेकलीस्ट प्रमाणे सर्व कागदपत्रांसह दि. 10 नोव्हेंबर पर्यत जिल्हा सैनिक कार्यालय येथे सादर करावीत आवेदन पत्र चेकलिस्ट व इतर सर्व माहिती संकेत स्थळावर www.desw.gov.in. या वेबसाईटवर उपलब्ध आहे. तसेच श्रेणी एक ते श्रेणी सहापर्यंतची प्रकरणेही जास्तीत जास्त दाखल करावीत, असे आवाहन जिल्हा सैनिक कल्याण अधिकारी, उस्मानाबाद यांनी केले आहे.                       

राष्ट्रीय एकता व संकल्प दिन साजरा होणार

      उस्मानाबाद - सरदार वल्लभभाई पटेल यांच्या जयंतीनिमित्त राष्ट्रीय एकता दिवस व माजी पंतप्रधान स्व.श्रीमती इंदिरा गांधी यांच्या पुण्यतिथी दि.31 ऑक्टोबर रोजीचे औचित्य साधून राष्ट्रीय संकल्प दिन विविध कार्यक्रमांनी साजरा करण्यात येणार असून याबाबत संबंधित यंत्रणेला आदेशित करण्यात आल्याची माहिती जिल्हाधिकारी,उस्मानाबाद यांनी दिली आहे. 

      या दिनी शिक्षणाधिकारी (माध्यमिक) व क्रीडा अधिकारी यांच्या समन्वयाने सकाळी  जिल्हाधिकारी कार्यालय ते शिवाजी चौकापर्यंत एकता दौड, सर्व विभागाच्या समन्वयाने  पोलीस विभागामार्फत जिल्हा पोलीस मुख्यालयात पोलीस संचलन व मानवंदना,  तसेच सर्व कार्यालयामार्फत विभाग प्रमुख व कार्यालय प्रमुखांनी राष्ट्रीय एकता दिवसाची शपथ ग्रहण करणे, मिरवणूका आदि कार्यक्रमाचे आयोजन करण्यात आले आहे.                  

निवृत्तीवेतन प्रकरणे वेळेत सादर करण्याचे आवाहन

     उस्मानाबाद - अधिकारी , कर्मचारी शासकीय सेवेतून सेवानिवृत्त होतो. निवृत्ती धारकांना तात्काळ लाभ मिळावेत,यासाठी शासनाने ऑनलाईन पेन्शन प्रणालीद्वारे प्रकरणे सादर करण्यासंदर्भात विविध प्रपत्रामध्ये सुधारणा करण्याचा महत्वकांक्षी निर्णय घेण्यात आला आहे. तरी कार्यालयातील सर्व कर्मचाऱ्यांची निवृत्ती वेतनाची प्रकरणे ऑनलाईन वेळेत सादर करुन त्यांना सर्व प्रकारचे लाभ मिळवून देण्यासाठी सर्व आहरण व संवितरण अधिकाऱ्यांनी सहकार्य करण्याचे आवाहन कोषागार अधिकारी विशाल पवार यांनी केले. 

येथील पोलीस मुख्यालयाच्या अलंकार हॉल मध्ये (दि.30 रोजी) सर्व आहरण व संवितरण अधिकारी व कर्मचाऱ्यांसाठी प्रशिक्षण घेण्यात आले. त्यावेळी त्यांनी वरील आवाहन केले. या प्रशिक्षणास उपविभागीय अधिकारी (महसूल) तेजस चव्हाण, अप्पर कोषागार अधिकारी एस.बी. देगांवकर, एस.बी.शिंदे, ए.बी.पवार, प्रशिक्षक एस.बी.घुटे, ए.एस.सिताफुले, श्रीमती एस.जी.घोगरे, एन.बी. बारकुल, एस.आर.ठाकूर,एस.एन.बुंधे यांच्यासह सर्व आहरण व संवितरण अधिकारी व कर्मचाऱ्यांची उपस्थिती होती. 

कोषागार अधिकारी श्री.पवार म्हणाले की, ऑनलाइन पेन्शन केस सहा महिन्यापुर्वी महालेखापाल, नागपूर यांना सादर करणे आवश्यक आहे. कर्मचारी नियमित सेवा करुनही त्यांची प्रकरणे वेळेत सादर न झाल्यामुळे त्यांना सेवानिवृत्ती वेळी व नंतर अडचणी येत असतात. त्यासाठी  ऑनलाईन प्रणालीद्वारे प्रकरणे वेळेत सादर करुन त्यांना सर्व प्रकारचे लाभ दिले तरच त्यांना न्याय मिळेल. ऑनलाईन प्रणालीद्वारे माहिती भरत असतांना अडचणी आल्यास मला व कार्यालयातील कर्मचाऱ्यांना भेटून शंकेचे निरसन करावे,असेही त्यांनी यावेळी सांगितले. 

श्री.ए.बी.पवार यांनी सेवा निवृत्तीधारकांनी आर्थीक लाभासाठी कार्यालयात वारंवार फेऱ्या मारु नये, यासाठी वेळीच दक्षता घेऊन ऑनलाईन प्रणालीद्वारे निवृत्ती प्रकरणे सादर करतांना कोणती दक्षता घेऊन प्रकरणे महालेखाकार यांना सादर करण्याबाबत सविस्तर माहिती दिली. श्री.घुटे यांनी ऑनलाईन प्रणालीद्वारे अधिकारी व कर्मचाऱ्यांची माहिती विहित नमुन्यातील प्रपत्रात कशी भरावी व  प्रपत्र अद्यावत करण्याविषयी संगणकाद्वारे माहिती सादर केली. या प्रशिक्षणाचे सूत्रसंचालन श्रीमती पूजा दळवे केले तर आभार एस.बी.शिंदे यांनी मानले

सरपंच सोडत आरक्षण प्रकरण ,अखेर जनतेचे मत परिवर्तन

      पांगरी (गणेश गोडसे)  बार्शी तालुक्यातील  पांगरीजवळील पिंपळगांव (देशमुख) येथील ग्रामपंचायतीच्या निवडणुकीसाठी झालेल्या सदस्य,सरपंच सोडतीत सलग पंचेवीस (25) वर्षापासून सर्वसाधारण गटाच्या कोणत्याच प्रवर्गासाठी एकही जागा न सुटल्यामुळे ग्रामस्थामधून संताप व्यक्त केला जात असल्याबाबत व तेथील ग्रामस्थांच्या मनातील खदखद  मांडल्यामुळे सर्वसाधारण गटातील मतदारांनी मतदान प्रक्रियेवर बहिष्कार टाकण्याचा निर्णय घेतला होता. बहिष्काराच्या पार्श्वभूमीवर मतदारांचे मत परिवर्तन करण्यासाठी बार्शीचे तहसिलदार बालाजी सोमवंशी यांनी गावात जावून ग्रामस्थांशी संवाद साधला॰तहसीलदारांनी सदस्य व सरपंच आरक्षण सोडत याबाबत जनतेशी चर्चा करून त्यांचे मत परिवर्तन केले.

           याबाबत अधिक माहिती अशी की, दिनांक (13) पासून पिंपळगांव (दे) येथील ग्रामपंचायतीसाठी प्रक्रिया सुरू आहे.मात्र महसूल विभागाच्या कामाचा अजब नमूना येथील लोकांना दिसून आला आहे.सरपंच पदाच्या दोन्ही जागेवर एकही उमेदवारी अर्ज दाखल झालेला नाही.सर्वसाधारण गटातील 35 टक्के मतदार गावात असूनही सलग पाचवी पंचवार्षिक निवडणूक सर्वसाधारण गटातील उमेदवारास ग्रामपंचायतीबाहेर ठेऊन पार पडत आहे.नेमकी चूक कोणाची,आरक्षण कश्या पद्धतीने टाकण्यात आले याबाबत गावात व मतदारात उलट सुलट चर्चिले जात होते. 2010 मध्ये पार पडलेल्या सार्वत्रिक निवडणुकीतही सात जागांपैकी पाच जागेवरच उमेदवारांची निवड प्रक्रिया पार पडली होती.दोन जागा रिक्त राहिल्या होत्या.

    सात सदस्य संख्या असलेल्या व 391 मतदार असलेल्या पिंपळगांव येथील सरपंचपद ओबिसी प्रवर्गासाठी आरक्षित असून 124 सर्वसाधारण गटातील आहेत.पिंपळगांव येथील 2015 च्या निवडणुकीतील आरक्षण प्रभाग क्रमांक एक मध्ये अनुसूचीत जाती पुरुष एक,महिला एक,प्रभाग क्रमांक दोन मध्ये नागरिकांचा मागास प्रवर्ग (ओबिसी) एक पुरुष,एक महिला,प्रभाग तीन मध्ये अनुसूचीत जाती एक पुरुष, एक स्त्री,व अनुसूचीत जमाती महिला एक असे आरक्षण आहे.

  2010 मध्ये पार पडलेल्या निवडणुकीसाठी अनुसूचीत जमातीच्या महिलेसाठी येथील सरपंच पद आरक्षित होते.त्यावेळेस प्रभाग क्रमांक एक येथे अनुसूचीत जाती पुरुष एक,स्त्री एक,प्रभाग क्रमांक दोन मध्ये अनुसूचीत जमाती स्त्री एक,अनुसूचीत जाती पुरुष दोन,प्रभाग क्रमांक तीन मध्ये नागरिकांचा मागास प्रवर्ग एक स्त्री,एक पुरुष असे आरक्षण होते.त्यावेळसही सर्वसाधारण गटासाठी एकही जागा देण्यात आली नव्हती.प्रभाग तीन मधील दोन्ही जागा रिक्त होत्या.विशेष म्हणजे हे की दोन कुटुंबे,आठ मतदार यांच्यासाठी दोन जागा आरक्षित होऊ शकतात तर 124 मतदारांना लोकशाहीत हक्कांपासून दूर ठेवले आहे असा प्रश्न संबंधित जनतेला आहे॰आमच्या आडनावावरून ज्या गावाची ओळख आहे त्या गावातच आम्हाला जर ग्रामपंचायतीची पायरी चढण्याचा हक्क नाही का असा प्रश्न येथील नागरिकांकडून विचारला जात आहे.एक,दोन,तिन निवडणुका ठीक आहेत मात्र सलग 25 वर्ष आमच्यावर अन्याय का?

चौकट: जेवढ्या जागेवर अर्ज दाखल करण्यात आले आहेत तेथील जागा भरल्या जाणार असून ग्राम पंचायत आरक्षण अधिनियम 1958 मधील तरतुदीनुसार आरक्षण सोडत करण्यात आली आहे असे तहसीलदर श्री.सोमवंशी यांनी पिंपळगांव ग्रामस्थांशी झालेल्या भेटीनंतर पुढारी प्रतिनिधीशी बोलताना संगितले.

ग्रा. प. निवडणुक प्रचार थंडवला

पांगरी ( गणेश गोडसे ) होशियार..खबरदार..जागते रहो..,ग्रांमपंचायत निवडणुकीच्या प्रचाराच्या तोफा थंडावल्या असून एका रात्रीवर मतदानाची प्रक्रिया येऊन ठेपली आहे.जात,धर्म,पंथ,नाती,गोती,गोत्र आदींचा आधार घेऊन मताचा जोगवा मागितला गेला आहे.

         वेगवेगळी आमिषे,आश्वासणे,थापा,गप्पा मारून व जेवणावळी घालून मतदारांना आपलेस करण्यात नेत्यांना यशही आले आहे.स्थानिक उमेदवार नेत्याचे भवितव्य मतपेटीत बंद करण्यासाठी काळ,वेळ हळूहळू पुढे पुढे सरकत चालला आहे.कधी मतदान होईल आणि आम्ही यातून निवांत होतोय अशीच काहीशी अवस्था नेतेमंडळीची झालेली आहे.मतदारसंघात प्रशासकीय यंत्रणा,तयार ठेवण्यात आली असून यावेळेस पोलिस बंदोबस्तही खूप मोठ्या प्रमाणात ठेवण्यात आला आहे.पंधरा दिवसांच्या सरावाची मुदत संपत चालली असून नेत्यांच्या रंगीत तालमीही पूर्ण झाल्या आहेत.प्रयोग सादर करण्यासाठी सगळे तयार आहेत.

शुक्रवारी प्रचाराच्या शेवटच्या दिवशी प्रचार फेर्‍या,वैयक्तिक गाठी भेटी,यामुळे गावो गावी निवडणूकमय वातावरण निर्माण झाले होते.होणारी निवडणूक अटी तटीची होत असल्यामुळे वाहनांचा निवडणुकीसाठी प्रथमच वापर करण्यात आला.

   रात्र वैर्‍याची आहे: प्रत्येक निवडणुकीच्या अंतिम चरणात मतदान प्रक्रियेच्या अगोदरच्या शेवटच्या रात्रीला खूपच महत्व असते.कारण निकाल बदलण्याची ताकत या एका रात्रीत दडलेली असते असे नेतेमंडळी ठासून सागत असतात.उमेदवार व नेत्यांचे हितचिंतक गावात येणार्‍या रस्त्यावर,चौकाचौकात,रात्रभर थांबून विरोधक काही काळेबेरे करतात का याच्यावर नजर ठेऊन असतात.पूर्वीच्या काळात गावावर सांगून दरोडे टाकण्यात येत असायचे तेव्हा संपूर्ण ग्रामस्थ एकवटून गावाच्या मुख्य वेशीवर गावाच्या सुरक्षेसाठी रात्री जागून काढून जनतेचे रक्षण करायचे.मात्र काळ बदलला.दरोडेखोरांचे राहणीमान,निवास,यात आमुलाग्र बदल घडून जंगलातील दरोडेखोर पांढपेशे बनून शहरातच स्थिर-स्थावर झाले.आजही त्यांचे हस्तक येतात जनतेला ओरबाडून घेऊन जातात,बदल फक्त थोडा झालाय.

   निवडणुका अटीतटीच्या होत असल्यामुळे नेत्यांनी गाफिल न राहाता जागता पहारा देण्याचे आदेश दिले आहेत.आरोप प्रत्यारोपाच्या मालिका संपल्या असून आता नेतेच आपण कधी,कोठे,काय काय आरोप केले त्याचा काय परिणाम होतोय याची चाचपणी करत आहेत.कधी कधी सत्य मान्य करत जनता सुज्ञ झाली असून योग्य निर्णय घेऊन आपल्या मनाची समजूत घालून जनतेचेही कौतुक केले जात आहे.उमेदवार आपण केलेली कामे घसा कोरडा पडस्तोर जनतेपुढे मांडून निवडून देण्याचे आवाहन करू लागले आहेत.

 निवडणूकींवर सट्टा;  कोणता निवडणूक पूर्व अंदाज खरा ठरणार,कोणाचा अंदाज फोल ठरणार यावर सध्या जास्त चर्चा होताना दिसत आहे.आपल्या बाजूने अंदाज वर्तवण्यासाठी कोणी किती पैसे मोजले,कोणाला किती पार्ट्या दिल्या,कोणी किती घेतले,कोणी गोप्यस्फोट दाबले यावर सगळीकडेच चविणे चर्चा सुरू आहे.यावरून मतदारांनी काय बोध घ्यायचा.निवडणूक पूर्व अंदाज आपल्या बाजूने करून घेऊन आपल्यासाठी वातावरण चांगले असल्याचा भास निर्माण करून घेऊन वाहवा मिळवण्यात सगळेच धन्यता मानत आहेत॰पक्ष,पदाधिकारी,नेते,व त्यांना साथ देणारे कार्यकर्ते यांनी पातळी सोडून निवडून येण्यासाठी झटत आहेत.

दीपगृह, पर्यटन क्षेत्राचे मेरुमणी ठरतील – नितीन गडकरी

    मुंबई - देशातील दीपगृहांचा विकास करण्याचा महत्त्वाकांक्षी प्रकल्प सरकारने हाती घेतला असून ही दीपगृह पर्यटन क्षेत्राचे मेरुमणी ठरतील अशी अपेक्षा केंद्रीय जहाजबांधणी मंत्री नितीन गडकरी यांनी व्यक्त केली.       पर्यटनासाठी दीपगृहाच्या विकासासंदर्भातील मुंबईत आयोजित केलेल्या  गुंतवणूक परिषदेत ते आज बोलत होते.  दीपगृहांच्या सभोवतालचे सौंदर्य तसेच समृध्द सागरी वारसा यामुळे संपूर्ण जगभरात दीपगृहांकडे पर्यटकांचा ओढा वाढला आहे. भारतात,  पर्यटनाच्या अमाप क्षमता आहेत, ज्यांचा पूरेपूर वापर अद्याप झाला नाही असे गडकरी यांनी यावेळी सांगितले.

      देशभरात सुमारे 189 दीपगृह असून पहिल्या टप्प्यात सार्वजनिक-खाजगी भागीदारी तत्त्वावर 78 दीपगृहांचा पर्यटन केंद्र म्हणून विकास करण्याचा निर्णय दीपगृह आणि दीपनौका महासंचालनालयाने घेतला असल्याचे ते म्हणाले. गुजरात, महाराष्ट्र, गोवा, कर्नाटक, केरळ, लक्षद्विप, तामिळनाडू, पुद्दूचेरी, आंध्रप्रदेश, ओदिशा, पश्चिम बंगाल आणि अंदमान निकोबार बेटांवरच्या दीपगृहांचा यात समावेश आहे.  यापैकी महाराष्ट्र आणि गोव्यात नऊ दीपगृह आहेत. यामध्ये संक रॉक, कान्होजी आंग्रे, उत्तन पॉईंट, कोरलाई किल्ला, जयगड, रत्नागिरी, देवगड, वेंगुर्ला रॉक्स, तोलकेश्वर पॉईंट, ॲगोडा आणि साओ जॉर्ज यांचा समावेश आहे. 

    सरकारी-खाजगी भागीदारीसाठी अधिक रुची निर्माण करण्याच्या दृष्टीने जहाजबांधणी मंत्रालयाने यापूर्वीच चेन्नई, कोची आणि विशाखापट्टणम याठिकाणी रोड शोज आयोजित केले असून त्याला उत्तम प्रतिसाद मिळाला आहे. सुमारे 236 गुंतवणूकदार यात सहभागी झाले होते असे त्यांनी नमूद केले.

   किनारपट्टी नियामक क्षेत्र मंजूरी, सुरक्षा मंजूरी, अनुदानासंदर्भात मंत्रालयाकडून सहाय्य आदि गोष्टींच्या बाबतीत गुंतवणूकदारांनी चिंता व्यक्त केल्याचे गडकरी यांनी नमूद केले. तथापि, या महत्त्वाकांक्षी प्रकल्पाची अंमलबजावणी करतांना येणारे अडथळे पार करुन हे प्रकल्प पूर्णत्वास नेण्याची सरकारची भूमिका असल्याचे त्यांनी स्पष्ट केले. यासंदर्भातील समस्यांचे निराकरण करण्यासाठी  आंतरमंत्रालयीन समितीची स्थापना करण्यात येणार असून त्यामध्ये जहाज बांधणी, पर्यटन आणि पर्यावरण मंत्रालयाचे संबंधित राज्यांचे प्रतिनिधी असतील.  सुरक्षेसंदर्भातील मंजूरीसाठी गृहमंत्रालयाशी तर वन आणि पर्यावरणासंदर्भात पर्यावरण मंत्रालयाशी आपल्या मंत्रालयाने सल्लामसलत केली असल्याचे ते म्हणाले. प्रत्येक प्रकल्पाचे स्वरुप लक्षात घेऊन पर्यावरणासंदर्भातील मंजूरी दिली जाईल अशी माहिती त्यांनी गुंतवणूकदारांना दिली.

   बहुतेक दीपगृह ही देशाच्या दुर्गम भागात आहेत, या दीपगृहांच्या पर्यटन विकासामुळे त्या-त्या भागात रोजगाराच्या संधी निर्माण होऊन तिथल्या अर्थव्यवस्थेला चालना मिळेल अशी अपेक्षा गडकरी यांनी यावेळी व्यक्त केली.  दीपगृह महासंचालनालयाने पर्यटनासाठी आकर्षण म्हणून तामिळनाडूतल्या चेन्नई आणि महाबलीपुरम्‌ तर केरळमधल्या ॲलेप्पी  आणि कॅनानोरे दीपगृहांचा विकास केला आणि पर्यटकांचा ओढा या दीपगृहांकडे वाढला, असे दीपगृह आणि दीपनौका महासंचालक कॅप्टन ए.एम. सूरज यांनी यावेळी सांगितले. 

महाराष्ट्रातल्या कान्होजी आंग्रे आणि संक रॉक, गोव्यातील ॲगौडा, केरळमधील कुडलूर पॉईंट, लक्षद्विपमधील मिनीकॉय, तामिळनाडूमधील महाबलीपुरम्‌ आणि कन्याकुमारी-मुत्तम् आणि ओदिशामधील चंद्रभागा या आठ दीपगृहांच्या विकासासाठी दीपगृह महासंचालनालयाने रिक्वेस्ट फॉर क्वॉलिफिकेशन अर्थात पात्रता विनंती मागवली आहे.  70 दीपगृहांसाठी स्वारस्य पत्र जारी करण्यात आले आहेत. 

     कल्पकतेला  प्रोत्साहन देण्यासाठी स्वीस चॅलेंज पध्दतीचा वापर करण्याचा जहाज बांधणी मंत्रालयाचा मानस आहे. पर्यटकांना आकर्षित करण्यासाठी दीपगृहांच्या परिसरात हॉटेल, सागरी जीवनाशी निगडीत गोष्टींचे वस्तु संग्रहालय, धाडसी क्रीडा प्रकार, लेझर शो यासह इतर सुविधांचा या विकास कामात समावेश आहे. दक्षिण कोरिया, स्कॉटलंड आणि दक्षिण आफ्रिका या देशांनी दीपगृह पर्यटनाचा पाया घातला. भारताने जरी या क्षेत्रात उशीराने पाऊल टाकले असले तरी भविष्यात लवकरच यामध्ये विकास साधला जाईल, अशी आशा आहे.

कोजागिरी निमित्‍त जिल्‍हाधिकारी पायी चालत तुळजापूरकडे जाताना

उस्‍मानाबाद -  कोजागिरी पोर्णिमेनिमित्‍त श्री तुळजाभवानी मंदीर संस्थानचे अध्‍यक्ष तथा जिल्हाधिकारी डॉ. प्रशांत नारनवरे यांच्‍यासह विविध खात्‍याचे अधिकारी सोमवारी सायंकाळी ४ वाजण्‍याच्‍या सुमारास उस्‍मानाबाद येथिल जिल्हाधिकारी कार्यालयातुन तुळजापूरकडे पायी रवाना झाले.

छाया -  राहुल कोरे

कोजागिरीनिमित्त तुळजापुरात भाविकांची मांदियाळी

तुळजापूर :- शारदीय नवरात्र महोत्सव व कोजागिरी पोर्णिमा निमित्त सोलापूर जिल्हा व शेजारील राज्यातून भाविक पायी चालत येत असतात. या भाविकांच्या मांदियाळीने संपूर्ण तुळजापूर-सोलापूर रस्ता फुलून गेल्याचे चित्र आज पाहायला मिळाले. या लाखो भाविकांनी  तुळजापुरात पायी चालत येऊन श्री तुळजाभवानी देवीचे दर्शन घेऊन आनंद उत्साहच साजरा केल्याचे चित्र दिसून येत होते. भाविकांमधील उत्साह कौतूकास्पद होता आणि प्रत्येक भाविक आपण तुळजापूरात देवीच्या दर्शनासाठी पायी चालत आल्याचा आनंद प्रत्येक भाविकांच्या चेहऱ्यावर दिसून येत होता. यावेळी प्रशासनाकडून मुख दर्शन, धर्मदर्शन आणि शिखर दर्शनाची स्वतंत्र रांगेत सोय करण्यात आल्याने भाविकांचे दर्शन सुलभ होत असल्याचे पाहायला मिळाले. सोलापूरसह विजापूर, इंडी यासह कर्नाटक राज्याच्या विविध भागातील भाविक श्री तुळजाभवानी देवीच्या दर्शनासाठी तुळजापुराकडे येत असल्याचे चित्र होते. युवा वर्ग, महिला याबरोबरच काही वृद्ध भाविकही पायी चालत येताना दिसत होते. 

उद्या (दि.27 रोजी) मंदिर पौर्णिमा व श्री तुळजाभवानी देवीची नित्योपचार पुजा आणि रात्रौ सोलापूरच्या काठयासह छबीना होणार आहे.                       

डॉ.नारनवरे यांच्याकडून स्वच्छता राखण्याचे आवाहन

उस्मानाबाद -: कोजागिरी पोर्णिमा निमित्त सोलापूर जिल्हा व शेजारील राज्यातून  भाविक पायी चालत येत असतात. भाविकांच्या सोयीसाठी सेवाभावी संस्थांकडून मोफत अन्नछत्रामार्फत फराळ व अल्पउपहाराची सोय दिली जाते. परंतू  अल्पउपहार झाल्यानंतर भाविकांकडून प्लेट, व इतर साहित्य कचरा कुंडीत टाकले जात नसून ते रस्त्यावर टाकून दिले जाते. त्याचा त्रास  मागून येणा-या भाविकांना होतो. अस्वच्छतेमुळे भाविकांच्या आरोग्यावर परिणाम होतो. यासाठी   श्री तुळजाभवानी मंदिर संस्थानचे अध्यक्ष तथा जिल्हाधिकारी डॉ.प्रशांत नारनवरे यांनी उस्मानाबाद-सोलापूर जिल्ह्याच्या हद्दीवरील तामलवाडी येथे स्वच्छचा मोहीम राबविली. 

     स्थानिक नागरिक आणि ग्रामपंचायतींनी आपल्या हद्दीत अस्वच्छता होणार नाही, तसेच त्याचा त्रास भाविकांना आणि ग्रामस्थांना होणार नाही, यासाठी स्वच्छता ठेवण्याचे आवाहन केले. त्याची सुरुवात डॉ. नारनवरे यांनी स्वताच केली. 

अनेक भाविक पायी चालत जाताना अन्नछत्राचा लाभ घेतात मात्र, त्यानंतर कागद अथवा अन्य पदार्थ रस्त्यावरच टाकतानाचे चित्र जागोजागी दिसते. जिल्हाधिकारी डॉ. नारनवरे यांनी दि. 25 रोजी रात्री या संपूर्ण मार्गावर पाहणी करुन आढावा घेतला, तेव्हा ही बाब त्यांच्या लक्षात आली. यामुळे भाविकांच्या आणि स्थानिक नागरिकांच्या आरोग्यालाही धोका निर्माण होऊ शकतो. त्यामुळे त्यांनी या परिसरात स्वच्छता मोहीम राबविण्याचे निर्देश दिले. पायी येणाऱ्या भाविकांनाही आवाहन करुन या मोहिमेत सहभागी होण्याचे तसेच या मार्गावर कचरा न करण्याचे आवाहन करण्यात आले. ठिकठिकाणी दुकानदारांनी तसेच मोफत अन्नछत्र उघडलेल्या स्वयंसेवी संस्थांनी कचरा पेटीची व्यवस्था केली आहे, तेथेच नागरिकांनी कचरा टाकण्याचे आवाहन करण्यात येत होते. 

याशिवाय, रस्त्याने चालताना काळजी घ्या, आपल्या कुटुंबियांबरोबर राहा, आपणास कोणतीही अडचण आल्यास शासकीय यंत्रणा, पोलीस नियंत्रण कक्ष यांच्याशी संपर्क साधण्याचे आवाहन करण्यात आले. याशिवाय, आरोग्याचा त्रास होऊ लागल्यास तात्काळ प्रथमोपचार मिळावे, यासाठी या मार्गावर रुग्णवाहिका उपलब्ध करुन देण्यात आल्या  आहेत तसेच प्रथमोपचार केंद्रेही कार्यान्वित करण्यात आली आहेत. ठिकठिकाणी पाणपोईची व्यवस्था केल्याने भाविक समाधान व्यक्त करीत होते. 

 या मोहिमेत जिल्हाधिकारी डॉ. नारनवरे यांच्यासह उप विभागीय अधिकारी तेजस चव्हाण, तहसीलदार काशीनाथ पाटील, गटविकास अधिकारी विलास खिल्लारे, सहायक गटविकास अधिकारी श्री.शिनगारे, विस्तार अधिकरी श्री. साळुंके, ग्रामसेवक एस.ए.कोठे, मंडळ अधिकारी, तलाठी यांच्यासह ग्रामपंचायत  कर्मचारी व नागरिकांची उपस्थिती होती. 

अस्वच्छता करणाऱ्या विक्रेत्यांवर व स्वयंसेवी संस्थावर ग्रामपंचायतीमार्फत दंडात्मक कार्यवाही करण्याचे निर्देश दिले. प्रत्येक विक्रेत्यांने परिसर स्वच्छता राखण्यासाठी कचरा पेटी ठेवण्याचे व भक्तांनी अन्न ग्रहण केल्यास त्यांचे पात्र व अन्य साहित्य कचरा पेटीत टाकून प्रशासनास सहकार्य करण्याचे आवाहन डॉ.नारनवरे यांनी केले. भाविकांनी पदार्थांचा दर्जा, स्वच्छता बघुनच खरेदी करावी, अपायकारक पदार्थ टाळावे, असे आवाहनही करण्यात आले आहे.

शासन दुष्‍काळग्रस्‍तांच्‍या पाठीशी : ना. लोणीकर

नळदुर्ग -: शासन शेतकरी व दुष्‍काळग्रस्‍तांच्‍या पाठीशी असून शेतक-यांच्‍या खात्‍यांवर साडे सातशे कोटी रुपये जमा करणारे एकमेव भाजप सरकार असल्‍याचे पाणीपुरवठा मंत्री ना. बबनराव लोणीकर यांनी नळदुर्ग येथे भाजप सरकारच्‍या वर्षपूर्ती निमित्‍त लोकसंवाद कार्यक्रमप्रसंगी बोलताना सांगितले.

ना. लोणीकर पुढे म्‍हणाले की, भविष्‍यात मुख्‍यमंत्री ग्रामसडक योजना, मुख्‍यमंत्री ग्रामीण पेयजल योजना राजाचा चेहरामोहरा बदलणार असल्‍याचे सांगून जलयुक्‍त शिवाराच्‍या माध्‍यमातून मराठवाड्यासह राज्‍य कायमस्‍वरुपी दुष्‍काळमुक्‍त करण्‍याचे मनोदय त्‍यांनी व्‍यक्‍त केले. राज्‍यात परकीय गुंतवणूक वाढत असल्‍यामुळे युवकांच्‍या हाताला मोठ्याप्रमाणावर रोजगार उपलब्‍ध होणार आहे, असेही ते म्हणाले.

याप्रसंगी भाजपाचे प्रदेश सरचिटणीस सुजितसिंह ठाकूर, जिल्‍हाध्‍यक्ष नितीन काळे, अॅड. अनिल काळे, सुशांत भूमकर, विजय शिंगाडे, दत्‍ता कुलकर्णी, नळदुर्ग शहराध्‍यक्ष पद्माकर घोडके, विशाल डुकरे आदीजण व्‍यासपीठावर उपस्थित होते. यावेळी सचिन घोडके, भिमाशंकर बताले, सागर हजारे, श्रमिक पोतदार, बापू दुरुगकर, शंकर वाघमारे, अजय ठाकूर, आकाश घोडके, बालाजी घोडके, रवी ठाकूर, दादा जाधव, प्रमोद कोकणे, रिकी पिस्‍के, आनंद लाटे यांच्‍यासह कार्यकर्ते उपस्थित होते.

बार्शी-भूम मार्गावर तवेरा गाडीची चोरी

पांगरी (गणेश गोडसे) :- भाड्याने गाडी करून घेऊन येऊन चालक प्रातविधीसाठी थांबलेल्याची संधी साधून गाडीतीलच पाच अनोळखी तरुणांनी माढा तालुक्यातील  चालकाजवळील तवेरा गाडी,रोख रक्कम व मोबाइल हँडसेट असा पाच लाख रुपयांचा मुद्देमाल चोरून नेल्याची घटना शनिवार दि. 24 रोजी साडे सात वाजण्याच्या सुमारास बार्शी-भूम मार्गावरील आगळगांव ते धनगरवाडी रस्त्यावर घडली.परमेश्वर दगडू भुजबळ वय 39 रा.सापटणे ता.माढा (टे) यांनी यासंदर्भात पांगरी पोलिसात फिर्याद दिली आहे.

याबाबत अधिक माहिती अशी की, काल परमेश्वर भुजबळ हे टेंभुर्णी (ता.माढा) येथे भाड्याची वाट बघत असताना त्यांच्याजवळ अनोळखी  पाच तरुणांनी येऊन आपल्याला बार्शीपासून पुढे दहा की.मी.अंतरांवर जायचे आहे असे सांगून गाडी भाड्याने केली.दरम्यान तवेरा गाडी क्रमांक एम.एच 45. 4955 ही बार्शीच्या पुढे आगळगांव-धनगरवाडी दरम्यान आली असता चालक प्रातविधीसाठी खाली उतरला.चालक गाडीत नसल्याची संधी साधून दोन मोबाइल हँडसेट रोख रक्कम व पाच लाख रुपये किमतीची तवेरा गाडी त्या अनोळखी तरुनांणी त्यांच्या समतीशिवाय लबाडीने चोरून नेली.भुजबळ यांनी पांगरी पोलिसात दिलेल्या फिर्यादीवरुण अज्ञात चोरट्याविरुद्ध चोरी केल्याप्रकरणी गुन्हा दाखल करण्यात आला आहे.अधिक तपास पोलिस उपनिरीक्षक राजू राठोड हे करत आहेत.

गाडी भाड्याने करून गाडीच लुटण्याचा प्रकार घडल्यामुळे वाहनचालकामधून खळबळ उडाली असून भविष्यात ओळखीशिवाय भाडे न घेण्याबाबतच्या चर्चेने वेग घेतला आहे.

पांगरीत वक्तृत्व स्‍पर्धा संपन्‍न

पांगरी (गणेश गोडसे) :- वाचनाने माणूस प्रगल्भ होतो,वाचनामुळेच माणूस वाचतो त्यासाठी लहानपणापासूनच वाचन गरजेचे असल्याचे प्रतिपादन बार्शी पंचायत समितीच्या माजी सभापती  सौ.कौशल्या माळी यांनी केले.त्या पांगरी ता.बार्शी येथे नवरात्र मोहोत्स्वानिमित्त जय भवानी मित्र मंडळातर्फे घेण्यात आलेल्या वक्तृत्व स्पर्धेच्या कार्यक्रमाच्या बक्षीस वितरण प्रसंगी बोलत होत्या.

अध्यक्षस्थानी सरपंच विजय गोडसे होते.कार्यक्रमाची सुरुवात मान्यवरांच्या हस्ते छत्रपती शिवाजी महाराजांच्या प्रतिमा पूजन व दिप प्रज्वलनाने करण्यात आली. ग्रामीण भागातील विद्यार्थ्यांना व्यासपीठ निर्माण करून देण्याच्या हेतूनं घेण्यात आलेल्या स्पर्धेत कु.करुणा रत्नाकर सरडे हिने सादर केलेल्या दुष्काळग्रस्त शेतकरी या विषयास प्रथम,कु.स्नेहल नवनाथ क्षीरसागर हिने सादर केलेल्या 'मुली वाचवा देश वाचवा' या विषयास द्वितीय,तर  कु.रोहिणी दातात्रय गोडसे हिने मांडलेल्या 'झाडे लावा झाडे जगावा या विषयास'तृतीय क्रमांक मिळाला.बक्षीस विजेत्यांना विजय गोडसे स्वप्नील काळे,शशिकांत नारकर यांच्या हस्ते बक्षीस वितरण करण्यात आले.यावेळी राहुल गोडसे,प्रतिक गोडसे,सागर गोडसे,श्रीराम काकडे उपस्थित होते. कार्यक्रमाच्या यशस्वीतेसाठी अजित गोडसे,विश्वास काकडे,राजेंद्र नाईकवाडी,विलास गोडसे,यशवंत गोडसे,महेश पौळ आदींनी परिश्रम घेतले॰स्पर्धेचे परीक्षक म्हणून माजी सभापती कौशल्या माळी,पत्रकार गणेश गोडसे,रोहिणी वासकर यांनी काम पाहिले. 

कोजागिरीनिमित्‍त 1 हजार बसेस धावाणार

       उस्मानाबाद - शारदीय नवरात्र महोत्सवाबरोबरच कोजागिरी पोर्णिमा पूर्वतयारी निमित्त घेतलेल्या बैठकीत जिल्हाधिकारी तथा मंदिर संस्थानचे अध्यक्ष डॉ. प्रशांत नारनवरे यांनी भाविकांना चांगल्या सोयी देण्याच्या सूचना दिल्या होत्या. भाविकांची गर्दी पाहता एस.टी. महामंडळाकडून विशेष नियोजन केले असून उस्मानाबाद व तुळजापूर आगारा व्यतिरिक्त मुख्य दिवशी औरंगाबाद प्रदेशाकडून 690 बसेस, पुणे यांच्याकडून 350 अशा एकूण 1 हजार 40 बसेस धावणार आहेत. 

              कोणत्याही यात्रेकरुंची गैरसोय होणार नाही, याची काळजी सर्व महामंडळातील अधिकारी-कर्मचारी घेत आहेत. कर्नाटक राज्यातील वाहतूकीसाठी तुळजापूर आगारातील नवीन बस स्थानक हे वाहतूकीचे केंद्र आहे. कोजागिरी पौर्णिमा वाहतूकीसाठी नियोजनासाठी 25 अधिकारी यांच्यासह 145 पर्यवेक्षकीय कर्मचारी तसेच मार्ग तपासणी कामासाठी 36 पर्यवेक्षकीय कर्मचाऱ्यांची नियुक्ती करण्यात आलेली आहे. 

लातूर औसा मार्गावर नवीन बस स्थानकाऐवजी कृषी उत्पन्न बाजार समिती मैदानावरुन पार्कीगसह, सोलापूर मार्गावर तुळजापूर आगारातील शेडवरुन प्रतिवर्षाप्रमाणे पार्कीग, तुळजापूर आगारात केवळ उस्मानाबाद विभाग,हेलीपॅड येथे उर्वरित सर्व विभाग तर उस्मानाबाद व बार्शी मार्ग हे जुन्या बस स्थानकावरुन पार्कीगसह सोयउपलब्ध करुन देण्यात आली आहे. 

      कोजागिरी पोर्णिमा वाहतूकीच्या मार्गात बदल असून कर्नाटक राज्यातील वाहतूक हुमनाबाद,गुलबर्गा व उमरगा या मार्गावरील वाहतूक तुळजापूर-पाटोदा फाटा-लोहारा-माकणी-नारंगवाडी-चौरस्ता-उमरगा या मार्गाने तर सोलापूर या मार्गावरील वाहतूक तुळजापूर-मंगरुळ फाटा-टेलरनगर-इटकळ-बोरामणी-सोलापूर या मार्गाने केली जाईल. तसेच  तुळजापूर-उस्मानाबाद-नारी चिखर्डे-बाशी या मार्गानेही बार्शीची वाहतूक केली जाईल. 

     भाविक हा केंद्रबिंदू मानून त्यांच्यासाठी एस.टी.महामंडळाच्या वतीने जुन्या बस स्थानकावर तसेच नवीन बसस्थानकावर 24 तास वाहतूक नियंत्रण कक्ष कार्यान्वित करण्यात आला आहे. भाविकांसाठी पिण्याच्या पाण्याची सोय, सुरक्षिततेसाठी बसस्थानकावर पोलीस चौकी, जुन्या बसस्थानकावर क्लॉक रुमची व्यवस्था करण्यात आली आहे. भाविकांच्या सोयीसाठी आगाऊ आरक्षण कक्ष उपलब्ध करुन देण्यात आलेला आहे. सुरक्षित प्रवासासाठी राज्य परिवहन भाविकांना एस.टी. बसेसनेच प्रवास करण्याचे आवाहन करण्‍यात आले. 

वाईट हेतूने घरात शिरल्‍यामुळे एकाचा खून

पांगरी (गणेश गोडसे) :-  वाईट हेतूने घरात शिरल्याचा राग मनात धरून एकाचा पिंपरणीच्या लाकडी काठीने बेदम मारहाण करून खून केल्याची घटना काल (दि.22) गुरुवारी रात्री 10 वाजता बार्शी-भूम रस्त्यावर काटेगांव-आगळगांव दरम्यान असलेल्या रोडक्या साईड पट्टीलगत असलेल्या मयताच्या शेताजवळ उघडकीस आली.

सुनील अभिमान गाढवे वय 51 रा.काटेगांव ता.बार्शी असे खून झालेल्याचे नांव असून अतुल विजयकुमार गाढवे असे खून केल्याप्रकरणी ताब्यात घेतलेल्या आरोपीचे नांव आहे.

  मयताचा मुलगा सचिन सुनील गाढवे (रा.काटेगांव वय 23) याने पांगरी पोलिसात दिलेल्या फिर्यादीत म्हटले आहे की,काल दि.22 गुरुवारी दुपारी दोन वाजता त्यांचे वडील मयत सुनील अभिमान गाढवे हे त्यांच्याच भावकीतील आरोपी अतुल गाढवे याच्या घरात फक्त अंतवस्‍त्रावरच उघडे होऊन जेवण मागण्याच्या निमित्ताने वाईट हेतूने शिरल्याचा संशय आल्याने त्याचा राग मनात धरून मयतावर पाळत ठेऊन ते शेतातील गोठ्याकडे जाताना गाठून पिंपरणीच्या लाकडी काठीने त्यांना बेदम मारहाण करून जीवे ठार मारले आहे असे म्हटले आहे.

स.पो.नि.सोमनाथ वाघ,श्री.केकान,गृहरक्षक दलाचे समीर शेख,श्री.गरड हे पांगरी पोलिसांची गाडी रात्र गस्तीसाठी हद्दीतील आगळगांव,काटेगांव भागात घेऊन गेल्यानंतर त्यांना ही खुनाची घटना निदर्शनास आली.त्यानंतर पोलिसांनी तात्काळ सूत्रे हलवून आरोपीस ताब्यात घेतले.

  बार्शी येथील ग्रामीण रुग्णालयात वैद्यकीय अधीक्षक डॉ.शितल भोपलकर यांनी शवविछेदन केले.डोके,मेंदू व शरीरातील इतर अवयांवर बेदम मारहाण झाल्यामुळे मृतू झाल्याचे वैद्यकीय अहवालात म्हटले आहे.सचिन गाढवे यांनी दिलेल्या फिर्यादीवरून अतुल गाढवे याच्यावर जिवे ठार मारल्याप्रकरणी गुन्हा नोंद करण्यात आला.घटनास्थळास उपविभागीय अधिकारी प्रशांत अमृतकर यांनी भेट देऊन पाहणी केली असून अधिक तपास पांगरीचे स.पो.नि.सोमनाथ वाघ करत आहेत.

शेतक-यांना शेतीउपयोगी साहित्‍याचे वाटप

पांगरी (गणेश गोडसे) :- ग्रामीण भागातील आर्थिक द्रुस्टया आर्थिक संकटात सापडलेल्या बळीराजाराला उभारणी देण्याच्या उद्दात्त हेतूने पांगरी येथील प्रोडूसर मृदगंध अॅग्रो प्रोडूसर कंपनीच्या वतीने परिसरातील सभासद शेतकर्‍यांना महाराष्ट्र स्पर्धाक्षम कृषी विकास प्रकल्पाअंतर्गत (एमएसिपी) हरभरा पीक प्रात्याक्षिक 2015-16 साठी दहा टक्के लोकवाट्यातून त्यासाठी लागणारे विविध साहित्य मोफत वाटप करण्यात आले.

 प्रात्याक्षिक कार्यक्रमाअंतर्गत प्रती सभासद शेतकर्‍यांस 20 किलो हरभरा बियाणे,50 किलोची एक डि.ए.पी.ची ब्याग ,याबरोबरच बियानांवर प्रक्रिया करण्यासाठी विविध औषधे,फवारणीसाठी विविध कीटकणाशके आदी साहित्य वाटप करण्यात आले.मृदगंध अॅग्रो प्रोडूसर कंपनीच्या माध्यमातून या पिकाच्या प्रात्याक्षिकासाठी (एटिएमए)आत्मा सोलापूर यांच्या अधिकार्‍यांचे सहकार्य लाभले.भविष्यातही शेतकर्‍यांसाठी कंपनीमार्फत विविध विकासात्मक योजना राबवल्या जातील असे अधिकार्‍यांनी सांगितले. 

  बियाणे वाटप कार्यक्रम प्रसंगी कंपनीचे अध्यक्ष सतीश जाधव,सचिव रामलिंग सुरवसे,संचालक गणेश गोडसे,बाबा शिंदे,लक्ष्मण  बनसोडे,पदमाकर बाभळे,भाऊसाहेब घावटे,चंद्र्कांत पाटील,प्रशांत उकिरडे यांच्यासह पांगरी परिसरातील विविध गावातील सभासद शेतकरी मोठ्या संख्येने उपस्थित होते.

विद्यार्थ्यांना शैक्षणिक साहित्य वाटप

नळदुर्ग :- स्वत:च्या उत्पन्नातून दुसर्‍याचे संसार उभे करणे आणि वंचितांना मदत करणे ही कृती सहिष्णुतेची असल्‍याचे मत पंडित कैलास (राजस्‍‍थान) यांनी व्‍यक्‍त केले.

तुळजापूर तालुक्यातील बाभळगाव येथील वैष्णोदेवी फुड प्रॉक्टस्डच्या वतीने अपंग, निराधार व मुकबधीर विद्यार्थ्यांना शैक्षणिक साहित्य वाटप करण्यात आले. यावेळी ते बोलत होते. अध्यक्षस्थानी गोविंद काकाणी तर प्रमुख पाहुणे म्हणून राजकुमारी काकाणी, पंडित मेघराज, वैष्णोदेवी फुड्सचे मालक नवनीत काकाणी, निधी काकाणी, महाव्यवस्थापक विजय मुळे, उपव्यवस्थापक महेंद्र जाधव, आपलं घरचे व्‍यवस्‍थापक शिवाजी पोतदार आदींची उपस्थिती होती. प्रास्ताविक विजय मुळे, सूत्रसंचालन रामकृष्‍ण गायकवाड यांनी केले तर शिवाजी चव्हाण यांनी आभार मानले.

या कंपनीच्या वतीने नळदुर्ग येथील चैतन्य मुकबधीर विद्यालय, नूतन अपंग विद्यालय, आपलंघर या संस्थांना शैक्षणिक साहित्य देण्यात आले. 

धम्मचक्र प्रवर्तन दिनी उसळला भीमसागर

नागपूर :- बुद्धमं सरणं गच्छामि, धम्ममं सरणं गच्छामि!.च्या मंत्रघोषात विजयादशमी दिनी नागपूरच्या दीक्षाभूमीवर ५९ वा धम्मचक्र प्र्वतन दिन उत्साहात साजरा झाला. महाराष्ट्र तसेच देशाच्या कानाकोप-यातून आलेल्या लाखो भीमानुयायांचा सागर दीक्षाभूमीवर उसळला होता.

     नागवंशीयांच्या नागपूरात १४ ऑक्टोबर १९५६ साली महामानव डॉ. बाबासाहेब आंबेडकर यांनी आपल्या लाखो समाजबांधवांसह बौद्ध धम्माची दीक्षा घेऊन देशात एक नवी धम्मक्रांती केली होती. तो दसरा, ‘विजया दशमी’चा दिवस बाबासाहेबांनी धम्मदीक्षेसाठी निवडला होता. त्यामुळे हा दिवस दरवर्षी धम्मचक्र प्रवर्तन दिन म्हणून सर्वत्र साजरा केला जातो.

     शुभ्र वस्त्रे, पंचशील ध्वज आणि ‘जय भीम’चा नारा देत गुरुवारी धम्मचक्र प्रवर्तन दिनानिमित्त बौद्ध बांधवांनी दीक्षाभूमीवर तथागत भगवान गौतम बुद्ध आणि डॉ. बाबासाहेब आंबेडकर यांच्या विचारांचा जागर केला.

     दीक्षाभूमीवरील बोधीवृक्षाला एक ऐतिहासिक महत्त्व आहे. तथागत गौतम बुद्धांना ज्या बोधिवृक्षाखाली बुद्धत्वाची प्राप्ती झाली त्या रोपट्याचा तो बोधिवृक्ष आता बहरला आहे.

      याच बोधिवृक्षाखाली भिक्खू संघाचे सूत्तपठन सुरू होते. तसेच देशविदेशातून आलेले शेकडो भिक्खूही या पूजेत सहभागी झाले होते. या सोहळ्याला लाखोंच्या संख्येने होणारी गर्दी पाहता बुधवारी आदल्या दिवशीच बौद्ध बांधवांनी डॉ. बाबासाहेब आंबेडकरांच्या अस्थिकलशाचे दर्शन घेतले. दीक्षाभूमीवर कडेकोट सुरक्षाव्यवस्था ठेवण्यात आली आहे.

     दीक्षाभूमी परिसरात गुरुवारी सकाळपासूनच विविध कार्यक्रमांची रेलचेल सुरू होती. दीक्षाभूमी परिसरात फुले- शाहू- आंबेडकरी चळवळीतील अनेक ग्रंथ विक्रीसाठी ठेवण्यात आले होते.

तुळजाभवानी देवीची महिषासुर मर्दिनी अलंकार महापूजा

तुळजापूर -: शारदीय नवरात्र महोत्सवात बुधवारी दुर्गाष्टमी दिवशी तुळजापुरात श्री तुळजाभवानी देवीची महिषापूर मर्दिनी अलंकार महापूजा मांडण्यात आली. शेवटची माळ असल्याने भाविकांनी दर्शनासाठी व देवीचे व महिषासूराचे रुप पाहण्यासाठी प्रचंड गर्दी केली होती. 
        श्री तुळजाभवानीची आज नित्योपचार पुजा आणि अभिषेक पूजेनंतर महिषासूर मर्दिनी अलंकार महापूजा मांडण्यात आली. ज्यावेळी महिषासुर देवतांना हाकलून दिले व स्वत: स्वर्गाचा आनंद भोगू लागला. साक्षात पार्वती अवतार असलेल्या श्री तुळजाभवानी माता सर्व देवांच्या तेजापासून उत्पन्न झालेली जगदंबा माता भवानी आहे. हिने सर्व दैत्यांचा राजा महिषासुरचा वध केला व सर्व देवतांना सर्व प्राप्तीचा आनंद दिला. त्यामुळे देवीला महाअलंकार घालण्यात येऊन महिषासुर मर्दिनी अलंकार महापूजा मांडण्यात येते. अशी आख्यायिका सांगितली जाते. 

सिध्दीविनायक मल्टीस्टेट संस्थेच्या वर्धापन

उस्मानाबाद -  श्री सिध्दीविनायक मल्टीस्टेट या संस्थेच्या वर्धापन दिनानिमित्त जिल्हा सहनिबंधक शिवाजी बडे यांनी संस्थेला भेट दिली. यावेळी संस्थापक दत्ता कुलकर्णी यांच्या हस्ते बडे यांचा सत्कार करण्यात आला. यावेळी चेअरमन बालाजी कोरे, प्रवीण पाठक, ऍड. सचिन मिनीयार, धनंजय रणदिवे, गणेश कामटे, राजेश घुटे, अभिजीत पाटील, अमित मोदाणी, इंद्रजित देवकते व संस्थेचे संचालक व कर्मचारी उपस्थित होते. 

छाया- राहुल कोरे

सैन्य दलात अधिकारी पदाची सुवर्ण संधी

      उस्मानाबाद - भारतीय सैन्यदलात व वायुदलात अधिकारी होण्यासाठी पात्र उमेदवारांना एस.एस.बी. प्रशिक्षण वर्ग ठेवण्यात आलेला आहे. सदरच्या प्रशिक्षण वर्गासाठी सैन्य दलातील तज्ञ अधिकाऱ्यांकडून प्रशिक्षण मिळणार आहे. 

      कंबाईन्ड डिफेन्स सर्व्हिसेस या परिक्षेत उर्त्तीण झालेल्या व स्पेशल एंट्री द्वारे सैन्यदलात अधिकारी होऊ इच्छिणाऱ्या तसेच ज्या महाराष्ट्रीयन नवयुवक/युवतींना सशत्र सैन्यदलाकडून एस. एस. बी. परिक्षेची मुलाखत पत्रे मिळाली आहेत, अशा उमेदवारांना सर्व्हिसेस सिलेक्शन बोर्ड मुलाखतीच्या पुर्वतयारीसाठी महाराष्ट्र शासनामार्फत छात्रपूर्व प्रशिक्षण क्रेंद्र, विभागीय महसूल आयुक्त कार्यालय परिसर नाशिक रोड, नाशिक येथे वर्ग चालविण्यात येणार आहेत. प्रशिक्षण कोर्सचा कालावधी दि.27 ऑक्टोबर ते 5 नोव्हेंबर (एकूण10 दिवस) असा आहे. प्रशिक्षणकालावधीत निवासची, प्रशिक्षणाची व भोजनाची सोय विनामुल्य करण्यात आली आहे. 

तरी इच्छुक व पात्र उमेदवारांनी प्रशिक्षण वर्गात प्रवेश घेण्यासाठी दि. 19 ऑक्टोंबर रोजी सकाळी 11 वाजता जिल्हा सैनिक  कार्यालय,उस्मानाबाद येथे खालील प्रमाणे पात्रता धारण करीत असतील अशाच उमेदवारांनी शैक्षणीक प्रमाणपत्र व गुणपत्रिका मुळ प्रतीसह मुलाखतीस हजर राहावे. अधिक माहितीसाठी कार्यालयाचा दुरध्वनी क्रं.02427-222557 वर संपर्क साधावा. एस. एस.बी.च्या वर्गासाठी खालील प्रमाणे कोणतीही एक पात्रता आवश्यक आहे व हृया सबंधीचे पात्रता प्रमाणपत्र कोर्सला घेउन येणेआवश्याक आहे. कंबाईन्ड डिफेंन्स सर्विसेस एक्झीमिनेशन अथवा नॅशनल डिफेंस ॲकडमी एक्झीमिनेशन उत्तीर्ण असावे व त्यासठी सर्व्हिसेस सिलेक्शन बोर्ड मुलाखतीसाठी पात्र झालेले असावे. एन.सी.सी.सर्टिफिकेट ए,बी ग्रेड मध्ये पास झालेले असावे व एन.सी.सी ग्रुप हेडक्वार्टने एस.एस.बी.साठी शिफारस केलली असावी.टेक्नीकल र्गॅज्यूएट कोर्ससाठी एस.एस.बी.मुलाखतीसाठी कॉल लेटर असावे.युनिव्हर्सिटी एर्न्टी स्किमसाठी एस.एस.बी कॉल आलेले असावे अथवा एस.एस.बी शिफारस केलेल्या यादीत नाव असावे. तरी वरील प्रशिक्षण वर्गाचा जास्तीत जास्त पात्र महाराष्ट्रीयन तरूण/तरूणींनी लाभ घ्यावा असे आवाहन जिल्हा सैनिक कल्याण अधिकारी, (नि) सुभाष सासने,यांनी एका पत्रकान्वये केले आहे.           

फटाके विक्री स्टॉल परवानगी साठीचे अर्ज करण्याचे आवाहन

      उस्मानाबाद -  प्रतिवर्षाप्रमाणे दिपावली सणानिमीत्त तात्पुरते फटाके विक्री स्टॉल परवानगी साठीचे अर्ज दि. 23 आक्टोंबर ते 4 नोव्हेंबरपर्यत जिल्हाधिकारी कार्यालय, उस्मानाबाद येथे कार्यालयीन वेळेत सादर करावेत. 

         सदर परवानगीसाठी विहित नमुन्यातील अर्ज, फॉर्म एलई-5, ओळखपत्र, संबंधीत ग्रामपंचायत/नगरपरिषदेचे नाहरकत प्रमाणपत्र व साक्षांकीत नकाशा, संबंधीत जागा खाजगी असेल तर जागामालकीचे ना हरकत व जागेचे कागदपत्र, संबंधीत पोलीस स्टेशनचे नाहरकत प्रमाणपत्र व विहित परवाना फीस भरणा केल्याचे चलन सादर करावे. परिपुर्ण असलेले प्रस्ताव या कार्यालयात स्विकारले जातील. विहित मुदतीनंतर आलेल्या अर्जाचा विचार केला जाणार नाही, असे आवाहन अपर जिल्हादंडाधिकारी, उस्मानाबाद यांनी एका पत्रकान्वये केले आहे.    

तुळजाभवानी : भवानी तलवार अलंकार महापूजा

तुळजापूर   - शारदीय नवरात्र महोत्सवात  मंगळवार आठव्या दिवशी तुळजापुरात श्री तुळजाभवानी देवीची भवानी तलवार अलंकार महापूजा मांडण्यात आली. दर्शनासाठी भाविकांनी प्रचंड गर्दी केली होती. 

    राज्य व परराज्यातील चालत येणा-या  भाविकांच्या संख्येत प्रचंड प्रमाणात वाढ झाली आहे. भाविकांची वाढती संख्या लक्षात घेऊन मंदिर संस्थानने वेळेवर सर्वांना दर्शन मिळावे यासाठी गर्दीचे नियंत्रण करुन दर्शनरांग नियंत्रित केली. या शिस्तबद्धतेमुळे भाविकांना कोणताही त्रास न  होता चांगल्या पद्धतीने दर्शन घेता आले. 

श्री तुळजाभवानीची आज नित्योपचार पुजा आणि अभिषेक पूजेनंतर भवानी तलवार  अलंकार महापूजा मांडण्यात आली. श्री छत्रपती शिवाजी महाराज यांना धर्म रक्षणासाठी श्री तुळजाभवानी मातेने प्रसन्न होऊन आपल्या हाताने भवानी तलवार देऊन आर्शीर्वाद दिला म्हणून या दिवशी श्रींस महाअलंकार घालण्यात येऊन छत्रपती भवानी तलवार देत आहे, ही अवतार पूजा मांडण्यात येते.  दरम्यान, काल रात्री श्री देवीजींची छबिना मिरवणूक काढण्यात आली.  यावेळीही भाविकांनी मोठी गर्दी केली होती. उद्या (दि. 21 रोजी) श्री तुळजाभवानी देवीची महिषासूर मर्दिनी अलंकार महापूजा मांडण्यात येणार आहे. 

सातशे भाविकांची कुटुंबियाशी घडली पुन:र्भेट

      उस्मानाबाद -  भाविक सहकुटुंब त्या तीर्थक्षेत्राच्या ठिकाणी येतात. लाखो भाविक जेव्हा एकत्र येतात, तेव्हा गर्दीच्या भाऊगर्दीत एखादा लहानगा, अथवा घरातील वृद्ध व्यक्ती त्या गर्दीत दुरावते. अशावेळी त्या कुटुंबातील इतर सदस्यांची अक्षरश: त्यांना शोधण्यासाठी धावपळ सुरु असते. अशावेळी या कुटुंबांतील सदस्यांना पोलीसांचे मदत केंद्र हा मोठा आधार ठरत आहे.

      एखादी व्यक्तीची या गर्दीत ताटातूट झाली की लगेचच त्या पोलीस चौकीत येऊन माहिती दिली की, पोलीस त्यांच्या शोधासाठी  तात्काळ ध्वनीक्षेपकावरुन सातत्याने माहिती देऊन आणि त्या नातेवाईंकाना धीर देत त्यांची एकमेकांची पुनर्भेट घडवून आणत आहेत. नवरात्र सुरु झाल्यापासून अशा तब्बल सातशे व्यक्ती चुकामुकीनंतर पुन्हा आपल्या कुटुंबियांसोबत त्यांच्या घरी रवाना झाल्या आहेत. एकमेकांची भेट झाल्यानंतर त्यांच्या चेहऱ्यावर उमटलेला आनंद या पोलीसांना कामाची पावती मिळाल्याचे समाधान देत आहे. 

          महाराष्ट्राची कुलस्वामीनी श्री तुळजाभवानीच्या शारदीय नवरात्र महोत्सवास तुळजापूर येथे दि.13 रोजी प्रारंभ झाला. पहिल्या दिवसापासूनच राज्यभरासह कर्नाटक आणि आंध्रप्रदेशातील भाविकांचा तुळजापूरकडे येण्याचा ओघ वाढला. काही भाविक तर चालत तुळजापूरकडे येत असल्याचे चित्र पहिल्या दिवसापासूनच पाहायला मिळाले. या गर्दीचे नियंत्रण करण्यासाठी पहिल्या दिवसापासूनच पोलीस तसेच मंदिर संस्थानच्या यंत्रणेने चांगले प्रयत्न केले. भाविकांच्या मदतीसाठी ठिकठिकाणी फलक लावून तसेच स्वयंसेवकांच्या मदतीने त्यांना मार्गदर्शनासाठी मदत केली. मात्र, तरीही आजपर्यंतच्या आठ दिवसांत तब्बल सातशे जणांची त्यांच्या कुटुंबियांपासून चुकामूक  झाली. चुकामुक झाल्यानंतर त्यांच्या कुटुंबियांनी सुरुवातीला शोधाशोध करुनही संबंधीत व्यक्ती सापडला नाही तर पोलीस मदत कक्ष किंवा नियंत्रण कक्षाशी संपर्क साधत होते. 

त्यानंतर पोलीस यंत्रणा तात्काळ संबंधीत व्यक्तीचे नाव, तो कोठला आहे याची माहिती ध्वनीक्षेपकावरुन देऊन त्या व्यक्तीने मदतकेंद्राजवळ येण्याचे आवाहन करीत होते. विशेष म्हणजे, संबंधीत नातेवाईकांनाही , तुम्ही माईकवर बोला, म्हणजे त्यांच्या लक्षात येईल, असे सांगून त्यांना आवाहन करण्यास सांगत होते. याचा सकारात्मक परिणाम होऊन अशी चुकामुक झालेली अनेक जण सापडल्याची उदाहरणे या आठ दिवसात घडली. त्याची नोंदही या पोलीस मदत केंद्रांत केली जात होती. नवरात्र काळात 24 तास हे मदत केंद्र भाविकांच्या मदतीसाठी सुरु आहे. त्यांच्या या प्रयत्नाला यश आल्याचे पाहायला मिळाल्यानंतर या कर्मचाऱ्यांच्या चेहऱ्यावरही समाधान उमटत होते.  तुळजापूर शहराच्या विविध भागात ही मदत कक्ष उघडण्यात आले. मंदिर, महाद्वार आणि घाटशीळ चौक येथे कार्यान्वित असणाऱ्या या पोलीस चौकीत एकूण सातशे व्यक्ती हरवल्याची नोंद झाली आणि विशेष  म्हणजे, त्या व्यक्ती सापडल्याचीही!

नवरात्रात पोलीस अधीक्षक अभिषेक त्रिमुखे, अतिरिक्त पोलीस अधीक्षक दीपाली घाडगे-घाटे, सहायक पोलीस अधीक्षक प्रियंका भगत-नारनवरे यांच्या अधिपत्याखाली पोलीस प्रशासनाने पोलीस बंदोबस्तासाठी  उस्मानाबाद जिल्ह्यातील 46 वरिष्ठ पोलीस अधिकारी व 500 कर्मचारी आणि सोलापूर, लातूर आणि खंडाळा येथील पोलीस प्रशिक्षण केंद्रातील 62 वरिष्ठ पोलीस अधिकारी, 1 हजार कर्मचारी आणि 500 होमगार्ड या बंदोबस्तासाठी तैनात केले आहेत. त्यांच्या माध्यमातून पोलीस संपूर्ण तुळजापूर शहरात भाविकांच्या सुरक्षेसाठी अहोरात्र कार्यरत आहेत.

दरम्यान, या उत्सवादरम्यान विविध यंत्रणाही भाविकांना सोई-सुविधा मिळाव्यात यासाठी रात्रंदिवस प्रयत्न करीत आहेत. भाविकांना पिण्याच्या पाण्याची गैरसोय होऊ नये म्हणून नगरपालिकेच्या वतीने शहरात दररोज पाणीपुरवठा करण्यात येत आहे. बाहेरुन आलेल्या भाविकांची गैरसोय होऊ नये यासाठी विविध ठिकाणी पाणपोईची सोय उपलब्ध करुन देण्यात आली आहे. 

मंदीर प्रशासनाच्या वतीने नवरात्र महोत्सवाच्या पूर्वसंध्येला जिल्हाधिकारी तथा मंदिर संस्थानचे अध्यक्ष डॉ. प्रशांत नारनवरे यांनी सर्व प्रशासकीय यंत्रणांची बैठका घेऊन यात्रा कालावधीत सुयोग्य नियोजन करुन त्यांचे तंतोतत पालन करण्याच्या सूचना दिल्या होत्या. त्यानुसार सर्व विभाग आपली जबाबदारी चोख बजावत असल्यामुळेच या यात्रा कालावधीत भाविकांसाठी सज्ज असल्याचे दिसून आले.  

जिल्‍हाध्‍यक्षपदी अॅड मनीषा राखुंडे - पाटील

  उस्‍मानाबाद - मराठा सेवा संघाच्‍या जिजाउ ब्रीगेड उस्‍मानाबाद जिल्‍हाध्‍यक्षपदी अॅड मनीषा  राखुंडे - पाटील यांची निवड करण्‍यात आली . यावेळी संस्‍थापक अध्‍यक्ष पुरषोत्‍तम खेडेकर , प्रकाश धस यांच्‍या हस्‍तेनियुक्‍तीपत्र देवुन सत्‍कार करण्‍यात आला. यावेळी पुडलिक वैराळे, प्रा. अरूण गाढवे, रोहित पडवळ , ओम नाईकवाडी , राजसिंह राजे निबाळकर , उमेश राजेनिबाळकर , खंडु राउूत आदि. ‍    

स्वच्छ भारत अभियानाला वेग - नीरज वाजपेयी

     मुबई -   गेले वर्षभर सुरु असलेले “स्वच्छ भारत अभियान” लोकप्रियतेची नवीन शिखरे सर करत असताना, स्वच्छतेबाबत जनसामान्यांमध्ये जागरुकतादेखील  वेगाने पसरते  आहे. अभियान केवळ कागदपत्रांमध्ये अडकून राहणार नाही. हे अनेक यशोगाथा  आणि स्वच्छतेबाबत वाढती वचनबध्दता यावरुन सिध्द होते

   केवळ अधिकरीच  नाही तर सहभागी झालेल्या अनेक सामाजिक संस्था तसेच अन्य विभाग अभियानाचे स्वरुप आणि त्याच्या यशाची आकडेवारी सादर करत आहेत. आता, बहुतांश लोक  आणि सरकारी तसेच बिगर सरकारी  संस्था स्वच्छ भारताचे स्वप्न पूर्ण करण्यात गुंतले आहेत. शहर विकास मंत्री एम. वेंकय्या नायडू यांच्या मते, स्वच्छ भारत अभियान सरकारच्या प्रमुख उपक्रमांपैकी एक आहे, अन्य उपक्रम मागणीद्वारे प्रेरित आहेत. तर हया अभियानाचा उद्देश स्वच्छता सेवा आणि पायाभूत सुविधांसाठी मागणी निर्माण करणे हा आहे. यामध्ये लोकांना प्रेरित करणे आणि योग्य सवय लावून घेण्यासाठी त्यांना सजग करणे समाविष्ट आहे.

       आपल्या अनोख्या स्वरुपामुळे, स्वच्छ भारत अभियान ही केंद्र सरकारकडून चालवण्यात आलेल्या सर्व नवीन अभियानांची जननी आहे, असे नायडू म्हणतात. जग देखील याकडे मोठया उत्सुकतेने पाहत आहे. गेल्यावर्षी ऑक्टोबरमध्ये पंतप्रधानांनी अभियानाचा शुभारंभ  केल्यानंतर देशभरात विविध वयोगटातील लोक प्रेरित झाले आणि हेच या अभियानाचे सर्वात मोठे यश असल्याचे नायडू यांनी सांगितले.

   व्यवहारात्मक परिवर्तन अधिक सुदृढ  आणि संघटित करण्यासाठी गेल्या महिन्यात एक ठोस अभियान सुरु करण्यात आले. लोकांना स्वच्छतेप्रती प्रेरित  करण्यासाठी हे अभियान पुढल्यावर्षी मार्चपर्यंत 11 विशिष्ट क्षेत्रांमध्ये राबवण्यात येणार आहे. यात कृषी आणि धान्य बाजार, धार्मिक आणि पर्यटन स्थळे, शिक्षण संस्था, भुयारी मार्ग, उड्डाण पूल, छावणी परिसर, जलाशय, करमणुकीची ठिकाणे, रुग्णालये, जुनी शहरे  आणि सरकारी कार्यालये यांचा समावेश आहे.

   स्वच्छ भारत अभियानाच्या वर्षपूर्तीनिमित्त स्वच्छ भारत परिषदेचे आयोजन करण्यात येणार आहे. यावर्षी ऑगस्ट महिन्यांपर्यंत प्राप्त         झालेल्या अहवालानुसार, गुजरात, मध्यप्रदेश, कर्नाटक, पंजाब, छत्तीसगड, आंध्र प्रदेश, राजस्थान आणि हरियाणा या राज्यांनी घरांमध्ये शौचालये बांधण्याच्या कामात चांगली प्रगती केली आहे. मार्च 2016 पर्यंत, शहरी भागात, 25 लाख घरांमध्ये शौचालये  बांधण्याचे  जे उद्दिष्ट आहे, त्यापैकी 16 लाख 45 हजार  शौचालयांचे बांधकाम सुरु आहे. उत्तर प्रदेश, बिहार, तामिळनाडू यांसारख्या प्रमुख राज्यांनी याकामी अद्याप गती पकडलेली नाही. केरळ, दिल्ली, अंदमान-निकोबार द्विपसमूह, चंडिगढ, दमण, दीव, दादरा नगर हवेली, अरुणाचल प्रदेश, नागालँड, मेघालय, त्रिपुरा या राज्यांमध्ये शौचालयांचे बांधकाम  अद्याप सुरुही झालेले नाही.

   याकामात अनेक राज्यांनी दाखवलेल्या उत्साहाबाबत नायडू म्हणाले की,  शहरी भागात प्रत्येक शौचालयाच्या बांधकामासाठी केंद्र सरकारकडून देण्यात  येणाऱ्या  4 हजार रुपये अर्थसहाय्या व्यतिरिक्त 13 राज्ये 4 हजार ते 13 हजार रुपये अतिरिक्त अर्थसहाय्य देत आहेत.

घनकचरा व्यवस्थापनामध्ये चंडिगढ अव्वल 

     डेंग्यू, मलेरिया यांसारख्या आजारांचा सामना करण्यासाठी स्वच्छता अभियान आणि जनजागृती  कार्यक्रम राबवणे आवश्यक आहे. अनेक ठिकाणी  स्थानिक रहिवासी संघटना स्वच्छता अभियान राबवले आणि स्वत: निधी गोळा करुन धूर फवारणीची यंत्रे खरेदी केली.  पंतप्रधानांनी 69 व्या  स्वातंत्र्यदिनी लाल किल्ल्यावरुन केलेल्या भाषणात अभिमानाने स्वच्छ भारत अभियान यशस्वी झाल्याचे जाहीर केले. समाजातील सर्व वर्गातील लोक यामध्ये सहभागी झाल्याचे ते म्हणाले. या अभियानाला सर्वात जास्त पाठिंबा 10 ते 15 वर्षे वयोगटातील कोटयावधी मुलांकडून मिळाला आणि ते या अभियानाचे सर्वात मोठे दूत बनले.

    आता कुठे हे अभियान सुरु झाले आहे, ते पुढे न्यायचे आहे असे पंतप्रधान म्हणाले. शाळांमध्ये सव्वा चार लाख शौचालये बांधण्याचे उद्दिष्ट जवळपास पूर्ण झाले आहे असे ते म्हणाले. गेल्या वर्षभरात अनेक राज्यांनी तसेच केंद्रीय  मंत्रालयानी या दिशेने अनेक योजना सुरु केल्या.

सिंचन विहिरींची कामे मार्चपर्यंत पूर्ण करण्‍याचे आवाहन

      मुंबई -  राज्यात शेतकरी आत्महत्याग्रस्त भागातील सिंचन विहिरींचे  अपूर्ण कामे मार्चपर्यंत पूर्ण करावीत. ज्या विहिरींचे कामे पूर्ण झाले आहेत त्यांना तात्काळ विज पुरवठा देण्यासाठी जिल्हा प्रशासनाने पुढाकार घ्यावा. मंत्रालयस्तरावरील निर्णयांची प्रभावी अंमलबजावणी क्षेत्रियस्तरावर करुन सामान्यांना जलद प्रशासनाचा अनुभव दयावा, असे आवाहन मुख्य सचिव स्वाधीन क्षत्रिय यांनी आज येथे केले.

    मंत्रालयात व्हिडीओ कॉन्फरन्सिंगद्वारे राज्यातील पीक परिस्थिती, दुष्काळसदृष परिस्थितीत करावयाच्या उपाययोजना, स्वच्छ महाराष्ट्र, जलयुक्त शिवार, आधार क्रमांक नोंदणी आदि विविध विषयांबाबतचा आढावा विभागीय आयुक्त, जिल्हाधिकारी, जिल्हा परिषदेचे मुख्य कार्यकारी अधिकारी, महापालिका आयुक्त यांच्याकडून घेण्यात आला. त्यावेळी मुख्य सचिव बोलत होते.

   क्षत्रिय पुढे म्हणाले की, राज्यातील 14,708 गावांमध्ये दुष्काळसदृष परिस्थिती जाहिर करण्याबाबत मंत्रिमंडळाच्या उपसमितीने निर्णय घेतला आहे. या दुष्काळसदृष परिस्थितीत करावयाच्या उपाययोजनाबाबत जिल्हा प्रशासनाने सजग राहून प्रभावी कार्यवाही केली पाहिजे.

       जलयुक्त शिवार योजनेतंर्गत ज्या ज्या ठिकाणी कामे पूर्ण झाली आहेत त्याबाबतची छायाचित्रे तत्काळ अपलोड करणे आवश्यक आहे. यवतमाळ आणि उस्मानाबाद या दोन जिल्ह्यांमध्ये शेततळे बांधण्याचा कार्यक्रम हाती घेण्यात येणार आहे. पुढील चार वर्षांत दोन्ही जिल्ह्यांमध्ये प्रत्येकी चार हजार शेततळी करण्यात येणार आहे. ही योजना यशस्वी करण्यासाठी प्रशासनाने अधिक परिश्रम घेण्याचे आवाहनही मुख्य सचिवांनी केले.

        शेतकरी आत्महत्याग्रस्त जिल्ह्यांमध्ये धडक सिंचन विहिरी, जवाहर विहिरी आणि नरेगातून करावयाच्या विहिरींची कामे मोठया प्रमाणावर अपूर्णावस्थेत आहेत ती तातडीने पूर्ण करावीत. या विहिरींच्या कामांच्या प्रगतीमध्ये वाढ दिसली पाहिजे. मार्च 2016 पर्यंत या सर्व विहिरींची कामे पूर्ण झाली पाहिजेत ज्या विहिरी पूर्ण झाल्या आहेत त्यांना तत्काळ वीजपुरवठा दिला पाहिजे असेही मुख्य सचिवांनी यावेळी सांगितले. नरेगाच्या माध्यमातून विहिरींचे कामे मोठया प्रमाणावर यशस्वी करण्याची किमया मध्य प्रदेशात साधण्यात आली आहे. महाराष्ट्रात हा प्रयोग यशस्वी होण्याकरिता मध्यप्रदेशच्या मुख्य सचिवांना महाराष्ट्रात येण्याचे निमंत्रण देण्यात आले असून त्यांनी ते स्विकारले आहे. लवकरच यासंदर्भात त्यांच्यासोबत वरिष्ठ सचिवांची बैठक घेऊन विहिरींची कामे कशाप्रकारे जलद गतीने होतील यासाठी प्रयत्न करण्यात येतील, राज्यातील 14 जिल्ह्यांमध्ये वनहक्क कायद्यातंर्गत आदिवासी बांधवांना जमिनी देण्यात आल्या आहेत त्यांची मोजणी करून सातबारा देण्यासाठी मोठी मोहिम हाती घेण्याचे निर्देशही मुख्य सचिवांनी यावेळी दिले.

      राज्याने स्वच्छ महाराष्ट्र अभियानात गती घेतली आहे. मार्च 2016 पर्यंत पाच हजार गावे, 25 तालुके आणि दोन जिल्हे हगणदारीमुक्त करण्यासाठी प्रयत्न करावेत. या मोहिमेसाठी सात जिल्ह्यांमध्ये भारतीय प्रशासन सेवेतील परिविक्षाधीन अधिकारी नोडल ऑफिसर म्हणून नेमण्यात आले आहेत. त्यांच्यावर एक-एक गावाची जबाबदारी सोपविण्यात यावी, असे सांगून मुख्य सचिव पुढे म्हणाले की, ग्रामीण भागात महात्मा गांधी रोजगार हमी योजनेतून शौचालयाची कामेदेखील करण्याची परवानगी असल्याने या कामांना गती देऊन महाराष्ट्रातील गावे हागणदारीमुक्त होण्यासाठी मोहिम हाती घेतली पाहिजे. स्वच्छ गाव, स्वच्छ शहरे याबरोबरच स्वच्छ दवाखाने असले पाहिजे यासाठी विभागीय आयुक्त, जिल्हाधिकारी, महापालिका आयुक्त यांनी संयुक्तपणे मोहिम उदयापासून सुरु करावी असे निर्देश त्यांनी यावेळी दिले.

      राज्यात नागरी भागात 92 टक्के लोकांकडून शौचालयाचा वापर केला जातो. राज्यात आठ लाख शौचालय बांधण्याचा उद्देश असून 250 नगरपरिषदांमध्ये सुमारे पाच लाख शौचालय बांधण्यात येणार आहेत. यासाठी महापालिका आयुक्त, जिल्हाधिकारी यांनी पुढाकार घेतला पाहिजे. राज्यात डिसेंबरअखेर 34 शहरे हागणदारीमुक्त होणार असून ही अभिनंदनीय बाब आहे. नागरिकांमध्ये शौचालयाचा वापर आणि स्वच्छतेविषयी जागरुकता निर्माण करणे आवश्यक आहे.

      मुख्य सचिव पुढे म्हणाले की, आधार क्रमांक नोंदणीचे काम 89.25 टक्के करुन राज्याने आघाडी घेतली आहे मात्र अद्यापही ज्यांची आधार क्रमांक नोंदणी झालेली नाही याबाबतची कार्यवाही डिसेंबरअखेर पूर्ण करावी. यासाठी सर्व जिल्हाधिकारी, जिल्हा परिषदेचे मुख्य कार्यकारी अधिकारी व महापालिका आयुक्तांनी संयुक्तपणे सहभाग घेऊन शंभर टक्क्यांचे उद्दिष्ट पूर्ण करण्याचे आव्हान मुख्य सचिवांनी यावेळी केले. राज्यात 29 सप्टेंबर 2009 पूर्वीचे जे अनधिकृत धार्मिक स्थळांचे बांधकाम आहे ते नियमित करुन अथवा त्यांचे स्थलांतर करण्याबाबत तसेच 2009 नंतरच्या अनधिकृत धार्मिक स्थळांचे बांधकामाबाबत उच्च न्यायालयाचे जे आदेश आहेत त्यानुसार कार्यवाही करावी.

       लाचलुचपत प्रतिबंधक विभागाने केलेल्या वेगवेगळया कारवाईत राज्यात 42 जणांना न्यायालयाने दोषी ठरविले आहे. अद्यापही या 42 जणांना सेवेतून बडतर्फ करण्यात आले नाही. या कारवाईस विलंब का झाला असे विचारणा करुन मुख्य सचिव म्हणाले की, लाचलुचपत प्रतिबंधक विभागाच्या कारवाईत दोषी आढळलेल्यांवर कारवाई न करणाऱ्या सक्षम प्राधिकाऱ्याला जबाबदार धरण्यात येईल आणि त्यांना कारवाईला सामोरे जावे लागेल असे त्यांनी सांगितले. 

      यावेळी निती आयोगातंर्गत रस्त्यांची प्रलंबित कामे, रेल्वेच्या ओव्हर ब्रिज बांधकामासाठी परवानगी देणे, कौशल्य विकास कार्यक्रम आदिंबाबत आढावा घेण्यात आला.

   बैठकीस सामान्य प्रशासन विभागाचे अपर मुख्य सचिव पी. एस. मीना, कृषी विभागाचे अपर मुख्य सचिव डी. के. जैन, मुख्यमंत्र्याचे प्रधान सचिव प्रविण परदेशी, वित्त विभागाचे प्रधान सचिव विजय कुमार, पाणी पुरवठा व स्वच्छता विभागाचे प्रधान सचिव राजेश कुमार, आदिवासी विभागाचे प्रधान सचिव राजगोपाळ देवरा, कौशल्य विकास विभागाचे प्रधान सचिव एस. एस. संधु, मुंबई महापालिका आयुक्त अजोय मेहता, सामाजिक न्याय विभागाचे प्रधान सचिव उज्ज्वल उके, वन विभागाचे सचिव विकास खारगे, मदत व पुनर्वसन विभागाचे सचिव गोविंदराज, नगर विकास विभागाच्या सचिव मनीषा म्हैसकर, जलसंधारण विभागाचे सचिव प्रभाकर देशमुख, नगर परिषद संचालनालयाच्या संचालक मीता राजीव लोचन, माहिती तंत्रज्ञान संचालक शंकर नारायणन् आदिंसह विविध विभागाचे अधिकारी उपस्थित होते.

तुळजाभवानी - शेषशाही अलंकार महापूजा

उस्मानाबाद - शारदीय नवरात्र महोत्सवात  सोमवारी सातव्या दिवशी तुळजापुरात श्री तुळजाभवानी देवीची शेषशाही अलंकार महापूजा मांडण्यात आली.  श्री तुळजाभवानी देवीचे हे रुप पाहण्यासाठी आणि दर्शनासाठी भाविकांनी प्रचंड गर्दी केली होती. पाचव्या माळेपासूनच राज्य व परराज्यातील भाविकांची पावले तुळजापूरच्या दिशेने वळत आहेत. भाविकांची वाढती संख्या लक्षात घेऊन मंदिर संस्थानने वेळेवर सर्वांना दर्शन मिळावे यासाठी गर्दीचे नियंत्रण करुन  दर्शनरांग नियंत्रित केली. या शिस्तबद्धतेमुळे भाविकांना कोणताही त्रास न  होता चांगल्या पद्धतीने दर्शन घेता आले. 

श्री तुळजाभवानीची आज नित्योपचार पुजा आणि अभिषेक पूजेनंतर शेषशाही अलंकार महापूजा मांडण्यात आली.  श्री तुळजाभवानीचे हे रुप डोळ्यांत साठवण्यासाठी दूरवरुन भाविक मंदिराकडे येत होते. मंदिर परिसर व अवघे तुळजापूर या गर्दीने गजबजून गेले आहे. यात्रेकरुंना कोणताही त्रास सहन करावा लागू नये, यासाठी मंदिर संस्थान, पोलीस प्रशासन, जिल्हा प्रशासनाच्या विविध यंत्रणा जिल्हाधिकारी तथा मंदिर संस्थानचे अध्यक्ष  डॉ.प्रशांत नारनवरे, जिल्हा पोलीस प्रमुख अभिषेक त्रिमुखे, अपर पोलीस अधीक्षक दीपाली घाडगे-घाटे, उपविभागीय अधिकारी तेजस  चव्हाण यांनी दिलेल्या सूचनेनुसार गर्दीवर नियंत्रण ठेवत आहेत. 

दरम्यान, काल रात्री श्री देवीजींची छबिना मिरवणूक काढण्यात आली. यावेळीही भाविकांनी मोठी गर्दी केली होती.  उद्या (दि. 20 रोजी) श्री तुळजाभवानी देवीची भवानी तलवार अलंकार महापूजा मांडण्यात येणार आहे.    

 या नवरात्रीच्या पार्श्वभूमीवर सर्व यंत्रणांच्या सहकार्याने एकत्रितपणे हा उत्सव यशस्वी करण्यासाठी मंदिर प्रशासन प्रयत्न करीत आहे. त्यामुळे विविध कामांच्या समन्वयासाठी उपजिल्हाधिकारी दर्जाच्या अधिकाऱ्यांची नियुक्ती करण्यात आली आहे. हे अधिकारी त्यांना सोपविण्यात आलेल्या जबाबदारीचा दैनंदिनरित्या आढावा घेत असल्याने यात्रा काळात समन्वय राखणे शक्य झाले आहे. याशिवाय, यंदा प्रथमच तब्बल तीनशे तलाठी, कोतवाल आणि पोलीस पाटील यांना आपत्ती व्यवस्थापनअंतर्गत नवरात्र उत्सवात सेवा बजावण्यास सांगण्यात आले आहे. विविध ठिकाणी समन्वयाचे काम, तसेच गर्दी व्यवस्थापनाचे काम त्यांच्यावर देण्यात आले आहे. अतिशय चांगल्या पद्धतीने ते त्यांची सेवा बजावतानाचे चित्र पाहायला मिळाले.

नारी: घरफोडी करून साहित्‍य लंपास

     पांगरी (गणेश गोडसे )  सैनिकाच्या बंद घराचे कुलूप तोडून अज्ञात चोरट्यांनी घरातील सोन्या-चांदीच्या दागिन्यांसह इतर 55 हजार रुपयांचे साहित्य चोरून नेल्याची घटना नारी ता.बार्शी येथे घडली.

              विष्णु रामलिंग कुरूंद असे चोरी झालेल्याचे नांव आहे.पोपट कुरूंद यांनी पांगरी पोलिसात दिलेल्या फिर्यादीत म्हटले आहे की,त्यांचे भाऊ विष्णु हे भारतीय सैन्यात असल्याने ते कुटुंबासह पुणे येथे राहत आहेत.त्यामुळे बंद घराचा गैरफायदा घेत कोणीतरी अज्ञात चोरट्याने दरवाजाचे कुलूप तोडून आत प्रवेश करून घरातील लोखंडी पेटी मध्ये ठेवलेली 9500 रुपये किमतीची लेडीज अंगठी,11 हजार रुपये किमतीची 4 ग्रॅमची सोन्याची अंगठी,27 हजार रुपये किमतीच्या 5 ग्रॅमच्या दोन अंगठ्या,पाच हजार रुपये किमतीचे टॉप्स,एक साखळी असा 55 हजार रुपयांचा माल कोणीतरी चोरट्याने लबाडीने चोरून नेला.

 तसेच कुरूंद यांच्याप्रमाणेच गावातीलच शंकर अच्युत बदले याच्या घरातील लहान मुलांच्या पायातील चांदीच्या पट्ट्या,नारायण भास्कर शिंदे यांच्या घरातील पाच साड्या व रोकड,केसरबाई गव्हाने यांच्या घरातून साड्या व रोकड चोरट्यांनी लंपास केली.पांडुरंग आबा पाटील यांच्या घराचा पत्रा उचकटून चोरीचा अयशस्वी प्रयत्न केला.पोपट कुरूंद यांच्या फिर्‍यादिवरून पांगरी पोलिसात अज्ञात चोरट्याविरुद्ध चोरी केल्याप्रकरणी गुन्हा दाखल केला असून अधिक तपास हवालदार धन्नप्पा शेटे हे करत आहेत.

तुळजापूर : एस.टी. नियोजनामुळे भाविकांची सोय

           उस्मानाबाद -  शारदीय नवरात्र महोत्सवाच्या पार्श्वभूमीवर राज्य परिवहन महामंडळाने भाविकांच्या सोईसाठी केलेल्या नियोजनामुळे भाविकांतून समाधान व्‍यक्‍त केले जात आहेत. वेगवेगळ्या मार्गावरुन येणाऱ्या तसेच कर्नाटक राज्यातील बस आगारांच्या बसेससाठी केलेल्या स्वतंत्र व्यवस्थेमुळे भाविकांचीही सोय झाली आहे. त्यामुळे भाविकांची संख्या दररोज वाढती असली तरी उत्कृष्ट नियोजनामुळे यावर्षी राज्य परिवहन महामंडळाच्या उस्मानाबाद विभाग आणि तुळजापूर आगाराकडून भाविकांना चांगली सेवा मिळत असल्याचे चित्र आहे.

   शारदीय नवरात्र महोत्सवाच्या पूर्वतयारीनिमित्त घेतलेल्या बैठकीत जिल्हाधिकारी तथा मंदिर संस्थानचे अध्यक्ष डॉ. प्रशांत नारनवरे यांनी सर्व विभागांना या नवरात्रोत्सवात सर्वोत्कृष्ट सेवा देण्याच्या सूचना दिल्या होत्या. भाविकांची कोणत्याही दृष्टीने गैरसोय होणार नाही, याचे नियोजन करण्याचे निर्देशही त्यांनी दिले होते. त्यानुसार प्रत्येक यंत्रणा कार्यरत आहेत. 

   राज्य परिवहन महामंडळानेही वाहतूकीचे नियोजन दोन टप्प्यात केले आहे. पहिला टप्पा दसऱ्यापर्यंत चालणार  असून दुसऱ्या टप्प्यात कोजागिरी पौर्णिमेसाठी विशेष वाहतूक दि.24 ते 30 ऑक्टोबर ,2015 पर्यंत करण्यात येणार आहे. भाविकांची गर्दी पाहता त्यांच्या सोयीसाठी पुरेशा एस.टी. बसेस उपलब्ध करुन देण्यात आल्या असून त्या नियमित सोडण्यात येत आहेत. कोणत्याही यात्रेकरुंची गैरसोय होणार नाही, याची काळजी सर्व महामंडळातील अधिकारी-कर्मचारी घेत आहेत. 

    प्रथम सत्रात उस्मानाबाद विभागाकडून कर्नाटक राज्यातील वाहतूक व महाराष्ट्रातील सोलापूर,  बार्शी, लातूर, उस्मानाबाद व उमरगा व इतर मार्गावर वाहतूक करण्यासाठी 110 बसेस उपलब्ध करण्यात आल्या आहेत तर द्वितीय सत्रातील पोर्णिमा वाहतूकीसाठी मुख्य दिवशी औरंगाबाद प्रदेशाकडून 690 बसेस, पुणे यांच्याकडून 350 अशा एकूण 1 हजार 40 बसेस नियोजनानुसार धावणार आहेत. 

    कर्नाटक राज्यातील वाहतूकीसाठी तुळजापूर आगारातील नवीन बस स्थानक हे वाहतूकीचे केंद्र आहे. या यात्रा वाहतूकीच्या नियोजनासाठी 3 पाळयामध्ये प्रत्येकी एक पर्यवेक्षक व तीन वाहतूक नियंत्रक आणि सकाळी 9 ते सांयकाळी 6 या पाळीमध्ये एक सहायक वाहतूक अधिकारी आणि वाहतूक निरीक्षक नियुक्त करण्यात आले असून ते या सर्व बसेस वाहतूक नियोजन आणि अंमलबजावणीवर लक्ष ठेवून आहेत.  

   नवरात्र कालावधीमध्ये नियोजनासाठी 10 अधिकारी यांच्यासह 60 पर्यवेक्षकीय कर्मचारी तसेच मार्ग तपासणी कामासाठी 21 पर्यवेक्षकीय कर्मचाऱ्यांची नियुक्ती करण्यात आलेली आहे. तर जुने बस स्थानकावरुन तुळजापूर-सोलापूर, तुळजापूर- उस्मानाबाद या प्रमुख मार्गावर वाहतूक केली जात आहे. येथेही तीन पाळीमध्ये अधिकारी व कर्मचारी नियुक्त केले आहेत. 

    भाविक हा केंद्रबिंदू मानून त्यांच्यासाठी एस.टी.महामंडळाच्या वतीने जुन्या बस स्थानकावर तसेच नवीन बसस्थानकावर 24 तास वाहतूक नियंत्रण कक्ष कार्यान्वित करण्यात आला आहे. भाविकांसाठी पिण्याच्या पाण्याची सोय, सुरक्षिततेसाठी बसस्थानकावर पोलीस चौकी, जुन्या बसस्थानकावर क्लॉक रुमची व्यव

स्था करण्यात आली आहे. भाविकांच्या सोयीसाठी आगाऊ आरक्षण कक्ष उपलब्ध करुन देण्यात आलेला आहे. सुरक्षित प्रवासासाठी राज्य परिवहन भाविकांना एस.टी. बसेसनेच प्रवास करण्याचे आवाहन याठिकाणी करताना दिसत आहे. 

कीडरोग उपाययोजना व सल्ला

        उस्मानाबाद - जिल्हृयात तुर,कापूस किड रोग सर्वेक्षण व सल्ला प्रकल्प सन 2015-16 अंर्तगत केलेल्या निरिक्षणावरून सध्या तुर पिकावर काही ठिकाणी पाने गुंडाळणरी अळीचा प्रादुर्भाव दिसून येत असून कापूस पिकावरील रसशेाषन करणाऱ्या किडीचा प्रादुर्भाव दिसून येत आहे.किडीच्या नियंत्रणासाठी पुढील प्रमाणे योजना सुचविण्यात येत आहे.

        तुर-पिकावरील शेंगा पोखरणारी (हेलिकोवर्पा)अळीच्या नियंत्रणासठी क्लोरपायरीफॉस 20 ईसी 2 मिली किंवा क्विनॉलफॉस 25 ईसी 2 मिली प्रती लिटर पाण्यात मिसळून फवारावे.फुलोऱ्यामधील तुरीसाठी निंबोळी अर्क 5 टक्के किंवा एच.एन.पी.व्ही.500मिली या प्रमाणे फवारणी करावी. 

कापुस-पिकावरील रस शोषणाऱ्या किडीच्या नियंत्रणासाठी डायफेनथ्युरॉन 50 डब्लू पी 1.2 ग्राम किंवा ब्रुप्रोफेझीन 25 एस सी 1 ग्राम प्रती लिटर पाण्यात मिसळून फवारावे.सदरील किटकनाशकाचे प्रमाण साध्या पंपासाठी असून पेट्रोल पंपासाठी किटक-नाशकाची मात्रा 3 पट करावी.पाने लाल पडल्यास माग्रोसियम सल्फेट 1 टक्का किंवा युरिया 2 टक्के ची फवारणी करावी.असे आवाहन उपविभागिय कृषी अधिकारी केले आहे.                                                     

रद्दी खरेदीसाठी दरपत्रके सादर करावीत

          उस्मानाबाद -  येथील जिल्हा माहिती कार्यालयातील रद्दीची विक्री करावयाची  असून त्यासाठी इच्छुक खरेदीदारांनी रद्दी खरेदीबाबतची दरपत्रके जिल्हा माहिती कार्यालय, कक्ष क्र. 41, मध्यवर्ती प्रशासकीय इमारत,उस्मानाबाद येथे कार्यालयीन कामकाजाच्या दिवशी आणि कार्यालयीन वेळेत दि. 26 ऑक्‍टोबर 2015 पर्यंत सादर करावीत. या मुदतीनंतर प्राप्त होणाऱ्या दरपत्रकांचा विचार केला जाणार नाही याची सर्व संबंधितांनी नोंद घ्यावी.

    दरपत्रकात वृत्तपत्रांच्या तसेच इतर प्रकाशनाच्या रद्दीचा व अन्य किरकोळ रद्दीचा दर स्वतंत्रपणे नमुद करावा. रद्दी विक्रीच्या अटी व शर्ती कामकाजाच्या दिवशी व कार्यालयीन कामकाजाच्या वेळेत पाहण्यासाठी उपलब्ध असल्याचे जिल्हा माहिती अधिकारी,उस्मानाबाद ,यांनी कळविले आहे.   

राज्यमंत्री कांबळे यांनी घेतले तुळजाभवानीचे दर्शन

   उस्मानाबाद -  राज्याचे सामाजीक न्याय व विशेष सहाय, मदत व पुनर्वसन,अल्पसंख्यांक विकास व वक्फ आणि राज्य उत्पादन शुल्क राज्यमंत्री .दिलीप कांबळे यांनी आज सहकुटुंब तुळजापूर येथे श्री तुळजाभवानी देवीचे दर्शन घेऊन आशीर्वाद घेतले. 

       त्यानंतर मंदीर संस्थानच्या वतीने तहसीलदार काशीनाथ पाटील यांनी त्यांना श्री तुळजाभवानी मातेची  प्रतिमा, शाल, श्रीफळ देऊन सत्कार केला. यावेळी नितीन काळे, माजी नगराध्यक्षा संगीता कदम, धनंजय शिंगाडे, बंटी मंजूळे, प्रभाकर मुळे, मंदिर संस्थानचे व्यवस्थापक दिलीप नाईकवाडी यांच्यासह पदाधिकाऱ्यांची उपस्थिती होती.       

श्री तुळजाभवानी देवीजींची रथ अलंकाराने महापूजा

  उस्मानाबाद - तुळजापूर येथे शारदीय नवरात्र महोत्सवात आजपासून पाचव्या माळेच्या दिवशी श्री तुळजाभवानी देवीची ललित पंचमी निमित्त श्रीदेवीजींची नित्योपचार पूजेनंतर रथ अलंकार महापूजा बांधण्यात आली.       आज शनिवार असल्यामुळे तुळजापूरात विविध भागातून व आंध्र व कनार्टक राज्यातून येणाऱ्या भाविकांनी श्री तुळजाभवानी देवीच्या दर्शनासाठी मोठी गर्दी केली होती. 

भाविकांची गैरसोय होऊ नये, यासाठी जिल्हाधिकारी तथा मंदीर संस्थानचे अध्यक्ष डॉ.प्रशांत नारनवरे, पोलीस अधीक्षक अभिषेक त्रिमुखे, अप्पर पोलीस अधीक्षक दिपाली घाडगे-घाटे, उप विभागीय पोलीस अधिकारी प्रियंका भगत-नारनवरे, मंदीर संस्थानचे तहसीलदार तथा व्यवस्थापक (प्रशासन)  सुजित नरहरे यांच्या मार्गदर्शनाखाली प्रशासनातील अधिकारी व कर्मचारी अहोरात्र प्रयत्न करत आहेत.   

ललीता पंचमी निमित्त आज रथ अलंकार पूजा मांडण्यात येते. भगवान सुर्यनारायण यांनी त्रिलोक भ्रमणासाठी आपला रथ श्री भवानी मातेस दिला. याप्रमाणे रथ अलंकार अवतार पूजा मांडण्यात येते, अशी आख्यायिका सांगितली जाते.                  

        दररोज नियमित श्री तुळजाभवानी देवीजींचे विविध धार्मिक विधी विधीवत पार पाडले जातात.  यात, उद्या दि. 18 रोजी मुरली अलंकार महापूजा, दि. 19 रोजी शेषशाही अलंकार महापूजा,दि. 20 रोजी भवानी तलवार अलंकार महापूजा आणि दि. 21 रोजी महिषासूर मर्दिनी अलंकार महापूजा होणार आहेत. तत्पूर्वी, काल (शुक्रवारी) रात्री 10 वाजता श्री देवीजींची छबिना मिरवणूक काढण्यात आली.

या देवीच्या दर्शनासाठी अवघ्या महाराष्ट्रासह आंध्र प्रदेश, कर्नाटक आदी राज्यातून मोठ्या प्रमाणात भाविक येत आहेत. जिल्हाधिकारी तथा मंदिर संस्थानचे अध्यक्ष डॉ. प्रशांत नारनवरे यांनी नवीन केलेल्या बदलास भाविकांकडून मोठया प्रमाणात प्रतिसाद मिळत असून  एक ते दोन तासात गोंधळ न होता दर्शन होत असल्यामुळे भाविकांमधून उत्साहाचे वातावरण आहे. याशिवाय, दर्शनरांगांच्या ठिकाणी भाविकांच्या विश्रांतीसाठी कक्ष उघडल्यानेही भाविक या विश्राती कक्षात विश्रांती घेत आहेत.दर्शनरांगेच्या सुरुवातीलाच धर्मदर्शन आणि मुखदर्शन तसेच अभिषेक पूजेची स्वतंत्र रांग असल्याने भाविकांची गर्दी विभागली जाऊन प्रत्येकाला श्री देवीजींचे दर्शन होत आहे.