विठ्ठल मंदिर प्रवेश आंदोलन : तुळजापुरहून वारकरी निघाले विठ्ठलाकडे

                                              

 तुळजापुर : कुमार नाईकवाडी

 कुलस्वामिनी श्री तुळजाभवानी मातेच्या दरबातुन श्री देवीचे कळस दर्शन घेऊन विश्व वारकरी सेना तुळजापुर यांचे दि.३१ सोमवार रोजी तुळजापुर हुन श्री क्षेत्र पंढरपूर कडे टाळ मृधगांच्या गजरात श्री" विठ्ठलाचे "व श्री "तुळजा भवानी" मातेचे दार उघडले पाहिजे असा जयघोष करीत तिर्थ क्षेत्र  पंढरपूर कडे वंचित बहुजन आघाडीचे प्रकाश आंबेडकर यांना पाठींबा देण्यासाठी  सोमवारी सकाळी रवाना झाले.

 या विश्ववारकरी सेना दिंडीत ह.भ.प.धनाजी कुरुंद मोहन महाराज शिंदे मिलींद रोकडे जिवन कदम विकास बनसोडे के.टी गायकवाड आस्मिता पारवे सुरेश चौधरी आदीसह विश्ववारकरी सेनेचे वारकरी साहित्य कार्यकर्ते उपस्थित होते.

तुळजापूर : छावा संघटनेच्या नूतन पदाधिका-यांच्या निवडी संपन्न

 

तुळजापूर : कुमार नाईकवाडी

अखिल भारतीय छावा संघटनेची आज सोमवार दि. 31 ऑगस्ट रोजी तुळजापूर येथे बैठक संपन्न झाली. या बैठकीत नूतन पदाधिका-यांच्या निवडी करण्यात आल्या तर. शेकडो युवकांनी संघटनेत जाहीर प्रवेश केला. 

तुळजापूर येथे छावा संघटनेची सोमवार रोजी बैठक संपन्न झाली. यावेळी पुढीलप्रमाणे पदाधिका-यांची निवड करण्यात आली. उस्मानाबाद जिल्हाध्यक्षपदी दिनेश रोचकरी  (तुळजापुर विभाग), शशिकांत पाटील (उस्मानबाद-कंळब विभाग), जिल्हा कार्याध्यक्ष राजेंद्र साळुंके, जिल्हा उपाध्यक्ष विजय माने, तुळजापुर तालुकाध्यक्ष लखन मोटे, तालुका कार्याध्यक्ष प्रसाद शिंदे, उपाध्यक्ष कमलराजे शिंदे, तालुका सचिव महादेव शिंदे, तुळजापुर शहर अध्यक्ष आण्णासाहेब इंगळे यांची निवड करण्यात आली. तर  भुम, परंडा, उस्मानाबाद, उमरगा, लोहारा, कळंब, तुळजापुर येथील शेकडो युवकांनी प्रवेश केला.

या बैठकीस संघटनेचे केंद्रीय कार्याध्यक्ष नानासाहेब जावळे पाटील, विद्यार्थी आघाडी प्रदेश विजयकुमार घाडगे पाटील, प्रदेश अध्यक्ष पंजाबराव काळे पाटील, पिपंरी चिचंवड शहर अध्यक्ष गणेश जाधव, उस्मानाबाद युवक जिल्हाध्यक्ष कालीदास गायकवाड  यांची प्रमुख उपस्थिती होती. प्रास्ताविक विजय माने यांनी तर सुत्रसंचालन शशिकांत पाटील यांनी केले.

कोरोना : उस्मानाबाद जिल्ह्यात आज 134 पॉजिटीव्ह; तर सहा जणांचा मृत्यू

 

उस्मानाबाद, दि. 31 : उस्मानाबाद जिल्हयात आज सोमवार दि. 31 ऑगस्ट रोजी सायंकाळी प्राप्त झालेल्या अहवालानुसार 134 जणांचे अहवाल पॉजिटीव्ह आले आहेत.  तसेच आज दिवसभरात 109 जण बरे होवून घरी परतले आहेत. तर गेल्या चोवीस तासात 6 जणांचा मृत्यू झाला आहे. 

जिल्ह्यात कोरानाबाधित रुग्णांची एकूण संख्या 5 हजार 684 झाली आहे. यातील 3 हजार 661 रुग्ण बरे झाले असून आतापर्यंत 148 जणांचा मृत्यू झाला आहे. सध्या 1 हजार 875 जणांवर उपचार सुरु असल्याची माहिती जिल्हा प्रशासनाने दिली.

पोलीस पाटील यांना 50 लाखाचे विमा कवच द्या

उस्मानाबाद, दि. 31 : राज्यातील गाव पातळीवर काम करणारे पोलीस पाटील हे गावातील कायदा व सुव्यवस्था अबाधित ठेवण्यासोबतच कोरोना महामारीचा सामना स्वतःचा जीव धोक्यात घालून करीत आहेत, राज्य सरकारच्या अन्य कर्मचाऱ्याप्रमाणे पोलीस पाटील यांना 50 लाखाचे विमा संरक्षण द्यावे, अशी मागणी महाराष्ट्र राज्य गाव कामगार पोलीस पाटील संघटनेच्या वतीने जिल्हाधिकारी यांच्या मार्फत मुख्यमंत्री उद्धव ठाकरे यांच्याकडे केली आहे.

या संदर्भात पोलीस पाटील संघटनेच्या वतीने जिल्हाधिकारी यांना दिलेल्या निवेदनात म्हटले आहे की, जागतिक कोरोना महामारीचा प्रादुर्भाव रोखण्यासाठी गाव पातळीवर कोरोना सहाय्यता समितीचे गठन करण्यात आले आहे, या समितीचे पोलीस पाटील हे सदस्य सचिव म्हणून काम करीत आहेत, कोरोना विषाणूचा प्रादुर्भाव रोखताना जळगाव जिल्ह्यातील व अन्य जिल्ह्यातील पोलीस पाटील यांचा दुर्दैवाने मृत्यू झालेला आहे, राज्य सरकारने सर्व शासकीय, निमशासकीय कर्मचाऱ्यांना कोरोना महामारीने मृत्यू झाल्यास 50 लाखाचे विमा संरक्षण दिले आहे, त्या प्रमाणे पोलीस पाटील यांना 50 लाखाचे विमा संरक्षण द्यावे, अशी मागणी करण्यात आली आहे, निवेदनावर जिल्हाध्यक्ष हनुमंत देवकते, मीडिया जिल्हाध्यक्ष सुभाष कदम-पाटील, जिल्हा उपाध्यक्ष राहुल वाकुरे-पाटील, अजित शिंदे, तानाजी जाधव, सुनिल अंधारे, यांच्या सह्या आहेत,

याच मागणीचे निवेदन भाजपचे आमदार रानाजगजितसिंह पाटील यांना दिले असून हा विषय गृहमंत्री व मुख्यमंत्री यांच्या निदर्शनास आणून सोडविण्यासाठी प्रयत्न करण्याचे आश्वासन दिले.  

बंजारा मिशनच्या प्रदेश युवा अध्यक्षपदी अर्जुन राठोड यांची निवड

नळदुर्ग, दि. 31 : तुळजापूर तालुक्यातील वडाचा तांडा (होर्टी) येथील अर्जुन राठोड यांची राष्ट्रीय बंजारा मिशनच्या महाराष्ट्र प्रदेश युवा अध्यक्ष पदी निवड करण्यात आली आहे.

सामाजिक कार्यकर्ते  अर्जुन राठोड यांचे गेल्या अनेक वर्षा पासूनचे सामाजिक काम  पाहून राष्ट्रीय अध्यक्ष देवराव राठोड यांनी  निवड केली आहे.  बंजारा समाजाला एस. टीचे आरक्षण लागू व्हावे हा उद्देश मनात ठेवून येणाऱ्या काळात राज्यभर दौरा काढून समाजातील सर्व युवकांना संघटनेत सामील करून संघटना अधिक मजबूत करून वेळ प्रसंगी आंदोलन करून समाजाला एस.टीचे आरक्षण लागू होण्यासाठी प्रयत्न करणार असल्याचे  अर्जुन  राठोड यांनी सांगितले आहे,

त्यांच्या या निवडीबद्दल सरपंच सौ.विजया चव्हाण ,उपसरपंच सौ.निमाबाई राठोड, ग्राम पंचायत सदस्य लखन चव्हाण, सौ चांगुणा चव्हाण ,सौ.ललिता चव्हाण ,किसन राठोड ,रेवाप्पा राठोड,शिवाजी राठोड,बाबू राठोड, रणजित चव्हाण ,प्रेमदास राठोड,विजय राठोड,राहुल राठोड,नंदू पवार ,सुनील जाधव,जयराम राठोड आदीनी आभिनंदन करुन शुभेच्छा दिले आहे.

तुळजापूर : न.प. च्यावतीने श्री गणेश मुर्तीचे संकलन करुन करणार एकत्रित विसर्जन

 

तुळजापुर : कुमार नाईकवाडी

कोरोनाच्या पार्श्वभूमीवर मंगळवार दि. 1 सप्टेंबर रोजी अनंत चतुर्दशी दिनी  श्री गणेश विसर्जनावेळी गर्दी टाळण्यासाठी प्रतिबंधात्मक उपाययोजना म्हणून तुळजापुर नगरपरिषदेच्या वतीने शहरातील विविध भागात, केंद्रावर श्री गणेश मुर्तीचे संकलन करुन त्यांचे सामुदायिक विसर्जन करण्यात येणार असल्याचे नगराध्यक्ष सचिन रोचकरी यांनी सांगितले आहे.

तुळजापूर शहरातील दिपक चौक, शुक्रवार पेठ, पावणारा गणपती हाडको भाग, तुळजापुर (खुर्द), नळदुर्ग रोड वरील मंठाळकर कार्यालय या ठिकाणी सर्व श्री गणेश मुर्तीचे संकलन केद्र राहणार आहेत. याशिवाय शहरात दोन फिरते टक्टरद्वारे देखील घरगुती श्री गणेश मुर्तीचे संकलन केले जाणार आहे. जमा झालेल्या सर्व श्री गणेश मुर्तीचे विसर्जन तुळजापुर (खुर्द) रोड जवळील मोर्डा खणीत श्री गणपती (बप्पा) चे विसर्जन करण्यात येणार आहे. विसर्जन स्थळी न.प. अधिकारी, कर्मचारी, पोलीस कर्मचारी व सुरक्षा रक्षक कर्मचारी उपस्थित राहणार आहेत.

शहरातील घरगुती व सार्वजनिक श्री गणेश मुर्ती विसर्जनासाठी सर्व तयारी तुळजापुर नगर परिषद ने केली आहे. या बाबत सोमवार दि. ३१ रोजी शहरात दंवडीद्वारे नागरीकांना सांगण्यात आले आहे. टॅक्टरमध्ये अथवा शहरातील संकलन केद्रांवर घरगुती गणपती आणून द्यावे, यासर्व श्री गणेशाचे पारंपरिक पद्धतीने विधिवत पुजा करुन धार्मिक विधी करुन व सामाजिक अंतर पाळुन श्री गणेशाचे विसर्जन करण्यात येणार असल्याचे नगराध्यक्ष रोचकरी यांनी बोलताना सांगितले.

तुळजापूर : महावितरण कंपनीच्यावतीने गणेशोत्सवानिमित्त विविध सामाजिक उपक्रम

 

तुळजापुर : कुमार नाईकवाडी 

येथील महाराष्ट्र राज्य विद्युत महावितरण कंपनीच्या वतीने मंगळवार दि. ३१  रोजी श्री गणेश उत्सवाचे औचित्य साधून वृक्षारोपण, अन्नदान, महाप्रसाद करण्यात आला. 

प्रारंभी  येथील महाराष्ट्र राज्य विद्युत महावितरण कंपनीच्या कार्यालयातील श्री गणेशाची महाआरती नगराध्यक्ष सचिन रोचकरी यांच्या हस्ते करुन उपस्थित मान्यवराच्या हस्ते महावितरण च्या परिसरात वृक्षारोपण करण्यात आले. त्यानंतर अन्नदान करवुन श्री गणेश उत्सव साजरा करण्यात आला.

यावेळी नगरसेवक रणजीत इंगळे, अंबरीश जाधव, म.रा.वि. मंडळाचे कार्यकारी अभियंता बी.के शिंदे, गोदे एस. पी.,  उप कार्यकारी अभियंता एम.एस. सिंग, गोंकुडे  आदीसह अधिकारी, कर्मचारी उपस्थित होते. 

तुळजापूरात राष्ट्रवादी विद्यार्थी काँग्रेसचे प्रदेशाध्यक्ष सुनील गव्हाणे यांचा सत्कार

 

तुळजापूर : कुमार नाईकवाडी

तीर्थक्षेत्र तुळजापूरात राज्यव्यापी दौ-यानिमित्त आलेल्या राष्ट्रवादी विद्यार्थी काँग्रेसचे प्रदेशाध्यक्ष सुनील गव्हाणे व मराठवाडा विभागाचे अध्यक्ष प्रशांत कदम यांचा सत्कार रविवारी राष्ट्रवादी विद्यार्थी जिल्हा उस्मानाबाद यांच्यावतीने करण्यात आला. 

यावेळी रा.काँ. चे युवक जिल्हाध्यक्ष आदित्य गोरे, विद्यार्थी जिल्हाध्यक्ष दुर्गेश साळुंके,  विद्यार्थी शहराध्यक्ष समर्थ पैलवान, रोहित चव्हाण, आण्णा क्षीरसागर, आदित्य शेटे, प्रज्वल अंगुले, विजय बोधले, ओंकार अपराध,  संकेत साळुंके, सचिन माळगे, रंजित पंलगे, सुयोग जोशी , पुष्कर शिंदे, शुभम टिंगरे आदीजण उपस्थित होते.

निसर्ग पावला; पण महावितरण कोपले

काटी : उमाजी गायकवाड

तुळजापूर तालुक्यातील काटी येथील विद्युत उपकेंद्रा अंतर्गत येणाऱ्या गावच्या पुर्वेला असणाऱ्या गाटेवाडी शिवारातील गाटे डिपी म्हणून परिचित असलेला डिपी (रोहित्र) गेल्या महिनाभरापासून जळाला असून या डिपीवर अवलंबून असलेल्या पन्नास ते साठ शेतकऱ्यांचे पिके पाण्याअभावी सुकू लागली असून कांदा पिकांच्या लागवडी ठप्प आहेत.    

गावच्या  चार-पाच वर्षांच्या दुष्काळानंतर यंदा भरपूर पाऊस झाला. कायम कोरडेठाक राहणाऱ्या जलस्रोतात मुबलक पाणी आले. पण, वीजपुरवठ्या अभावी पिके करपून जात आहेत. जळालेल्या रोहित्रांसाठी येथील या भागातील शेतकरी वारंवार पाठपुरावा करत असून याच डिपीवर पोलीस सेवेत कार्यरत असलेले धनंजय राऊत यांची शेती असून धनंजय राऊत हे डिपीसाठी गेली 20 ते 25 दिवस वारंवार पाठपुरावा करत आहेत. परंतु महिना उलटला तरी डिपी मिळेना त्यामुळे निसर्गाने तारले आणि महावितरणने मारले असे म्हणण्याची वेळ शेतकऱ्यांवर आली आहे. आम्हाला ट्रान्सफॉरमर 'डिपी'  मिळेल का? असा प्रश्न शेतकऱ्यांना पडला आहे.

वरिष्ठ अधिकाऱ्यांनी याकडे लक्ष देऊन तात्काळ डिपी देण्याची मागणी धनंजय राऊत यांच्यासह शेतकऱ्यांमधून होत आहे.

होर्टी येथे कोरोना योद्धांचा गौरव

 

होर्टी : बाळकृष्ण मुळे

तुळजापूर तालुक्यातील होर्टी येथे जय भवानी गणेश मंडळाच्या वतीने कोरोनाच्या पार्श्वभूमीवर सामाजिक बांधिलकी जपत अनावश्यक खर्चाला फाटा देत कोरोना योद्धांचा  गौरव करण्यात आला.

कोरोना विरुद्ध लढत असलेल्या होर्टी गावामधील कार्य कौतुक पात्र आहे. त्याचबरोबर आशा कार्यकर्त्या, अंगणवाडी सेविका, महिला बचत गट सदस्या, पोलीस पाटील व ग्रामपंचायत कर्मचारी यांचा जय भवानी गणेश मंडळा कडून माजी सैनिक यांच्या हस्ते सत्कार करण्यात आला. यावेळी मंडळाचे सदस्य व पदाधिकारी उपस्थित होते.

कोरोनाची लक्षण असणाऱ्या नागरिकांनी आरोग्य खात्याशी संपर्क करावा - डॉ. अमोल सुर्यवंशी

 

रुईभर, दि. 31 : कोरोनाची लक्षणे असणाऱ्या नागरिकांनी आरोग्य खात्याची संपर्क करून गावात वाढत चाललेल्या कोरोना पेशंटची संख्या कमी करण्यासाठी आपल्याला प्रयत्न करता येऊ शकतो असे, मत बेंबळी प्राथमिक आरोग्य केंद्राचे वैद्यकीय अधिकारी डॉ. अमोल सूर्यवंशी यांनी रुईभर येथे शनिवारी आयोजित केलेल्या कोरोनाच्या ऑंटी जन टेस्ट शिबिराप्रसंगी व्यक्त केले.

यावेळी डॉ. सुर्यवंशी पुढे बोलताना म्हणाले की, प्रत्येक नागरिकाने सार्वजनिक ठिकाणी जात असताना आपली काळजी घ्या व आपल्या मुळे इतरां ना कसल्या प्रकारचा त्रास होणार नाही याची खबरदारी घ्या सरकारने सांगितलेल्या सूचनांचे सर्वांनी पालन करावे असेही त्यांनी शेवटी सांगितले.

या शिबिरात बेंबळी रुईभर देवळाली येथील 60 नागरीकांची कोरोना पेशंटच्या संपर्कात आलेले यांची तपासणी करण्यात आली. या शिबिरात 6 नागरिक कोरोना पॉझिटिव निघाले. त्यांना पुढील उपचारासाठी उस्मानाबाद  येथील आयुर्वेदिक दवाखान्यात दाखल करण्यात आले.

या शिबिरात समुदाय आरोग्य अधिकारी डॉ.पूजा पवार, डॉ. प्रियांका नायगावक,र आरोग्य सेवक काका वाघमारे, मधुकर कोल्हाळ, गजानन भोसले, आरोग्य सेविका शुभांगी स्वामी, आशा कार्यकर्ती गांधले भोईटे निंबाळकर ग्रामपंचायत कर्मचारी पारवे इत्यादींनी मोलाचे सहकार्य केले.  शिबिरास उपसरपंच बालाजी कोळगे, ग्रामसेवक प्रदीप कुंभार ग्रामपंचायतीचे सदस्य उपस्थित होते.

नळदुर्ग : मनसेच्या आरास स्पर्धेतील विजेत्यांना पारितोषिक वितरण

 

नळदुर्ग, दि. 31 : शहर महाराष्ट्र नवनिर्माण सेनेच्या वतीने आयोजित घरगुती गणपती आरास स्पर्धेचे पारितोषिक वितरण 30 ऑगस्ट रोजी करण्यात आले. ही स्पर्धा ऑनलाईन घेण्यात आली होती. 

गणेशोत्सवाच्या निमित्ताने आयोजित आरास स्पर्धेसाठी 246 स्पर्धकानी सहभाग नोंदविला होता. त्यात प्रथम क्रमांक सुजय बिश्वास यांनी पटकावला घरगुती गणपती सजावटी मध्ये त्यानी उत्तम कलाकुसर दाखवली. कोरोनाच्या पार्श्वभूमीवर सामाजिक संदेश या आरास मधून देण्यात आला होता. तर द्वितीय विजेते कु.वैष्णवी दीपक जगदाळे यांनी ही कोरोना पासून बचाव करण्यासाठी आपल्या गणेशोत्सव आरास मध्ये सामाजिक संदेश दिला. तसेच तृतीय विजेता विश्वजीत अंबादास वाघमारे यांनी ही आपल्या सजावटी मध्ये सामाजिक संदेश दिला. त्याचबरोबर त्यांनी इकोफ्रेंडली गणेश मूर्ती तयार केली होती. 

विजेत्या स्पर्धाकाला पारितोषिक म्हणून भेटवस्तु व सन्मानपत्र देऊन त्यांचा गौरव करण्यात आला. यावेळी जिल्हा सचिव ज्योतिबा येडगे,जनहितकक्ष व विधी विभागाचे अॅड. मतीन बाड़ेवाले, शहराध्यक्ष अलिम शेख, सरचिटणीस  प्रमोद कुलकर्णी इत्यादी उपस्थित होते.

लिंगायत सेवा संघ सोशल मिडियाच्या राज्य प्रमुखपदी हणमंतप्पा शंके

 

होर्टी : बाळकृष्ण मुळे

प.पू. कोरणेश्वर स्वामी (विरक्त मठ, उस्तुरी) यांच्या सानिध्यात लिंगायत सेवा संघाचे संस्थापक अध्यक्ष इंजि.विजयकुमार शेटे यांनी हणमंत शंके यांची लिंगायत सेवा संघाच्या सोशल मिडिया महाराष्ट्र प्रमुखपदि निवड केली आहे.

हणमंत शंके यांचे सोशल मिडियावरील वचन साहित्य प्रसार व सामाजिक कार्यातील योगदान व लिंगायत सेवा संघाच्या उपक्रमामधील सक्रिय सहभाग या गोष्टि विचारात घेऊन ही निवड केली आहे.

त्यांच्या या निवडीबद्दल संगनबसव विरक्त मठ निलंगाचे मठाधिश प.पू.बसवेश्वर येरटे, बसव कथाकार शिवानंद हैबतपुरे, साहित्यिक राजू जुबरे, प्रदेश अध्यक्ष डॉ. महादेव जोकारे,आलुर गावातील शिवसेनेचे ज्येष्ठ नेते नागेश पाटिल,युवा उद्योजक नितीन बोळदे जनहित सामाजिक संस्थेचे अध्यक्ष ॲड.शिवराज कूंचगे,बसव अनुभव मंटप,बसव शरण संगम बहुद्देशिय सामाजीक संस्थेचे सर्व पदाधिकारी आदीनी अभिनंदन करून पुढील कार्यास शुभेच्छा दिल्या आहेत.

चिवरी परीसरात सोयाबीन पिके पावसाअभावी माना टाकू लागले

 

चिवरी : राजगुरू साखरे

तुळजापुर तालुक्यातील चिवरी परिसरात गेल्या दहा दिवसापासून पाऊस नसल्याने सोयाबीनचे पीक सुकत असल्याचे चित्र पहावयास मिळत असून शेतकऱ्यांची चिंता वाढली आहे.

 तुळजापूर तालुक्यातील चिवरी ,येवती,आरळी, काळेगाव आदी परिसरात सोयाबीनचे पिक मोठ्या प्रमाणावर घेतली जाते. परंतु गेल्या दोन तीन वर्षापासून या परिसराकडे पावसाने पाठ फिरवली आहे. त्यामुळे पिके चांगली येत नसल्याने शेतकऱ्यांची आर्थिक गणित कोलमडले आहे. गेल्यावर्षी सोयाबीनचे पीक हातातोंडाशी आलेले अतिवृष्टीमुळे गेले होते. परंतु काही अंशी रब्बीने साथ दिल्यामुळे बऱ्यापैकी उत्पन्न मिळाले.

 यावर्षी जून महिन्यामध्ये मग नक्षत्रात पेरणी झाल्यामुळे शेतकरी आनंदी झाला होता. परंतु पावसाने उघडीप दिल्यामुळे शेतकरी पुन्हा नैराश्य मध्ये आला आहे. उडीद मूग याबरोबरच मुख्य पीक म्हणून खरिपाला सोयाबीनची विक्रमी पेरणी करण्यात आली आहे. पिके चांगली जोमात आले आहेत, परंतु पावसाने उघडीप दिल्याने पिके सुकत आहेत. सध्या सोयाबीन फुलाच्या आणि शेंगा भरण्याच्या अवस्थेत आहेत, परंतु गेल्या दहा दिवसापासून कसलाही पाऊस न पडल्यामुळे शेंगा ची वाढ होत नसल्याचे दिसत आहे. पाऊस नसल्याने जमिनीला भेगा पडत असून, नदी ,नाले ,ओढे व विहीरी ह्याना  अजूनही पाणी वाढले नाही. पाणीटंचाईचे संकट शेतकर्‍यांसमोर उभे ठाकले आहे. आणखी दोन-तीन दिवसांमध्ये जर पाऊस नाही पडला तर गतवर्षीची परिस्थिती निर्माण होते की काय असा प्रश्न शेतकऱ्यांसमोर पडला आहे.

वडगाव (देव) येथे श्री शिवमित्र गणेश मंडळाच्या वतीने रक्तदान शिबिर संपन्न

 

तुळजापूर, दि 31 : तालुक्यातील वडगाव देव येथील श्री शिव मित्र गणेश मंडळाच्यावतीने घेण्यात आलेल्या रक्तदान शिबिरात 30 दात्यांनी रक्तदान केले. 

सध्या  जगभरात कोरोनाने थैमान घातले आहे. यामुळे रक्ताचा तुटवडा पडल्यामुळे तुळजापूर तालुक्यातील वडगांव देव येथील श्री शिव मित्र गणेश मंडळाच्या वतीने सोमवार रोजी रक्तदान शिबीर संपन्न झाले. याचे उद्घाटन गावचे सरपंच नागेश काळेकर यांच्या हस्ते करण्यात आले. यावेळी  पोलीस पाटील सौ. कल्पना ताई मस्के, युवा नेते नीलकंठ कोरे, सचिन राजमाने, पवन पाटील, बारूळचे शहाजी सुपनार आदी उपस्थित होते.

या रक्तदानाला प्रतिसाद देत 30 रक्तदात्यांनी रक्तदान केले. सदरील रक्तदान शिबिर यशस्वी करण्यासाठी श्री शिव मित्र गणेश मंडळाचे अध्यक्ष प्रसाद राजमाने पाटील, नितीन राजमाने, प्रताप पाटील, बाबुराव काळेकर, आनंद राजमाने, पोपट गायकवाड, मनोज देवकते, संदीप कुंभार, गणेश तोंडवळे आदींनी पुढाकार घेतला.

नूतन जिल्हाधिकारी कौस्तुभ दिवेगांवकर यांचा रिपाइंच्यावतीने सत्कार

 

लोहारा, दि. 31 : उस्मानाबादचे नुतन जिल्हाधिकारी म्हणून कौस्तुभ दिवेगावकर यांची नियुक्ती झाल्याबद्दल त्यांचा रिपब्लिकन पार्टी ऑफ इंडिया (आ) रोजगार आघाडी उस्मानाबाद जिल्हा यांच्या वतीने सत्कार करण्यात आला.

यावेळी रिपाई रोजगार आघाडीचे महाराष्ट्र प्रदेश उपाध्यक्ष संजय शितोळे, रिपाई रोजगार आघाडीचे मराठवाडा अध्यक्ष डि. के. कांबळे, जिल्हाध्यक्ष उत्तम भालेराव, जिल्हा उपाध्यक्ष एम. के. मिसाळ, महादेव भोसले, नवनाथ हुंबे  यांच्यासह आदी उपस्थित होते.

तामलवाडी येथील पर्यायी रस्त्यावर गतिरोधक बसवण्याची मागणी

तामलवाडी : सर्जेराव गायकवाड 

तुळजापुर तालुक्यातील तामलवाडी येथील दोन्ही बाजुच्या पर्यायी रस्त्यावर दोनचाकी, चारचाकी वाहनांचा वेग वाढत असुन अपघात होण्याचा धोका निर्माण झाल्याने या दोन्ही बाजुच्या पर्यायी रस्त्यावर गतिरोधक बसवण्याची मागणी ग्रामस्थांमधुन होत आहे.

राष्ट्रीय महामार्ग हा तामलवाडी गावच्या मध्यभागामधुन गेल्याने गावचे दोन भागात विभाजन झाले आहे. ग्रामस्थांना ये - जा करण्यासाठी दोन्ही बाजुस पर्यायी रस्ते बनवण्यात आले आहेत पुर्वेकडील बाजुस शाळा,ग्रामपंचायत,पोलिस स्टेशन,तलाठी कार्यालय,सर्व शासकीय कार्यालये तर पश्चिम बाजुस,दवाखाने,मोठी दुकाने, मंदिर, मशीद, रस्त्यालगत असलेली घरे व याच बाजुस मुळ गाव असल्याने या दोन्ही पर्यायी रस्त्यावर दररोज गर्दी असते. याच रस्त्यावरून दोनचाकी,चारचाकी वाहनांचा वावर वाढला असुन वाहनचालक वाहने चालवताना अतिवेगाने चालवित असुन यामुळे छोटे अपघात घडले आहेत तसेच मोठा अपघात होण्याचा धोका निर्माण झाला आहे.

वाहनाच्या वेगावर नियंत्रण ठेवण्यासाठी पुर्व बाजुस जुनी बॅंक ऑफ महाराष्ट्र इमारत,पिंपळा रोड,नविन बस थांबा,तसेच पाण्याची टाकी  याठिकाणी तर पश्चिम बाजुस मशीद रोड,समृध्दी कापड दुकान,स्वराज अक्वा,तसेच पुढे दोन ठिकाणी गतिरोधक बसवण्याची मागणी ग्रामस्थांमधुन होत आहे.दोन्ही बाजुच्या पर्यायी रस्त्यावर वरील ठिकाणी महामार्गाच्या वरीष्ठ अधिकारी यानी पाहणी करून गतिरोधक बसवुन घ्यावेत जेणेकरून पर्यायी रस्त्यावर सुसाट धावणार्या दोनचाकी,चारचाकी वाहनांचा वेग नियंत्रणात राहुन अपघाताचा संभाव्य धोका कायमस्वरूपी टळणार आहे.

शाळा सुरू झाल्यावर आणखी धोका वाढणार

सध्या कोरोनाच्या पार्श्वभूमीवर शाळा बंद असल्या तरी काही महिन्यांनी शाळा सुरू होणार असुन शाळा सुरू झाल्यास याच रस्त्यावरून विद्यार्थ्यांना ये -जा करीत शाळा गाठावी लागते.ज्यांच्याकडे वाहन परवाने नाहीत अशी काही मुले दोनचाकी गाड्या सुसाट वेगाने चालवत असल्याने अपघाताचा धोका निर्माण झाला असुन या रस्त्यावर गतिरोधक बसवण्याची आवश्यकता असल्याचे संभाजी ब्रिगेडचे तालुकाध्यक्ष सर्जेराव गायकवाड यानी बोलताना सांगितले आहे.

भुयारी मार्गातील लाईट दोन महीन्यापासुन बंद

गावातील ग्रामस्थांना ये - जा करण्यासाठी दोन भुयारी मार्ग बनवले असुन मोठ्या भुयारी मार्गातील लाईट गेली दोन महीन्यापासुन बंद असल्याने भुयारी मार्गात अंधाराचे साम्राज्य पसरले आहे.रात्री यातुन मार्ग काढताना महीला,मुली,वृध्दांना अडचणीचा सामना करावा लागत आहे.या भुयारी मार्गातील लाईट लवकरात लवकर चालु करावी अशी मागणी शिवरत्न सामाजिक  प्रतिष्ठानच्या वतीने करण्यात येत आहे.

उस्मानाबाद जिल्ह्यात आज 207 कोरोना रुग्णांची वाढ; तर चौघांचा मृत्यू

उस्मानाबाद, दि. 30 : जिल्हयात रविवार दि. 30 ऑगस्ट रोजी सायंकाळी सात वाजता प्राप्त झालेल्या अहवानुसार आज जिल्हयात 207 कोरोना पॉजिटीव्ह रुग्ण आढळले आहेत. तर चार जणांचा मृत्यू झाला आहे. तसेच आज दिवसभरात 251 रुग्ण बरे होवून घरी गेले आहत. 

जिल्हयात कोरोनाबाधितांची संख्या 5 हजार 535 वर पोहचली आहे. यापैकी 3 हजार 552 जण बरे झाले असून 1 हजार 841 जणांवर उपचार सुरु आहेत. आतापर्यंत 142 जणांचा बळी गेला आहे.

सुगरण पक्ष्यांची घरटे बांधण्यासाठी लगबग

 

चिवरी शिवारातील टिपलेले छायाचित्र

चिवरी : राजगुरू साखरे

निसर्गाने  हिरवा शालू परिधान करताच, सुगरण पक्षांनाही विनीच्या हंगामाचे वेध लागले आहेत. आपल्या निरागस पिलांना सुरक्षित घर मिळावे, बाल्यावस्थेत सर्व संकटापासून मुक्त रहावी, यासाठी सुगरण पक्षातील नर विहिरींच्या अथवा ओढ्याच्या काठावर असलेल्या काटेरी झुडपावर मनमोहक नक्षीकाम केलेले घरटे तयार करतात. 

पक्षाचे जग मोठा रमणीय, आकाशात विहरणारं स्वच्छंद आयुष्य. मात्र अशा आयुष्य नाही विसावणारा घरकुल हवं असतं, पक्ष्यांची घरटी हा कलाकुसरीचा अत्यंत सुंदर नमुना असतो. काडी काडी जमवून पक्षी स्वतःही कलाकुसर करून ऊन पावसापासून संरक्षण करणारे घरटे बांधतात. पावसाळ्याच्या सुरुवातीला रानावनात फिरताना सुगरण पक्षाची नक्षीकाम केलेली मनमोहक घरटी मानवाला भुरळ घालतात आणि नकळत बहिणाबाई चौधरी यांच्या कवितेच्या ओळी आठवतात. अरे "खोप्यामधी खोपा, सुगरणीचा चांगला, देखा पिलासाठी तिनं, झोका झाडाले टांगला," या बालपणी पुस्तकात अभ्यासलेल्या ओळी पाखराचे जगणे सांगतात ज्या सुगरण पक्षावरून ही कविता बहिणाबाईंनी सुचली. ते दिसायला जसे मोहक असतात. तशीच त्यांची कलाकुसरही सुबक असते. हे सुगरण पक्षी एखाद्या झाडावर जणू आपले गावात बसवतात जिथे मानवी रहदारी कमी असेल किंवा आपले गाव दिसणार नाही अशी झाडे हा पक्षी निवडतो. या एकाच झाडावर त्यांची पंधरा ते वीस जणांची वस्ती असते. सुगरण पक्षाच्या घराचा आकार पालथ्या चंदू सारखा असतो. सुरुवातीला फांद्गयाभोवती गवताची धागे, घट्ट वीण मजबूत लोंबता दोर तयार करतात. हा दोर एकट्या माणसाला तुटत नाही. त्याच्या आधारावर घरटे लोंबत ठेवली जाते. घरटे मनोमध रुंद विनुन दोन भाग केले जातात. पहिला भाग बंद करून त्याला फुग्यासारखा आकार असतो. दुसरा भाग म्हणून लांब व रुंद नळीसारखा बनवला जातो. 

सुगरण पक्षी हा अद्भुत चातुर्य बुद्धी शाली असणारा स्वतःचा निवारा बनवणारा चिमणीपेक्षा याचे घरटे वेगळे असते. सुगरण पक्षाला निवारा तयार करण्यासाठी खूप वेळ लागतो. कारण त्याच्या घरट्या पाशी कोणत्याही प्रकारचा प्राणी माणूस त्या निवारा असलेल्या ठिकाणी जाता येऊ नयेत अशा ठिकाणी सुगरण पक्षी घरटे बनवतो. परंतु अलीकडच्या काळामध्ये वाढत्या शहरीकरणामुळे वाढत चाललेले प्रदूषण व आधुनिक शेतीमध्ये वापरण्यात येणारे रासायनिक खते व कीटकनाशके यामुळे पक्ष्यांची संख्या झपाट्याने कमी होत चाललेली आहे.

खुनासहित दरोडा, मोका गुन्ह्यातील पाहिजे आरोपी पाठलागानंतर जेरबंद

उस्मानाबाद, दि. 30 : विलास लक्ष्मण भोसले, रा. सिंदगाव, ता. तुळजापूर यांचा सावत्र आई- जयाबाई, वय 45 रा. जेवळी, ता. लोहारा यांच्याशी कौटुंबीक संघर्ष होता. यातुन त्याने आपली मुले- किरण व अर्जुन यांसह  जावई- विशाल परमेश्वर शिंदे, यांच्या मदतीने दि. 07.03.2020 रोजी 23.00 वा. सु जयाबाई यांना राहत्या घरी लोखंडी सळई, चाकु- भाल्याने वार करुन ठार केले होते. तर आई सोबत असणाऱ्या संतोष पवार यांना गंभीर जखमी केले होते. गुन्ह्यानंतर सर्व आरोपी अटक टाळण्यासाठी बेपत्ता झाले होते. ते गावापासून दुर अंतरावर माळरानावर ते पाल टाकून राहत असत. त्यांचा ठावठीकाणा पोलीसांना वेळोवेळी मिळुन येत होता. परंतु पथक पोहचण्यापुर्वीच ते आपले ठिकाण बदलत असत.

चौघा आरोपींपैकी विलास भोसले व विशाल शिंदे हे दोघे तुळजापूर तालुक्यातील मौजे कुनसावळे शिवारात पाल टाकून राहत असल्याची गोपनीय खबर स्था.गु.शा. च्या पोउपनि- श्री. पांडुरंग माने यांच्या पथकास मिळाली. यावर स्था.गु.शा. चे पोनि- श्री. दगुभाई शेख, सपोनि- श्री. आशिष खांडेकर, पोउपनि- श्री. पांडुरंग माने यांसह 12 पोलीस कर्मचारी व लोहारा पो.ठा. चे सपोनि- श्री. चौरे व 8 पोलीस कर्मचारी अशा 24 सदस्यांच्या पथकाने कुनसावळे शिवारातील पालावर दि. 30.08.2020 रोजी मध्यरात्री 02.00 छापा टाकला. पोलीसांची चाहुल लागताच आरोपी- विलास व विशाल हे दोघे तेथून पळून जाउ लागले. यावर पथकाने त्यांचा पाठलाग करुन आवश्यक बळाचा वापर करुन त्यांना जेरबंद केले.

यातील विलास भोसले हा वरील गुन्ह्यासोबतच तामलवाडी पो.ठा. गु.र.क्र. 83 / 2014 या खुनासहीत दरोड्याच्या, मोका कायद्यांतर्गत गुन्ह्यातील पाहिजे आरोपी असुन गेली 6 वर्षे तो लपुन-छपून राहत होता. तर याच गुन्ह्यातील त्याच्या 3 साथीदारांना मा. न्यायालयाने यापुर्वीच जन्मठेप सुनावली आहे.

पोलीस पथकाने केलेल्या या कारवाईबद्दल मा. पोलीस अधीक्षक श्री. राज तिलक रौशन व मा. अपर पोलीस अधीक्षक श्री. संदीप पालवे यांनी अभिनंदन केले आहे.

उस्मानाबाद जिल्हयात चोरीचे दोन गुन्हे दाखल

भुम : शिवनाथ विठोबा नागरगोजे, रा. तिनखडी, ता. पाथर्डी हे दि. 29.08.2020 रोजी 03.30 वा. सु. भुम तालुक्यातील पार्डी घाटातून पिकअप क्र. एम.एच. 16 सीसी 2494 मधून ईलेक्ट्रॉनिक कॅपॅसिटर बॉक्स घेउन जात होते. दरम्यान घाटरस्त्यामुळे पिकअपची गती कमी झाल्याचा फायदा घेउन अज्ञात चोरट्याने पिकअपचे पाठीमागील टारपोलीन फाडून आतील 33000 एमएफडी 250 व्हीडीसी क्षमतेचे 8 ईलेक्ट्रॉनिक्स कॅपॅसिटर चोरुन नेले. अशा मजकुराच्या शिवनाथ नागरगोजे यांनी दि. 29.08.2020 रोजी दिलेल्या प्रथम खबरेवरुन भा.दं.सं. कलम- 379 अन्वये गुन्हा नोंदवला आहे.

उस्मानाबाद : सिताराम दिगंबर भंगे, रा. शिवाजीनगर पुणे हे दि. 28.08.2020 रोजी 20.45 वा. सु. पुणे- मुखेड असा होंडा शाईन मो.सा. क्र. एम.एच. 5826 ने प्रवास करत होते. दरम्यान मौजे येडशी जवळील सम्राट हॉटेलजवळ ते लघुशंकेस थांबले असतांना दोन अनोळखी व्यक्तीं तेथे आल्या. त्यातील एकाने सागर असे नाव सांगुण मोबाईल फोन कॉल करण्याचा बहाण्याने सिताराम भंगे यांचा मोबाईल फोन मागून घेतला. फोन हाती येताच त्या दोघांनी बाजूस उभी असलेली सिताराम भंगे यांची मोटारसायकल पळवून घेउन गेले. अशा मजकुराच्या सिताराम भंगे यांनी दि. 29.08.2020 रोजी दिलेल्या प्रथम खबरेवरुन भा.दं.सं. कलम- 379, 34 अन्वये गुन्हा नोंदवला आहे.

अणदूर येथील अशोक घुगे यांचे निधन

 

अणदूर, दि. 30 : तुळजापूर तालुक्यातील अणदूर येथील स्वस्त धान्य दुकानदार असलेले व्यावसायिक अशोक वामनराव घुगे यांचे रविवार ( दि ३०) रोजी दुपारी 2 वाजता उपचारादरम्यान दुःखद निधन झाले आहे.

विश्व हिंदु परिषदेचे दक्षिण क्षेत्र प्रभारी तथा अयोध्या श्रीराम मंदिर निर्माण ट्रस्टचे कोष्याध्यक्ष भुजंगराव घुगे यांचे ते बंधू होत. त्यांच्या पश्चात पत्नी, तीन भाऊ,तीन बहिणी,दोन मुले,मुली, सुना,जावई, नातवंडे असा मोठा परिवार आहे. घुगे यांच्या निधनाने अणदूर सह परिसरातून हळहळ व्यक्त केली जात आहे.

काटी : पत्नी पाठोपाठ पती फत्तेसिंह देशमुख यांचेही निधन

 

काटी, दि. 30 : तुळजापूर तालुक्यातील काटी येथील प्रतिष्ठित नागरिक फत्तेसिंह शहाजीराव देशमुख वय (90) यांचे रविवार दि. 30 रोजी सकाळी साडेसात वाजता अल्पशा आजाराने दु:खद निधन झाले.

पत्नी सौजन्यादेवी यांच्या  निधनानंतर अवघ्या सातव्या दिवशी पतीचेही निधन झाल्याची दुर्दैवी घटना तुळजापूर तालुक्यातील काटी  येथे घडली आहे. या दुर्दैवी घटनेने त्यांचे चिरंजीव भारतीय जनता पक्षाचे नेते तथा सोसायटीचे विद्यमान चेअरमन विक्रमसिंह देशमुख व  त्यांच्या परिवारावर आईच्या निधनाच्या दु:खातून सावरतो न सावरतो तोच रविवारी वडिलांचेही छत्र हरपल्याने दुःखाचा डोंगर कोसळला आहे. 

पत्नी पाठोपाठ पतीने या जगाचा निरोप घेतला व सात जन्म सोबत राहण्याची शपथ पूर्ण केली. मात्र त्यांच्या या निधनाने विक्रमसिंह देशमुख व त्यांच्या परिवारावर मात्र अचानक आई-वडिलांचे छत्र नाहीसे झाल्यामुळे अशा या सुखी कुटुंबाला काळाची दृष्ट लागली असे ग्रामस्थांमधून बोलले जात आहे. काटी येथील कोरोनाच्या वाढत्या संख्येच्या पार्श्र्वभूमीवर व शनिवारी घेतलेल्या रॅपिड अॅंन्टीजेन टेस्ट मध्ये सातजणांचा अहवाल पॉझिटिव्ह आल्याने  खबरदारी व  प्रतिबंधात्मक उपाय म्हणून मयताच्या पार्थिवावर तुळजापूर येथील नगरपरिषदेतील कर्मचाऱ्यांमार्फत मोजक्याच लोकांच्या उपस्थितीत सोशल डिस्टंन्सिंगचे पालन करीत येथील देशमुख स्मशानभूमित दुपारी 12 वाजता अंत्यसंस्कार करण्यात आले.त्यांच्या पश्चात दोन मुले, दोन मुली, तीन सुना, नातवंडे असा परिवार आहे. या दुर्दैवी घटनेमुळे काटी येथे हळहळ व्यक्त होत आहे.

लिंगायत सेवा संघाच्या मराठवाडा विभागीय अध्यक्षपदी देवराज संगुळगे

 

मुरूम, दि. 30 : परमपूज्य कोरणेश्वर स्वामी (विरक्त मठ, उस्तुरी) यांच्या मार्गदर्शनाखाली लिंगायत सेवा संघाचे संस्थापक अध्यक्ष तथा इंजिनिअर विजयकुमार शेटे यांनी देवराज संगुळगे यांची लिंगायत सेवा संघाच्या मराठवाडा विभागीय अध्यक्ष पदी निवड केली आहे. 

संगुळगे यांनी सन २०१४ पासून लिंगायत सेवा संघाच्या प्रचार-प्रसारासाठी मोठे योगदान दिल्यामुळे त्यांची निवड झाली आहे. त्यांच्यावर संपूर्ण मराठवाडा विभागाची जबाबदारी दिल्याने लिंगायत सेवा संघ वाढण्यास निश्चित मदत होईल. त्यांच्यात संघटन कौशल्य असल्यामुळे त्यांनी आपल्या कामातून या परिसरात एक वेगळी ओळख निर्माण केली आहे. सामान्य जनतेपर्यंत पोहचण्याची कसब त्यांच्यात असल्यानेच  त्यांची निवडी झाली आहे. 

त्यांच्या या निवडीबद्दल संगनबसव विरक्त मठ, निलंगाचे मठाधिश प.पू.बसवेश्वर येरटे, बसव कथाकार शिवानंद हैबतपुरे, थोर साहित्यिक राजू जुबरे, प्रदेश अध्यक्ष डॉ.महादेव जोकारे, शेतकरी नेते प्रशांत पाटील, पत्रकार संघ मुरूम शहर, मराठा सेवा संघाचे सचिव श्रीधर इंगळे, विर भगतसिंह विद्यार्थी परिषदेचे विभागीय उपाध्यक्ष किरण गायकवाड, जिल्हाध्यक्ष मोहन जाधव, ए.आय.एस.एफ. विद्यार्थी संघटनेचे जिल्हाध्यक्ष लखन भोंडवे आदींनी त्यांचे विशेष अभिनंदन केले.

नगराध्यक्ष सचिन रोचकरी यांच्या हस्ते नागरीकांना आयुर्वेद रसायन चुर्ण काढाचे वाटप

 

तुळजापुर : कुमार नाईकवाडी

गणेश उत्सवाच्या पार्श्वभूमीवर येथील प्रभाग क्र. 8 पूर्व मंगळवार पेठ मध्ये साथीच्या आजाराच्या काळात प्रतिकार क्षमता वाढीसाठी आयुर्वेद रसायन चुर्ण काढाचे वाटप  नगराध्यक्ष सचिन रोचकरी यांच्या हस्ते प्रभाग क्र 8 मध्ये नागरीकांना वाटप करण्यात आले.

यावेळी विनोद गंगणे, अविनाश गंगणे, नगरसेवक अभिजीत कदम, नानासाहेब लोंढे, शहाजी भांजी, अंबरीष जाधव, नानासाहेब डोंगरे, श्रीनाथ शिंदे, भरत सोनवणे, योगेश रोचकरी, हणमंत पुजारी, विकास भांगे, महेश अंबुलगे, भैया कंगले, गुंडु कदम, आण्णा जाधव, समाधान जगताप, सुरज जगताप, नितीन पाबळे, शेखर कदम, शाहरुख पठाण आदींची उपस्थिती होती.

तुळजापूर तालुका पत्रकार संघाच्या वतीने किरण चौधरी यांचा सत्कार

 

तुळजापुर : कुमार नाईकवाडी

तुळजापुर तालुका पञकार संघाच्या शहर अध्यक्षा कु. किरण चौधरी यांची नुकतीच  स्टार महाराष्ट्र न्युज पुणे येथे निवड झाल्यामुळे  तुळजा तालुका पञकार संघाच्या वतीने रविवार दि. ३० ऑगस्ट रोजी उस्मानाबाद जिल्हा पञकार संघाचे उपाध्यक्ष श्रीकांत कदम यांच्या हस्ते शाल पुष्प गुच्छ देऊन सत्कार करण्यात आला व त्याना पुढील वाटचालीस हार्दीक शुभेछा देण्यात आल्या.

यावेळी तुळजापुर पत्रकार संघाचे तालुकाध्यक्ष प्रदीप अमृतराव, सचिव कुमार नाईकवाडी, पञकार सुरक्षा समितीचे जिल्हाध्यक्ष सचिन ताकमोघे, तालुका उपाध्यक्ष प्रमोद कावरे, सचिव अमिर शेख, पञकार गुरुनाथ बडुरे, अनिल आगलावे, आशा वाघ  आदिसह पञकार बांधव  उपस्थित होते.

पद्माकर मोकाशे यांना मातृशोक

 

तुळजापूर, दि. 30 : येथील संस्कार भारतीचे अध्यक्ष पद्माकर मोकाशे यांच्या मातोश्री इंदुबाई बाबुराव मोकाशे (वय ८५ )यांचे वार्धक्याने ३० ऑगस्ट रोजी सकाळी ७ वाजून १५ मिनिटांनी निधन झाले. त्यांना संस्कार भारतीच्या वतीने भावपूर्ण श्रद्धांजली वाहण्यात आली. त्यांच्या पश्चात मुले-नातवंडे असा परिवार आहे.

ओबीसी कर्मचारी - अधिकारी महासंघाच्या तुळजापूर तालुकाध्यक्षपदी बालाजी माळी

 

जळकोट,दि.३० : मेघराज किलजे 

 तुळजापूर तालुक्यातील जळकोट येथील रहिवासी, महाराष्ट्र राज्य प्राथमिक शिक्षक संघाचे जिल्हा प्रसिद्धी प्रमुख व सध्या होर्टी येथील जिल्हा परिषद केंद्रीय प्राथमिक शाळेत सहशिक्षक पदावर कार्यरत असलेले बालाजी माळी यांची ओबीसी कर्मचारी- अधिकारी महासंघाच्या तुळजापूर तालुकाध्यक्षपदी निवड झाली आहे.

बालाजी माळी हे उपक्रम शील शिक्षक म्हणून ओळखले जातात. शिक्षक संघटनेच्या विविध पदावर त्यांनी काम केले आहे. शिक्षक संघटनेचे ती सध्या जिल्हा प्रसिद्धीप्रमुख म्हणून काम करतात. विविध स्तरावर त्यांना पुरस्कार मिळाले आहेत. त्यांच्या कार्याची दखल घेऊन तुळजापूर तालुका कर्मचारी अधिकारी महासंघाच्या तालुका अध्यक्षपदी त्यांची निवड झाली आहे. या निवडीबद्दल शिक्षक संघटना, शिक्षक मित्र, प्राथमिक शिक्षक सहकारी पतसंस्था, जिल्हा पतसंस्था, कर्मचारी आदि वर्गातुन त्यांचे अभिनंदन होत आहे.

जिजामाता तरुण मंडळाच्या वतीने रक्तदान शिबिर संपन्न

 

तुळजापूर : कुमार नाईकवाडी

येथील जिजामाता तरूण गणेश मंडळाच्या वतीने आज दिनांक 29 शनिवार रोजी रक्तदान शिबिर घेण्यात आले. यामध्ये जवळपास 90  रक्तदात्यांनी रक्तदान केले.

 कार्यक्रमाचे उद्घाटन सकाळी १० वाजता नगरीचे नगराध्यक्ष सचिन रोचकरी, तहसीलदार सौदागर तांदळे व सहाय्यक पोलीस निरीक्षक सुशील चव्हाण युवा नेते विनोद गंगणे व चंद्रशेखर भोसले यांच्या हस्ते झाले. 90 रक्तदात्यांना मंडळातर्फे जेवणाचे टिफीण बॉक्स देण्यात आले यावेळेस तहसीलदार तांदळे यांनी मंडळाच्या  उपक्रमाचे कौतुक करून तसेच इतर शहरातील मंडळाने रक्तदान शिबिर आयोजित करावे अशी या प्रसंगी त्यांनी आवाहन केले.

यावेळेस मंडळाचे अध्यक्ष सुरज शेळके यांनी मान्यवरांचे पुष्पगुच्छ देऊन स्वागत केले तसेच मंडळाचे उपाध्यक्ष विशाल भोसले महेश शिंदे , विशाल नाईकवाडी, महेश कापसे, राहुल जाधव,देवा कोठावळे राहुल जगताप, शेखर फुगारे, सुमित कवडे, वैभव सुरवसे, सुमित देशमाने पदाधिकाऱ्यांनी कार्यक्रम यशस्वी करण्यासाठी परिश्रम घेतले.

आमदार ज्ञानराज चौगुले यांची तत्परता; गाडीतून उतरुन अपघातातील जखमीना केली मदत

जळकोट, दि. 30 : मेघराज किलजे 

उमरगा-लोहाराचे आमदार ज्ञानराज चौगुले हे  तुगाव (ता. उमरगा) या ठिकाणी नियोजित दौऱ्यानिमित्त जात असताना मुरुम मोड समोरील पेट्रोल पंपाजवळ अपघात झाल्याने आमदार ज्ञानराज चौगुले यांनी लगेच गाडी उभी करुन अपघातात जखमी झालेल्या व्यक्तींना उमरगा येथे तात्काळ पाठवून दिले. 

यावेळी शिवसेना तालुका प्रमुख बाबुराव शहापूरे ,माजी नगरसेवक विवेक हराळकर यांनी जखमीना  पट्टी बांधून धीर दिला.    यापूर्वीही आमदार ज्ञानराज चौगुले यांनी अनेक अपघातात मदत केलेली आहे. 

जि.प. अध्यक्षा अस्मिता कांबळे यांची नंदगाव गावास भेट

 

नळदुर्ग, दि. 30 : तुळजापूर तालुक्यातील नंदगाव येथे कोरोनाबाधित रुग्ण आढळून आला आहे. त्या पार्श्वभूमीवर ‍नंदगाव गावास  जिल्हा परिषद अध्यक्षा अस्मिता कांबळे यांनी भेट देऊन त्याठिकाणी असलेल्या सोयी-सुविधा बद्दल चौकशी करुन सद्यस्थितीचा आढावा घेतला. 

जि.प. अध्यक्षा कांबळे यांनी नंदगाव गावातील ग्रामस्थांशी चर्चा करून शासनाने घालून दिलेल्या अटी व समाजिक अंतर, तोंडाला मास्क बांधून घराबाहेर पडणे, याबाबत आवाहन केले. तसेच रूग्ण आढळलेल्या परिसरात भेट देऊन सॅनिटायजर व गोळ्या वाटप करण्यास सांगितले. 

यावेळी तुळजापूर पंचायत समितीचे बीडीओ राऊत, पंचायत समिती सदस्य सिध्देश्वर कोरे, सरपंच श्रध्दानंद कलशेट्टी, वैभव पाटील, ग्रामसेवक धड्डे यांच्यासह ग्रामपंचायत सदस्य, आशा कार्यकर्त्या, ग्रामपंचायत कर्मचारी उपस्थित होते.

कोरोना योध्दा पोलीस उपनिरीक्षक लहाने व डॉ. झंगे यांचा अणदूर येथे सत्कार

 

अणदूर, दि. 30 : नळदुर्ग पोलीस ठाण्याचे पोलीस उपनिरीक्षक कोरोना योद्धे  कैलास लहाने हे कोरोना मुक्त झाल्याने व तसेच कोरोनाच्या काळात अहोरात्र रुग्ण सेवा देणारे डॉक्टर प्रशांत झंगे यांचा अणदूर ता. तुळजापूर येथे अक्षय घुगे व मित्र परिवारांच्यावतीने यथोचित सत्कार करण्यात आला. 

दि.२२ मार्च २०२०पासून पुकारण्यात आलेल्या जनता कर्फ्यु व लाँडाऊनच्या काळात गेल्या चारपाच महिन्या पासून कोरोनाच्य प्रतिबंधासाठी त्यांनी प्रयत्न करत आहेत. जीवाची पर्वा न करता आपले कर्तव्य बजावत असताना कोरोना विषाणूने पोलीस उपनिरीक्षक लहाने यांना घेरले होते. त्यामुळे त्यांना शासकीय रुग्णालयात उपचारासाठी दाखल करण्यात आले होते. कोरोनासी झुंज देत त्यानी कोरोनाला अखेर हारवून कोरोना मुक्त झाले. कोरोना मुक्ती नंतर त्यांनी दहा दिवसाचा विलगीकरणाचा कालावधी पुर्ण करून ते नळदुर्ग पोलीस ठाण्यात कर्तव्यावर हजर झाले आहेत. कोरोना वर मात करुण आल्याबद्दल अणदूर येथे अक्षय घुगे यांच्या हस्ते सत्कार करण्यात आला. त्याचबरोबर कोरोना महामारीच्या काळात प्रत्येक रुग्णास ख-या अर्थाने सेवा देणारे डॉ. प्रशांत झंगे यांचाही यावेळी सत्कार करण्यात आला. याप्रसंगी अनिकेत मोहराळे, गौरव घुगे, दिपक कार्ले आदिजण उपस्थित होते.